அழகிரி வீழ்ச்சி ஏன்?

அஞ்சாநெஞ்சன் அழகிரி இனியாவது செயல்பட வேண்டும். அவருக்குத் தென் மண்டல அமைப்புச் செயலாளர் பதவியைக் கொடுத்தார் கருணாநிதி. அவர் செயல்பட்ட விதத்தைப் பார்த்து, தென் மாவட்டத் தில் அவருக்கு ஆதரவாக இருந்த சில மாவட்டச் செயலாளர்கள்கூட ஸ்டாலின் அணிக்கு மாறினார்கள். திடீரென்று ஒரு நாள் போர்டு மீட்டிங் கூட்டியதோடு சரி. அதன் பிறகு அது கூடவும் இல்லை. செயல்படவும் இல்லை. தென் மண்டல அமைப்புச் செயலாளரை தென் மண்டல எல்லைக்கு உட்பட்ட மாவட்டச் செயலாளர்களில் மதுரை புறநகர் மூர்த்தியும் தேனி மூக்கையாவும் தவிர மற்றவர் யாரும் மறந்தும் சந்திப்பது இல்லை. ஆண்டுதோறும் செப்டம்பர் மாதம் நடக்கும் முப்பெரும் விழா கடந்த ஆண்டில் நாகர்கோவிலில் நடந்தது. அதற்கும் அழகிரிக்கு அழைப்பு இல்லை. அண்ணா அறி வாலயத்தில் தனக்கென பிரத்யேக அறை ஒன்றை ஒதுக்கீடு செய்யக் கேட்டார் அழகிரி. அதுவும் ஒதுக்கித் தரப்படவில்லை. பொதுக்குழு, செயற்குழுக் கூட்டங்களில் மேடைத் தலைவர்களாக உட்கார ஒரு நாற்காலி கேட்டார். அதுவும் போடப்படவில்லை. இவை அனைத்துக்கும் சாதாரணமாக ஸ்டாலின் ஆட்கள் ஒரு காரணத்தைச் சொன்னார்கள்... 'செயல்படாதவருக்கு எதற்கு சேர்?’

கட்சியும், இளைஞர் அணியும், தலைமைக் கழகமும், முரசொலியும், கலைஞர் டி.வி-யும் ஸ்டாலின் கட்டுப்பாட்டில் இருப்பதால், அழகிரியால் செயல்பட முடியவில்லை. இந்தத் தொந்தரவு இல்லாத மத்திய உரத் துறையிலும் அவரால் ஏன் செயல்பட முடியவில்லை? எப்போதாவது டெல்லி செல்வது, போனாலும் துறை அலுவலகத்துக்குச் செல்வது இல்லை, மத்திய கேபினெட் கூட்டத்துக்குப் போவதே இல்லை, நாடாளுமன்றத்தில் பேசுவதே இல்லை.... என்று துறையிலும்  செயல்படவில்லை. விலைவாசியுடன் சேர்த்து இந்தியாவில் உரங்களின் விலையும் எகிறியது. கோடிக்கணக்கான விவசாயிகளின் வயிற்றில் அடித்த விஷயம் அது. தமிழகத்தைச் சேர்ந்த மத்திய அமைச்சர் சம்பந்தப்பட்ட துறை அது. வேறு ஒருவர் மந்திரியாக இருந்தால் கருணாநிதி எந்த அளவுக்கு எகிறி அடிப்பார் என்பது அனைவருக்கும் தெரியும். அழகிரி என்பதால், அடக்கமாகிவிட்டார் கருணாநிதி. இப்படித் துறை ரீதியான செயல்பாடுகளும் பூஜ்யம்.

அழகிரியின் இப்போதைய பின்னடைவுக்கு இவை இரண்டும்தான் காரணம். ஸ்டாலினுக்குப் போட்டியாக அழகிரியும் கட்சிப் பணியாற்றி, துறை ரீதியாகவும் அகில இந்தியப் புகழை அடைந்த மத்திய அமைச்சராகவும் அவர் மாறியிருந்தால், 'எனக்குப் பிறகு ஸ்டாலின்தான் தலைவர்’ என்று கருணாநிதியால் அறிவித்திருக்க முடியாது. இன்னமும் கோபாலபுரம் வீட்டுக்குள் தயங்கித் தயங்கியே பதுங்கி இருப்பார்.

அழகிரி செயல்படவில்லை என்பதைவிட, அவரால் செயல்பட முடியவில்லை அல்லது செயல்பட விரும்பவில்லை என்பதே உண்மையானது. அரசியலில் சிலர் மட்டும்தான் முருகனைப் போல ஊரைச் சுற்றி வந்து மாம்பழம் பெற நினைப்பவர்கள். பலர், இருந்த இடத்தைச் சுற்றி ஷோ காட்டியே பதவிகளை அடைந்தவர்கள்தான். இதுவரை அடைந்த பதவிகள் அப்படி வந்ததால், இனியும் அப்படியே தொடரும் என்று அழகிரி நினைத்திருக்கிறார். ஆனால் யதார்த்தத்தை மற்றவர்கள் கற்றுத்தருவதற்கு முன்னால் தகப்பனாரே சொல்லிக்கொடுத்ததுதான் சரி!

''ஸ்டாலின் நான் இளமைக் காலத்துல அலைந்தது மாதிரி அலைகிறான். அதுமாதிரி அழகிரியால செயல்பட முடியல.... அந்தப் பொறாமை மட்டும்தான் இருக்கு'' என்று கருணாநிதியே கமென்ட் அடித்ததாகக் கூறப்படுகிறது.

அவருக்குத்தானே இருவரில் யார் சரியானவர் என்று எல்லாரையும்விட நல்லாத் தெரியும்!

(முகுந்த்)