மீனவர் பிரச்சினையில் அரசியல்,  தமிழக தலைவர்கள் தேர்தல் சித்து

(விசு கருணாநிதி)

இலங்கை தமிழர் பிரச்சினையை மையமாக வைத்து அரசியல் லாபம் தேடிக்கொண்டதில் தமிழ்நாட்டு அரசியல்வாதிகள்தான் காலத்திற்குக் காலம் முன்னணி வகிக்கின்றனர். தமிழகத்தில் சட்ட சபைத் தேர்தல் நடைபெறும் காலத்தில் பிரசாரம் செய்வதற்கு இலங்கைத் தமிழர் பிரச்சினையே அவர்களுக்குக் கைகொடுத்து வருகிறது. தி.மு.க, அ.தி.மு.க. என இரு பிரதான அரசியல் கட்சிகளும் இலங்கைத் தமிழர் பிரச்சினை என்ற அஸ்திரத்தைக் கையில் எடுத்தே தமது அரசியல் காய்நகர்த்தலை முன்னெடுத்து வருகின்றன. இதில் தமிழக முதலமைச்சர் கலைஞர் மு.கருணாநிதி கைதேர்ந்தவராகத் திகழ்கிறார். இப்போது அவரது மகள் கனிமொழி அப்பாவின் வழியில் தப்பாமல் இலங்கைப் பிரச்சினையைக் கையில் எடுத்துப் பிரசாரம் செய்வதில் தனது திறமையை வெளிப்படுத்தி வருகிறார்.

தற்போது இலங்கையில் யுத்தம் நிறைவடைந்துள்ள நிலையில் தமிழ்நாட்டு அரசியல்வாதிகள் மீனவர் பிரச்சினையைத் தூக்கிப்பிடிக்கத் தொடங்கியுள்ளனர். தமிழகத்தில் சட்ட சபைத் தேர்தல் நெருங்கி வரும் வேளையில் மீனவர்கள்பற்றிக் கூடுதல் கரிசனையுடன் செயற்படுகின்றனர்.

தமிழக-இலங்கை மீனவர்கள் எல்லை மீறுவது இன்று நேற்றல்ல என்பது இரு நாட்டு மக்களுக்கும் நன்கு தெரிந்த விடயம். மீனவர்கள் கைதுசெய்யப்படுவதும் பின் விடுதலைசெய்யப்படுவதும் தொடராக இடம்பெற்று வந்திருக்கிறது. ஆனால், சில தினங்களுக்கு முன்னர் யாழ்ப் பாணத்தில் தமிழக மீனவர்கள் கைது செய்யப்பட்டதும் ஆர்ப்பாட்டங்களை நடத்தி தேர்தல் பிரசாரத்தை அமர்க்களப்படுத்தியிருக்கிறார் கனிமொழி கருணாநிதி.

மீனவர் பிரச்சினையை ஆர்ப்பாட்டங்கள் மூலம் தீர்க்க முடியாது என்பதை அறியாதவரல்ல கனிமொழி. மீனவர்களின் வாழ்வாதாரப் பிரச்சினையைத் தீர்க்க முடியாமல் ஆர்ப்பாட்டம் நடத்தி அவாகள்மீது கருணைகாட்டுவதாகக் காண்பிப்பது தமிழக அரசியல்வாதிகளின் கையாலாகத் தனம் என்பதே உண்மை.

கடந்த மூன்று தசாப்த காலமாக யாழ்ப்பாண மீனவர்கள் தமது தொழிலைச் சரியாகச் செய்ய முடியாமல் திண்டாட்ட வாழ்வுக்குள் மூழ்கியிருந்ததைத் தமிழகம் நன்கு அறியும். அந்த நிலையை உணர்ந்ததால்தான் ஈழத்தமிழர்கள் அவல வாழ்வு வாழ்ந்துகொண்டிருக்கிறார்கள் என அப்போது தமிழகத்தில் குரல் எழுப்பினார்கள்.

புலிகள் இயக்கத்தின் நெருக்குவாரங்கள், கடலில் மீன்பிடிப்பதற்கு விதிக்கப்பட்டிருந்த தடை, கட்டுப்பாடுகள் காரணமாகவும் யாழ் மீனவர்கள் தமது வாழ்வாதாரத்தைத் தொலைத்திருந்தனர். தற்போது யுத்தம் நிறைவடைந்துள்ள நிலையில் யாழ் மீனவர்கள் தொலைந்த தம் வாழ்வைத்தேடி சுதந்திரமாகக் கடற்றொழிலுக்குச் செல்கிறார்கள். இதில் மண்ணள்ளி போடும் வகையில் தமிழகத்திலிருந்தும் கேரளாவிலிருந்தும் அத்துமீறி வரும் மீனவர்கள் யாழ் கடற்பரப்பில் உள்ள வளங்களைச் சிதைத்து வருகிறார்கள்.

