நிர்ப்பந்தம் காரணமாக கூட்டமைப்பு புலிகளின் குரலாக செயற்பட்டது

கேள்வி: உள்ளூராட்சி தேர்தலில் அரசாங்கத்தின் வெற்றி வாய்ப்புக்கள் எவ்வாறு இருக்கின்றன?

பதில்: உள்ளூராட்சித் தேர்தலில் அரசின் வெற்றி வாய்ப்புக்கள் மிக நம்பிக்கைக்குரியதாக அமைந்துள்ளன. இதற்குப் பல காரணங்களைக் கூறலாம். நாட்டின் செழிப்பும் முன்னேற்றமும் கிராமங்களின் அபிவிருத்தியிலேயே தான் தங்கியிருக்கின்றது என்பது அரசின் நிலைப்பாடு.

இத்தகைய கொள்கை மிகவும் சரியானது என்பதை மக்கள் நன்றாக உணர்ந்திருக்கின்றார்கள். கிராமிய அபிவிருத்தியை சிறப்படையச் செய்ய தேவையான மானியங்களையும் தொழிலுக்கான உபகரணங்களையும் வழங்கிவரும் அரசு அமைச்சுக்கள் மூலமாக தொழில் சார்ந்த வழிகாட்டல்களையும் ஊக்குவிப்புக்களையும் அளித்து வருகின்றது. இதனால் கிராமிய மக்கள் அரசை நம்புகின்றார்கள்.

அரசுக்கு ஆதரவளிக்கிறார்கள். கிராமிய மக்கள் அபிவிருத்தியின் பால் இட்டுச் செல்லாமல் அத்தியாவசிய உணவுப் பொருள் உட்பட அனைத்துத் தேவைகளையும் வெளிநாட்டில் இருந்து இறக்குமதி செய்யும் ஐ.தே. கவின் திறந்த பொருளாதாரக் கொள்கை பொருத்தமற்றது என்பதை நாட்டு மக்கள் உணர்ந்துவிட்டனர்.

முப்பத்தாண்டு காலம் பீதியில் வாழ்ந்த மக்கள் நிம்மதி பெருமூச்சுவிட்டு சுதந்திரக் காற்றைச் சுவாசிக்கச் செய்தவர் நமது ஜனாதிபதி அதனால் ஜனாதிபதி மீது மக்கள் வைத்திருக்கும் நம்பிக்கை பெருமதிப்பு காரணமாக ஜனாதிபதித் தேர்தலிலும் அமோக வெற்றி கிடைத்தது. பாராளுமன்றத் தேர்தலிலும் அவ்வாறே அரசுக்குப் பாரிய வெற்றிக் கிடைத்தது.

அதுபோல மாகாண சபைத் தேர்தலிலும் கிடைத்தது. உள்ளூராட்சித் தேர்தலிலும் பெரு வெற்றி கிடைக்கும் என உறுதியாகக் கூறலாம். அத்தோடு பிரதான எதிர்க்கட்சியான ஐ.தே.க வுக்குள்ளே பாரிய கருத்து வேறுபாடு ஏற்பட்டு கட்சி உறுப்பினர்கள் கோஷ்டிகளாக பிரிந்து கிடக்கின்றனர். நலிவடைந்த இந்தக் கட்சிக்கு மக்கள் எப்படி வாக்களிப்பார்கள்? எதிர்க் கட்சிக் குழப்பங்களும் ஆளும் கட்சி வெற்றி வாய்ப்புக்கு சாதகமாகவுள்ளது.

கேள்வி: மட்டக்களப்பு மாவட்டத்தில் தேர்தல் நடவடிக்கைகள் எவ்வாறு இடம்பெறுகின்றன?

பதில்: இந்த மாவட்டத்தில் காத்தான்குடி நகரசபை ஏறாவூர் நகர சபை, ஓட்டமாவடி பிரதேச சபை ஆகியவற்றில் தேர்தல் இடம்பெறுகின்றது. ஆளும் கட்சியைப் பொறுத்தவரையில் வேட்பாளர் பட்டியலில் எமது கட்சியான அகில இலங்கை முஸ்லிம் காங்கிரஸ் அதாவுல்லா தலைமையிலான தேசிய காங்கிரஸ் மற்றும் ஸ்ரீலங்கா சுதந்திரக் கட்சி ஆகியவற்றைச் சேர்ந்த வேட்பாளர்கள் இடம்பெறுகின்றனர்.

