அதிபரை நியமிப்பது யார், எப்படி?

ஆற அமர வாசகர்களுக்கு ஆற அமர எமது புத்தாண்டு நல்வாழ்த்துக்கள்! இந்தப் புதிய ஆண்டில் புதுப்புது திடசங்கற்பங்களைப் பூண்டு புதிய கொள்கைகளைக் கைக்கொள்ள பலர் எண்ணியிருப்பீர்கள். உங்கள் எண்ணங்கள் அவ்வாறே நிறைவேறட்டும்.

இந்த ஆண்டும் பாடசாலை விவகாரங்களுக்குப் பஞ்சம் இருக்காது போல்தான் தெரிகிறது. முதன் முதலாக, பலாங்கொடைப் பகுதி தமிழ் மகா வித்தியாலயம் ஒன்றின் மாணவர்களின் பெற்றோர்களும் மாணவர்களும் நடத்திய போராட்டமொன்றில் வெற்றிபெற்றிருக்கிறார்கள். செய்தியாள நண்பர் ஒருவர் இதனை ஊர்ஜிதம் செய்தார்.

புதிதாக அதிபர் ஒருவரை நியமனம் செய்தமைக்கு எதிராகப் பெற்றோர்களும் மாணவர்களும் களமிறங்கியதால் குறித்த பாடசாலையில் இரண்டு நாட்கள் கல்வி நடவடிக்கைகள் ஸ்தம்பித்திருந்தன. வருடத்தின் முதற் பகுதி இப்படித்தான் ஆரம்பித்திருக்கிறது அந்த மாணவர்களுக்கும் அந்த அதிபருக்கும்.

பொதுவாக சப்ரகமுவ பகுதியில் உள்ள தமிழ் பாடசாலைகளின் கல்வி நடவடிக்கைகள் ஏனைய மாவட்டங்களைவிட மிகவும் பின்தங்கிய நிலையில் உள்ளதை மனச்சாட்சி உள்ள ஆசிரியர்களும் அதிகாரிகளும் ஏற்றுக்கொள்வார்கள். பலாங்கொடைப் பகுதியில் ஓரளவு திருப்திகொள்ளும்படியான நிலைமை காணப்படுவதும் உண்மைதான்.

இந்த நிலையில் இவ்வித்தியாலயத்திற்கு அண்மையில் புதிய அதிபர் ஒருவரை மாகாண கல்வி அமைச்சு நியமித்தது. விடயத்தைக் கேள்வியுற்றதும், அந்தப் புதிய அதிபருக்கு எதிராகப் பெற்றோர்கள் திரண்டெழுந்திருக்கிறார்கள். புதிய அதிபர் எவ்வாறானவர் என்பதைப் பற்றி மாணவர்களுக்குத் தெரியாவிட்டாலும் பெற்றோர்களின் நிலைப்பாட்டைப் பின்பற்ற வேண்டியது அவர்கள் நிர்ப்பந்தம்.

பாடசாலையில் பிள்ளையைச் சேர்ப்பதற்கு முன்னர் அந்தப் பாடசாலையின் கல்வி மேம்பாடு எவ்வாறு உள்ளது என்பதை அறிந்து அதன்படி செயற்படுபவர்கள் பெற்றோர்கள் அல்லவா. அதனால் தமது பாடசாலைக்கு நல்லதோர் அதிபரை நியமிக்க வேண்டும் என்று பெற்றோர்கள் மேற்கொள்ளும் முயற்சிக்கு மாணவர்களும் துணைபோக வேண்டியிருக்கிறது.

இதில் தவறிருக்க முடியாது. ஆனால் ஒரு பாடசாலைக்குத் திறமையான அதிபரை நியமித்துக்கொள்ளும் உரிமையும் திறமையும் பெற்றோர்களுக்கோ அல்லது குறித்த பாடசாலையின் ஏனைய ஆசிரியர்களுக்கோ மாணவர்களுக்கோ உண்டா என்ற ஒரு கேள்வியும் எழவே செய்கிறது.

