தமிழர் பிரச்சினையை இலங்கை அரசு கையாளும் முறை தொடர்பில் மன்மோகன்சிங் தெரிவித்த சர்ச்சைக்குரிய கருத்துகள்

இந்தியப் பிரதமர் மன்மோகன் சிங் கடந்த வாரம் புதுடில்லியில் சிரேஷ்ட பத்திரிகை ஆசிரியர்கள் உடனான சந்திப்பின் போது பங்களாதேஷ் தொடர்பாக தெரிவித்த கருத்துகள் அசாதாரணமான விதத்தில் டாக்காவிலும் டில்லியிலும் கவனத்தை ஈர்த்திருந்தன.ஆனால், இலங்கை தொடர்பாக அவர் நேரடியாகத் தெரிவித்த அபிப்பிராயங்கள் பரிசீலனைக்கு உட்படுத்தும் தன்மையைக் கொண்டவையாக இருப்பதாக பிஸ்னஸ் ஸ்டான்டர்ட் பத்திரிகை குறிப்பிட்டுள்ளது.

 
பங்களாதேஷ் தொடர்பான மன்மோகன் சிங்கின் கருத்துகள் டாக்காவில் பரந்தளவில் மகிழ்ச்சியின்மையை ஏற்படுத்தியிருந்ததுடன், அதனைத் தொடர்ந்து இந்தியாவானது பாதிப்பைக் கட்டுப்படுத்தும் நடவடிக்கைகளில் ஈடுபட வேண்டியிருந்தது. அத்துடன், நேற்று முன்தினம் செவ்வாய்க்கிழமை பங்களாதேஷ் பிரதமர் ஷேக் ஹசீனாவுடன் தொலைபேசியில் பிரதமரே தொடர்புகொள்ள வேண்டிய நிலைமையும் ஏற்பட்டது. அதேசமயம், இதற்கு முற்றிலும் முரண்பாடான விதத்தில் கொழும்பில் நிசப்தமான நிலைமை காணப்படுகிறது.

இலங்கையிலுள்ள தமிழ் மக்கள் இரண்டாம் தரப் பிரஜைகளாக நடத்தப்படுகின்றார்கள் என்பது தொடர்பாக பிரதமர் தெரிவித்திருந்த கருத்துகள் தொடர்பாக கொழும்பில் கடும் அமைதி காணப்படுகிறது. 2009 இல் இலங்கையின் உள்நாட்டு யுத்தம் முடிவுக்கு வந்ததைத் தொடர்ந்து முதற்தடவையாக மகிந்த ராஜபக்ஷவின் அரசாங்கத்தின் மீது பகிரங்கமாக இந்தியப் பிரதமர் விமர்சனங்களைத் தெரிவித்திருந்தார். சிங்கள இன மேலாதிக்கவாதம் யதார்த்தமான நிலைமை என்றும் கடும் போக்காளர்கள் தமிழ் மக்கள் சம உரிமையுடனும் கௌரவத்துடனும் வாழ்வதற்கு இடமளிக்க மறுக்கின்றார்கள் என்றும் அவர் கூறியிருந்தார். அதேசமயம், இலங்கையின் நிலைவரத்தை நேரடியாக தமிழ் நாட்டுடன் தொடர்புபடுத்தியிருந்தார். தமிழக அரசாங்கத்தை எமது பக்கத்தில் வைத்திருப்பது எமக்குச் சவாலான விடயமென்பதை அவர் ஏற்றுக்கொண்டிருந்தார்.

