தடம் மாறிப் பயணிக்கும் தமிழ் கூட்டமைப்பின் தமிழ்த் தேசியம்?

தமிழ் தேசியக் கூட்டமைப்பின் தலைவர்கள் தொடர்பாக அண்மைக்காலமாக ஊடகங்களில் வெளியாகும் செய்திகள் தமிழ் மக்களிடையே பலத்த சந்தேகங்களையும், கேள்விக்குறிகளையும் ஏற்படுத்தியுள்ளது. தேர்தல் காலங்களில் மக்களைத் தமது பொய்யான உறுதி மொழிகளால் ஏமாற்றி வாக்குகளை அபகரித்து தாமே அம்மக்களின் பிரதிநிதிகள் என மார்தட்டிவரும் தமிழ் கூட்டமைப்பு இன்று அதன் பாராளுமன்ற உறுப்பினர்கள் சிலரின் தரக்குறைவான செயற்பாடுகளினால் அதே மக்களின் முன்பாக வெட்கித் தலைகுனியும் நிலைக்குத் தள்ளப்பட்டுள்ளது.

தமக்குச் சார்பான ஊடகங்கள் சிலவற்றில் அறிக்கைப் பிரசாரங்களை மட்டுமே செய்துவரும் கூட்டமைப்பின் தலைவர்கள் பலர் திரைமறைவில் தமது தனிமனித வளர்ச்சிக்காக மேற்கொண்டுவரும் திருகுதாளங்கள் பல இப்போது அம்பலமாகி வருவதால் மக்கள் மத்தியில் நடமாட முடியாதவர்களாகக் காணப்படுகின்றனர். தமக்கு வாக்களித்த தமிழ் மக்களிடமிருந்து தம்மைப் பாதுகாத்துக் கொள்ள இவர்கள் பொலிஸாரின் பாதுகாப்புடனேயே தமது தொகுதிகளுக்குச் சென்றுவரும் நிலை இன்று காணப்படுகிறது.

கடந்த வாரம் கிளிநொச்சியில் பாராளுமன்ற உறுப்பினர் ஒருவரது அலுவலகத்திலிருந்து வெடிபொருட்கள், அரசாங்கத்திற்கு எதிரான துண்டுப் பிரசுர காகிதாதிகள் என்பனவற்றுடன் ஆபாச சீடிக்கள், ஆணுறைக் கவசங்கள் எனப் பல கண்டுபிடிக்கப்பட்டதுடன் அவரது செயலாளரும் கைது செய்யப்பட்டுள்ளார். ஓர் அரசியல்வாதியின் அலுவலகத்தில் இருக்கக் கூடாத பொருட்கள் கண்டுபிடிக்கப்பட்டமை அப்பகுதி மக்களை முகம் சுளிக்க வைத்துள்ளது. ஏற்கனவே இப்பாராளுமன்ற உறுப்பினர் மீது சிறுமி ஒருவரைப் பாலியல் பலாத்காரம் செய்ததாக ஒரு குற்றச்சாட்டும் சந்தேகத்தில் உள்ளது. இந்நி¨லையில் தற்போது இவரது அலுவலகத்தில் கண்டுபிடிக்கப்பட்டுள்ள வெளியே சொல்ல வாய் கூசும் சமாச்சாரங்கள் அக்குற்றச்சாட்டை நிரூபிப்பதாகவே உள்ளது. ஆனால் குறிப்பிட்ட பாராளுமன்ற உறுப்பினரோ தனக்கு இதில் சம்பந்தம் எதுவுமே இல்லாதது போன்று தனது செயலாளரைச் சம்பந்தப்படுத்தியுள்ளார். அது போதாதென்று அரசாங்கத்தின் திட்டமிட்ட சதி என்றும் அறிக்கை விட்டுள்ளார். நடந்த சம்பவத்தையே பிரசுரிக்க மறுத்த கூட்டமைப்பின் சார்பு ஊடகங்கள் அவரது அறிக்கையை மட்டும் வழமைபோன்று விபரமாகப் பிரசுரித்துள்ளன. உண்மையிலேயே அவரது செயலாளர்தான் இக்குற்றத்தைப் புரிந்திருந்தாலும் பாராளுமன்ற உறுப்பினரும் இதற்குப் பதில் கூறியே ஆக வேண்டும்.