 இருந்தபோதும் கருத்து வேற்றுமைகளைப் பொருட்படுத்தாது புரிந்துணர்வுடன் நாம் தேர்தல் பிரசாரப் பணிகளில் ஈடுபடுகின்றோம். இந்த மூன்று சபைகளிலும் ஆளும் கட்சியே அமோக வெற்றிபெறும் என்ற நம்பிக்கை எமக்கு உண்டு.

கேள்வி: மட்டக்களப்பு மாவட்டத்தில் ஏற்பட்ட வெள்ள அழிவுகள் தொடர்பாக சற்று விபரிப்பீர்களா?

பதில்: இந்த மாவட்ட வெள்ள அழிவு ஒரு சுனாமி அழிவு போன்றதே. வெள்ளப் பெருக்கினால் இப்பகுதியின் உட்கட்டமைப்பு வசதிகள் அனைத்தும் அழிந்துள்ளன. பாதைகள், பாலங்கள் அள்ளிச் செல்லப்பட்டுள்ளன. மக்களின் வீடுகள் இருந்த இடம் தெரியாமல் கொண்டு செல்லப்பட்டுள்ளன. மக்களது வாழ்க்கைப் பாதிப்பு வார்த்தைகளால் வர்ணிக்க முடியாது.

இந்த அழிவினால் சுமார் 100 குளங்கள் உடைப்பெடுத்துள்ளன. ஆயிரக்கணக்கான ஏக்கர் வயல் நிலங்களில் வேளாண்மையே இல்லை. மதிப்பீட்டின் படி 2 இலட்சத்து 30 ஆயிரம் மெற்றிக் தொன் நெல் நாசமாகியுள்ளது. இதன் பெறுமதி சுமார் 860 பில்லியன் என மதிப்பிடப்பட்டுள்ளது. இத்தகைய அழிவைத் துரிதமாக ஈடுசெய்ய ஜனாதிபதியின் பணிப்புரைக்கிணங்க விசேட நடவடிக்கைகள் எடுக்கப்பட்டு வருகின்றன. குளங்களைப் புனரமைக்கவும் கால்வாய்களைத் திருத்தவும் தெருக்கள் பாலங்களை அமைக்கவும் துரிதமாக வேலைத் திட்டங்கள் நடைமுறைப்படுத்தப்படுகின்றன.

மக்கள் இழந்த வீடுகளை மீளக் கட்டிக் கொடுக்கவும் நடவடிக்கைகளை அரசு மேற்கொண்டு வருகின்றது. மக்கள் அங்கு சுயதொழிலை மீண்டும் ஆரம்பிக்க ஆக்கமும் ஊக்கமும் அளிக்கப்படுகின்றது. கூடிய விரைவில் மக்கள் இதன் பயனை அனுபவிப்பர் என்று எண்ணலாம்.

கேள்வி: யுத்தக் குற்றம் சாட்டப்படுகின்றதே?

பதில்: யுத்தக் குற்றச்சாட்டு என்பது பழிவாங்கும் எண்ணத்தின் வெளிப்பாடு என்றே கூறலாம். கடந்த 3 தசாப்தங்களிலும் தமிbழம் மலரும் என்று கனவு கண்டவர்கள் பலரே. இந்த ஜனாதிபதியின் ஆட்சிக்கு முற்பட்ட காலத்தில் எந்த அரசும் இனப்பிரச்சினையைத் தீர்க்க உருப்படியான நடவடிக்கை எடுக்கவில்லை. பயங்கரவாதத்தை ஒழிக்கும் திராணியும் அவர்களுக்கு இருக்கவில்லை. தமிbழத்துக்கான சக்திகள் வலுப்பெற புலம்பெயர் தமிழ் சமூகம் உதவி செய்ததுமல்லாமல் தமிbழம் கிடைக்கும் என்றே எதிர்பார்த்தனர்.

