தமிழ்த் தேசியத்தை வைத்து பத்திரிகை வியாபாரம் செய்வதை இனியும் அனுமதிக்க முடியுமா?

ஜனாதிபதி, பாதுகாப்புச் செயலாளர் மற்றும் அரசாங்கத்திலுள்ள அமைச்சர்களையும், அரசின் தீர்வு முயற்சிகளையும், அபிவிருத்தித் திட்டங்களையும் கண்மூடித்தனமாகவும், பொய் கலந்த கற்பனையான கருத்துக்களுடனும் விமர்சித்துவரும் யாழ். கொழும்பு இணைந்த இரு பத்திரிகைகள் இன்று அதே அரசாங்கத்தின் கீழ்வரும், திணைக்களங்கள், வங்கிகள், நிறுவன விளம்பரங்களை பல மில்லியன் ரூபாய்களுக்குப் பக்கம் பக்கமாக பெற்றுவருவது மட்டுமல்லாது பாதுகாப்புச் செயலாளர் உட்பட முக்கிய பல அமைச்சர்களின் பேட்டிகளையும் பக்கம் பக்கமாகப் பிரசுரிக்கும் அளவிற்கு இந்த நாட்டில் இன்றைய அரசாங்கத்தினால் ஊடகச் சுதந்திரம் வழங்கப்பட்டுள்ளது.

இதே நிறுவனம் விடுதலைப் புலிகள் இருந்த காலத்தில் அரசாங்கத்தின் விளம்பரங்களைப் பெற்றுக் கொள்வதில்லை எனும் கொள்கையைக் கொண்டிருந்தது மட்டுமல்லாது அரசாங்க அமைச்சர்கள் மற்றும் முக்கியஸ்தர்கள் எவரையும் பேட்டி காண்பதையும் தவிர்த்து வந்தது. ஜனாதிபதிக்கும் அவரது தலைமையிலான அரசாங்கத்திற்கும் மிகவும் அவதூறான செய்திகளை வேண்டுமென்றே பிரசுரித்துவரும் இப்பத்திரிகையின் உரிமையாளர் ஜனாதிபதி மாளிகையில் விருந்துபசாரத்தில் கலந்துகொள்ளும் சந்தர்ப்பங்களில் ஜனாதிபதி இவ்விடயத்தை நன்குணர்ந்தும் இவரை அன்புடனேயே வரவேற்பார். அந்தளவிற்கு இன்று ஜனாதிபதியினால் ஊடகச் சுதந்திரம் வழங்கப்பட்டுள்ளது.

கடந்த வாரம் வாரமஞ்சரியில் வெளியிடப்பட்ட கரவெட்டி கந்தசாமியின் முதலாவது கடிதத்தில் அவரால் தெரிவிக்கப்பட்டிருந்த மன ஆதங்கங்களை பார்வையிட்ட இந்த பத்திரிகை நிறுவன உரிமையாளர் தனது நிறுவன ஊழியர்களுடன் உருத்திர தாண்டவ நடனமாடியதாக உள்வீட்டுத் தகவல்கள் தெரிவித்தன. தலையிடியும் காய்ச்சலும் தனக்கென்று வந்தால்தான் அதன் வலியையும் தாக்கத்தையும் வேதனையையும் உணரமுடியும் என்பது போல பிறரை தனிப்பட்ட முறையிலும், அவர்களது பொது வாழ்வையும் கொச்சைப்படுத்தி தமக்குப் பிடிக்காவிட்டால் தாறுமாறாக எழுதிவரும் இவரது பத்திரிகை தொடர்பாகவும் தமிழ்த் தேசியத்தை வைத்து போடும் இரட்டை வேடத்தையும் கிழிக்கத் தொடங்கியதை பொறுக்கமுடியாதவர்களாக அங்குள்ள சிலர் காணப்பட்டனராம்.

விடுதலைப் புலிகள் இருந்த காலத்தில் சகோதரச் சண்டை மூலமாக ஒரே கொள்கைக்காகப் போராடிய மாற்று இயக்க இளைஞர்கள் புலிகளால் துரத்தித் துரத்திப் படுகொலை செய்யப்பட்டபோது இவரது பத்திரிகை வாய் திறந்ததா? இல்லை. புலிகள் செய்த தவறுகளை இந்தப் பத்திரிகைகள் எப்போதாவது, ஒருசிறு சம்பவத்தையாவது தவறென்று சுட்டிக்காட்டினவா? இல்லை. அன்று புலிகளுக்கு வேண்டப்படாதவர்களைத் துரோகிகளாக புலிகளுடன் சேர்ந்து சித்தரித்தனர். இது தாம் புலிகளுக்கு ஆதரவானவர்கள் எனக் காட்டி தமிழ் மக்களை மடையர்களாக்கி தமது பத்திரிகை விற்பனையைக் கொண்டு செல்ல இவர்கள் நடித்த நாடகம் என்பது இப்போது வெளிச்சத்திற்கு வந்துள்ளது.

