துவங்கிய வேகத்தில் முடங்கிய ஆம் ஆத்மி !

மிக குறுகிய காலத்தில் துவங்கப்பட்ட ஆம் ஆத்மி என்னும் அரசியல் கட்சி, டெல்லி சட்டமன்ற தேர்தலில் முதன் முறையாக போட்டியிட்டு 28 இடங்களில் வெற்றியும் பெற்றது. ஆட்சி அமைப்பதற்கு போதிய 36 இடங்கள் இல்லையென்றாலும், எதிரும், புதிருமாக இருந்த காங்கிரஸ் வலியப் போய் தனது 8 சட்டமன்ற உறுப்பினர்களின் ஆதரவை கொடுத்து கெஜ்ரிவால் தலைமையில் ஆம் ஆத்மி கட்சியை ஆட்சி பீடத்தில் அமர்த்தியது. ஆம் ஆத்மியின் இந்த வரலாற்று சிறப்பு மிக்க நிகழ்வை தேசம் முழுவதுமுள்ள ஊழலுக்கு எதிரான மக்கள் கொண்டாடி மகிழ்ந்தனர்.

ஆம் ஆத்மியின் கொள்கையில் முதன்மையானது ஊழல் எதிர்ப்பாகும். ஜன்லோக்பால் சட்டத்தின் மூலம் நாட்டிலிருந்து ஊழலை நிரந்தரமாக ஒழித்து விடமுடியும் என்ற கெஜ்ரிவாலின் நம்பிக்கையை நாமும் வரவேற்றோம். டெல்லியில் ஆட்சி பீடத்தில் அமர்ந்த கெஜ்ரிவாலிடம் பின் தங்கிய மக்கள் எதிர்பார்த்தது, சுத்தமான குடிநீர், பாதுகாப்பான இருப்பிடம், சீரான மின்சாரம், வறுமையை போக்கும் வேலைவாய்ப்பு போன்றவைகளை தான்.

கெஜ்ரிவால் ஆட்சியில் அமர்ந்த நேரம் டெல்லியில் கடும் குளிர்! சேரிப்பகுதியில் வசித்து வந்த குடிசைப்பகுதி மக்களில் சிலர் குளிர் தாங்கும் போர்வை கூட இல்லாமல் இறந்தனர். இந்த செய்தி தான் அன்றைய ஊடகங்களில் பிரதானமாக பேசப்பட்டது. இது தொடர்பாக சமூக நல ஆர்வலர் ஒருவர் தொடர்ந்த பொதுநல வழக்கில் டெல்லி உயர்நீதிமன்றம், குடிசை பகுதிகளில் வசிக்கும் ஏழை மக்களுக்கு குளிர் தாங்கும் கம்பளி போர்வை மற்றும் வீடுகள் வழங்க வேண்டுமென்று கெஜ்ரிவால் அரசுக்கு உத்தரவிட்டது.

அடித்தட்டு மக்கள் முதன்மையாக எதிர் பார்த்த அடிப்படை தேவைகளில் சிலதை கூட செய்து கொடுக்காமல். ஜன்லோக்பால் என்ற ஒற்றை சட்டத்தினை நிறைவேற்ற முயற்சித்து அதற்கு பா.ஜ.க, காங்கிரஸ் ஆதரவு கிடைக்கவில்லை என்ற கோபத்தில் ஆட்சியில் அமர்ந்த 45வது நாளிலேயே தமது அமைச்சரவையை ராஜினாமா செய்த கெஜ்ரிவால் முடிவை கண்டு அவருக்கு வாக்களித்த மக்கள் அதிர்ச்சி அடைந்தனர்.

ஜன்லோக்பாலுக்காக முடிவை தமது முதல்வர் பதிவியை ராஜினாமா செய்த உத்தமர் என்றே வாக்களித்த மக்கள் கருதி மீண்டும் நமது அரசியலுமக்கு துணை நிற்பர் என்று எதிர் பார்த்த கெஜ்ரிவாலுக்கு மக்கள் மறக்க முடியாத தண்டனையை பாராளுமன்ற தேர்தலில் கொடுத்து விட்டனர். கெஜ்ரிவாலின் அவசரத்தனமான அரசியல் முடிவால், டெல்லியில் படுதோல் அடைந்தது மட்டுமல்லாமல் நாடு முழுவதும் தமது இமேஜையும் குறைத்துக் கொண்டார்.

தேர்தல் முடிவுக்கு பின்னரே தமது தவறை உணர்ந்த கெஜ்ரிவால் தமது கட்சியை நம்பி வாக்களித்த டெல்லி மக்களிடம் பகிரங்கமாக மன்னிப்பு கேட்டார். பின்னர் மீண்டும் டெல்லியில் ஆட்சி அமைக்க தமக்கு வாய்ப்பு தரவேண்டுமென்று குடியரசு தலைவரிடமும், காங்கிரஸிடமும் கோரிக்கை வைத்துள்ளார்.

பா.ஜ.க தலைவர் நிதின்கட்கரி தொடர்ந்து அவதூறு வழக்கில் பிணைத்தொகை செலுத்தி ஜாமீன் பெற மறுத்த காரணத்தினால் ஒரு வாரத்திற்கும் மேலாக சிறையில் அடைக்கப்பட்ட கெஜ்ரிவால் தற்போது பிணைத்தொகை செலுத்தியே வெளியில் வந்துள்ளார். கெஜ்ரிவாலின் இந்த முரண்பட்ட நடவடிக்கைகளால் ஆம் ஆத்மியில் குழப்பம் ஏற்பட்டு முககியமானவர்கள் எல்லாம் அந்த கட்சியிலிருந்து வெளியேறும் சூழல் உருவாகிவிட்டது.

தமக்கு கிடைத்த அரியதொரு வாய்ப்பினை டெல்லி ஆட்சி பீடத்தில் இருந்தவாறே பாராளுமன்ற தேர்தலை கெஜ்ரிவால் சந்தித்திருந்தால் கண்ணியமான வெற்றியை டெல்லியிலேயே ஆம் ஆத்மி பெற்றிருக்கும் என்றே உண்மையான ஆம் ஆத்மி (எளிய மக்கள்) கருதுகின்றனர்.

(கீழை ஜஹாங்கீர் அருஸி)

இக்கட்டுரையில் சொல்லப்பட்ட விடயத்திற்கு அப்பால் இந்திய முதலாளித்துவத்தின் சின்னமான அமபானியின் பாஜக ஊடான தாக்குதலை முகம் கொடுக்க முடியாமல், அம்பானி குழுமத்தினால் பதவி கவிழ்கப்பட்டக்கூடிய சூழல் உருவானதும், இதனைத் தொடர்ந்து ஆம் ஆத்மி கட்சியின் பதவி துறப்பு நடைபெற்றது என்பதை புரிந்து கொள்ள வேண்டும். -சாகரன்