இலங்கை தொடர்பான இந்தியாவின் கொள்கை தொடர்பாக விபரித்த மன்மோகன் சிங் கடினமான சமநிலை என அதனை வர்ணித்திருந்தார். இலங்கையின் இன மேலாதிக்கவாதம் தொடர்பாக தமிழ்நாட்டில் காணப்படும் பிரதிபலிப்புகள் களத்திலுள்ள யதார்த்த நிலையே என்பதை அவர் குறிப்பிட்டிருந்தார். இலங்கை தொடர்பாக ஜூன் முற்பகுதியில் தமிழக சட்ட சபையில் நிறைவேற்றப்பட்ட ஏகமனதான தீர்மானத்தை உதாரணமாக அவர் குறிப்பிட்டிருந்தார்.
ஜெயலலிதா அரசாங்கத்தின் தீர்மானத்தின் பிரகாரம் இலங்கை யுத்தத்தில் ஏற்பட்ட பாரியளவிலான பொதுமக்கள் மரணங்களுக்குப் பொறுப்பானோரை போர்க்குற்றவாளிகள் என பிரகடனப்படுத்துவதற்கு ஐ.நா.வுக்கு அழுத்தம் கொடுப்பதற்கான உடனடி நடவடிக்கைகளை மத்திய அரசாங்கம் எடுக்க வேண்டியது அவசியம் என்பதாகக் காணப்படுகிறது. அத்துடன் இடம்பெயர்ந்த தமிழர்களுக்கு போதியளவு புனர்வாழ்வளிக்கப்படும் வரை கொழும்பின் மீது பொருளாதாரத் தடைகளை விதிக்க வேண்டுமென்ற தீர்மானத்தையும் தமிழக அரசு நிறைவேற்றியிருந்தது.

இந்தத் தீர்மானமானது இலங்கை மீதான நேரடியான தாக்குதலாக உள்ளது. உள்நாட்டு யுத்தம் முடிவுக்கு வந்த உடனடியாகவே பாரதூரமான மீறல்கள் தொடர்பாக சிவில் உரிமைக் குழுக்களால் இலங்கை இராணுவம் குற்றஞ்சாட்டப்பட்டிருந்தது. வெள்ளைக்கொடியுடன் சரணடைய வந்தவர்களை படுகொலை செய்த குற்றச்சாட்டுகளும் இதில் அடங்கியிருந்தன.
பிரிட்டனின் சனல் 4 அண்மையில் வெளியிட்ட ஆவணப்படமும் புலிகள் மற்றும் தமிழ்ப் பொதுமக்கள் வல்லுறவுக்குட்படுத்தப்பட்டமை போன்ற பிரதிமைகளைக் கொண்டவையாக உள்ளன. இந்தக் குற்றச்சாட்டுகள் தொடர்பாக கருத்துத் தெரிவிப்பதை டில்லி தவிர்த்துக்கொண்டிருந்தது. ஜூன் 8 இல் தீர்மானம் நிறைவேற்றப்பட்ட போது இலங்கைத் தமிழர்கள் இரண்டாந்தரப் பிரஜைகளாக இருப்பதாக ஜெயலலிதா விபரித்திருந்தார். அதே வசனத்தைக் கடந்த வாரம் பத்திரிகை ஆசிரியர்களுடனான சந்திப்பின் போது பிரதமர் மன்மோகன் சிங்கும் பயன்படுத்தியிருந்தார். கொழும்புக்கும் சென்னைக்குமிடையிலான மன்மோகன் சிங்கின் விபரமான தொடர்புகள் பற்றிய விபரணமானது உண்மையில் புதிய அரசியல் சமன்பாடு புதுடில்லிக்கும் சென்னைக்குமிடையில் ஏற்பட்டுக்கொண்டிருக்கின்றது என அவதானிகள் நம்புவதற்கு வழிவகுத்திருக்கிறது. 2ஜி அலைக்கற்றை ஒதுக்கீட்டு விடயத்தில் தி.மு.க. தொடர்புபட்டிருப்பதான விடயமானது பிரதமருக்கு சங்கடத்தை ஏற்படுத்தியிருக்கின்றது என்று கூறப்படுகிறது. கௌரவம், நிதித்துறையில் நேர்மை என்பனவற்றில் உயர்ந்த மதிப்பைப் பெற்றவராக பிரதமர் காணப்படுகிறார்.

