ஜெயலலிதாவின்"குரல்'

சிலசமயம் இலங்கைத்தமிழருக்கு புதிய நம்பிக்கையின் உதயமாக இருக்கக் கூடும்''

தமிழக முதலமைச்சர் ஜெயலலிதா எழுப்பியிருக்கும் குரலானது இலங்கைத் தமிழர்களுக்கு புதிய நம்பிக்கையின் உதயமாக சில சமயம் இருக்கக்கூடும் என்று வீக்கன்ட் லீடர்.கொம் இணையத்தளத்தில் அதன் ஆலோசக ஆசிரியர் சாம் ராஜப்பா எழுதியுள்ளார்.நேற்று முன்தினம் வெள்ளிக்கிழமை இது தொடர்பாக அவர் குறிப்பிட்டிருப்பதாவது; 1948 இல் பிரிட்டிஷார் இலங்கையிலிருந்து வெளியேறிய போது வடக்கு,கிழக்கு மாகாணங்களை உள்ளடக்கிய தமிழ் மாநிலமும் நாட்டின் ஏனைய பகுதியின் சிங்கள மாநிலமும் கொழும்பிலுள்ள மத்திய அரசாங்கத்தை தளமாகக் கொண்டு அமைந்திருந்தன.

சுதந்திரமடைந்த காலம் முதல் சிங்கள அரசியல் தொடர்பாக எதிர்மறையான பிரதிபலிப்பை தமிழர்கள் கொண்டிருந்ததை இலங்கை அரசியல் காட்டுகின்றது. சிங்கள அரசியலானது மேலாதிக்கவாத தன்மை கொண்டதென தமிழர்கள் கருதி வந்தனர். சிங்களவர்களின் மேலாதிக்கத்தை கொண்ட அரசாங்கங்களில் தமிழர்களின் எதிர்பார்ப்பும் அபிலாஷைகளும் ஒருபோதுமே நிறைவேற்றப்பட்டிருக்கவில்லை. 1948 -1956 வரையிலான காலப்பகுதியில் பதிலளிக்கும் நிபந்தனைகளை முன்வைத்து ஒத்துழைப்பை அவர்கள் மேற்கொள்ள ஆரம்பித்தனர்.
195772 காலப்பகுதியில் சமஷ்டி அரசுக்கான கோரிக்கை முன்னேற்றமடைந்தது. 1976 இல் வட்டுக்கோட்டை தீர்மானத்தின் தனித்தமிழீழத்துக்கான கோரிக்கை முன்வைக்கப்பட்டது.
பிரதான தமிழ் அரசியல் தலைமைத்துவமானது தனது தந்திரோபாயங்களை சமாதான வழியிலான பேச்சுவார்த்தை போராட்டம் என்பவற்றை உள்ளடக்கியதாக மட்டுப்படுத்தியிருந்தது. இதை முன்னேற்றத்தை ஏற்படுத்தவில்லை. இன மேலாதிக்கவாத சிங்கள தலைமைத்துவத்துடன் இந்த விடயம் முன்னேற்றத்தை கொடுக்கவில்லை.

பெரும்பான்மை ஜனநாயகமானது ஏற்றுக்கொள்ள முடியாதது என்ற கருத்தை தமிழ் இளைஞர்கள் கொண்டிருந்தனர். அரசியலானது முற்றுமுழுதாக அதிகாரத்தை மையப்படுத்தியதாகும். அரச அதிகாரம் தொடர்பான அரசியல் பாரம்பரியத்தின் முக்கியமான விடயத்தை புரிந்துகொள்ளும் போது தமது இலக்கை வென்றெடுப்பதற்கு வன்முறையை தமிழ் இளைஞர்கள் தேர்ந்தெடுத்தனர். தேசிய விடுதலை இயக்கங்களின் புரட்சிவாத வன்முறை தன்மையானது புதிய வரலாற்று மற்றும் கோட்பாட்டு ரீதியான பரிமாணத்தை ஏற்படுத்தியது. அவர்களை அவ்வாறு விட்டுச் சென்றிருந்தால் தமிழ் இளைஞர் போராளிகள் தமது இலக்கான ஈழத்தை இலங்கைக்குள் சமஷ்டி ஏற்பாடான அரசாக அல்லது தனியான அரசாக 80 களில் பிற்பகுதியில் வென்றெடுத்திருக்கக்கூடும்.

