காஸாவில் அப்பாவிகள் மீது இஸ்ரேலின் அராஜகம்

பாலஸ்தீனத்தில் காஸா பள்ளத்தாக்கு மீது இஸ்ரேல் நேற்று எட்டாவது நாளாகவும் சரமாரியான குண்டுத் தாக்குதல் களை நடத்தி வருகின்றது. இதில் 180க்கும் மேற்பட்ட பொதுமக்கள் கொல்லப்பட்டிருப்பதோடு சுமார் 2000 பேர் காயமடைந்திருக்கிறார்கள். இஸ்ரேலிய சியோனிஸப் படைகள் சிவிலியன்களை இலக்கு வைத்து நடத்தி வரும் கட்டுப்பாடில்லாத தரை, வான் தாக்குதல்களை நிறுத்துமாறு உலகநாடுகள் விடுத்த வேண்டுகோள்களும் இஸ்ரே லிய அரசால் நிராகரிக்கப்பட்டிருக்கிறது. இஸ்ரேலைச் சேர்ந்த மூன்று சிறுவர்கள் கடத்தப்பட்டு கொலை செய்யப்பட்டிருந்த நிலையில் சடலங்களாக மீட்கப்பட்டனர். இந்தச் சம்பவம் கடந்த வாரம் இடம்பெற்றது. ஹமாஸ் அமைப்பே இந்தக் கொலைகளைச் செய்திருப்பதாக இஸ்ரேல் குற்றஞ்சாட்டியது. ஆனால் ஹமாஸ் இதனை முற்றாக மறுத்திருக்கிறது.

மூன்று சிறுவர்களின் கொலைகளைக் காரணங்காட்டி காஸா பள்ளத்தாக்கின் மீது இஸ்ரேல் மிலேச்சத்தனமாகத் தாக்குதல்களை நடத்துகிறது. ஹமாஸ் இயக்கத்தின் முகாம்களை அழித்தொழிக்கும் நோக்கில் தாங்கள் தரைவழி, வான்தாக்குதல்களை நடத்துவதாக இஸ்ரேல் இறுமாப்புடன் அறிவித்துள்ளது.

சுமார் 20,000க்கும் மேற்பட்ட மக்கள் காஸாப்பகுதிகளிலிருந்து வெளியேறி நிர்க்கதியாகி இருக்கிறார்கள் என்பது வேதனைக்குரிய விடயம். புனித ரமழான் நோன்பை நோற்கும் காஸா மக்கள் மத்தியில் குண்டுமாரி பொழிவதும், ஷெல் தாக்குதல்கள் நடத்துவதும் ஒரு புத்திசாதுரியமான செயலாகக் கருத முடியாது. கடந்த எட்டு நாட்களாக கொடூர தாக்குதல்களை நடத்துவதை மிலேச்சத்தனத்தின் உச்சமென்றே கூறமுடியும்.

இஸ்ரேலியப் பிரதமர் பென்ஜமின் நெத்தன்யாகுவின் அறிவிப்பைப் பார்க்கின்றபோது காஸா மீதான தாக்குதல் நடவடிக்கை ஏற்கனவே திட்டமிடப்பட்டவைபோலவே தெரிகிறது. அதாவது தாக்குதலை முன்னெடுப்பதற்குரிய ஒரு போர்வையாகவே சிறுவர்களின் கொலையை இஸ்ரேல் பயன்படுத்துகிறது.

இஸ்ரேலின் இந்த இராணுவ நடவடிக்கை எப்போது முடிவுக்கு வருமென எமக்குத் தெரியாது என பிரதமர் நெத்தன்யாகு சர்வதேச ஊடகங்களுக்குத் தெரிவித்துள்ளார்.

அதேநேரம் காஸாவில் ஏற்பட்ட சிவிலியன்களின் உயிரிழப்புக்களுக் கான பொறுப்பை ஹமாஸ் இயக்கத்தின் இராணுவப்பிரிவே ஏற்கவேண்டுமெனவும் கூறியிருக்கிறார்.

