இலங்கை மீனவர்களின் குற்றச்சாட்டை இந்தியா புறந்தள்ளி விட முடியாது

தமிழக மீனவர்கள் இரட் டைமடி, சுருக்குமடி உள்ளிட்ட வலைகளையும் இழுவைப் படகுகள், டைனமைட் ஆகியவ ற்றையும் பயன்படுத்துவதால் மீன்வளமும், மீன் குஞ்சுகள் வளர்வதற்கான இயற்கை வளமும் அழிந்து வருவதாக இலங்கை மீனவர்களின் குற்றச்சாட்டை இந்தியா புறந்தள்ளிவிட முடியாதென இந்தியாவின் முன்னணி தமிழ் நாளேடான ‘தினமணி’ தெரிவி த்துள்ளது. இது தொடர்பாக ‘வேண்டாமே விரோதம்’ எனும் தலைப்பில் ‘தினமணி’ பத்திரிகை நேற்று ஆசிரியர் தலையங்கம் தீட்டியுள்ளது. தமிழக மீனவர்கள் தடையை மீறி செயற்படுவதைக் கட்டுப்படுத்த முடியவில்லை என்பது உண்மைதான் என தெரிவித்துள்ள தினமணி ஆசிரியர், தெளிவான புரிந்துணர்வுக்கு இருநாட்டு அரசுகளும் வழிகோல வேண்டுமெனவும் கேட்டுள்ளார்.

அதில், மேலும் கூறப்பட்டுள்ளதாவது:-

மீனவர்கள் பிரச்சினை தொடர்பாக பிரதமர் மன்மோகன் சிங்குக்கு தமிழக முதல்வர் ஜெயலலிதா பலமுறை கடிதம் எழுதியதைத் தொடர்ந்து இந்தியாவுக்கும் இலங்கைக்கும் இடையிலான உறவில் மிகவும் சிக்கலானதாக உருவெடுத்துள்ள மீனவர்கள் பிரச்சினைக்கு நிரந்தர தீர்வு காண்பதற்காக, இரு நாட்டு மீன் வளத்துறை அமைச்சர்கள் நிலையிலான பேச்சுவார்த்தைக்கான முன்முயற்சியை மத்திய அரசு எடுத்தது. டில்லியில் கடந்த புதன்கிழமை நடைபெற்ற பேச்சுவார்த்தையில் இந்தியத் தரப்பில் மத்திய வேளாண், மீன் வளத்துறை அமைச்சர் சரத் பவாரும், இலங்கை தரப்பில் மீன் வளத்துறை அமைச்சர் ராஜித சேனாரத்னவும் கலந்து கொண்டனர்.

இரு நாடுகளிலும் சிறையில் அடைக் கப்பட்டுள்ள அனைத்து மீனவர்களையும் படிப்படியாக விடுவிப்பது என அந்தப் பேச்சுவார்த்தையில் உடன்பாடு ஏற்பட்டது.

இதன்படி முதல் கட்டமாக இலங்கை சிறைகளில் அடைக்கப்பட்டிருந்த 51 தமிழக மீனவர்களும், தமிழகச் சிறைகளில் அடைக்கப்பட்டிருந்த 52 இலங்கை மீனவர்களும் விடுவிக்கப்பட்டு அவரவர்கள் தாயகம் திரும்பியுள்ளனர். இதனிடையில், இலங்கை சிறைகளில் அடைக்கப்பட்டிருந்த நாகை, மண்டபம், பகுதிகளைச் சேர்ந்த 121 மீனவர்களையும் நீதிமன்றம் விடுவித்து வெள்ளிக்கிழமை உத்தரவிட்டது. அதே நேரத்தில், தமிழக சிறைகளில் உள்ள 61 இலங்கை மீனவர்களும் வெள்ளிக்கிழமை விடுதலை செய்யப்பட்டுள்ளனர்.

எதிர்வரும் 27ஆம்திகதி இரு நாடுகளின் மீனவர் பிரதிநிதிகள் இடையே சென்னையில் நடைபெறவிருக்கும் பேச்சுவார்த்தையில் சுமுகமான தீர்வு ஏற்படுவதற்கு நல்லதொரு தொடக்கமாக மீனவர்களின் விடுதலை அமைந்துள்ளது.