இளைஞரும் அனுபவமற்றவருமான இந்தியப் பிரதமர் ராஜிவ் காந்தி சமாதானப்படையை அனுப்பியதன் மூலம் வரலாற்று ரீதியான தவறை இழைத்திருந்தார். 1987 இல் கைச்சாத்திடப்பட்ட இலங்கைஇந்திய உடன்படிக்கையை அமுல்படுத்துவதற்கு உதவியாக அவர் சமாதானப்படையை அனுப்பியிருந்தார். இந்த விடயமானது புலிகளுடன் மோதலை மேற்கொள்வதுடன் முடிவுக்கு வந்தது.

 
தமது விடுதலைப் போராட்டத்தில் ஈடுபட்டிருந்த தமிழ் இளைஞர் குழுவினரின் கரங்களில் தனது ஆயுதப்படைகள் நசுக்கப்படுவதை இந்தியாவின் கொள்கை வகுப்பாளர்கள் ஒருபோதுமே இடமளிக்கமாட்டார்கள். 2009 இன் கோடை காலப்பகுதியின் யுத்தத்தை முன்னேற்ற இலங்கை ஜனாதிபதி மகிந்த ராஜபக்ஷ தீர்மானித்த போது இந்தியா அவருக்கு முழுமையான ஆதரவை வழங்கியிருந்தது.

இலங்கையிலுள்ள தமிழர்கள் தாழ்ந்த மட்டத்திற்கு சென்றிருக்கக்கூடும். ஆனால், அவர்கள் இல்லாமல் போய்விடவில்லை. வடக்கு,கிழக்கு மாகாணங்கள் இன்று சிங்கள காலனிகளாக மாறிவிட்டன. கிழக்கு மாகாணத்தில் பொம்மை நிர்வாகம் ஏற்படுத்தப்பட்டுள்ளது. சகல அரசியல் நோக்கங்களுக்காகவும் வடமாகாணம் இராணுவ ஆட்சியின் கீழ் உள்ளது. அவர்களின் தாயகமானம் தமிழ் கலாசாரத்தின் மையமாகவும் திகழும் யாழ்ப்பாணத்திலும் வன்னியிலும் சிங்கள மயமாக்கல் பற்றிப்படர்ந்து வருகிறது. ஈழப்போரின் போது இடம்பெற்ற குண்டுவீச்சுகளினால் இந்து ஆலயங்கள் தரைமட்டமாகிவிட்டன. பௌத்த தூபிகள் மேலெழுந்து வருகின்றன. நகரங்கள், கிராமங்கள், வீதிகள் வெற்றிபெற்ற இலங்கை இராணுவ அதிகாரிகளின் பெயர்கள் சூட்டப்பட்டவையாக மாறிவருகின்றன.

தமிழ் மக்களின் வாழ்க்கை அதிகளவு அடக்குமுறைக்கு உட்பட்டவையாக மாறிவருகின்றது. இத்தகைய துன்பமான காட்சிகளுக்கு மத்தியில் சர்வதேச நெருக்கடியிலிருந்து இந்தியா தன்னை பாதுகாக்கும் என இலங்கை நிர்வாகம் எதிர்பார்க்கின்றது. யுத்தத்தின் போது இழைக்கப்பட்டதாகத் தெரிவிக்கப்படும் போர்க்குற்றச்சாட்டுகள் தொடர்பாக ஐ.நா.நிபுணர் குழுவின் அறிக்கையைத் தொடர்ந்து சர்வதேச ரீதியாக இந்தியா தன்னை காப்பாற்ற வேண்டுமென இலங்கை நிர்வாகம் விரும்புகிறது.

