நேபாளத்தின் அடுத்த பிரதமர் யார் ?

(அர்ச்சனா)

அடுத்த பிரதமரைத் தீர்மானிக்கும் விடயத்தில் நேபாள அரசியல் கட்சிகளுக்கிடையில் இணக்கப்பாடு இதுவரை எட்டப்படவில்லை. அடுத்த பிரதமராக யாரை நியமிக்கலாம் என்பதில் நேபாளத்தின் மூன்று பிரதான கட்சிகளிடையேயும் முரண்பாடுகள் தோன்றியுள்ளன. மாதவ்குமார் நேபாள் கடந்த 13 மாதங்களாக நேபாளத்தின் பிரதமராக இருந்தவர். நேபாளத்தின் பாராளுமன்றத்தில் மாவோயிஸ்டுகளே அதிக எண்ணிக்கையான ஆசனங்களைக் கொண்டிருந்தனர். எனவே, தங்களது தலைமையிலான அனைத்துக் கட்சிகளையும் கொண்ட தேசிய அரசொன்றை அமைப்பதற்காக, மாதவ்குமார் பதவி விலக வேண்டும் என்று மாவோயிஸ்டுகள் வற்புறுத்தி வந்தனர்.

மாதவ்குமார் நேபாளின் தலைமையிலான ஆட்சிக்கு 22 கட்சிகள் ஆதரவு தெரிவித்து வந்தன. ஆனால் அவர் ஆட்சிபீடமேறிய நாள் முதல் மாவோஸிஸ்ட்டுகள் ஒத்துழையாமை இயக்கத்தை நடாத்தி வந்தனர். இதனால் நேபாளத்தில் கடந்த நான்காண்டுக்கும் மேலாக அரசியலில் தேக்க நிலை நிலவியது. மாதங் குமாரின் அரசு நாளை வரவு - செலவுத் திட்டத்தை பாராளுமன்றில் சமர்ப்பிக்கவிருந்தது. ஆனால் வரவு - செலவுத் திட்டக் கூட்டத் தொடரைப் புறக்கணிப்பதுடன், அதனை நிறைவேற்ற விடாமல் தடுக்கப் போவதாக மாவோஸிஸ்டுகள் சூளுரைத்திருந்தனர்.

இந்நிலையில் கடந்த புதன்கிழமையன்று தான் பிரதமர் பதவியை இராஜினாமா செய்வதாக மாதவ்குமார் தொலைக்காட்சியினூடாக அறிவிப்பு விடுத்தார். பிரதமராகப் பதவிக்கு வந்த சில காலங்களிலேயே தனது நாட்கள் எண்ணப்படுகின்றன என்று மாதவ்குமார் அறிந்திருந்தார். எனினும், மாவோஸ்டுகளின் அழுத்தத்தால் தான் பதவி விலகுவதாக மக்கள் நம்பக் கூடாதென்பதில் அவர் கூடுதல் கவனம் செலுத்தினார். முன்னதாக, மாதவ்குமார் நேபாள், மே மாதம் 28 ஆம் திகதியன்று பதவி விலகுவாரென நேபாளத்தின் மூன்று முக்கிய கட்சிகளிடையே இணக்கப்பாடு காணப்பட்டிருந்தது. ஆனால் குறிப்பிட்ட திகதியில் மாதங்குமார் பதவி விலகாதது, அவரது கட்சிக்குள்ளேயே அவர் மீதான அதிருப்தியை ஏற்படுத்தியிருந்தது.

பிரதமர் மாதங்குமார் பதவி விலகியதையடுத்து செய்தி வெளியிட்டிருந்த மாவோயிஸ்டுகளின் நாளேடான ஜனடிஷா ‘இந்தியாவின் கைப்பொம்மை’ ஆட்சிக்கு இனி நேபாளத்தில் இடமில்லை என வர்ணித்திருந்தது.

நேபாளத்தில் இருந்து வெளிவரும், நடுநிலையான ஊடகங்கள் மாற்றுக் கருத்துக்களையும் வெளியிட்டிருந்தன. விமர்சனங்களுக்கு அப்பால், நேபாளத்தில் கடந்த ஒரு வருட காலமாக நிலவிய அரசியல் தேக்கநிலையை, பிரதமர் மாதவ்குமார் நேபாளின் இராஜினாமா முடிவுக்குக் கொண்டுவரும் என்பதே பெரும்பாலானோரின் அபிரப்பிராயமாக இருந்தது.

பிரதமர் மாதங்குமாரின் இராஜினாமாவை ஏற்றுக் கொண்ட ஜனாதிபதி ராம் பரன் யாதவ், மாற்று ஏற்பாடுகள் செய்யப்படும் வரை மாதவ்குமாரை பிரதமர் பதவி வகிக்கும்படி கேட்டுக் கொண்டார்.

