ஜிம்மி கார்ட்டரின் பார்வையில் இன்றைய அமெரிக்கா

மனித உரிமைகள், தனியார் சுதந்திரம் உள்ளிட்ட ஏனைய அடிப்படை உரிமைகள் குறித்த அமெரிக்காவின் இன்றைய போக்குகள் ஆபத்தான கட்டத்தை எட்டியுள்ளதாக அந்நாட்டின் முன்னாள் ஜனாதிபதி ஜிம்மி கார்ட்டர் கவலை வெளிப்படுத்தியுள்ளார். மனித உரிமைகள், ஜனநாயகம் போன்றவற்றில் உலகின் உச்சக்கட்ட நம்பிக்கையை வென்றிருந்த அமெரிக்கா இன்று எல்லா வகையான மனித, தனிப்பட்ட, மத உரிமைகளை மீறி நடப்பதாகவும் ஜிம்மி கார்ட்டர் வேதனைப்படுவதை அவரது கருத்துக்களிலிருந்து உணர முடிகிறது. 2002 ஆம் ஆண்டு சமாதானத்துக்கான நோபல் பரிசை வென்ற கார்ட்டர் 32 வருடங்களுக்கு முன் அமெரிக்காவின் ஜனாதிபதியாக இருந்தவர். 1980 ஆம் ஆண்டு அவர் வெள்ளை மாளிகையைவிட்டு வெளியேறி அரசியலிலிருந்து ஓய்வு எடுத்துக்கொண்டார்.

அன்றைய காலங்களில் அமெரிக்காவுக்கிருந்த மதிப்பு, நம்பிக்கை கெளரவம் என்பன இன்று அடியோடு இல்லாமல் போயுள்ளது. இவ்வாறான நிலைக்கு அமெரிக்காவை இட்டுச் சென்றது வொஷிங்டனின் வெளிநாட்டுக் கொள்கைகளே. பொருளாதார வளர்ச்சியை மையமாகக் கொண்ட திட்டங்களல்லாமல் இராணுவ நலனை நோக்கிய பார்வைகள் உலகெங்கும் அமெரிக்காவுக்கு எதிரிகளையுண்டாக்கியுள்ளது. பிழையான புலனாய்வுகள், எல்லோரையும் அடிபணியவைக்கும் மனோபாவம் ஒரு தலைப்பட்சமான முடிவுகளே இவற்றுக்கு காரணமென்றும் ஜிம்மிகார்ட்டர் விளக்குகிறார். உலகின் எந்தவொரு மூலையிலும் பிரபலமான மக்கள் எழுச்சிகள் தலைதூக்கியபோது அமெரிக்கா பலவீனமடையாமல் நிதானத்துடன் செயற்பட்டு உறுதியான தீர்மானங்களை எடுக்கும்.

இவை ஒருவேளை தோல்வியில் முடிந்தாலும் அமெரிக்காவுக்கு அவமானத்தையோ அழிவையோ தேடித்தந்ததில்லை. நியூயோர்க் டைம்ஸ் பத்திரிகையில் அண்மைக் காலமாக அமெரிக்கா செய்த பாரிய பிழைகள் சம்பந்தமாக வெளியான ஆய்வுக்கட்டுரைகளையும் ஜிம்மிகார்ட்டர் கவனத்திற் கொண்டுள்ளார். அபு கைறாப் சிறைச்சாலையில் ஈராக்கியர்கள் துன்புறுத்தப்பட்டமை, குவான்தமோ சிறைச்சாலையில் தடுத்து வைக்கப்பட்டு சித்ரவதைக்குள்ளாகும் தலிபான் அல் கைதா சந்தேக நபர்கள் இதுபோல அமெரிக்க இராணுவம் நிலைகொண்டுள்ள நாடுகளில் நடைபெறும் அட்டகாசங்களால் உலக நாடுகளிலிருந்து அமெரிக்கா தனிமைப்படுத்தப்படுவதையும் ஜிம்மி கார்ட்டர் கோடிட்டுக் காட்டத் தவறவில்லை. ஈராக்கிலிருந்த அபு கைறாப் சிறைச்சாலையில் கைதிகள் நிர்வாணமாக்கப்பட்டு மோப்ப நாய்களால் கடித்துக் குதறப்பட்டமையும் பெண் கைதிகளை நிர்வாணமாக்கி ஆண்களுக்கு முன்னால் மலம் கழிக்க வைத்ததெல்லாம் அமெரிக்காவின் அண்மைக்கால கொடூரங்கள்.

இதேபோன்று குவான்தனமோ சிறையில் கைதிகளின் தலைகளை மூச்சுத்திணறும்படி நீருக்குள் அமிழ்த்தி மின்சாரத்தை பாய்ச்சிய கொடூரங்களெல்லாம் மனித வரலாறுகளால் மறக்கப்படாதவை. இத்தனை கொடிய சித்திரவதைகளால்தான் இன்று அமெரிக்கா அகெளரவமான நிலைக்குப்போய் கேவலமடைந்துள்ளது. சமாதானத்தின் காவலன். ஜனநாயகத்தின் ஏகன் என்ற அமெரிக்காவின் கெளரவங்கள் காற்றில் கரைந்துவிட்டது. ஆப்கானிஸ்தான், ஈராக், பாகிஸ்தான், பலஸ்தீன் போன்ற நாடுகளில் அமெரிக்கா இன்று செய்பவையும் ஈரான் நைஜீரியா சீனா, சிரியா, யெமன் உள்ளிட்ட நாடுகளில் செய்யத் துடிக்கின்ற காரியங்களுமே அமெரிக்காவை ஆபத்தில் மாட்டியுள்ளது.

