வடபகுதி ரயில் சேவையும் தென்பகுதி மக்களின் பங்களிப்பும்

ஓமந்தை ரயில் நிலையத்தைப் புனரமைக்கும் பணி கடந்த சனிக்கிழமை ஆரம்பிக்கப்பட்டு ள்ளது. இரண்டு கோடி ரூபா செலவில் மேற்கொள்ளப்படவுள்ள இப் புனரமைப்புப் பணிக்குக் காலி மாவட்டத்தைச் சேர்ந்த மக்கள் உதவி புரிகின்றனர் என்பது குறிப்பிடத்தக்கது. இதேநேரம், காங்கேசன்துறை வரையிலான ரயில் பாதை யைப் புனரமைக்கும் பணியும் விரைவில் மேற் கொள்ளப்படவுள்ளது. இப்போது ஓமந்தை வரை யிலான ரயில் பாதை புனரமைக்கப்பட்டுள்ளது. எஞ்சிய புனரமைப்பு வேலைக்காக ஐகோன் இன்ரர் நாஷனல் லிமிடெட் என்ற இந்திய நிறுவனத்துடன் ஒப்பந்தம் கைச்சாத்தாகியிருக்கின்றது.

ஐக்கிய மக்கள் சுதந்திர முன்னணி அரசாங்கத்தின் ‘வட க்கின் வசந்தம்’ அபிவிருத்தித் திட்டத்தில் காங்கேசன் துறை வரையிலான ரயில் சேவையை மீண்டும் ஆரம்பிப்பது முக்கிய இடம் வகிக்கின்றது. மூன்று தசாப்தங்களுக்கு மேலாக நடைபெற்ற ஆயுத மோதலின் விளைவாகவே இந்த ரயில் சேவை நிறுத்தப் பட்டது. இச்சேவை நிறுத்தப்பட்டதால் வடபகுதி மக்கள் மிகுந்த பாதிப்புக்கு உள்ளாகினர். அவர்களின் அன்றாட வாழ்க்கை இதனால் சீர் குலைந்தது எனக் கூறலாம்.

பயங்கரவாதத்தின் விளைவாக வடக்கும் தெற்கும் மெய் நடப்பில் பிரிந்திருந்தன என்பதை நாம் ஏற்றுக் கொண்டாக வேண்டும். யுத்த களத்தில் புலிகள் தோற் கடிக்கப்பட்ட பின் வடக்கும் தெற்கும் அரசியல் ரீதி யாக ஒன்றிணைந்துள்ள நிலையில் உணர்வு ரீதியான ஒன்றிணைவுக்கான செயற்பாடு அரசாங்கத்தினால் ஒவ்வொன்றாக முன்னெடுக்கப்படுகின்றது. வடபகுதிக் கான புகையிரத சேவையை மீண்டும் ஆரம்பிப்பது இச் செயற்பாட்டில் பிரதான இடம் வகிக்கின்றது.

கொழும்புக்கும் காங்கேசன்துறைக்கும் இடையிலான புகையிரத சேவை மீண்டும் இடம்பெறுவதால் வட பகுதி மக்கள் மிகவும் நன்மை அடைவார்கள் என்பது வடபகுதிப் பாராளுமன்ற உறுப்பினர்களுக்குத் தெரியாததல்ல. யாழ்ப்பாணத்தையும் வன்னிப் பெருநிலப் பரப்பையும் வதிவிடமாகக் கொண்ட மக்களின் அன்றாட வாழ்வில் இச் சேவை சிறப்பான பலனை அளிக்கும் என்பது எல்லோரும் அறிந்த விடயம்.

ஆனால் இப்பிரதேசங்களைப் பிரதிநிதித்துவப் படுத்தும் தமிழ்த் தேசியக் கூட்டமைப்புப் பாராளு மன்ற உறுப்பினர்கள் இவ்விடயத்தில் மெளனம் சாதிப்பது புதிராக இருக்கின்றது. மக்களின் நாளாந்த வாழ்க்கையில் நன்மை பயக்கும் நிகழ்வுகள் இடம் பெறுவதை இவர்கள் விரும்பவில்லையா என்ற கேள்வி எழுகின்றது.

கொள்கை வேறுபாடுகள் இருப்பினும் மக்களுக்கு நன்மை பயக்கும் காரியங்கள் இடம்பெறும் போது ஆதரவளிப்பவர்களே உண்மையான மக்கள் பிரதிநிதிகள். வடபகுதி மக்கள் நன்மை பெறும் விடயங்கள் பற்றித் தமிழ்த் தேசியக் கூட்டமைப்புப் பாராளுமன்ற உறுப்பினர்கள் மெளனம் சாதிப்பது துரதிஷ்டமானது.

அன்றாட வாழ்வில் வடபகுதி மக்கள் பெறும் நன்மைகளையிட்டு அவர்களின் பிரதிநிதிகள் அக்கறை இல்லாதவர்களாக இருக்கின்ற போதிலும் தென்பகுதி மக்கள் தங்கள் அக்கறையை வெளிப்படுத்துவது மகிழ்ச்சியளிக்கின்றது. ஓமந்தை முதல் காங்கேசன் துறை வரையிலான பல ரயில் நிலையங்களைப் புனரமைப்பதற்கு உதவியளிக்கத் தென்பகுதி மக்கள் முன்வந்திருக்கின்றார்கள்.

இனப் பிரச்சினையின் தீர்வுக்கு அத்தியாவசியமான இன ஐக்கியத்தைத் தோற்றுவித்து வளர்ப்பதில் தென்பகுதி மக்களின் இப்பங்களிப்பு முக்கிய பாத்திரம் வகிக்கும் என்பதில் சந்தேகம் இல்லை. வடபகுதி மக்களும் இந்த வளர்ச்சிப் போக்குக்கு அமைவான விதத்தில் தங்கள் பிரதிபலிப்பை வெளிப்படுத்துவார்களென நம்புகின்றேம்.

(தினகரன்)