இருவேறு உலகின் இருவேறு நங்கையர்

(கோவை ஈஸ்வரன்)      

சென்ற திங்களில் உலக நாளிதழ்களின் முகப்புகள் இரண்டு நங்கையர்களின் படங் களை -முரண்பாடுடைய இரு வேறு சமுதாய அமைப்புகளின் வாழ்க்கைமுறைகளைத் தாங்கிப் பாரெங்கும் பவனி வந்தன.கிரிஸ்டியானா மார்கரெட் கீலர் என்ற இருபத் தோரு வயது நிரம்பிய ஆங்கிலப் பொன்னிறக் கூந்தலழகி ஒருத்தி. வாலண்டினா தெரோஸ்கேவா என்ற இருபத்தாறு வயது நிரம்பிய ரஷ்யாவின் பேரழகுப் பெட்டகம் மற்றொருத்தி. முன்னவள் விலைமாது; பின்னவள் விண் வெளியைச் சுற்றிய வீராங்கனை! ஒருத்தி குற்றம் சுமத்தப்பட்டவள்; இன்னொருத்தி வெற்றி முரசு கொட்டியவள்! ஆனால் இந்த இரண்டு பேரும் தங்கள் தங்கள் தாயகத்தின் -தங்களைத் தயாரித்த சமுதாய அமைப்பு களின் அழியாச் சின்னங்கள்!

இருவருமே ஜூன் மாதத்தில் பத்திரிகை களின் தலையெழுத்துக்களோடு தங்களின் தலையெழுத்துக்களையும் பிணைத்துக் கொண்டனர். இந்தப் பரந்த பூபாகத்தில் உயிரோடு உலவிக் கொண்டிருக்கும் முந்நூறு கோடி வாய்களிலும் அந்த இரண்டு பேரின் பெயர்களும் பலமுறை விழுந்து எழுந்தன.

கிரிஸ்டியானா திரையுலகில் ஜொலிக்கும் நட்சத்திரமாவதைத் தன் லட்சியமாகக் கொண்டிருந்தபோது, வாலண்டினாவோ ஒளி வீசும் நட்சத்திர மண்டலங்களுக்கிடையே யும், பூமிப்பந்தைச் சுற்றித் திரியும் வான கோளங்களுக்கிடையேயும் ஊடுருவிப் பறப் பதிலே பேராவல் கொண்டிருந்தாள். மந்திரிப் பிரதானிகளைக் கீலர் ஈர்த்து திரிந்த நேரத் தில், வாலண்டினா ஈர்ப்புச் சக்திகளுக்கு அப் பாற்பட்ட விண்வெளியில் தன் சிந்தனை களைப் பதித்துக் கொண்டிருந்தாள்.

இந்த இருவருமே உழைத்துப் பிழைக்கும் வர்க்கத்தில் பிறந்தவர்கள்! பால்மணம் மாறாப் பிஞ்சுப் பருவத்திலேயே பெற்றெடுத்த தந்தை யை இழந்துவிட்ட அநாதைகள்! அதே நேரத் தில் தாங்கள் கொண்ட லட்சியங்களுக்காகத் தங்கள் இதயங்களை எதையும் தாங்குவதற் குத் தயாராக்கிக் கொண்டுவிட்டனர்! இத்து டன் இவர்களுக்கிடையேயுள்ள ஒற்றுமைகள் விடை பெற்றுக் கொள்கின்றன.

அமைச்சரவை ஆடும் வரை..

கொள்ளை லாபச் சுரண்டும் மனோபாவம் கொண்ட இங்கிலாந்தின் பூர்ஷ்வா சமுதாய அமைப்பு எப்படியும் பணக்காரியாகிவிடு-எந்த வழியானாலும் சரி, துணிந்துவிடு என்று தூண்டியது கீலரை! அவள் இங்கிலாந்தின் மண்ணிலே பிறக்கும் போது ஏழையாகத்தான் பிறந்தாள்- சேரியின் மத்தியில். தனது பதினாறாவது வயதில் அந்த ஏழைப் பெண் தன் அரை சாண் வயிற்றை நிரப்பிக் கொள்ள வேலை தேடி லண்டன் மாநகருக்கு ஓடி வந்தாள்! தக்காளி ரசங்களைத் தயாரிக்கும் வேலைக்குக்கூட இங்கிலாந்தின் சமைய லறைகள் அவளுக்கு வழிவிடவில்லை! அதே நேரத்தில் வேறு வழியில் வழி விட்டது அவள் வாழ!

