தேசிய பாரம்பரிய இடங்களுக்கு பாதுகாப்பு அளிக்கப்படும்

இலங்கையின் தேசிய பாரம்பரிய சின்னங்களான, நக்கில்ஸ் மலைத்தொடர், ஹொர்டன் பிளேன்ஸ் மற்றும் சிவனொளி பாதமலை ஆகியவற்றை யுனெஸ்கோ ஸ்தாபனம் உலகின் இயற்கை பாரம்பரிய சின்னங்களாக பிரகடனம் செய்திருப்பதை அடுத்து, அவற்றிக்கு சட்டபூர்வமான முறையில் பூரண பாதுகாப்பை வழங்குவதற்கு சுற்றாடல் பாதுகாப்பு அமைச்சு புதிய சட்டங்களை விரைவில் பாராளுமன்றத்தில் நிறைவேற்றவுள்ளது. எங்கள் நாட்டின் தேசிய பாரம்பரிய சின்னங்களை வெளிநாட்டவர்கள் இங்கு வந்து சீர்குலைப்பதில்லை. எங்கள் நாட்டு பிரஜைகளே இந்த மனவேதனைக்குரிய தேசத்துரோகச் செயற்பாடுகளில் ஈடுபட்டு வருகிறார்கள். உல்லாசப்பிரயாணிகளாக இவ்விடங்க ளுக்கு பொழுதை மகிழ்ச்சியோடு கழிப்பதற்காக செல்லும் இவர்கள், இவ்விடயங்களில் மதுபான போத்தல்களையும், பொலித் தீன் பைகளையும் வீசி எறிந்து, அங்கு சுற்றாடலுக்கு பெரும் தீங்கை ஏற்படுத்துகிறார்கள்.

இவ்விதம் அசுத்தப்படுத்தப்பட்ட தேசிய பாரம்பரிய சின்னங்கள் அமைந்துள்ள இடங்களை மீண்டும் சுத்தப்படுத்தி, பழைய நிலைக்கு கொண்டு வருவது அவ்வளவு இலகுவான செயலல்ல. அதனை திருத்தியமைப்பதற்காக, சுற்றாடல் பாதுகாப்புத் துறை அமைச்சு, பல இலட்ச ரூபாவை அநாவசியமாக விரயம் செய்ய வேண்டியிருக்கிறது.

எனவே, சுற்றாடல் அசுத்தப்படுத்தப்படும் இத்தகைய செயற்பாட்டில் ஈடுபடுவோர்களை கைது செய்து, பொலிஸாரின் உதவியுடன் சட்டபூர்வமாக தண்டிக்கக் கூடிய வகையில் சுற்றாடல் பாதுகாப்புத்துறை அமைச்சர் அனுர பிரியதர்சன யாப்பா, புதிய சட்டமூலம் ஒன்றை விரைவில் பாராளுமன்றத்தில் நிறைவேற்றுவதற்கான ஒழுங்குகளை செய்து வருகிறார்.

இதற்கென அமைச்சர் நியமித்துள்ள நிபுணர்கள் குழு, இது பற்றி விசாரணைகளை நடத்தி, தனது ஆய்வு அறிக்கையை கூடிய விரைவில் சமர்ப்பித்தவுடன், இந்த புதிய பணியை அமைச்சர் உடனடியாக மேற்கொள்ளவுள்ளார்.

கடந்த ஆண்டு ஜூலை மாதத்தில் பிரேசிலில் நடைபெற்ற யுனெஸ்கோவின் 34 வது உலக சம்மேளனத்தில், இலங்கையி லுள்ள, நாம் மேலே குறிப்பிட்டுள்ள இடங்களை உலகின் இயற்கையான பாரம்பரிய ஸ்தானங்களாக பிரகடனம் செய்வது என்ற தீர்மானம் எடுக்கப்பட்டது. இவை மட்டுமன்றி, கடந்த காலத்திலும் யுனெஸ்கோ ஸ்தாபனம் உலகின் வரலாற்று முக்கியத் துவம் கொண்ட பிரதேசங்களை உலகின் இயற்கை பாரம்பரிய ஸ்தானங்களாக பிரகடனப்படுத்தியமை குறிப்பிடத்தக்கது.