பாடசாலையின் தராதரத்திற்கு ஏற்பவும் சேவை மனப்பாங்கு, சமூக உணர்வு, தொழில்வாண்மை, நல்லொழுக்கம், மாணவர் நலன் கருதிய செயற்பாடு ஆகியவற்றைக் கொண்டவராகவும் உள்ள ஓர் அதிபரை நியமிப்பது கல்வித் துறைசார் அதிகாரிகளின் பொறுப்பும் கடமையுமாகும். ஆனால், நியமனத்தின் பின்னர் இந்த அதிபருக்கு இவை எவையுமே இல்லை என்ற முடிவுக்குப் பெற்றோர்களும் மாணவர்களும் வருகிறார்கள் என்றால் தவறு யார் மீது என்பதும் முக்கியமாக சிந்திக்க வேண்டிய விடயமாகும்.

பலாங்கொடைப் பகுதியில் உள்ள தமிழ் மகா வித்தியாலயங்களில் உயர் தரத்தில் உன்னத நிலை காணப்படும் வித்தியாலயம் இன்னமும் உருவாகவில்லை. எனவே இது விடயத்தில் அக்கறை செலுத்த வேண்டியது சமூக உணர்வுமிக்க சகலரினதும் கடப்பாடாகும். விஞ்ஞானம், வணிகம், கணிதம் ஆகிய துறைகள் மேம்படும் வகையில் செயலாற்றக்கூடிய ஓர் அதிபரை நியமிக்க வேண்டும் என்பது பெற்றோர்களின் கோரிக்கை.

எப்படியோ ஆர்ப்பாட்டம் போராட்டத்திற்குப் பின்னர் அந்தப் புதிய அதிபரின் நியமனம் வாபஸ்பெறப்பட்டு அவருக்குப் பதிலாக பிரதேசத்தைச் சேர்ந்த ஒருவர் புதிதாக நியமிக்கப்பட்டிருக்கிறார்.

அந்தளவில் பெற்றோர்கள் திருப்தியடையலாம். ஆனால் இது விடயத்தில் கல்வித் திணைக்கள அதிகாரிகளின் வகிபாகம் எவ்வாறிருந்தது என்பதை ஆராய்ந்தால் பதில் பூஜ்ஜியமாக கிடைக்கிறது. இரண்டு நாள் மாணவர்கள் வகுப்புகளைப் பகிஷ்கரித்திருந்தும் என்ன ஏதென்று அறிவதற்குக் கூட அதிகாரிகள் பாடசாலைப் பக்கம் எட்டிப் பார்க்கவில்லை. நியமனம் ஒன்றை வழங்குவதற்கு முன்னர் தீர ஆராய்ந்து முடிவெடுக்கவும் இல்லை.

எடுத்திருந்தால் பின்னர் அந்த முடிவை மாற்றிக்கொண்டிருக்க முடியுமா? இதில் அதிகாரிகளின் கல்வி நிர்வாகத் திறன் கேள்விக்குறியாகியிருக்கிறது. ஏற்கனவே இரண்டு பாடசாலைகளில் குறித்த ஆசானை அதிபராக நியமித்தமைக்கு எதிர்ப்பு கிளம்பியிருக்கிறது. இது மூன்றாவது தடவை. கல்வித் துறையைச் சீரழிப்பது மட்டுமன்றி அந்த ஆசானுக்கும் கல்வித் துறைக்கும் களங்கத்தை ஏற்படுத்தி இங்கு கல்வி நிர்வாகமே தோற்றுப்போய் இருக்கிறது. பொறுப்பானவர்கள் இதற்குப் பதில் சொல்லியே ஆகவேண்டும். பலாங்கொடைக்கு ஆற அமர மீண்டும் வருவோம்.

(ஜீவிதன்)