பதினேழாவது திருத்தம் மக்களின் உடனடித் தேவையல்ல

ஜனாதிபதி மஹிந்த ராஜபக்ஷவும் எதிர்க்கட்சித் தலைவர் ரணில் விக்கிரமசிங்ஹவும் சந்தித்து அரசிய லமைப்புத் திருத்தம் பற்றிப் பேசியதற்குப் பின்னர் ஐக்கிய மக்கள் சுதந்திர முன்னணியின் பிரதிநிதிகளுக்கும் ஐக்கிய தேசியக் கட்சியின் பிரதிநிதிகளுக்குமிடையே பேச்சு வார்த்தை நடைபெற்றமை பற்றிய செய்தி மக்களிடம் நம் பிக்கையைத் தோற்றுவித்தது.  அத்தியாவசியமாகத் தேவைப் படும் அரசியலமைப்பு மாற்றங்களுக்கு எதிர்க்கட்சியின் ஆதரவு கிடைக்கும் என்று மக்கள் நம்பினார்கள். ஆனால் ஐக்கிய தேசியக் கட்சிப் பிரதிநிதிகளின் செயற்பாடு மக்க ளின் நம்பிக்கையைத் தகர்ப்பதாக உள்ளது.

சில தினங்களுக்கு முன் வெளிவிவகார அமைச்சரைச் சந்தித்த ஐக்கிய தேசியக் கட்சிப் பிரதிநிதிகள் பதினேழாவது திருத்தம் அரசியலமைப்பில் இப்போது உள்ளவாறாக இருத்தல் வேண்டுமென வலியுறுத்தியிருக்கின்றார்கள். பதினேழாவது திருத்தம் எப்போதும் பிரச்சினைக்கு உரியதாகவே இருந்து வருகின்றது. மக்கள் விடுதலை முன்னணியின் கோரிக்கையின் பேரிலேயே பதினேழாவது திருத்தம் நிறைவேற்றப்பட்டது. அப்போது ஐக்கிய தேசியக் கட்சி பெரிய அளவில் அதற்கு ஆதரவு அளிக்கவில்லை. முதலில் திருத்தத்துக்கு எதிர்ப்புத் தெரிவித்த அக்கட்சி கடைசி நேரத்திலேயே பாராளுமன்றத்தில் ஆதரிப்பது எனத் தீர்மானித்தது.

ஐக்கிய தேசி யக் கட்சியின் கடைசி நேர மனமாற்றத்தை அறியாததால் அக்கட்சியின் நேச அணியாகச் செயற்பட்ட தமிழர் விடுதலைக் கூட்டணி பதினேழாவது திருத்தத்துக்கு எதிர்ப்புத் தெரிவித்துச் சபையிலிருந்து வெளியேறியதையும் இங்கு குறிப்பிடலாம். திருத்தத்தை எதிர்ப்பது என்ற ஐக்கிய தேசியக் கட்சியின் முன்னயை முடிவுக்கு அமை வாகவே தமிழர் விடுதலைக் கூட்டணி சபையிலிருந்து வெளியேறியது. பதினேழாவது திருத்தத்தைத் தயக்கத் துடன் ஆதரித்த ஐக்கிய தேசியக் கட்சி இப்போது அதைத் தீவிரமாக வலியுறுத்துவதற்கு அரசியல் நோக்கமே காரணம் எனக் கூறுவது தவறாகாது.

முக்கிய பதவிகளுக்கும் ஆணைக்குழுக்களுக்கும் அரசியல் சார்பற்றவர்களை நியமிப்பதற்குப் பதினேழாவது திருத்தம் நடைமுறையில் இருக்க வேண்டியது அவசியம் என்பதை ஏற்றுக்கொள்வது கடினம். இத் திருத்தத்தின் கீழ் அரசியல் தலைவர்களே நபர்களைச் சிபார்சு செய்கின்றார்கள். ஏதேனுமொரு விதத்தில் தங்களுக்குச் சார்பானவர்களையே அரசியல் கட்சிகள் சிபாரிசு செய்கின்றன. எனவே, பதினேழாவது திருத்தத்தின் கீழ் ஆணைக்குழுக்களுக்கு நியமிக்கப்படுபவர்கள் எல்லோரும் எந்த விதத்திலும் அரசியல் சார்புநிலை இல்லாதவர்களாக இருப்பதில்லை.

பதவியிலுள்ள அரசாங்கம் மக்களின் அங்கீகாரம் பெற்ற அதன் வேலைத் திட்டங்களை நடைமுறைப்படுத்துவதற்குச் சாதகமானவர்களை இனங்கண்டு நியமிப்பதும் அவற்றை நடைமுறைப்படுத்துவதற்குக் குந்தகமான சூழ்நிலைகளை அகற்றும் செயற்பாடுகளில் ஈடுபடுவதும் தவறானவையல்ல. இக் கோட்பாட்டின் அடிப்படையிலேயே, அமைச்சுச் செயலாளர்களாக நிர்வாக சேவை அதிகாரிகளையே நியமிக்கும் நடைமுறையை ஐக்கிய தேசியக் கட்சி மீறி முன்னுதாரணத்தை ஏற்படுத்தியது. மக்களின் ஆணையைச் செயற்படுத்துவதற்குச் சாதகமற்ற சூழ் நிலையை அரசியல் சார்பின்மை எனக் கூறிக்கொண்டு எந்த வடிவத்திலாவது தோற்றுவிப்பது மக்கள் விரோத செயற்பாடாகும்.

அரசியல் தேவையொன்றுக்காக நிறைவேற்றப்பட்ட பதினேழாவது திருத்தத்தை ஐக்கிய தேசியக் கட்சி இன்று அரசியல் நோக்கத்துக்காகப் பயன்படுத்துவது நியாயமானதல்ல. மக்களின் உடனடி நலனுக்கும் ஜனநாயக ரீதியான எதிர்பார்ப்புகளுக்கும் ஏற்ற வகையிலான அரசியல மைப்புத் திருத்தங்களே இன்றைய தேவை.

(தினகரன்)