இறுதி யுத்தத்தின்போது கிளிநொச்சி, முல்லைத்தீவு மாவட்ட மக்கள் பட்ட துன்பங்களை எவருமே அனுபவித்திருக்க மாட்டார்கள். அவ்வாறு யுத்தக் கெடுபிடிக்குள் சிக்குண்டு மறுவாழ்வு பெற்றிருக்கும் அம்மக்கள் தாம் நம்பியிருந்த புலிகளே தம்மை நட்டாற்றில் விட்டுவிட்டுச் செல்ல அவர்களது வால்களைப் பிடித்துக்கொண்டிருந்த உங்களை நம்பிக் கொண்டிருக்கையில் நீங்கள் ஆபாச வீடியோக்களில் மோகங்கொண்டு அலுவலகத்தில் அராஜகம் புரிகிaர்கள். உதவிகேட்டு வரும் மக்களை உதாசீனம் செய்வது மட்டுமல்லாது பெண்கள் குலத்தின் பாவத்திற்கும் ஆளாகுகிaர்கள். புலம்பெயர் நாடுகளிலிருந்து பாதிக்கப்பட்ட தமிழ் மக்களுக்காக அனுப்பி வைக்கப்படும் பெருந் தொகைப் பணத்தின் பெரும் பகுதியைச் சூறையாடி வருவதுடன் அரசாங்கம் இம்மக்களுக்காகச் செய்துவரும் உதவிகளையும் உதறித் தள்ள முற்படுகிaர்கள். சில தமிழ்க் கூட்டமைப்பின் தலைவர்கள் தமது பிள்ளைகளின் உயர் கல்விக்காகவும் அவர்களது வெளிநாட்டுப் புலமைப் பரிசிலுக்காகவும் மட்டும் அரசாங்கத்துடன் பேச்சுவார்த்தை நடத்தி வருகின்றனர்.

இன்னும் சிலரோ வெளிநாட்டிலிருக்கும் தமது உறவினர்களுக்கு இரட்டைப் பிராஜாவுரிமை பெறுவதற்காக அரசுடன் இரகசியக் கூட்டு வைத்துச் செயற்படுகின்றனர். இன்னும் சிலர் விஸா வியாபாரம் செய்கின்றனர். இதனையே ஏனைய தமிழ் தலைவர்கள் செய்தால் துரோகிகள் என்கின்றனர். ஆனால் இந்தத் தமிழ்க் கூட்டமைப்பின் தலைவர்களுக்கு வாக்களித்த அப்பாவித் தமிழ் மக்களோ இத்தலைவர்கள் தமக்கு நிரந்தரத் தீர்வொன்றினைப் பெற்றுத் தருவார்கள் என நம்பியவர்களாக இன்றும் காணப்படுகின்றனர். மக்களில் பலருக்கு இத்தலைவர்கள் முன்னர் போன்றல்லாது தற்போது சுயநலமாகச் செயற்பட்டுத் தம்மை ஏமாற்றுகிறார்கள் எனும் உண்மை நிலை நன்கு புரிந்திருந்தாலும் தமது ஒற்றுமையைச் சீர்குலைத்துவிடக் கூடாது எனும் ஒரே காரணத்திற்காக பொறுமை காத்து வருகிறார்கள் என்பதே உண்மையாகும்.

அண்மைக் காலமாக தமிழ் கூட்டமைப்பின் தலைவர்கள் தொடர்பாக வெளியாகும் செய்திகள் மக்கள் மனங்களில் ஆழமான பாதிப்பை ஏற்படுத்தி வருகிறது. வேலியே பயிரை மேய்வது போல தமக்குப் பாதுகாப்பாக இருந்து குரல் கொடுக்க வேண்டிய தலைவர்களே இன்று தமக்குத் துரோகம் செய்பவர்களாக மாறியுள்ளதை மக்கள் உணரத் தொடங்கியுள்ளனர். அரசியல் சொகுசு வாழ்வு, அதிகாரம், சுய தேவைகளுக்காக தம்முடன் கூடவே திரியும் உதவி அடியாட்கள் இந்த தமிழ்த் தேசிய அரசியல்வாதிகளின் நிலையை மாற்றியமைத்துவிட்டதை மக்கள் உணர்ந்துவிட்டனர்.