தேர்தலின் பின்னர் தி.மு.க. கணிசமான அளவுக்கு பலவீனமடைந்திருக்கின்ற போதிலும் மத்திய அரசில் தி.மு.க.வின் 18 எம்.பி.க்கள் காங்கிரஸ் தலைமையிலான அரசாங்கத்திற்கு ஆதரவளித்து வருகின்றன. ஜெயலலிதாவின் அ.தி.மு.க.விற்கு ஒன்பது எம்.பி.க்கள் மட்டுமே உள்ளன. ஆயினும் பொதுமக்களின் மனதை நன்கு அறிந்துள்ள பிரதமர் இணைந்து செயற்படுவது குறித்து சுட்டிக்காட்டுவார் என கருதப்படுகிறது.
ஜெயலலிதாஜியுடன் சிறப்பான ஒத்துழைப்பை நான் கொண்டிருக்கிறேன். தமிழக சட்டசபையில் எத்தகைய தீர்மானங்கள் நிறைவேற்றப்பட்டாலும் இந்தியஇலங்கை உறவுகளைச் சமாளிக்கும் யதார்த்த நிலைமைகள் மற்றும் சிக்கலான தன்மைகள் குறித்து ஜெயலலிதா முழுமையான பிரக்ஞையுடன் இருப்பதை நான் அறிந்துள்ளேன் என்று மன்மோகன் சிங் கூறியுள்ளார்.

உண்மையில் இலங்கை தொடர்பான பிரதமரின் கருத்துகள் பங்களாதேஷ் தொடர்பான அவரின் கருத்துகளுக்கே முரண்பட்டவையாகக் காணப்படுகின்றன. கொழும்பில் குறிப்பிடத்தக்களவுக்குக் காணப்படும் மௌனமானது ஊடகங்களை சத்தமற்றதாக்கும் பெறுபேறாக இருப்பதாக அவதானிகள் குறிப்பிட்டுள்ளதாக பிசினஸ் ஸ்டான்டர் பத்திரிகை தெரிவித்துள்ளது.

இதேவேளை, விடுதலைப் புலிகளின் மறைவானது ஏதோ ஒரு விதத்தில் நல்லதெனவும் ஆயினும் தமிழ் மக்களின் பிரச்சினை மறைந்துவிடவில்லையெனவும் மன்மோகன் சிங் கூறியிருந்தார். தமிழ் மக்கள் நியாயபூர்வமான கவலைகளைக் கொண்டுள்ளனர். தாங்கள் இரண்டாந்தரப் பிரஜைகளான மட்டத்திற்குத் தாழ்ந்த நிலையில் இருப்பதாக அவர்கள் உணர்கின்றனர் என்றும் பிரதமர் கூறியிருந்தார்.

 
இலங்கை தொடர்பான தனது மௌனத்தை கலைத்ததன் மூலம் ஜெயலலிதாவின் அரசியல் ரீதியான கோரிக்கைக்கு பிரதமர் இடமளித்துள்ளதாகவும் இந்த விடயத்தில் அமெரிக்காவின் வரையறைகளைப் போன்றதொன்றைக் கொண்டிருப்பதாகவும் ஆய்வாளர்கள் கூறியுள்ளனர்.
இலங்கை யுத்தத்தின் முடிவில் இலங்கை இராணுவத்தின் உரிமை மீறல்கள், குற்றச்சாட்டுகள் தொடர்பாக இந்தியா ஏன் நிராகரிக்கும் தன்மையைக் கொண்டிருந்தது என்பது பற்றி தம்மை அடையாளம் காட்ட விரும்பாத இந்திய அதிகாரிகள் கருத்துத் தெரிவித்திருந்தனர். 1991 இல் ராஜீவ் காந்தியைப் படுகொலை செய்ய உத்தரவிட்டவரான பிரபாகரனைக் கொல்வதில் வெற்றியடைந்த ஒரேயொரு இலங்கைத் தலைவர் ராஜபக்ஷ என்பதனால் உரிமை மீறல் குற்றச்சாட்டுகள் தொடர்பாக இந்தியா நிராகரிக்கும் மனப்பான்மையைக் கொண்டிருந்ததாக அவர்கள் கூறியுள்ளனர். யுத்தத்தின் விலையாக தமிழ்ப் பொதுமக்கள் கொல்லப்பட்டமை அதிகளவாக இருந்த போதிலும் மற்றும் கடந்த வருடம் ஜனாதிபதி தேர்தலை ராஜபக்ஷ முன்கூட்டியே நடத்தி வெற்றிபெற்றிருந்த போதிலும் தமிழ் மக்களின் பிரச்சினையைக் கௌரவமான முறையில் தீர்த்து வைக்குமாறு ராஜபக்ஷவிற்கு பகிரங்கமாக அழுத்தம் கொடுக்க டில்லி நிராகரித்திருந்ததை அவர்கள் குறிப்பிட்டுள்ளனர். எவ்வாறாயினும் தமிழர்களுக்கு அரசியல் அதிகாரத்தைப் பகிர்ந்தளிக்குமாறு கொழும்பை திரைமறைவில் தூண்டுவதற்கு டில்லி முயற்சித்ததாக அவர்கள் ஏற்றுக்கொண்டுள்ளனர்.
தனியான சட்டவாக்க சபைக்கு இடமளிக்கும் அரசியலமைப்பின் 13ஆவது திருத்தத்தில் மாற்றத்தைக் கொண்டுவருவது உட்பட அதிகாரப் பகிர்விற்குத் தூண்ட திரைமறைவில் டில்லி முயற்சித்தது.

