அமெரிக்காவை அச்சுறுத்தும் அடுத்த பின்லேடன்!

அபுபக்கர் பாக்தாதி

அடுத்த ஒசாமா பின்லேடன் என்று அஞ்சப்படுபவர் 43 வயது அபுபக்கர் அலி பாக்தாதி. சுமார் 10,000 தீவிரவாதிகள் உள்ள இவரது ஐசஸ் (ISIS) என்கிற தீவிரவாதிகள் அமைப்பு, இன்று ஈராக்கைத் தீக்கிரையாக்கிக் கொண்டு இருக்கிறது. அந்த நாட்டில் இருக்கும் எண்ணெய் வயல்களை இவரது ஆட்கள் சொக்கப்பனைகளாக்கிக் கொளுத்தி விளையாடி வருகிறார்கள். எண்ணெய் சுத்திகரிப்பு ஆலைகளுக்குள் வெடிகுண்டுகளை உருட்டி வெடித்து வேடிக்கைப் பார்க்கிறார்கள். அதனால் விலை மதிப்பில்லாத உயிர்கள் மட்டுமல்ல, உலகின் பொருளாதாரமே சீட்டுக்கட்டு மாளிகையாகச் சரிந்துகொண்டிருக்கிறது.

அல்கொய்தாவில் இருந்து பிரிந்த இயக்கம்தான் இவரது 'ஐசஸ்’ என்றாலும் ஒசாமா பின்லேடன் மாதிரி இவர் எப்போதுமே தன்னை விளம்பரப்படுத்திக்கொள்ள விரும்புவது இல்லை. பாக்தாதி தன் முகத்தை வெளியில் காட்டிக்கொள்வதே இல்லை. தனக்கு அடுத்த நிலையில் இருக்கும் தளபதிகளிடம் பேசும்போதுகூட முகத்தைத் துணியால் மூடிக்கொண்டுதான் இவர் பேசுவாராம். அதனால் பாக்தாதி எப்படி இருப்பார் என்பதே உலகுக்குத் தெரியாது. ஈராக் படைகள் கொடுத்த ஒரு பழைய புகைப்படத்தை வைத்துத்கொண்டு இவர் இப்படித்தான் இருப்பார் என்ற நம்பிக்கையில் அமெரிக்கா உட்பட பல நாட்டு உளவு நிறுவனங்களால் இவர் தேடப்பட்டு வருகிறார்.

கடந்த வாரம் ஈராக்கின் முக்கிய நகரங்களான திக்ரீத் மற்றும் மோசூல் நகரைக் கைப்பற்ற நடைபெற்ற நடந்த துப்பாக்கிச் சண்டையில் 1,700 ராணுவ வீரர்களைக்  கொன்று குவித்துவிட்டதாக அலி பாக்தாதியின் ஐசஸ் படையினர் செய்த எக்களிப்பு அண்டை நாடுகளை மட்டுமல்ல, அமெரிக்காவையும் எரிச்சல் அடைய வைத்திருக்கிறது. இவரது இயக்கம் வெளியிட்டிருக்கும் புகைப்படங்கள் ஈராக் ஆட்சியாளர்களின் வயிற்றில் புளியைக் கரைக்கிறது. ஐசஸ் படை வீரர்களின் துப்பாக்கி சத்தத்தைக் கேட்டாலே ஆயுதங்களை வீசிவிட்டு ஈராக் ராணுவத்தினர் ஓடிவிடுகிறார்கள்.

'எங்களின் அடுத்த இலக்கு பாக்தாத் நகர்தான்’ என்ற அபுபக்கர் அலி பாக்தாதியின் ஐசஸ் படையின் போர்முழக்கத்தைக் கேட்டு அமெரிக்கா, பதற்றம் அடைந்திருந்தாலும் மீண்டும் போரில் ஈடுபட்டு தன் விரல்களை சுட்டுக்கொள்ள விரும்பவில்லை.

ஈராக்கில் நடந்துகொண்டிருப்பது அரசுக்கும் அபுபக்கர் அலி பாக்தாதியின் படைகளுக்கும் இடையில் நடக்கும் போர் இல்லை. இது ஷியா மற்றும் சன்னி என்ற இரு பிரிவினருக்கு இடையே நடக்கும் போர் என்ற கோணத்திலும் சிலர் கருத்து தெரிவிக்கிறார்கள். அடிபட்ட புலிகளாக இருக்கும் சன்னி இன வீரர்களின் தளபதியாக அபுபக்கர் அலி பாக்தாதி உருவெடுத்துவிட்டார் என்கிறார்கள். ''ஒட்டுமொத்த உலகத்தையும் கணக்கில் எடுத்துப் பார்த்தால் 90 சதவிகிதம் சன்னி முஸ்லிம்களுக்கு 10 சதவிகிதம் ஷியா முஸ்லிம்கள்தான் இருக்கிறார்கள். ஆனால் ஈராக்கைப் பொறுத்தவரை ஷியா பிரிவினர்தான் பெரும்பான்மையினர். அங்கே இப்போது ஆட்சிக் கட்டிலில் இருப்பதும் ஷியா பிரிவினர்தான்'' என்று சொல்லப்படுகிறது.