தாம் வாக்களித்து பாராளுமன்றத்திற்கு அனுப்பி வைத்தவர்கள் இன்று தமக்கு ஊடகங்களில் அதுவும் ஒரு சில தமிழ் ஊடகங்களில் மட்டுமே தாம் விடும் அறிக்கைகள் மூலமாகத் தீர்வினைப் பெற்றுத் தரப் பாடுபட்டுவருவது போலப் பாசாங்கு செய்வது அந்த வாக்களித்த மக்களுக்கு புரிந்து விட்டது. உண்மையில் காத்திரமான அறிக்கை மூலமாகவும் வடக்கில் நடைபெறும் ஆர்ப்பாட்டங்களிலும் கலந்துகொண்டு தமிழ் மக்களுக்காக உண்மையாகக் குரல் கொடுத்துவரும் மனோ கணேசனின் அரசியல் செயற்பாட்டை வடக்கு கிழக்கு மக்கள் வரவேற்கிறார்கள். அவர் மக்களை ஏமாற்றவில்லை. மக்களுக்காக அரசாங்கத்தை எதிர்க்கிறார். இவர் போன்ற ஒருவர் அரசாங்கத்திலிருந்து தமக்குச் சேவையாற்ற வேண்டுமென அந்த மக்கள் விரும்புகிறார்கள். அவரும் அந்த உண்மையைப் புரிந்து கொள்ள வேண்டும். ஆனால் யுத்தம் முடிவடைந்து பேச்சுவார்த்தை, சர்வதேச சமூகம், புலம்பெயர் சமூகம் என்று கடந்த நான்கு வருடங்களாக தமிழ்த் தேசியத்திற்காகப் பாடுபட்டுவரும் தமிழ்த் தேசியக் கூட்டமைப்புன் தமிழ்த் தேசியத் தலைமைகள் தடம்மாறி பயணிக்க ஆரம்பித்துள்ளனர். பெருந்தலைவரால் அதன் சிறு தலைவர்களைக் கட்டுப்பாட்டில் வைத்திருக்க முடியாதுள்ளதால் இன்று பலரும் குறுந் தலைவர்களாகச் செயற்படும் நிலை தோன்றியுள்ளது.

இதன் காரணமாக இவர்கள் தமது மக்கள் சேவையை மறந்துவிடும் நிலைக்குத் தள்ளப்பட்டுள்ளனர். தாம் மக்களால் வாக்களித்து வந்தவர்கள் என்பதை மறந்து குறுநில மன்னர்களாக தம்மை எண்ணி வாக்களித்த மக்களையே வாயடக்கி ஆள முனைந்துள்ளனர். இது ஆரோக்கியமானதல்ல. வாக்களித்த மக்கள் கிளர்ந்தெழ ஆரம்பித்தால் அரசியல் அலுவலகங்களை மூடிவிட்டு முன்னர்போன்று கொழும்பில்தான் தஞ்சமடையயும் சூழல் ஏற்படும்.

எனவே உங்களை நம்பி உங்களது புளித்துப் போன தமிழ் தேசியக் கதைகளை நம்பி வாக்களித்த மக்களை புலிகளைப் போன்று நடுத்தெருவில் விட்டுவிட வேண்டாம், உங்களால் முடியாவிட்டால் அரசாங்கத்துடன் இணைந்து செயலாற்ற மக்கள் தயாராகவே உள்ளனர். ஏற்கனவே பெருமளவிலான மக்கள் அரசாங்கத்துடன் இணைந்து செயலாற்றும் தமிழ்த் தலைவர்களின் பின்னால் அணி திரள ஆரம்பித்துவிட்டனர். ஒன்று மக்களுக்கு நீங்கள் ஏதாவது செய்யுங்கள் அல்லது செய்து கொண்டிருக்கும் அரசாங்கத்தைச் செய்யவிடுங்கள் என்பதே எமது வேண்டுகோளாகும்.

(தினகரன்)