இதற்கமைவாக, இம்மாதம் 7ம் திகதி வரை ஜனாதிபதி அரசியல் கட்சிகளுக்குக் காலக்கெடு விதித்திருக்கின்றார். இம்மாதம் 7 ஆம் திகதிக்கு முன்பாக நேபாளத்தின் அடுத்த பிரதமர் யார் என்பது குறித்த உடன்பாட்டுக்கு கட்சிகள் வரவேண்டும் என்று அவர் அறிவித்திருக்கின்றார்.

நேபாளத்தின் சமாதான முன்னெடுப்புகள் குறித்து சர்வதேச சமூகத்தினர் அழுத்தம் கொடுத்து வருகின்ற நிலையில், நேபாளத்தின் அடுத்த பிரதமரைத் தீர்மானிப்பதில் பாரிய முரண்பாடுகள் நிலவுகின்றன.

நேபாளத்தில் 10 ஆண்டுகளுக்கு மேலாக உள்நாட்டு யுத்தத்தில் ஈடுபட்டிருந்த மாவோயிஸ்டுகள், அரசியல் நீரோட்டத்தில் கலந்து, 2008 ஆம் ஆண்டில் இடம்பெற்ற தேர்தல்களில் அமோக வெற்றியீட்டினர்.

பாராளுமன்றத்தில் அதிக ஆசனங்கள் தம் வசமிருப்பதால் அதிகாரப் பகிர்வு அரசுக்குத் தாமே தலைமைதாங்க வேண்டும் என்று மாவோயிஸ்டுகள் வலியுறுத்தி வருகின்றனர்.

ஆனால், தேசிய அரசொன்றை அமைப்பதற்கான காலக்கெடு முடிவடைய சில நாட்களே இருக்கின்ற நிலையில், மாவோயிஸ்ட்டுகளின் தலைமையிலான அரசில் இணைய முடியாதென, முக்கிய கட்சிகள் திட்டவட்டமாகக் கூறியுள்ளன.

இதற்கிடையில், தேசிய அரசொன்றை அமைக்கும் முயற்சிகளைத் துரிதப்படுத்துமாறு ஐ. நா. செயலாளர் நாயகம் பான் கீ மூனும் கோரிக்கை விடுத்திருக்கின்றார். தேசிய அரசொன்றை அமைப்பதன் மூலம், 2006 ஆம் ஆண்டின் சமாதான உடன்படிக்கையில் இணக்கம் காணப்பட்ட விடயங்களை துரிதமாக அமுல்படுத்துமாறும் அவர் கூறியிருக்கின்றார்.

நேபாளத்தில் உள்நாட்டு யுத்தம் முடிவடைந்து 4 வருடங்கள் கழிந்து விட்ட நிலையிலும் சமாதான உடன்படிக்கையின் பல ஷரத்துக்கள் இன்னமும் அமுல் செய்யப்படவில்லை. குறிப்பாக, நேபாளத்தில் போரிட்ட ஆயிரக்கணக்கான மாவோயிஸ்டுகள் இன்னமும் இராணுவத்தில் உள்வாங்கப்படவில்லை.

சமாதான நடவடிக்கைகளின் முன்னேற்றத்தை வலியுறுத்தியுள்ள ஐ.நா. சபை, பிரதமர் மாதவ்குமாரின் இராஜினாமாவை சமாதான நடவடிக்கைகளை முன்னெடுப்பதற்கான ஒரு சந்தர்ப்பமாகவும் கொள்ளும்படி கூறியிருக்கிறார்.

நோபாளத்தின் புதிய பிரதமராகப் பதவிவகிக்பவர், சமாதான நடவடிக்கைகளை முன்னெடுப்பது அவசியமானது. நோபாளத்தில் 2008 ஆம் ஆண்டில் முடியாட்சி முறை ஒதுக்கப்பட்டது. நேபாளம் குடியரசு நாடாகியது. இதற்கு அரசியலமைப்பின் மூலம் அங்கீகாரம் வழங்கும் வகையிலான புதிய அரசியல் யாப்பு அடுத்த வருடம் மே மாதத்துக்குடையில் உருவாக்கப்படு வதை உறுதி செய்வதும் அவரது பொறுப்பாகின்றது.

மாவோயிஸ்ட் தலைவர் பிரசண்டாவே நேபாளத்தின் அடுத்த பிரதமராகத் தெரிவாவார் என ஊகங்கள் தெரிவிக்கப்பட்ட போதும், தான் விதித்த காலக்கெடுவுக்குள் பிரதமர் ஒருவரை நேபாளத்தின் 25 அரசியல் கட்சிகளும் தீர்மானிக்த் தவறினால் அரசியலமைப்பின் பிரகாரம், பாராளுமன்றத்தில் பெரும்பான்மை பலமுள்ள கட்சியின் பிரதிநிதியை பிரதமராக நியமிக்க போவதாகவும் ஜனாதிபதி ராம் பரன்யாதவ் எச்சரித்திருக்கின்றார்.