நாளைய வெற்றிக்காக இளைஞரை தயார் செய்வதே புதிய கல்வித் திட்டத்தின் இலக்கு

இன்றைய பாடசாலைக் கல்வியில் இனங்காணப்பட்ட குறைபாடுகளைத் திருத்தும் நோக்கில் புதிய கல்வித் திட்ட மறுசீரமைப்பு 2005 ஆம் ஆண்டு முதல் நடைமுறைப்படுத்தப்பட்டு வருகிறது. மகரகமவில் அமைந்திருக்கும் தேசிய கல்வி நிறுவகம் புதிய கல்வித்திட்ட மறுசீரமைப்புக்கான வடிவமைப்பை உருவாக்கி, அதை அமுலாக்கும் முயற்சியை மேற்கொண்டுள்ளது.

இது வரையில் நடைமுறையிலிருந்த கல்வி அமைப்பானது தெரிந்த விடயங்களை மெருகூட்டுவதிலும் ஏற்கனவே முடிவு செய்தவற்றைக் கற்பதிலும் இருக்கும் விடயங்களை மீண்டும் அதே அடிப்படையில் கட்டியெழுப்புவதிலுமே கல்வியாளர்களை ஈடுபடுத்தியது.

இந்நிலையை மாற்றியமைத்து, தெரிந்தவற்றை மாற்ற முயற்சித்தும், புதியனவற்றைக் கண்டறிந்தும், எதிர்காலத்திற்குத் தேவையானவற்றை உருவாக்கியும் நாளைய வெற்றிக்காகத் தயார் நிலையில் இருக்கக்கூடிய மாணவர் கூட்டத்தை உருவாக்குவதையே அடிப்படை நோக்காகக் கொண்டு மறு சீரமைப்புத் திட்டம் தயாரிக்கப்பட்டுள்ளது.

இதன் விளைவாக வகுப்பறையில் ஆசிரியரின் பாகமும் மாணவரின் பாகமும் புரட்சிகரமான முறையில் மாற்றத்திற்குள்ளாகவேண்டியுள்ளது. ஆசிரியரிடமிருந்து அறிவு வெறுமனே கடத்தப்பட்டு மாணவரிடம் படிப்பதற்குப் பதிலாக, மாணவர் மைய, தேர்ச்சிக்கமைய செயற்பாடுகளை அடிப்படையாகக் கொண்ட முறைமை புகுத்தப்பட்டுள்ளது.

இதன் காரணமாக, வகுப்பில் கற்கும் ஒவ்வொரு மாணவனதும் மாணவியினதும் சிந்தனைத்திறன்கள், சமூகத்திறன்கள், தனிப்பட்ட திறன்கள், அறிவைத் தேடியறியும் திறன்கள் என்பவற்றை விருத்தி செய்யும் பெரும் பொறுப்பை ஆசிரியர் தம் தோளின் மீது சுமக்கத் தயாராக வேண்டிய கட்டுப்பாடு ஏற்படுத்தப்பட்டுள்ளது.

புதிய வகையில் சிந்திப்பதற்கும் நாளாந்த அனுபவங்களூடாக ஆழ்ந்து அறிவைப் பெற்றுக்கொள்வதற்கும், பகுப்பாய்வுத் திறன்களை வெளிக்கொணர்வதற்கும் மாணவர்களுக்கு வாய்ப்பளித்து, சரியாகத் தீர்மானங்கொடுக்கக் கூடிய, பிரச்சினைகளைத் தீர்க்கக் கூடிய புதியதொரு சமுதாயத்தை எதிர்காலத்தில் உருவாக்குவதில் ஆசிரியரின் அர்ப்பணிப்பு மிகுந்த பணி எதிர்பார்க்கப்படுகிறது.

கல்வியினால் மூளையை மட்டும் போஷிக்கும் முன்னைய முறையை மாற்றி, உள்ளத்தையும் போஷித்து நல்ல மனப்பாங்குள்ள பிரஜைகளை உருவாக்குவதே புதிய கல்வித் திட்டத்தின் அடிப்படை நோக்கமாகும்.

புத்தறிவைப் பெறுவதற்கு ஆசிரியரையே நம்பியிருக்கும் நிலை நாளைய உலகில் சாத்தியப்படாது என்பதனால் அறிவு துரிதமாகப் பெருகிச் செல்லும் தற்போதைய நிலையைக் கருத்தில் கொண்டு புதிய கல்வி மறுசீரமைப்பின் அம்சங்கள் திட்டமிட்டுள்ளன.

வகுப்பில் மாணவரால் முன்னெடுக்கப்படவுள்ள குழு நிலைச் செயற்பாடுகளால் அவர்களின் சகபாடிகள் தொடர்பாகக் கவனம் செலுத்துவதற்கும் அவர்கள் கூறுபவற்றைப் பரிவுணர்வுடன் செவி மடுப்பதற்கும் அவர்களுடன் பகிர்ந்து பரிமாறிக் கொள்வதற்கும் பல்வேறு வாய்ப்புக்கள் கிடைக்கும். சிறு குழு நிலையில் தேடிப்பெறும் அறிவை வகுப்பில் ஏனையோருடன் பகிர்ந்து பரிமாறியவாறே எதிர்காலத்தில் உருவாக்கத்தக்க பிரச்சினைகளைத் தைரியமாக எதிர்கொண்டு வெற்றி கொள்வதற்கு மாணவர்கள் தயாராவர்.

