ஆடிக்கலவரம், ஆடி முடிந்து முப்பத்தொரு வருடங்களாகி விட்டது

ஆடிக்கலவரம், அது இடம்பெற்றது நேற்றுப் போல இருப்பினும் எதிர்வரும் புதன்கிழமையுடன் முப்பத்தொரு வருடங்கள் கழிந்து விட்டன. ஆனாலும் அதன் தாக்கம் தமிழர் மனங்களிலிருந்து இன்னமும் அகலவில்லை. இலங்கையின் வரலாற்றில் கறைபடிந்த தினங்களாக 1983 ஜுலை இனக்கலவரம் அமைந்து விட்டது. ஐக்கிய தேசியக் கட்சியின் ஆட்சிக் காலத்தில் அதிகாரத்தின் உச்ச நிலையைப் பயன்படுத்தி அன்றைய ஆட்சியாளர்களின் அனுசர ணையுடன் நடந்தேறிய ஓர் இனச் சுத்திகரிப்புச் செயற்பாடாகவே தமிழ் மக்கள் இந்த ஆடிக் கலவரத்தை பார்க்கின்றனர்.

தமிழ் மக்களின் மனங்களில் ஆறாத வடுவாக அமைந்துள்ள அந்த நாட்களின் வலிகளை எண்ணிப் பார்க்கவும் முடியாதுள்ளது. தமிழரின் உடைமைகளுக்கு மட்டுமல்ல உயிர்களுக்கும் தீவைத்துக் கொளுத்தி மகிழ்ந்த கலகக்காரர்களுக்கு பாதுகாப்பாக இருக்குமாறு படையினருக்குப் பணித்த ஐக்கிய தேசியக் கட்சியின் ஆட்சியாளர்களில் பலர் இன்று உயிருடன் இல்லை. என்றாலும் அன்று இக்கைங்கரியத்தைக் கண்டும் காணாதது போலிருந்த சிலர் அதே கொடூர விஷத்துடன் இன்றும் கட்சியை வழிநடத்தி வருகின்றனர்.

தமிழரை அடக்கி வைத்து ஆன நினைத்த ஐ.தே.க. தலைமைத்துவம், வேண்டுமென்றே தமிழர் மீது வன்முறையைக் கட்டவிழ்த்து விட்டது. தப்பியோடும் போது பாதையில் உயிருடன் டயரில் போட்டு எரிக்கப்பட்ட தமிழரும், கொடூரர்களின் வாள் வீச்சுக்கு அவயவங்களை இழந்த தமிழர்களும் ஆடிக் கலவரத்தின் ஆதாரத்திற்கு இன்றும் சான்று பகர்பவர்களாக வாழ்ந்து வருகின்றனர்.

கல்வியில், விளையாட்டில், நிர்வாகத்துறையில், வர்த்தகத் துறையில் எனப் பல்துறைகளிலும் கொடிகட்டிப் பறந்த தமிழரை மேலும் மேலெழும்ப விடாது தடுக்கும் ஒரு கைங்கரியமாகவே ஐக்கிய தேசியக் கட்சி தலைமையேற்று நடத்திய அந்த இனக்கலவரம் அமைந்திருந்தது. நன்கு திட்டமிட்டு நாட்டிலுள்ள காடையர்களை ஒன்றுதிரட்டி தமிழ் மக்களுக்கு எதிராக ஐ.தே.க. ஏவி விட்டது. அவர்களும் தமது பணியை நன்கு விசுவாசமாகச் செய்து முடித்தனர்.

ஐக்கிய தேசியக் கட்சியின் தலைவர்கள் சிலர் மேற்கொண்ட இப்பாரிய வரலாற்றுத் தவறு அமைதியாக இருந்த இலங்கைக்கு முழு உலகிலுமே என்றுமே மாறாத ஓர் அபகீர்த்தியை ஏற்ப டுத்தியது.