கச்சத்தீவை ஒட்டியுள்ள பகுதிகளில் தமிழக மீனவர்கள் மீன் பிடிப்பது பிரச்சினையல்ல அவர்கள் அதையும் தாண்டி இலங்கையின் கடல் பரப்பில் மீன் பிடிப்பதுதான் பெரும் பிரச்சினையாக உள்ளது என அந்த நாட்டு மீனவர்கள் கூறுகின்றனர்.

இலங்கையில் 25 ஆண்டுகளுக்கும் மேலாக நடந்த சண்டை முடிவுக்கு வந்த பிறகு தற்போதுதான் தாங்கள் மீண்டும் மீன்பிடித்தொழிலில் ஈடுபட்டு வருவதாகவும், தங்களது வாழ்வாதாரத்தைப் பாதிக்கும் வகையில் தமிழக மீனவர்களின் செயல்பாடுகள் உள்ளதாகவும் இலங்கை மீனவர்கள் சுட்டிக்காட்டுகின்றனர்.

தமிழக மீனவர்கள் இரட்டை மடி சுருக்கு மடி உள்ளிட்ட வலைகளையும், இழுவைப் படகுகள் டைனமைட் ஆகியவற்றையும் பயன்படுத்துவதால் மீன் வளமும் மீன் குஞ்சுகள் வளர்வதற்கான இயற்கை வளமும் அழிந்து வருவதாகவும் இலங்கை மீனவர்கள் குற்றம் சாட்டுகிறார்கள். இந்தியக் கடல் பகுதியில் மீன் பிடிபாடு குறைந்ததால், தமிழக மீனவர்கள் தற்போது தங்களது எல்லையைத் தாண்டி இலங்கை கடல் பகுதிக்குள் மீன் பிடிப்பதால் பிரச்சினை ஏற்படுவதாகவும் இதை ஒருபோதும் அனுமதிக்க முடியாது என்றும் இலங்கை மீனவப் பிரதிநிதிகள் திட்டவட்டமாகத் தெரிவித்துள்ளனர்.

இலங்கை மீனவர்களின் இந்தக் கருத்துக்களை நாம் ஒட்டுமொத்தமாகப் புறந்தள்ளிவிட முடியாது. ஏனெனில் தமிழக மீனவர்கள் தடையை மீறி இரட்டை மடி, சுருக்கு மடி வலைகள் பயன்படுத்துவதை நமது மீன் வளத் துறையினரால் கட்டுப்படுத்த முடியவில்லை என்பது உண்மைதான். அதே நேரத்தில் தமிழக மீனவர்களின் நலன்களையும் கருத்தில் கொண்டு இரு தரப்பும் ஏற்றுக் கொள்ளக்கூடிய சுமுகமான தீர்வை எட்ட முழு மனதுடன் பேச்சுவார்த்தை நடத்த வேண்டும்.

இந்தியா, இலங்கை கடல் பரப்பில் அமைந்துள்ள பாக்கு நீரிணைப் பகுதியில் இரு நாட்டு மீனவர்களும் இணைந்து மீன் பிடிப்பதற்கான சூழலை ஏற்படுத்த வேண்டும். அல்லது மாதத்தில் குறிப்பிட்ட சில நாட்களுக்கு தமிழக மீனவர்களும் வேறு சில நாட்களுக்கு இலங்கை மீனவர்களும் மீன்பிடித்துக் கொள்ளும் வகையில் ஒரு தெளிவான அட்டவணையை தயாரித்து அதை நடைமுறைப்படுத்தலாம்.

மீன் வளத்தைப் பாதிக்கக் கூடிய எந்தவொரு மீன்பிடி சாதனத்தையும் பயன்படுத்துவதில்லை என இரு நாட்டு மீனவர்களும் முடிவு எடுக்க வேண்டும்.

மீன்வளம் என்பது இயற்கை அளித்த கொடை. கடல் என்பது மனித இனத்துக்குப் பொதுவான சொத்து இதைப் பயன்படுத்துவதில் சண்டை சச்சரவுக்கு இடமிருத்தல் கூடாது. தெளிவான புரிந்துணர்வுக்கு இரு நாட்டு அரசுகளும் வழி கோல வேண்டும்.

(நன்றி: தினமணி)