பொழுதுபோக்கு நட்பையும் உறவையும் வளர்க்கும்

எப்போ பாடசாலை மணி அடிக்கும், ஓடியாடி விளையாடலாம் என மணி மேல் விழிவைத்துக் காத்துக் கிடந்த பால்ய காலம் ஞாபகம் இருக்கிறதா? அதன் பின் படிப்பு, வேலை என வாழ்க்கை யின் அடுத்தடுத்த கட்டங்களுக்கு தாவியபோது நழுவிப் போன ஒரு விடயம்தான் பொழுது போக்கு. பொழுது போக்கு என்றால் இயல்பாகவே ஒரு சின்ன உற்சாகம் மனதுக்குள் ஓட வேண்டும். சிலரோ ‘அதற்கெல்லாம் ஏது நேரம். வேலையைப் பார்க்கவே நேரம் இல்லை’ என சலித்துக் கொள்வார்கள். ஒருவேளை நீங்களே கூட அப்படி புலம்பும் பார்ட்டியாய் இருக்கலாம். பொழுது போக்கு என்றாலே ஏதோ மிச்ச மீதி இருக்கும் நேரத்தைச் செலவிடும் வெட்டி விடயம் என்று தான் பலரும் நினைக்கிறார்கள். அப்படியல்ல. அதுவும் நமது வாழ்வின் ஒரு பாகமே.

நமது அலுவலக வேலை நமது பொருளாதாரத் தேவைக்கான ஓட்டம். பொழுது போக்கு நாம் இழந்த விருப்பங்களுக்கான ஓட்டம்! ‘இதில் என்ன இருக்கின்றது’ என சலிப்படை பவர்கள் ஒரு தனி ரகம். அவர்கள் வாழ்க்கையில் எல்லாவற்றையும் பொருளாதார அளவை கொண்டு அளப்பவர்கள். வாழ்க்கை அதைத் தாண்டியும் உள்ளது. உற்சாகம், இனிமை, ஆனந்தம் நேர் சிந்தனை எல்லாவற்றின் கூட்டுத்தொகைதான் வாழ்க்கை. நமக்கு என்ன பிடிக்குமோ, அதுவேதான் வேலையாகவும் இருந்தால் பொழுது போக்கே தேவையில்லை. ஆனால் நமக்கு அப்படியா அமைகிறது?

பெரும்பாலும் நமக்கு அமையும் வேலை நம் மனதுக்குப் பிடித்ததாக அமைவதில்லை. வெகு சிலருக்கு மட்டுமே விதிவிலக்கு! “ஊரில் விவசாயம் செய்வதுதான் எனக்கு பிடித்திருக்கிறது. என பிடிவாதமாய் வாழும் மனிதர்கள் உண்டு. ஹரிபொட்டர் நாவல் புகழ் ஜே.கே. ரவுலிங் எழுத்து மீது சின்ன வயதிலேயே அதீத காதல் உடையவர். அவ ருக்கு இப்போது எழுத்தே வாழ்க்கையாகிவிட்டது. வெகு சிலருக்கே இப்படிப்பட்ட வாழ்க்கை அமைகிறது!

இன்றைக்கு வாழ்க்கையில் எல்லாமே அவசரம். இதனால் அலுவல் வேலை நேரமும் சகட்டு மேனிக்கு உயர்ந்து விட்டது. அதிலும் குறிப்பாக மென்பொருள் போன்ற துறையில் வேலை பார்ப்பவர்கள் இரவு, பகல் என உழைக்க வேண்டிய கட்டாயம். இதனால் பலரும் மன அழுத்தம் எனும் கொடிய நிலைக்குத் தள்ளப்படுகிறார்கள்.

மன அழுத்தத்தைப் பற்றித் தெரிந்து கொள்ள விரும்பினால் ஏதேனும் ஒரு டாக்டரிடம் கேட்டுப் பாருங்கள். பட்டியல் போட்டு அதன் பிரச்சினைகளைச் சொல்வார்கள். மன அழுத்தம் மனதைப் பாதித்து மனதின் நிம்மதியைக் குலைத்து, அமைதியைச் சிதைத்து ஏகப்பட்ட மனப் பதற்றத்தை தரும். அந்த மன மாறுதல்கள் அப்படியே உடலுக்கும் பரவி ஏகப்பட்ட நோய்களையும் தந்து செல்லும்.