தமிழர்களின் தேசிய பிரச்சினைக்குத் தீர்வைக் காண்பது மற்றும் நாட்டிலுள்ள தமிழர்களுக்கு எதிரான நடவடிக்கைகளை கொழும்பு தொடர்ந்து மேற்கொள்வதற்கு இடமளிப்பது என்பவற்றுக்கிடையிலான தற்போது சர்வதேச சமூகத்தின் முன்னால் காணப்படுகிறது.
விடுதலைப் புலிகளின் போராட்டத்தை வெற்றிகொண்டமை தொடர்பான உண்மைத்தன்மை குறித்து அமெரிக்கா உட்பட முழு மேற்குலகுமே இப்போது உறுதியான எண்ணப்பாட்டைக் கொண்டதாக இருக்கின்றன.

புதுடில்லி இப்போது சிக்கியிருக்கும் நிலையில் தமிழ்நாட்டில் புதிதாக தேர்ந்தெடுக்கப்பட்டிருக்கும் ஜெயலலிதாவின் அரசாங்கம், முன்னைய முத்துவேல் கருணாநிதியின் தி.மு.க. அரசாங்கத்தை போல் அல்லாமல் இலங்கைத் தமிழர்கள் தமது இலக்கை வென்றெடுப்பதற்கு உதவுவதற்கான முயற்சியை எடுத்திருக்கிறது.

இலங்கைக்கு எதிரான பொருளாதாரத் தடைகளை இந்திய அரசாங்கம் ஏற்படுத்த வேண்டுமென வலியுறுத்தி மாநில சட்டசபையில் ஜெயலலிதா தீர்மானத்தை நிறைவேற்றியுள்ளார். இது அமுல்படுத்தப்பட்டால் இலங்கையின் பொருளாதாரத்துக்கு பாதிப்பு ஏற்படும். அதனால் தமிழர்களின் நியாயபூர்வமான கோரிக்கையை இலங்கை ஏற்றுக்கொள்ள வேண்டிய நிர்ப்பந்தம் தோன்றும். தி.மு.க.விலிருந்தும் வேறுபட்ட நிலைப்பாட்டை ஜெயலலிதா மேற்கொண்டிருப்பதை எதிர்பார்த்து ஐதராபாத்திற்கு தூதுவர் ஒருவரை இலங்கை அனுப்பியுள்ளது. தமிழ்நாட்டில் புதிய முதலமைச்சருடனான நட்புறவை விருத்தி செய்வதற்கு தெலுங்கு தேசத்தின் தலைவர் சந்திரபாபு நாயுடுவின் சேவையை பெற்றுக்கொள்ள நாடியுள்ளது.

தமது தாயகத்தில் இலங்கை தமிழர்கள் வாழ்கின்ற துன்பமான வாழ்க்கை பற்றி தமிழக சட்டசபையில் இடம்பெற்ற ஆளுநர் உரையின் போது குறிப்பிடப்பட்டுள்ளது. தமது சொந்த இடங்களில் வேருடன் அகற்றப்பட்ட தமிழர்களுக்கு உடனடி புனர்வாழ்வை மேற்கொள்வதற்கான நடவடிக்கைளை எடுக்க வேண்டிய தேவை குறித்து இலங்கை அரசுக்கு அழுத்தியுரைக்குமாறு மன்மோகன் சிங்கை வலியுறுத்தி ஆளுநர் உரையின் போது தெரிவிக்கப்பட்டுள்ளது. இலங்கைத் தமிழர்கள் தொடர்பாக வரவேற்புக்குரிய முன்முயற்சிகளை மேற்கொண்டுள்ள ஜெயலலிதா பாராட்டுக்களுக்கு உரித்தானவர் என்று சாம் ராஜப்பா குறிப்பிட்டுள்ளார்.