‘தாயகத்தின் தாய்’

‘ஒரு அடி கூட பின்வாங்காதே!’

1942 ஆகஸ்ட் 23ம் தேதி அந்த மகத்தான நகரின் மீது பாசிச சர்வாதிகாரி ஹிட்லரின் படைகள் முதல் குண்டைப் பிரயோகித்துத்தாக்குதல் தொடுத்த நாள். அந்த நாள் முதல், அந்த நகரை மட்டுமல்ல, அந்த நாட்டை மட்டுமல்ல, ஒட்டுமொத்த உலகின் மனிதகுலத்தையே பாசிசத்தின் பிடியிலிருந்து விடுதலை செய்த 1943 பிப்ரவரி 2ம் தேதி வரை போர்க்களத்தில் ஒலித்துக்கொண்டிருந்த குரல் இது. ‘ஸ்டாலின் கிராடு’ என்பதே வரலாற்றின் கதாநாயகனாக மாறிய அந்த மகத்தான நகரம். ‘சோவியத் சோசலிச குடியரசுகளின் ஒன்றியம்’ என்ற முழுப் பெயர் கொண்ட சோவியத் ஒன்றியத்தின் வீரஞ்செறிந்த செஞ்சேனையின் கைகளால், ஹிட்லரின் படைகள் மீள முடியாத இழப்பையும் அழிவையும் சந்தித்த மாநகரம் அது.

வெள்ளம் பாய்ந்தோடும் வோல்கா நதியை கிழக்கு எல்லையாகக் கொண்ட இந்த மாநகரின் இயற்பெயர் வோல்கா கிராடு. 200 நாட்கள் நடந்த, மனிதகுல வரலாறு இதுவரையிலும் கண்டிராத மிகப்பிரம்மாண்டமான-அதே நேரத்தில் தங்களது தாயகத்தையும், இப்பூவுலகையும் பாசிசத்தின் பிடியில் சிக்காமல் காக்கும் பொருட்டு மிகப்பெரும் அழிவையும் எதிர்கொண்டு நடந்த தேசபக்தப் போருக்குப் பிறகு, ஸ்டாலின் கிராடு என்று இயல்பாகவே மக்களாலேயே பெயரை மாற்றிக்கொண்டது, வோல்கா கிராடு.

மாவீரன் ஸ்டாலின் தலைமையில், உலகமே கண்டிராத அளவிற்கு மிகப்பெரும் தியாகத்தைச் செய்து, வீரத்தின் விளை நிலமாக விளங்கி நாஜிப்படைகளை வீழ்த்தியது; ஹிட்லரின் ராஜ்யத்திற்கு முடிவுரை எழுதியது ஸ்டாலின் கிராடு.

ஆஆஆ

1943 நவம்பர் 6ம் தேதி இரவு குடிமக்களுக்கு உரையாற்றினார் சோவியத் ஒன்றியத்தின் ஜனாதிபதி, தளபதி ஸ்டாலின்.

“தாயகத்தைக் காக்கும் போரில், கடினமான பாதையைக் கடந்து வந்திருக்கிறோம். 1941 அக்டோபர் 6ம் தேதி, நமது மகத்தான சோசலிசப் புரட்சியின் 24ம் ஆண்டைக் கொண்டாடும் போது, நமது எதிரிகள் லெனின் கிராடைச் சுற்றி வளைத்திருந்தார்கள்; 1942 அக்டோபரில் நமது புரட்சியின் வெள்ளி விழாவைக் கொண்டாட வேண்டிய தருணத்தில் இன்னும் ஆபத்து சூழ்ந்திருந்தது; இதோ 1943 அக்டோபரில் பேசிக்கொண்டிருக்கிறோம். நமது புரட்சியின் 26ம் ஆண்டு இது. தேசபக்தப்போரில் மகத்தான வெற்றி பெற்றுவிட்டோம். செஞ்சேனையின் இந்த மாபெரும் வெற்றிகள் ஒருபோதும் சோவியத் மக்களின் ஆதரவும் பங்கேற்பும் அளப்பரிய தியாகமும் இல்லாமல் கிட்டியிருக்காது; தாயகத்தைக் காக்கும் போரில் உயிரையும் துச்சமென மதித்து ஆர்த்தெழுந்த எமது மக்களுக்கு தலைவணங்குகிறேன்”.