பாலஸ்தீனத்தில் புதிய ஒருமைப்பாட்டு அரசு உருவாக்கப்பட்டி ருக்கிறது. ஆளும் தரப்பாக இருக்கின்ற ஹமாஸ் இயக்கமும். அப்பாஸ்தலைமையிலான அல்பத்தா இயக்கமும் இணைந்த ஒருமைப்பாட்டு அரசு ஏற்படுத்தப்பட்டிருக்கும் நிலையில் பலஸ்தீனத்தை பலவீனப்படுத்தும் நோக்கிலேயே இஸ்ரேல் இந்தத் தாக்குதல்களை நடத்துகிறதென்பது அரசியல் விமர்சகர்களின் கருத்தாக இருக்கின்றது.

பலஸ்தீனத்தில் ஹமாஸ் இயக்கம் மிகச் செல்வாக்கு மிக்கதும் பலம் பொருந்திய அமைப்பாகவும் வளர்ச்சியடைந்துள்ளது. பலஸ்தீனத் தில் பலம்பொருந்திய தலைமையொன்று உருவாகுவது தனக்கு அச்சுறுத்தலாக இருக்குமென இஸ்ரேல் அஞ்சுகிறது. இதன்வெளிப் பாடே காஸா மீதான தாக்குதலாக இருக்கிறது.

இப்படி திட்டமிட்ட அரசியல் இலக்கை வைத்துக் கொண்டு சிவிலியன்களைக் கொன்று குவிப்பதை எவ்வகையிலும் நியாயப்படுத்த முடியாது.

ஹமாஸின் ஆயுதப்பிரிவான ‘கஸ்ஸாம்’ படையணியின் முகாம்கள் பல நிர்மூலமாக்கப்பட்டிருப்பதாக கூறும் இஸ்ரேல், காஸா பள்ளத்தாக்கிலுள்ள வடபகுதியில் வாழும் மக்களை அங்கிருந்து வெளியேறுமாறு அறிவித்துள்ளது. இதனையடுத்து மக்கள் நிர்க்கதிக்குள்ளாகி இருப்பதோடு பெரும் அவலங்களை சந்தித்து வருகிறார்கள்.

பலஸ்தீன மக்கள் தங்களது தாயக மீட்புப் போராட்டத்தை இலட்சியத்தோடு முன்னெடுத்து வருகிறார்கள். இதற்கான போராட்டத்தில் பல அமைப்புக்கள் களத்தில் நிற்கின்ற போதும் காலித் மிஸ்அல் தலைமையிலான ஹமாஸ் பலமான இயக்கமாக திகழ்கிறது. இதனை அழித்தொழித்து போராட்டத்தை பலவீனப் படுத்துவதே இஸ்ரேலின் இலக்கு.

எவ்வாறாயினும் அரசியல் நலனுக்காக மக்களை கொன்று குவிப்பது மிகவும் கோழைத்தனமென்பதை இஸ்ரேல் புரிந்து கொள்ள வேண்டும். எகிப்து உட்பட பல நாடுகள் விடுத்த யுத்த நிறுத்த வேண்டுகோளை இஸ்ரேல் ஏற்றுள்ளது. ஆயினும் ஹமாஸ் உட்பட போராளிக் குழுக்கள் அதனை நிராகரித்திருக்கின்றன. அடுத்த கட்ட நகர்வுக்கு இஸ்ரேல் தன்னைத் தயார்படுத்துவதற்கே யுத்த நிறுத்தத்துக்கு இணங்குகின்றதென குற்றஞ்சாட்டியுள்ளன.

எதுவென்றாலும் இருதரப்பும் பேச்சுவார்த்தைக்கு சென்று அப்பாவிக ளின் இழப்பைத் தவிர்த்துக் கொள்வதே ஆரோக்கியமாகும்.

(தினகரன்)