ஆனால், சதாம் உசேன் ஆட்சியில் இருந்தபோது, ஷியா இனத்தவர் கடும் சித்ரவதைகளை அனுபவித்தனர். தன் சொந்த நாட்டு மக்களையே விஷ வாயு செலுத்தி சதாம் உசேன் கொன்றார் என்றெல்லாம் அப்போது சதாம் மீது குற்றம் சுமத்தப்பட்டன. நாசகார ரசாயன ஆயுதங்களை வைத்திருக்கிறார் என்ற குற்றம் சுமத்திதான் அமெரிக்கா ஈராக்குக்குத் தனது துருப்புகளை அனுப்பி சதாமுக்கு மரண தண்டனையை நிறைவேற்றியது.

சதாம் வீழ்ச்சிக்குப் பிறகு காட்சிகள் மாறின. அமெரிக்காவின் உதவியோடு ஷியா பிரிவினர் ஆட்சி அதிகாரத்தைப் பிடித்தனர். இருந்தாலும் சன்னி பிரிவினர் அடங்கிவிடவில்லை. கார்களை வெடிகுண்டுகளாக மாற்றும் வித்தையில் நிபுணத்துவம் பெற்றிருந்த அவர்கள், ஆட்சியாளர்களை ஒரு நாள்கூட நிம்மதியாகத் தூங்கவிட்டது இல்லை. சன்னி பிரிவினர் வசித்த பகுதிகளில் எல்லாம் அல்கொய்தா இயக்கம் வேர்விட்டது. ஈராக்கில் அமெரிக்க துருப்புகளின் கை ஓங்கியிருந்தபோதும், சன்னி இனப் போராளிகள் வைத்த கார் வெடிகுண்டுகள் ஈராக்கின் எல்லா திசைகளிலிலும் ஓயாமல் வெடித்துக்கொண்டே இருந்தன.

ஒசாமா பின்லேடனின் மறைவுக்குப் பிறகு சர்வதேச அளவில் அல்கொய்தா இயக்கத்தின் தலைமையே தள்ளாட்டம் கண்டது. 'சிரியாவின் (ஈராக்கின் பக்கத்து நாடு) விவகாரங்களில் நீங்கள் தலையிட வேண்டாம்’ என்று அல்கொய்தாவின் தலைமை விடுத்த எச்சரிக்கையை பாக்தாதி மீறினார். அல்கொய்தாவுக்கு ஐசஸ் என்ற புதிய அடையாளத்தை இவர் கொடுத்தார். பொதுமக்கள் - போர்வீரர்கள் என்று எந்த பாகுபாடும் பார்க்காமல் வெடிகுண்டுகளை வீசி, ஈவு இரக்கமே இல்லாமல் அரக்கத்தனமாக உயிர்களைப் பறிக்கும் அபுப்பக்கர் அலி பாக்தாதியின் போக்கு தங்களுக்கு கெட்டப்பெயர் வாங்கிக் கொடுக்கும் என்று அச்சத்தினால், தங்களுக்கும் ஐசஸ் இயக்கத்துக்கும் எந்த தொடர்பும் இல்லை என்று அல்கொய்தா இயக்கத்தினரே பிரகடனப்படுத்திவிட்டனர்.

சிரியாவின் எண்ணெய் வயல் முதலாளிகளிடமிருந்து பணம்பெற்று வளர்ந்த பாக்தாதியின் ஐசஸ் இயக்கம், சமீபத்தில் அது கைப்பற்றிய மொசூல், கிர்குக், திக்ரித், சாதியா, ரமாடி சமர்ரா, ஜலாலா ஆகிய நகர வங்கிகளில் இருந்த பணத்தை எல்லாம் கொள்ளையடித்திருக்கிறது. பணம் பாதாளம் மட்டும் பாயும். பணத்தோடு சேர்ந்து ஆயுதம், சன்னி இனமக்களின் கோபம் போன்றவற்றையும் தனக்கு சாதகமாக வைத்திருக்கும் பாக்தாதியின் பலம் எதுவரை பாயும் என்பதை காலம்தான் சொல்ல வேண்டும். அதற்குள் எத்தனை மனித உயிர்கள் காவு வாங்கப்படும் என்பதை யாராலும் கணிக்க முடியாது!

- வேல்ஸ்