ஆஆஆ

ஜனாதிபதியும் சோவியத் கம்யூனிஸ்ட் கட்சியின் பொதுச் செயலாளரும் செஞ்சேனையின் தலைமைத் தளபதியுமான ஜோசப் ஸ்டாலின் தலைமையில் சோவியத் ஒன்றியம் ஹிட்லரை வீழ்த்திய அந்த மாபெரும் வரலாற்றில், பெயர் தெரியாத லட்சோப லட்சம் மக்கள்-புரட்சியாளர்கள்-போராளிகள்-ராணுவ அதிகாரிகள்-சாதாரண தரைப்படை வீரர்கள்-பல்லாயிரக்கணக்கான பெண்கள் என

20 லட்சத்திற்கும் அதிகமான மக்களின் தியாகம் அடங்கியிருக்கிறது.

அவர்களில், ஸ்டாலின் கிராடைப் பாதுகாக்கும் அந்த 200 நாள் உச்சகட்டப் போரில் சோவியத் செஞ்சேனையின் 62வது படைப்பிரிவின் தளபதி ஜெனரல் வசிலி இவானோவிச் சுக்கோவ், 62வது படைப்பிரிவின் 1047வது ரைபிள் பிரிவின் தளபதிகளில் ஒருவரான வசிலி கிராகோரியெவிச் ஜேத்சவ், ஸ்டாலின் கிராடு நகரில் மட்டும் போரிலும் ராணுவத் தோழர்களுக்கான மருத்துவப் பணியிலும் ஈடுபட்ட 75 ஆயிரம் இளம் பெண்களின் பிரதிநிதியாக அளப்பரிய சேவையாற்றிய டாக்டர் ஜைனாய்டா எர்மோலெவியா... இப்படி ஸ்டாலின் கிராடின் கதா நாயகர்கள், சோவியத் ஒன்றியத்தின் கதாநாயகர் களாகக் கொண்டாடப்பட்டார்கள். இன்றளவும் நினைவு கூரப்படுகிறார்கள்.

ஆஆஆ

2013 பிப்ரவரி 2.

ஹிட்லரின் கொடிய ராஜ்யத்திற்கு முடிவுரை எழுதிய ஸ்டாலின் கிராடு போரின் 70ம் ஆண்டு விழாவை எழுச்சியுடன் கொண்டாடியது இன்றைய ரஷ்யா. சோசலிச சோவியத் ஒன்றியத்தின் மேன்மைகளையும், மகத்துவத்தையும், மாவீரன் ஸ்டாலினின் அளப்பரிய பங்களிப்பையும் வரலாற்றின் பக்கங்களிலிருந்து அழிப்பதற்கு முதலாளித்துவ சக்திகள் மீண்டும் மீண்டும் முயற்சிக்கும் போதிலும், ரஷ்ய மக்கள் தங்கள் வரலாற்றைப் புரட்டிக்கொண்டே இருக்கிறார்கள்.

ஸ்டாலின் கிராடை, வோல்கா கிராடு என மீண்டும் பெயர் மாற்றியவர்கள், மக்களின் நிர்ப்பந்தத்தால் மீண்டும் ஸ்டாலின் கிராடு என்று பெயர் சூட்டுகிறார்கள். பிப்ரவரி 2 முதல் ஒரு வார காலம் அதிகாரப்பூர்வமாகவே ஸ்டாலின் கிராடு என்று அழைக்கப்படும் என ஜனாதிபதி புடின் அறிவித்திருக்கிறார்.

உலகைக்காத்த அந்த மாபெரும் வரலாற்று யுத்தத்தின் அழிக்க முடியாத சாட்சியாக ஸ்டாலின் கிராடில் வானளாவ உயர்ந்து நிற்கிறாள் ‘தாயகத்தின் தாய்’.

- - எஸ்.பி.ராஜேந்திரன்