மன அழுத்தத்தை விரட்ட ஓர் எளிய வழி நல்லதொரு பொழுது போக்கை கொண்டிருப்பது தான் என்கின்றனர் மருத்தவர்கள். பொழுது போக்கிற்காய் செலவிடும் கொஞ்சம் நேரமே போதுமாம் வேலை அழுத்தத்தைக் குறைத்து மனதைச் சமநிலைப்படுத்த!

மடோனா தனது மன அழுத்தத்தைக் குறைக்க எழுதுவதை வழக்கமாக்கிக் கொண்டிருந்தார். பிறகு அந்த பொழுது போக்கில் அவருடைய ஈடுபாடு அதிகமாகிப் போய் விட்டது. குழந்தைகளுக்கான பல புத்தகங்களை அவர் பிற்காலத்தில் வெளியிட்டார் என்பது சுவாரசியத் தகவல்!

பொழுது போக்கில் மிக ஆர்வமாய் ஈடுபடும் பலர் பிற்காலத்தில் அதையே முதன்மைத் தொழிலாக ஆக்கிக் கொள்வதுண்டு. இல்லாவிட்டால் அதன் மூலம் தங்கள் வேலையை வெற்றிகரமாய் மாற்றுவதும் உண்டு.

ஹொலிவுட் இயக்குனர் ஸ்பீல்பெர்க் பற்றிக் கேள்விப்பட்டிருப்பீர்கள். ஜுரசிக் பார்க் இயக்குனர். அவருடைய பொழுது போக்கு ஏலியன்ஸ் அதாவது வேற்றுக்கிரகவாசிகளைப் பற்றி தேடித்தேடி வாசிப்பது. அந்தப் பொழுது போக்கு அவருக்கு மிகவும் கை கொடுத்தது. ஏலியன் படங்களை எடுத்து உலகப் புகழையும் பெற்றார்.

பணிகள் பெரும்பாலும் நமக்கு வெளியேயான விடயங்களைத் தேடி ஓடுவதில்தான் இருக்கும். படிப்பு, வேலை, கு¡ந்தைகள், பெற்றோர் இப்படி பொழுது போக்கு நம்மையே நாம் தேடிக் கொள்ளும் விடயம். நம்மைப் பற்றி, நம்முடைய திறமைகளைப் பற்றி, நமது இயல்புகளைப் பற்றி அறிந்து கொள்ளும் இடம் இது.

எதையேனும் செய்து முடிக்கும்போது, ‘அட! நானா இதைச் செய்தேன்’ என மனதை வருடும் இதமான ஒரு உணர்வு நமது உற்சாக நரம்புகளையெல்லாம் மீட்டி விடும். மீண்டும் மீண்டும் தொடர்ந்து செயல்பட அது ஊக்கம் தரும். நமக்காகக் கொஞ்ச நேரம் ஒதுக்காத வாழ்க்கை நமக்கான வாழ்க்கையா?

பலருக்கும் பொழுது போக்கு என்பது வேலையாகிப் போய் பின்னர் வாழ்க்கையே அதுவாகிப் போவதுண்டு. குறிப்பாக சமையல் கலையில் ஆர்வம் உடைய பலர் பிற்காலத்தில் மிகப்பெரிய உணவகங்கள் அமைத்திருக்கிறார்கள். பொம்மைகள் செய்வதில் ஆர்வமுடையவர்கள் பெரிய வர்த்தகர்கள் ஆகியிருக்கிறார்கள்.

ஏன்? பேஸ்புக்கை வடிவமைத்த மார்க் ஷ¤க்கர் பெர்க் கூட அதை பொழுது போக்காகத்தான் ஆரம்பித்தார். மென்பொருள் புரோகிரேமிங் செய்வது அவருடைய பொழுது போக்கு. அவர் உருவாக்கிய ‘ஷக்நெட்’ எனும் ‘செட்டிங்’ மென்பொருள் உண்மையில் இன்றைய பிரபல செட்டிங் மென்பொருட்களின் முன்னோடி.