சகலவற்றையும் ஆசிரியரிடமே கேட்டுத் தெரிந்து கொள்வதற்குப் பதிலாக வாசித்தும், கலந்துரையாடியும் அவதானிப்புகளில் ஈடுபட்டும் தாமாகவே செயல்களில் ஈடுபட்டும் ஆழ் சிந்தனையூடாகப் புத்தறிவைத் தேடிப் பெறப் பழகும் மாணவர்கள், தொடர்பாடல் திறன்களையும் தம்மிடையே வளர்த்துக்கொள்வர்.

குழு முறைச் செயற்பாடுகளில் மாணவர்கள் ஈடுபடுவதால் ஏனையோரின் கருத்துக்களைச் சகிப்புத்தன்மையுடன் அங்கீகரிக்கப் பழகுவதோடு, சிறு சிறு விடயங்களுக்குக் கூடப் பொறுமையிழந்து சினக்கும் பழக்கத்தை ஒதுக்கித் தள்ளி, நேர¨த்தை வீணடிக்கும் வெட்டிப் பேச்சுக்களைத் தவிர்த்து, அந்நேரத்தைச் சுய மேம்பாட்டுக்காகப் பயன்படுத்தி பணிகளின் விளைதிறனுக்காகத் திட்டமிட்டுச் செயற்படுவர். நல்ல ஆற்றல்களை வளர்த்துக்கொள்வர். புதிய வேலைகளைத் தாமாகவே தொடங்குவதற்கும் ஏனையோர் அறிமுகம் செய்யும் விளைதிறனுடைய மாற்றங்களுக்கு ஒத்துழைப்பு வழங்குவதற்கும் பழகிக் கொள்வர்.

அவர்கள் சுய விளக்கத்தை வெளிக்காட்டுவதோடு பொருத்தமான முறையில் இடர்களை எதிர்கொண்டு முற்சியாண்மைத் திறன்களையும் விருத்திசெய்து கொள்வர். இப்புதிய முறையியலுக்கூடாகப் பொறுப்புகளை வகிப்பதற்கும் வகை சொல்வதற்கும் மாணவர்களுக்குக் கிடைக்கும் வாய்ப்பானது வெற்றியளிக்கும் வகையில் கற்றல் கற்பித்தல் முறைமையை நெறிப்படுத்தும் ஆசிரியர், தேசிய நற்பணிகளில் அர்ப்பணிப்புடன் செயற்படத்தக்க சுய கட்டுப்பாடுடைய புதியதொரு சந்ததியை உருவாக்குவதில் பங்களிப்புச் செய்தவாறு தமது வாண்மைத் திருப்தியையும் மேம்படுத்திக்கொள்வர்.

புரட்சிகரமான புதிய கல்வித்திட்டத்தின் முன் மிகவும் சவாலாக அமைவது, க. பொ. த. (உயர்தர) கலைப்பிரிவு மாணவர்களிடையே தொழில்நுட்பப் பாடங்களை அறிமுகஞ் செய்தலாகும்.

எமது அன்றாட வாழ்வோடு பின்னிப்பிணைந்து கணத்திற்குக் கணம் புதியனவற்றைத் தோற்றுவித்துக் கொண்டிருக்கும் தொழில்நுட்பமானது உணவு உற்பத்தி, வைத்திய தேவைகள், உற்பத்திப் பொருட்கள், சக்தி வளங்கள், எண்ணங்கள் தொடர்பாடல் போக்குவரத்து போன்ற அனைத்துத் துறைகளிலும் ஊடுருவி மாற்றங்களை ஏற்படுத்தி வருவதால் தொழில் நுட்பம் சம்பந்தப்பட்ட கல்வியை அனைவரும் ஓரளவுக்காயினும் கற்றிருப்பது அத்தியாவசியமானது. தொழில்நுட்பக் கல்வியின் அடிப்படையானது உள்Zடுகள், மூலவளங்கள், செய்முறைகள், வெளிப்பாடுகள், பின்னூட்டல் மற்றும் கட்டுப்படுத்தல் போன்றவற்றில் தங்கியுள்ளது. பிரயோகம் இல்லாத தொழிற்நுட்பக் கல்வியினால் சமுகத்திற்கு எப்பயனும் விளையாது.

(தொடரும்....)

(சா.சக்திதாசன் பட்டயஇயந்திரப் பொறியியலாளர் (செயற்றிட்ட அதிகாரி)  தொழில் நுட்பக்கல்வித்துறை தேசிய கல்வி நிறுவகம் மகரகம.)