இவ்வாறு அரசுக்கெதிரான உள்நாட்டு, வெளிநாட்டு சக்திகளின் எதிர்பார்ப்புக்களுக்கு மாறாக யுத்தம் முடிவுக்கு கொண்டுவரப்பட்டது. பயங்கரவாதத்தை ஒழித்து நாட்டில் சமாதானத்தை ஏற்படுத்திய நற்பெயர் மஹிந்தவுக்கு ஏற்பட்டுவிட்டதே என்ற காழ்ப்புணர்வும் இத்தகைய யுத்தக் குற்றச் சாட்டுகளுக்கு காரணமாகும். யுத்தத்தின் இறுதிக் கட்டத்தில் அங்கிருந்த பொதுமக்கள் வெளியேற அனுமதிக்கப்பட்டிருந்தால் அசம்பாவிதங்கள் ஏற்பட்டிருக்க மாட்டாது.

மனித உரிமை மீறல் பற்றிப் பேசுவதற்கு பிரிட்டன் போன்ற நாடுகளுக்கு அருகதை இல்லை. வியாபாரத்துக்கு வந்த பிரித்தானியர் இலங்கையின் கரையோரப் பிரதேசங்களை முதலிலும் பின்னர் கண்டியையும் கைப்பற்றியபோது நடைபெற்ற போரிலே தேசாபிமானமிக்க சுதேசிகள் கொல்லப்படவில்லையா? அது மனித உரிமை மீறல் இல்லையா? கடந்த காலங்களில் அரசியல் வாதிகளாகவும் தலைவர்களாகவும் இருந்து பணிபுரிந்த பலர் கொல்லப்பட்டமை மனித உரிமை மீறல் இல்லையா?

வடபுலத்திலுள்ள 75 ஆயிரத்துக்கு மேற்பட்ட முஸ்லிம் குடும்பங்கள் ஓரிரு நாளில் விரட்டியடிக்கப்பட்டமை மனித உரிமை மீறல் இல்லையா? உலக நாடுகள் பலவற்றிலே போரினாலும் அதிகாரப் போட்டியாலும் எத்தனை உயிர்கள் மடிகின்றன. அவைகள் ஐ.நாவுக்கும் சர்வதேச சமூகத்துக்கும் ஏன் தெரியவில்லை? இலங்கை விஷயம் தானா அவர்களின் கண்ணில் புலப்படுகின்றது. காழ்ப்புணர்வு காரணமான இந்தச் சேறுபூசும் நடவடிக்கை பொருத்தமற்றது என்பதே வெளிப்படையான உண்மை.

கேள்வி: தமிழ்த் தேசியக் கூட்டமைப்பின் அரசியல் நிலைப்பாடு தொடர்பாக நீங்கள் என்ன கருதுகின்aர்கள்?

பதில்: கூட்டமைப்பு தமிழ் மக்களின் நலனுக்காக அவர்களின் உரிமை, அபிலாஷைகளுக்காக ஜனநாயக வழியில் குரல் கொடுத்து வந்தது. புலிகளின் ஆதிக்கம் வலுப்பெற்ற காலகட்டத்திலே கூட்டமைப்பினர் தமது சொந்தக் கருத்துக்களை வெளியிட முடியாத கட்டுப்பாடு இருந்தது. புலிகளின் குரலாக ஒலிக்க வேண்டிய நிர்ப்பந்தம் ஏற்பட்டது.

இன்று புலிகள் ஒழிந்த நிலையில் கூட்டமைப்பினர் சாதுரியமாக தமது கோரிக்கைகளைப் பெற முயற்சிக்க வேண்டும். அதற்காக அரசின் நல்லெண்ணத்தோடு காரியங்களை நிறைவேற்ற முயலவேண்டுமே தவிர அரசுக்கு எதிரான விமர்சனங்களை வெளியிட்டும் மேடைகளில் பேசியும் நிலைமையைக் குழப்பிக் கொள்ளக்கூடாது. அரசியல் ரீதியான பிரச்சினைகள் தமிழ் மக்களுக்கும் உண்டு. முஸ்லிம் மக்களுக்கும் உண்டு. முஸ்லிம் காங்கிரஸ் அரசுடன் சேர்ந்திருந்தபோதும் முஸ்லிம் காங்கிரஸ¤ம் கூட்டமைப்பும் பிரச்சினைகளை அரசுடன் பேசி தீர்வு காணவேண்டுமே தவிர மனம்போன போக்கில் விமர்சனம் செய்வதால் நன்மை ஏற்படப்போவதில்லை.

சுஐப் எம். காசிம்