நக்கில்ஸ் மலைப்பிரதேசத்தில் மேற்கு நாடுகளில் இருப்பதை போன்று குளிர்ந்த பிரதேசத்தில் வாழும் மரை என்ற மிருங்கள் பெரிய கொம்புகளுடன் சுதந்திரமாக வாழ்ந்து கொண்டிருப்பது இந்த மலைப்பிரதேசத்திற்கு மேலும் மெருகூட்டுவதாக அமைந்துள்ளது.

இவற்றுடன் அங்கு அழகிய சிறுத்தைகளும், பெருமளவில் காணப்படுகின்றன. இந்த பிரதேசத்தின் இயற்கைக்கு மெருகூட்டி வரும் இந்த அப்பாவி வனவிலங்குகளுக்கும் உல்லாசப்பிரயாணிகள் என்ற பெயரில் அப்பிரதேசங்களுக்கு செல்லும் எமது நாட்டவர்கள் பெரும் அச்சுறுத்தலை ஏற்படுத்திய வண்ணம் இருக்கிறார்கள்.

இந்த உல்லாசப்பிரயாணிகளுடன் சேர்ந்து கொள்ளும் சில சுயநலவாதிகள் அங்குள்ள பெரிய மரைகளை இறைச்சிக்காக வேட்டையாடும் எத்தனையோ சம்பவங்களும் நாளாந்தம் இடம்பெற்று வருகின்றன. இவர்களில் விரல்விட்டு எண்ணக் கூடிய ஓரிவருக்கு எதிராக மாத்திரமே நட்டநடவடிக்கை எடுக்கப்படுகின்றது. மற்றவர்கள் எவ்வித பிரச்சினையுமின்றி தப்பி விடுகிறார்கள்.

இப்பிரதேசங்களில் உள்ள வனவிலங்குகளை இந்த சமூகவிரோதி களிடமிருந்து காப்பாற்றுவதற்காக இப்போது பொலிஸார் வன விலங்கு பாதுகாப்பு உத்தியோகஸ்தர் மற்றும் இராணுவத்தினரின் உதவியுடன் தக்க சட்டநடவடிக்கை எடுப்பதற்கும் நடவடிக்கைகள் எடுக்கப்படுகின்றன.

இலங்கையின் இயற்கையான தேசிய பாரம்பரியங்களையுடைய பிர தேசங்கள் எமது நாட்டின் உல்லாசப்பிரயாணத்துறையை மேலும் வளர்ப்பதற்கும், அதன் மூலம் தேசிய வருமானத்தை பெருக்கு வதற்கும் பேருதவியாக அமைகின்றன.

எனவே, அதற்கு வசதி களையும் செய்து கொடுக்க இருக்கும் சுற்றாடல் பாதுகாப்பு அமைச்சு, அபிவிருத்தி என்ற பெயரில் அப்பிரதேசங்களில் சிற்றுண்டிச் சாலைகள் மற்றும் கடைகளை திறப்பதற்கு எக்காரணம் கொண்டும் அனுமதி கொடுக்க முடியாது என்று திட்டவட்டமாக அறிவித் துள்ளது. இப்பிரதேசங்கள் வர்த்தக பிரதேசங்களாக மாற்றப்படும் போது, அங்கு சுற்றாடலுக்கு பாதிப்பு ஏற்படுவதை தடுக்க முடியாது என்ற காரணத்தினால் தான் இந்த தீர்மானம் எடுக்கப்பட்டுள்ளது.

தேசிய பாரம்பரியங்களின் சின்னங்களாக விளங்கும் இப்பிரதேசங்கள் இயற்கையான மெருகுடன் இருந்தால் மட்டுமே, அதன் புனிதத் தன்மையும் முக்கியத்துவமும் வலுப்பெறும் என்று அமைச்சு கருதுகிறது.

இதனால் அப்பிரதேசங்களில் குறிப்பாக 5000 அடி உயரத்திற்கும் மேலான இடங்களில் கட்டடங்களை நிர்மாணிப்பதற்கும் அமைச்சு தடை விதித்துள்ளது. சுற்றாடல் துறை அமைச்சின் இந்த நல்ல திட்டங்களுக்கு அரசியல் மற்றும் வர்த்தக ரீதியில் செல்வாக்குமிக்கவர்கள் தடையாக இருப்பதற்கும், அமைச்சர் அனுர பிரியதர்சன யாப்பா இடமளிக்கப் போவதில்லை என்று அறிவித்துள்ளார்.

(தினகரன்)