தமிழகக் கடற்பரப்பில் இழுவைப்படகுகளைப் பயன்படுத்தி மீன்பிடித்ததன் மூலம் இன்று பிழைப்பு நடத்த முடியாமல் தமிழகக் கடல் வளம் திq=!கிப்போன நிலையில் அவர்கள் அதே இழுவைப் படகுகளைப் பயன்படுத்தி யாழ் குடாநாட்டின் கடல் வளத்தையும் சிதைக்கும் முயற்சியில் ஈடுபட்டுள்ளனர். அதுமட்டுமன்றி இழுவைப்படகுகள் மூலம் எமது கடற்றொழிலாளர்களின் வலைகள் உட்பட மீன்பிடி உபகரணங்க ளையும் அழித்துச் செல்கின்றனர். கடந்த முப்பது வருடகாலமாக இலங்கையின் வட கடற்பரப்பில் மீன்பிடித்துறை மட்டுப்படுத்தப்பட்டிருந்ததால் அங்கு மீன்வளம் பெருகியிருக்கின்றது.

எனவேதான் தமிழக மீனவர்கள் இங்கு அத்துமீறி மீன்பிடிக்க வருகின்றனர் என்பது யாழ் மீனவர்களின் குற்றச்சாட்டாக இருக்கிறது. இவ்வாறு இலங்கை மீனவர்களின் யதார்த்த வாழ்க்கையைப் புரிந்துகொள்ளாமல் தமிழகத்தில் செயற்படும் அரசியல்வாதிகள் வரிசையில் தற்போது கனிமொழி களமிறங்கியிருப்பது தேர்தல் பிரசாரத்திற்கு மட்டும் அல்ல என்பதும் நன்கறிந்த விடயமே. இலங்கையில் தமிழர் பிரச்சினை யைத் தீர்ப்பதற்கான ஒரு மா¡க்கத்தையோ வழிமுறைகளையோ அறிந்திராதவர்காளாக செயல்பட்ட தமிழ்நாட்டு அரசியல்வாதிகள், மீனவர் பிரச்சினையிலும் மூக்கை நுழைத்து வருகிறார்கள்.

கனிமொழியைப் பொறுத்தவரை, அவர் தேர்தல் பிரசாரத்தை மாத்திரம் கருத்திற்கொண்டு மீனவர் பிரச்சினையைப் பார்க்கவில்லை. தற்போது இந்தியாவில் தேசிய ரீதியாக அவருக்கு ஏற்பட்டுள்ள நெருக்கடியை வேறுபக்கமாகத் திசைதிருப்பும் ஒரு களமாகவும் வட பகுதி கடற்பரப்பை அவர் பயன்படுத்துகிறார் என்பதில் சந்தேகமில்லை.

இதேசமயம், தமிழகத்தின் முன்னாள் முதல்வர் ஜெயலலிதாவும் தேர்தல் பிரசாரம் கருதி மீனவர் பிரச்சினையை முன்னிலைப்படுத்தியிருக்கிறார். இலங்கை அரசாங்கத்திற்கு நேரடியாக எச்சரிக்க வேண்டும் என்று அவர் தெரிவித்தருப்ப தானது, ஏனையவர்களைவிடத் தாம் இந்த விடயத்தில் முதன்மை வகிக்க வேண்டும் என்பதில் ஜெயலலிதாக குறியாக இருக்கிறார்.

தமிழக முதலமைச்சர் மீனவர் பிரச்சினை குறித்து நடவடிக்கை எடுக்கிறார் இல்லை என்று ஜெயலலிதா தற்போது குற்றச்சாட்டை முன்வைத்தாலும், இலங்கைத் தமிழ் அகதிகளுக்கு உதவிகளைச் செய்வதற்குக்கூட நடவடிக்கை எடுக்க வில்லை. அப்போது இலங்கைத் தமிழ் மக்களுக்கு எதிரான நிலைப்பாட்டைக் கொண்டிருந்த ஜெயலலிதா, தற்போது தேர்தல் நோக்கத்திற்காக மீனவர்கள் மீது இரக்கம் கொண்டவராகக் காண்பிப்பது ஓர் அரசியல் கபடத்தனம் என்பதில் சந்தேகம் இல்லை.