கல்லூரிக்கான ஒரு சிறிய இணையத்தளமாக அவர் உருவாக்கிய பேஸ்புக் இன்று 80 கோடி பேர் பயன்படுத்தும் உலகின் மிகப்பெரிய சமூக வலைத்தளமாக விஸ்வரூபம் எடுத்திருக்கிறது! உலகின் மிக இளம் வயதுக் கோடீஸ்வரரான இவருக்கு வயது வெறும் 27 தான்! சொத்து சுமார் 90 ஆயிரம் கோடி ரூபாய்கள்! இப்போது சொல்லுங்கள் பொழுது போக்கு நல்லதாக, கெட்டதா?

பொழுது போக்கையெல்லாம் வயதான பிறகு பார்த்துக்கொள்ளலாம் என பலர் நினைப்பதுண்டு. ஆனால் சிறு வயதிலேயே ஒரு நல்ல பொழுது போக்கை உருவாக்கினால்தான் அது புதிய வயதில் கை கொடுக்கும். கதை எழுதுவது உங்கள் பொழுது போக்கு என வைத்துக் கொள்ளுங்கள். சின்ன வயதிலேயே அந்த கலையை ஆர்வமாய் தொடர்ந்தால் முதுமையில் அட்டகாசமாய் எழுதித் தள்ளலாம்.

இன்னும் சொல்லப் போனால் குழந்தைப் பருவத்திலேயே ஒரு பிடித்தமான பொழுது போக்கை கை வரப் பெற்றால் அந்த பொழுது போக்கு காலம் முழுதும் பயனளிக்கும். எனவேதான் ஒரு நல்ல பொழுது போக்கைப் பிடித்துக் கொள்ள குழந்தைகளை உற்சாகமூட்டுவது தேவையாகிறது.

பொழுது போக்கு நட்பையும் உறவையும் வளர்க்கும்! ஒரு பொழுது போக்கு இருந்தால், அதேபோன்ற பொழுது போக்குடைய பலருடன் நட்பு கொள்ளும் வாய்ப்பும் கிடைக்கிறது. இணையம் அந்த வசதியை மிக எளிமையாக்கியிருக்கிறது.

எழுதும் விருப்பம் உடையவர்களுக்கு இலவசமாய் கிடைக்கின்றன. புளொக் எனப்படும் வலைப்பூக்கள். பாட விருப்பம் உடையவர்களுக்கும், அல்பம் தயாரிக்கும் ஆர்வம் உடையவர்களுக்கும் யூடியூப் போன்ற வலைத்தளங்கள் களம் அமைத்துக் கொடுக்கின்றன. ஓவியம், சமையல் போன்ற கலைகள் பிடித்திருந்தால் பேஸ்புக் போன்ற சமூக வலைத்தளங்கள், குழுக்கள் வைத்து உங்களை ஊக்கமூட்டுகின்றன. இங்கெல்லாம் ஒத்த சிந்தனையுடைய நிறைய நண்பர்களின் அறிமுகம் கிடைக்கும்.

வெளி நபர் அறிமுகம் கிடைப்பது இருக் கட்டும், பல வேளைகளில் நமது குடும்பத்திலுள்ள நபர்களோடு இணைந்து நேரம் செலவிடவும், இனிமையாய் மாலை நேரங்களைப் பயனுள் ளதாக்கவும் கூட நமது பொழுது போக்குக்குக் கைகொடுக்கும். பொழுது போக்கு மூளைக்கு மிக நல்லது என்கின்றனர் மருத்தவர்கள். பொழுது போக்கு மூளையின் ஆனந்த அணுக்களைத் தூண்டி உற்சாகமூட்டுகிறது.

அதனால் உடலும், உள்ளமும் உற்சாகமடைகின்றன. வேலையின் சோர்வைக் கழுவிக்களையும் சக்தி பொழுது போக்கிற்கு உண்டு. நல்ல பொழுதுபோக்கு உங்கள் பொழுதுகளை ஆக்கும். உடலுக்கும், மன துக்கும் ஒரே சேர உற்சாகம் தரும்.