அவள் கற்றுக் கொண்டது இது தான்.... இங்கிலாந்தின் நவீன சகாப்தத்தில் புகழ்பெற வேண்டுமானால், கண்ணாடிக் காலணி களோடு மாமயில் போன்று லண்டனின் வீதி களில் ஆடித் திரிய வேண்டும். பகிரங்கமாக நடத்தப்படும் இரவு விடுதிகளில் கேளிக் கைப் பொருளாக வேண்டும்!

அவள் ஆடத் தொடங்கினாள் இரவு விடுதிகளில்! ஆடினாள்... ஆடினாள் .. சென்ற ஜூன் மாதம் மாக்மில்லன் மந்திரி சபையே அதிரும் வகையில் ஆடினாள்!

பிறந்த மண்ணின் சிறப்பு

அதே நேரத்தில் சரியான ஒழுங்கு நியதி என்ற அஸ்திவாரத்தின் அடிப்படையில் கட்டப்பட்ட சோஷலிச சோவியத்தின் மண்ணிலே தோன்றிய குடிமகளோ நட்சத்திர மண்டலங்களிடையே தன் பயணத்தை நடத்திக் காட்டினாள்! அது அவள் பிறந்த மண் ஏற்றுக் கொண்ட தத்துவத்தின் சிறப்பு!

இனி-கீலரைப் பார்ப்போம் :

புராதனத் தொழிலை விடுத்து பூர்ஷ்வா சமுதாயத்தின் ‘நாகரிக’த் தொழிலைச் செய் யத் துணிந்ததால், அவளுக்குக் கிடைத்த ‘சிறப்புகள்’ பல. உலகத்தின் முதல் தரமான ராஜ தந்திரிகள் என்று முதலாளித்துவ ஏடு கள் ஏற்றிப் புகழும் பலர் அவள் காலடியில்- கதவோரத்தில் காத்து நின்றனராம். அந்த வேல்விழியாளின் பள்ளியறையில் இங்கி லாந்தின் பாதுகாப்பு மந்திரியே காவலிருந்த தாராம்! பாதுகாப்பு அமைச்சருக்குத் தன் நாட்டு மக்களைக் காப்பதில் எவ்வளவு கடமை உணர்வு பார்த்தீர்களா! இன்னும் அவ ளைச் சுற்றி வட்டமிட்ட கோடீஸ்வரர்கள் எத் தனை எத்தனை பேர்! அவள் வாழும் உலகத் தின் மனிதர்கள் சமுதாய அந்தஸ்திற்காக- அரசியல் அதிகாரத்திற்காக- பொருளாதார பாதுகாப்பிற்காகத் தங்கள் அறிவை -மானத் தை - திறமையை விற்பது மிகச் சாதாரணம்! அவள் மட்டும் சும்மாயிருப்பாளா என்ன! கடைசியில் அவள் எந்தப் புகழை விரும் பினாளோ அந்தப் புகழ் அவளுக்குக் கிடைத் துவிட்டது! இப்போது அவளது புகைப்படத் திற்குப் பல ஆயிரம் பவுன்களாம்! வாழ்க்கை வரலாற்றுக்கோ 15,000 பவுனாம்! இப்போது இங்கிலாந்து அவளைக் கவனிக்கத் தொடங்கிவிட்டதல்லவா! அவளைத் தூற்றி என்ன பயன்? முதலாளித்துவ சமுதாயத்தின் கோரப் பிடியில் சிக்கிச் சீரழிந்த பல கோடிப் பேரின் பட்டியலில் அவளும் ஒருத்தி! முத லாளித்துவ சமுதாயம் குடும்ப உறவுகளையே பண உறவாக்கி விடுகிறது! மனிதனுக்கும் மனிதனுக்கும் இடையே உள்ள உணர்வையே ஒரு வியாபாரப் பரிவர்த்தனைப் பண்டமாக்கி விடுகிறது! அவள் மட்டும் எம்மாத்திரம்? மறந்துவிடாதீர்கள்! கீலர் முதலாளித்துவ சமுதாயத்தின் அடையாளச் சின்னம்!