இலங்கையில் தமிழ்நாட்டில் தீர்மானம் நிறைவேற்றப்பட்ட ஒரு சில நாட்களுக்குள் இந்திய தேசிய பாதுகாப்பு ஆலோசகர் சிவ்சங்கர் மேனன் கொழும்புக்கு விஜயம் மேற்கொண்டார். சகல சமூகங்களும் சௌகரியமாக வாழ்வதற்கான ஏற்பாட்டிற்கு இலங்கை துரிதமாக வருவது சிறப்பானதென அவர் கூறியிருந்தார். ஆனால், இந்த ஏற்பாடானது 13 ஆவது திருத்தமா அல்லது 13 பிளஸ்ஸா என்பது குறித்து கருத்துத் தெரிவிக்க அவர் மறுத்திருந்தார்.
தமிழ் மக்களின் பாதுகாப்பற்ற தன்மை மற்றும் அச்சம் தொடர்பாக எதனையாவது செய்யுமாறு அவர் ராஜபக்ஷவிற்கு கூறியிருப்பார் என்பது தெளிவானதாக இருக்கின்ற போதிலும் 1987 இல் ராஜீவ்ஜயவர்தன உடன்படிக்கை மேற்கொள்ளப்பட்ட காலம் முதல் எதனையாவது செய்வதற்கு இந்தியா முயற்சித்துக்கொண்டு வருகின்றது என்பது தெளிவான விடயமாகும். ஆனால், ராஜபக்ஷ முன்னகர்வை மேற்கொண்டதாகத் தென்படவில்லை. அரசியல் தீர்வை தமிழ் மக்களுக்கு வழங்குமாறு இந்தியாவிடமிருந்த அழுத்தமில்லை. அல்லது 13ஆவது திருத்தமோ அல்லது 13 ஆவது பிளஸ்ஸோ தொடர்பாகவும் குறிப்பிடப்படவில்லை என்று ராஜபக்ஷ பத்திரிகைகளுக்குத் தெரிவித்திருந்தார்.

ஜெயலலிதாவின் தீர்மானம் குறித்து இலங்கைப் பாராளுமன்றத்தில் கேள்வி எழுப்பப்பட்ட போது, நேரடி பதிலளிக்க அரசாங்கம் தவிர்த்துக்கொண்டது. நாட்டிற்கு எதிரான தாக்குதலை ஆரம்பிக்க முயற்சிகளை மேற்கொண்டிருக்கும் பகைமையுள்ள சக்திகளினால் இலங்கைக்கெதிராக சகல விமர்சனங்களும் முன்னெடுக்கப்படுவதாக வெளிவிவகார அமைச்சர் பீரிஸ் கூறியிருந்தார்.