புலிகளுக்கு அன்று வாக்காலத்து வாங்கியது போலவே இன்று தமிழ்த் தேசியக் கூட்டமைப்புக்கும் எதிராக வாயே திறப்பதில்லை. இதற்குக் காரணம் இவர் ஒரு கல்லில் இரு மாங்காய்களை விழுத்த முனைந்து வருவதாகும். தமிழ்க் கூட்டமைப்பை விமர்சித்தால் தனக்கு அடுத்த தேர்தலில் வேட்பாளர் பட்டியலில் இடம் கிடைக்காது என்பதுவும் இவருக்கு நன்கு தெரியும். அதேபோன்று தனது மைத்துனரை வடக்கு மாகாண தேர்தல் தள்ளிச் சென்றால் பரவாயில்லை கிழக்கிற்காவது முதலமைச்சராக்கிவிடுவது என்பதும் இவரது மற்றொரு எதிர்பார்ப்பாகவுள்ளது.

யாழ்ப்பாணம் இந்துக் கல்லூரியின் பழைய மாணவர் சங்கக் கிளையில் பாரிய நிதி மோசடி எனக் குறிப்பிட்டு ஒருவரை அவரது அரசியல் மற்றும் குடும்ப வாழ்வு தொடர்பாகவும் தாறுமாறாகத் தாக்கி எழுதி அவரது அரசியலுக்கே உலை வைத்த இந்தப் பத்திரிகையின் உரிமையாளர் இன்று அதே நபருடன் யாழ்ப்பாணத்தில் நில அபகரிப்புப் போராட்டத்தில் கைகோர்த்துக் கொண்டு படமெடுத்துத் தனது பத்திரிகையிலேயே பிரசுரிக்கிறார்.

இவ்விடயம் தமிழ்த் தேசியக் கூட்டமைப்பிலிருந்து ஒதுங்கி புதிய கட்சிகளை ஆரம்பித்துச் செயற்படும் வடபகுதி இளம் அரசியல்வாதிகளுக்கு நன்கு தெரியும்.

தனக்குத் தேவை என்றால் எதுவும் செய்யத் துணியும் சுயநலம் கொண்ட இவர் தமிழ்த் தேசியத்தை வைத்துப் பிழைப்பு நடத்திவருவது குறித்து அவரது பத்திரிகை அலுவலக ஊழியர்களே மனம் வெதும்பி பல விடயங்களைக் கசியவிட்டு வருகின்றனர்.

முன்னொரு காலத்தில் யாழ்ப்பாணத்தில் தனது பத்திரிகையைத் தவிர எதுவுமே பிரசுரமாகக் கூடாது என்பதில் தீவிர கவனமாக இருந்த இவர் அவ்வாறு சில பத்திரிகைகள் பிரசுரமாகிவிட்டால் புலிகளைக் கொண்டு அவற்றைத் தடை செய்த வரலாறும் மறைமுகமாக உள்ளது. ஆனால் இன்று அரசாங்கத்தின் ஊடக சுதந்திரக் கொள்கை காரணமாக இவர் தலை கீழாக நின்ற போதிலும் யாழ்ப்பாணத்தில் ஏழு தினசரிப் பத்திரிகைகள் வெளியாகி வருகிறது. இப்போது தமிழ் இணையத்தளங்கள் பலவும் செய்திகளை உடனுக்குடன் பிரசுரித்து பிரசித்தமாகி வருவதால் தனது பத்திரிகை வீழ்ச்சி கண்டு வருவதாகப் புலம்பித் திரியும் இவர் அதனைக் கவிழ்க்க என்ன செய்யலாம் என்றுகூட யோசித்து வருவதாகவும் அவரது ஊழியர்கள் சிலரே தெரிவிக் கின்றனர்.

எல்லாவற்றையும்விட புலிகளின் காலத்தில் பிரபல்யமான பத்திரிகையா ளர்களாக லசந்த விக்கிரமதுங்க, தராக்கி சிவராம், நடேசன், நிமலராஜன் போன்ற பலர் கொலைசெய்யப்பட்ட போதும் இவரது நிறுவனத்தின் சாரதி, பாதுகாவலர், ஒப்புநோக்குனர் ஆகி யோரே சுடப்பட்டமையானது பெரும் சந்தேகத்தை எழுப்பிய ஒரு சம்பவ மாகவே இன்றும் நோக்கப்படுகின்றது என்று அவரது ஊழியர்களே தெரிவித்தனர்.

இவரது நிறுவனத்தைச் சேர்ந்த எந்தவொரு பத்திரிகையாளரும் சுட்டுக் கொல்லப்படவில்லை.