அண்ணன், தம்பி போன்று சகோதரர்களாக, ஒரு குடும்பமாக வாழ்ந்து வந்த தமிழ், சிங்கள மக்களிடையே பாரிய விரிசலை ஏற்படுத்த ஆடிக்கலவரம் ஆணிவேராக இருந்தது. அன்று ஏற்பட்ட இன விரிசலானது இன்றுவரை ஒருவரையொருவர் சந்தேகக் கண்கொண்டு பார்க்கும் ஒரு நிலைக்குத் தள்ளிவிட்டது. அதன் விளைவாக சுமார் முப்பது வருட கால யுத்தம் தமிழருக்கு மட்டுமல்ல, சிங்கள மக்களுக்கும் பாரிய அழிவையே தந்தது. சிங்களப் பொதுமக்கள் பலரும் புலிகளினால் கொல்லப்பட்டுள்ளனர். அவர்களது சொத்துக்களுக்கும் சேதம் ஏற்படுத்தப்பட்டுள்ளது.

இறுதி யுத்தம் வரை புலிகளால் பல இராணுவ வீரர்கள் கொல்லப்பட்டுள்ளனர். அவர்கள் சிங்களவர்கள். அதேபோன்று பயங்கரவாதிகள் எனப் படையினரால் கொல்லப்பட்ட புலிகள் தமிழர்களாக இருந்தனர். ஆனால் இவர்கள் அனைவருமே இலங்கையர் என்பதை உணர நாம் எல்லோருமே மறந்து விட்டோம்.

1983 ஆடிக் கலவரத்தில் ஆரம்பித்த யுத்தம் சுமார் முப்பது வருட காலத்தில் சிங்களவர், தமிழர், முஸ்லிம்கள் என பல்லாயிரக்கணக்கான உயிர்களை இதுவரை காவு கொண்டு விட்டது. படுகொலை கலாசாரத்தை 1983ம் ஆண்டு ஜுலை 23ம் திகதி ஆரம்பித்து வைத்த ஐ.தே.க. தனக்கு ஆட்சி செய்ய இறுதி யாகக் கிடைத்த சந்தர்ப்பம் வரை புலிகள் மூலமாகத் தமிழரை ஒடுக்கும் கைங்கரியத்திலேயே ஈடுபட்டு வந்தது. புலிகளுடன் பேச்சுவார்த்தை நடத்துவது போன்று பாசாங்கு செய்த காலத்திலும் தமிழருக்குத் தீங்கிழைப்பதில் குறியாகவே இருந்தது.

ஆனால் இன்று புலிகளும் இல்லை, ஆடிக்கலவரமும் ஏற்பட வாய்ப்பும் இல்லை. எனுமளவிற்கு ஜனாதிபதி மஹிந்த ராஜபக்ஷ தலைமையிலான இன்றைய அரசாங்கத்தினால் நாட்டில் அமைதி நிலை ஏற்படுத்தப்பட்டுள்ளது. ஐ.தே.க. ஆரம்பித்து வைத்த இன விரோதப் போக்கு இன்று இல்லாதொழிக்கப்பட்டுள்ளது. விடுதலைப் புலிகள் முழுமையாக அழிக்கப்பட்டதனால் இன்று முழு நாடும் அமைதியாக உள்ளதுடன் நாட்டு மக்களும் இன, மத, மொழி பேதமின்றி மீண்டும் சகோதரரத்துவ மனப்பான்மையுடன் வாழ்ந்து வருகின்றனர். இந்த இன ஒற்றுமை இனி எந்தக் காலத்திலும் சீர் குலையக் கூடாது. அதற்கு மக்கள் ஒருபோதும் இடமளிக்கவும் கூடாது.

1983 ஆடிக்கலவரத்தின் போது ஏவிவிடப்பட்ட காடையர் கூட்டத்தால் தமிழர் கொல்லப்பட்டும், அடித்து துன்புறுத்தப்பட்ட போதும் அதைப் பார்த்துக் கண்ணீர் வடித்து முடிந்தளவிற்கு உதவிக் கரம் நீட்டி, பல வழிகளிலும் பாதுகாப்புத் தந்த சிங்கள சகோதரர்களைக் காப்பாற்ற தமிழர் என்றுமே பின்னின்றதும் கிடையாது. இவைதான் உண்மையான சகோதரத்துவம். தொடர வேண்டும் என்பதே எமது அவாவாகும்.

(தினகரன்)