பெத்த மகனைப் பார்க்கப் போக முடியலை!

செங்கல்பட்டு முகாமில் தீராத சோகம்..

செங்கல்பட்டு சிறப்பு முகாம் மீண்டும் அனலில் தகிக்கிறது. இந்த முகாமில் 30 இலங்கைத் தமிழர்களும் மூன்று நைஜீரிய கைதிகளும் அடைக்கப்பட்டு உள்ளனர். முகாமில் இருக்கும் இலங்கை அகதிகள், தங்களை விடுவிக்கக்கோரி உண்ணாவிரதம் மேற்கொள்வதும், 'விரைவில் விடுவிக்க ஏற்பாடு செய்கிறோம்’ என்று அதிகாரிகள் வாக்குறுதி கொடுப்பதும் அடிக்கடி நடப்பதுதான். கடந்த உண்ணாவிரதத்தின்போது, '45 நாட்களில் தீர்வு கிடைத்துவிடும்’ என்று அதிகாரிகள் நம்பிக்கையுடன் கூறி இருந்தார்கள். அந்த அவகாசம் முடிந்துவிட்டதால், கடந்த 15-ம் தேதியில் இருந்து மீண்டும் உண்ணாவிரதத்தைத் தொடங்கிவிட்டார்கள். போராட்டம் நடத்து​பவர்களில் பலருக்கு உடல்நலக் குறைவு ஏற்பட்​டதால், முகாமுக்கு மருத்துவர்கள் அழைத்து வரப்பட்டார்கள். கடந்த 21 மற்றும் 22-ம் தேதிகளில் உடல் நிலை பாதிக்கப்பட்டவர்கள் மட்டும் செங்கல்பட்டு அரசு மருத்துவமனைக்கு அனுப்பப்பட்டார்கள்.

போராடும் இலங்கைத் தமிழர்களுக்கு ஆதரவாக கடந்த 22-ம் தேதி செங்கல்பட்டு பழைய பேருந்து நிலையம் அருகே பல்வேறு இயக்கத்தினரும் சேர்ந்து போராட்டத்தைத் தொடங்கினார்கள்.

முதலாவதாக மைக் பிடித்த வன்னியரசு, ''ஜெய​லலிதா அரசாக இருந்தாலும் சரி, கருணாநிதி அரசாக இருந்தாலும் சரி... எல்லாருமே இரட்டை வேடம் போடுகிறவர்கள்தான். நாம் யாருக்கும் அஞ்சாமல் தொடர்ந்து போராடுவோம்'' என்று கோபத்துடன் ஆரம்பித்துவைத்தார்.

அடுத்துப் பேசிய மல்லை சத்யா, ''இலங்கைப் போரின் சித்ரவதையைத் தாங்க முடியாமல் தாய்த் தமிழகத்துக்கு வந்தார்கள். அவர்கள் மீது பொய்யான வழக்குகள் புனைந்து, சிறப்பு முகாம் என்ற பெயரில் செயல்படும் சித்ரவதை முகாம்களில் அடைத்துவைத்துள்ளனர். அவர்களை விடுவிப்பதாக பலமுறை மாநில அரசாங்கம் வாக்குறுதி கொடுத்தும், அதனை செயல்படுத்தவில்லை. அதனால்தான் தங்கள் உயிரை மாய்த்துக்கொள்ளவும் அஞ்சாமல், அற வழியில் போராடி வருகின்றனர். உடனடியாக அவர்களை விடுதலை செய்யவேண்டும் என்று மாநில அரசாங்கத்தைக் கேட்டுக்கொள்கிறோம்'' என்று கோரிக்கை வைத்தார்.

அடுத்துப் பேசிய தியாகு, ''ஈழத் தமிழர்கள், பல்வேறு நாடுகளிலும் அகதிகளாக வசிக்கின்றனர். தமிழ்நாட்டைவிட அதிகமாக ஈழத் தமிழர்கள் கனடாவில் வசிக்கிறார்கள். அங்கே ஈழத் தமிழர்களுக்கான அகதி முகாம் என்று ஒன்றுகூட இல்லை. தமிழ்நாட்டிலேதான் அகதிகள் முகாம் இருக்கின்றன. அரைகுறை சுதந்திரத்தோடு, மனித உரிமைகள் மறுக்கப்பட்டு வாழும் நிலை இங்கேதான் இருக்கிறது'' என்று கொதித்தார்.

கண்டனக் கூட்டத்தை முடித்துவிட்டு வந்தவர்கள் அனைவரும், சிகிச்சை பெற்று வரும் அகதிகளைப் பார்க்க செங்கல்பட்டு அரசு மருத்துவமனைக்குச் சென்றனர். தங்களுக்கான ஆதரவைக் கண்டு நெகிழ்ந்து போன ஈழத் தமிழர் செல்வராஜ், ''கியூ பிராஞ்ச்ல இருக்கறவங்க என்னை பொய் கேஸ் போட்டு இங்கே அடைச்சுவெச்சு இருக்காங்க. இங்கே தண்ணீர்கூட பற்றாக்குறையாத்தான் இருக்குது. அரசு கொடுக்குற 70 ரூபாய், எங்க சாப்பாட்டுக்கே பத்தலைங்க. எனக்கு பெத்த மகனைப் பார்க்கணும்; குடும்பத்தைப் பார்க்கணும்; குடும்பத்தோட ஒண்ணு சேரணும்'' என்று போராட்டக் குழுவினரின் கைகளைப் பற்றிக்கொண்டு தேம்பித் தேம்பி அழுதார்.

முகாமில் உண்ணாவிரதம் இருப்பவர்களைப் பார்க்க வந்த தா.பாண்டியனுக்கு அனுமதி மறுக்கப்​படவே, மருத்துவமனைக்குச் சென்று சிகிச்சையில் இருந்தவர்களை மட்டும் பார்த்துவிட்டு சென்றார். அன்று இரவு 11 மணிக்கு வைகோவும் வந்து பாதிக்கப்​பட்டவர்களைக் கண்டு ஆறுதல் கூறினார். 28-ம் தேதி சீமானும், வேல்முருகனும் வந்து ஆறுதல் கூறினர். ''எங்களை விடுதலை பண்றதுக்கு ஏற்பாடு செய்யுங்க'' என்று கதறியபடி கேட்டார்கள் ஈழத் தமிழர்கள்.

ஈழத் தமிழர்களை தமிழகமே மிதிக்கும் கொடுமை​யை என்னவென்று சொல்வது?

- பா.ஜெயவேல்  

இவர்கள்தான் அந்த 30 பேர்!

இலங்கை நாதன், சௌந்தர்ராஜன், நாகராசா, நர்மதன், சுதாகர், சதாசிவம், சிவக்குமார், அன்பு, அலெக்ஸ், யோகநாதன், சதீஷ்குமார், சந்திரகுமார், விக்கிரம சிங்கம், சதாசிவம், நந்தகுமார், செல்வராஜ், தனுஷன், சமநாகரன், சுதர்சன், வேந்தன், பிஸ்மி முகமத், ரமேஷ், பராபரன், செந்தூரன், சதீஷ்குமார்(2), சேகர், ஜெகன், ஜெயபாலன், சிவா, ரைஸ் உருதின்.