2001ஆம் ஆண்டு அமெரிக்காவின் இரட்டைக் கோபுரம் தாக்கப்பட்டதையடுத்து அமெரிக்கா எடுத்துக்கொண்ட கோலம் உலக பொலிஸ்காரனிலிருந்து உலக சண்டியனாக்கிவிட்டது. கடந்த ஒரு தசாப்த காலமாகத்தான் கடுமையான தவறுகளும் மோசமான நடத்தைகளும் அமெரிக்காவில் கட்டவிழ்த்து விடப்பட்டுள்ளன. நவீன கருவிகளைக் கொண்டு ஒட்டுக்கேட்டல், நவீன ஒலி, ஒளிப்பதிவு, எதிரிகளின் மறைவிடங்களைப் படம் பிடிக்கும் ஆளில்லா விமானம் என்பன அமெரிக்காவின் எல்லை தாண்டிய தனி மனித உரிமை மீறல்கள் என்கிறார் முன்னாள் ஜனாதிபதி ஜிம்மி கார்ட்டர். இதன் விளைவாக உலகில் எந்த தேசத்தில் அமைதிக்கான மாநாடு, உரிமை, சுதந்திரம், நாடுகளின் இறைமை போன்ற கூட்டங்கள், கருத்தரங்குகள், மாநாடுகளில் அமெரிக்காவால் எவ்வித கருத்துக்களையும் முன்வைக்க முடியாமலுள்ளது. முன்னாள் ஜானதிபதி ஜோர்ஜ் புஷ்ஷ¤டைய நிர்வாகத்திலே இவ்வாறான மனித உரிமைக்கெதிரான இராணுவ செயற்பாடுகள் எல்லை தாண்டியதாகவும் இன்று பராக் ஒபாமாவின் நிர்வாகத்தில் இவை தொடர்வதையும் காண முடிகின்றது. வெள்ளை மாளிகையின் இவ்வாறான போக்குகளால் அமெரிக்காவின் எதிரிகளின் எண்ணிக்கை நாளாந்தம் பெருகிச் செல்கின்றது.

பழிவாங்க துடிக்கும் எத்தனையோ உள்ளங்கள் சந்தர்ப்பத்துக்காக காத்துக்கொண்டிருக்கிறன. இதனால் அமெரிக்கர் சென்ற இடமெல்லாம் கடத்தப்படுகின்றனர். காணாமல் போகின்றனர். பணயக் கைதியாக்கப்படுகின்றனர். அமெரிக்க மக்கள் சொத்துகளுக்கு போதுமான பாதுகாப்பு ஏற்பாடுகளை அமெரிக்காவிலே செய்ய முடியும் அவையும் இன்றைய காலகட்டங்களில் கேள்விக்குள்ளாகியுள்ள நிலையில் வெளிநாடுகளிலுள்ள அமெரிக்கர்களின் நிலையென்ன. ஆசியா ஐரோப்பா, அமெரிக்கா அவுஸ்திரேலிய கண்டங்களிலுள்ள அமெரிக்கர்களையும் இங்கு தொழிலுக்காகவும் சுற்றுலாவுக்காகவும் செல்லும் அமெரிக்கர்களையும் எவ்வாறு பாதுகாப்பது, பத்திரமாகக் கொண்டுவந்து சேர்ப்பது. இந்நிலைமையும் போக்கும் நீடித்தால் இப்போதுள்ளதைவிட வெளிநாடுகளில் குறிப்பாக இஸ்லாமிய நாடுகளில் வாழும் அமெரிக்கர்களின் நிலைமைகள் சிக்கலுக்குள்ளேயே முடியும். எனவேதான் வெளிநாடுகளில் அமெரிக்கா முன்னெடுக்கும் இ¡ணுவ நடவடிக்கையின் உபாயங்களை மீளாய்வு செய்ய வேண்டியுள்ளது.

இந்தாண்டு மாத்திரம் ஆப்கானிஸ்தானில் 30 வான்தாக்குதல்கள் நடத்தப்பட்டுள்ளன. இதில் உடல் சிதறி பலியான பெண்கள். முதியோர், சிறுவர்களின் எண்ணிக்கைகள் வேண்டுமென்றே மறைக்கப்படுவதுண்டு. ஆகாய மார்க்கமான தாக்குதலில் பொதுமக்களின் இழப்புகள் தவிர்க்க முடியாதது என்பதைக் கொண்டு வான் தாக்குதல்களை நியாயப்படுத்தினாலும் அதே வேளை பொதுமக்களின் எதிர்ப்பை இது பெரிதும் சம்பாதிக்கிறது. இவைகைள அடியோடு இல்லாமல் செய்து அமெரிக்காவின் அந்தஸ்து, கெளரவங்களை முன்னரிருந்த நிலைக்கு கொண்டுவர வேண்டுமென்கிறார் ஜிம்மி கார்ட்டர்.

பெரும்பான்மையான மக்களின் நிலைப்பாட்டோடு ஒன்றிச்செல்லல் மத அமைப்புகள், நம்பிக்கைகளை கெளரவித்தல், இராணுவ நலன்களுக்கான செயல்பாடுகளை குறைத்தல், பிராந்திய வல்லரசு நாடுகளின் உறவை பேணல் போன்ற முக்கியமான கொள்கைகளை உடனடியாக கடைப்பிடிக்க வேண்டும் என்கிறார் சமாதான பரிசை வென்ற ஜிம்மி கார்ட்டர்.

(தமிழ்நேசன்)