அதே நேரத்தில் தனது வட்டநிலவொளி முகத்தை இரும்பு ஹெல்மெட்டில் பதித்த வண்ணம் பத்திரிகையின் முகப்பில் அலங் கரித்தாளே வாலண்டினா. அவளும் பெண் தான்; ஆனால் சோஷலிச சமுதாயத்தின் தயாரிப்பு- சோவியத் ரஷ்யாவின் உரிமை பெற்ற குடிமகள்! அவள் தனது குழந்தைப் பருவத்திலேயே தந்தையை இழந்தாள்! அவளது தந்தை நாஜிஸ வெறியர்களை எதிர்த்தார் என்ற காரணத்தால் இளமை யிலேயே கொல்லப்பட்டார்! அந்தப் பொற் கொடியைப் பெற்ற உத்தமியோ தான் பெற்ற குழந்தைகளை வளர்க்க நெசவாலையில் உடல் கடுக்க உழைத்தாளாம்.

அந்தக் குலமகளின் குடும்ப விளக்கோ தனது ஏழாண்டுக் கல்வியை முடித்துப் பின் டயர் கம்பெனிக்குச் சென்றாள், உழைத்துப் பிழைக்க. பகலெல்லாம் அங்கே பாடுபட்டுப் பின் மாலைக் கல்லூரியில் சேர்ந்து ரஷ்ய பொருளாதாரம், இலக்கியம் ஆகியவற்றைக் கற்று தேனீயைப் போல் அறிவைச் சேகரித் துக் கொண்டாள். லண்டனில் கீலரின் கருத் தில் பால் உணர்வூட்டும் நாவல்கள் நடமாடிக் கொண்டிருந்த நேரத்தில் வாலண்டினாவின் கரங்களை டால்ஸ்டாயும், செக்கோவும், கார்க்கியும், மார்க்ஸூம் அலங்கரித்தனராம்.

ககாரின் ககன விளிம்பைத் தொட்டுத் திரும்பியதும் அவளையும் அந்தப் பேராவல் கவ்வவே, கடுமையாகப் படித்துத் தேர்வுகள் பல பெற்றுத் தன்னைத் தகுதி உடைய வளாக்கிக் கொண்டாள்! தகுதி பெற்ற அந்தத் தங்கச் சிலைக்கோ அரசும் அழைப்புக் கொடுத்தது, விண்ணைச் சுற்ற. ஆபத்து நிறைந்த பணியை அந்த முழுநிலவு முத்துச் சிரிப்போடு ஏற்றுக் கொண்டது. இன்றோ விண்ணைச் சுற்றிய வீராங்கனை என்ற வீர விருதைப் பெற்றுத் திகழ்கிறாள் வாலண் டினா. புகழ் அவள் காலடியில் மண்டிக் கிடக்க, மேலை நாட்டு விஞ்ஞானிகளின் முகமோ சுண்டிக்கிடக்கிறது!

ஆம். கீலர்... அவளும் பெண் தான்! தன் எழிலுடம்பும் பாளைச் சிரிப்பும் தன் முத லாளித்துவ நாட்டிற்கு அவசிய அன்றாடத் தேவை என்கிறாள்!

வாலண்டினா... அவளும் பெண் தான்! விண்ணைச் சுற்றிய வீரப்புதல்வி! சோஷலிச சோவியத்தின் தவப்புதல்வி என்கின்றனர். அதிலே சிறப்பு அவளுக்கு.

பார்த்தீர்களா, முரண்பாடுடைய இரு வேறு உலகுகளை! இருவேறு தத்துவத்தின் சின்னங்களை! இல்லை, இரண்டு அழகிகள் இரு வேறு உலகத்தின் பிரதிநிதிகளாக நின்று பேசுகின்றனர்.

இப்போது சொல்லுங்கள். பழம்பெரும் நாடாம் பாரதத்தின் மண்ணில் தோன்ற வேண்டியது கிரிஸ்டியானா கீலர்களா அல் லது வாலண்டினா தெராஸ்கோவாகளா?

-13.7.63