சாரணர் இயக்கத்தை வலுப்படுத்தி  மாணவர்களை ஒழுக்க சீலர்களாக்கலாம்

முதலாம் தவணையின் இறுதி வாரங்களில் பாடசாலைகளுக்கு இடையிலான கிரிக்கெட் போட்டிகள் நடைபெறும் போது, பாட சாலைப் பிள்ளைகளின் மனதிற்குள் புதைந்திருக்கும் சில தீய எண்ணங்கள் வெளிப்படையாக இன்று கொழும்பிலும் நாட்டின் ஏனைய பிரதான நகரங்களிலும் வீதிகளில் அரங்கு ஏறுவதை நாம் பார்த்திருக்கிறோம். இந்த கிரிக்கெட் போட்டிகள் நடைபெறும் நாட்களில், பாடசாலை மாண வர்கள் விநோத உடைகளை அணிந்து தங்கள் பாடசாலை கொடி களை ஏந்தியவாறு, மகிழ்ச்சி ஆரவாரம் செய்தவண்ணம் வாகனங் களில் செல்வதுண்டு. இன்னும் சிலர் நூற்றுக் கணக்கில் சைக்கிள் ஊர்வலங்களில் சென்று மகிழ்ச்சி ஆரவாரத்தில் ஈடுபடுவதும் உண்டு. வேறு சிலர் தொப்பிகளை கையில் வைத்த வண்ணம் வீதியில் செல்லும் பொதுமக்களிடம் பிச்சை எடுப்பதுபோன்று கைச்செலவுக்கு ஏதாவது தாருங்கள் என்று கேட்பதும் உண்டு.

இவை அனைத்தையும் வயது வந்த பொதுமக்கள் சிறு பிள்ளைகளின் விளையாட்டு என்று நினைத்து, தங்களால் முடிந்தளவு பண உதவி செய்து அவர்களை மன்னித்துவிடுவார்கள். அதுபோன்றே, பொலிஸா ரும் இந்த பாடசாலை பிள்ளைகள் மற்றவர்களுக்கு துன்பமிழைக்காத வாறு நடத்தப்படும் சேஷ்டைகளை பார்த்தும் பாராதவர்கள் போன் றும் இருப்பார்கள்.

வட பகுதியில் உள்ள பாடசாலைகளிலும் இதுபோன்று கிரிக்கெட் போட்டி கள் நடைபெறும்போது மாணவர்கள் இவ்விதம் குதூகலிப்பது உண்டு. ஆயினும் இப்போது மாணவர்கள் இந்த கிரிக்கெட் போட்டிகளின் போது மேற்கொள்ளும் வினோதமான விளையாட்டுக்கள் மக்களை துன்புறுத்தும் அல்லது வேதனைப்படுத்தும் அளவுக்கு மோசமடைந் துள்ளது. கிரிக்கெட் போட்டிகள் நடைபெறும் மைதானத்திற்குச் சென்று மகிழ்ச்சி ஆரவாரம் செய்வதற்கு பதில் இவர்களில் சில மாணவர்கள் தங்கள் பெற்றோரிடமிருந்தும் வழிப்போக்கர்களிடமிரு ந்தும் கிடைக்கும் பணத்தில் மது அருந்தி, அகெளரவமான முறையில் வீதியில் நடந்துகொள்வதைப் பார்க்கும் பொதுமக்கள் அருவெறுப்பும் வேதனையும் அடைகிறார்கள்.

சில மாணவர்கள் மதுபோதையில் அல்லது மது அருந்தாத சுய நினை வுடன் பெண்கள் பாடசாலைகளை முற்றுகையிட்டு, மாணவிகளையும் ஆசிரியர்களையும் துன்புறுத்தும் சேஷ்டைகளிலும் ஈடுபடுவதும் உண்டு. இதனால், ஆத்திரமும்,கோபமும் அடையும் பெண்கள் பாட சாலைகளின் அதிபர்கள் தங்களுக்கு அபயமளிக்குமாறு அருகிலுள்ள பொலிஸ் நிலையத்திற்கு வேண்டுகோள் விடுத்து, பொலிஸாரின் பாதுகாப்பை நாடுவதும் உண்டு.

சில மாணவர்கள் பெண் பாடசாலைகளின் வெளிச்சுவரில் கேவலமான துர்வசனங்களை கொட்டை எழுத்துக்களில் எழுதியும், தங்கள் தீய எண்ணங்களை வெளிப்படுத்துவதும் உண்டு. இதுபற்றி, ஒரு சிரேஷ்ட பொலிஸ் உத்தியோகத்தர் கருத்துத் தெரிவிக்கையில், இந்தத் தடவை பாடசாலை மாணவர்கள் வீதிகளிலும், பொது இடங்களிலும் இவ்விதம் சட்டவிரோதமான முறையில் முறைகேடாக நடந்துகொண்டால், அவர்களுக்கு எதிராக பொலிஸார் கடுமையான நடவடிக்கைகளை எடுப்பார்கள் என்று அறிவித்துள்ளார்.

சுமார் 50, 60 ஆண்டுகளுக்கு முன்னரும் இத்தகைய கிரிக்கெட் போட்டி கள் பாடசாலைகளுக்கு இடையில் நடைபெற்றன. அன்றும் பாட சாலை பிள்ளைகள் இவ்விதம் வீதிகளிலும் பொது இடங்களிலும் கிரிக்கெட் போட்டிகள் நடைபெறும்போது, வாகனங்களில் சென்று பொது இடங்களில் மகிழ்ச்சி ஆரவாரங்கள் செய்வதுண்டு.

ஆனால், அன்று இத்தகைய ஆரவாரங்களை பாடசாலை மாணவர்கள் மிகவும் கண் ணியமான முறையில் பொதுமக்களுக்கோ, மாணவிகளுக்கோ மன வேதனை அளிக்காத வகையில் செய்தார்கள். அன்று, ஆசிரியர் களும் பொது இடங்களில் தங்கள் பாடசாலை பிள்ளைகள் முறை தவறி நடக்காதவாறு அவதானிக்கும் பொறுப்பையும் ஏற்று, தவறி ழைக்கும் மாணவர்களை தண்டிக்கவும் தவறியதில்லை.

ஆனால், இன்று பாடசாலை மாணவர்களின் ஒழுக்கம் சீர்குலைந்து போயிரு க்கிறது என்பதை நாம் வேதனையுடன் ஞாபகப்படுத்துவது பொருத் தமாக இருக்கும் என்று நம்புகிறோம்.

பாடசாலை பிள்ளைகளின் ஒழுக்கம் சீர்குலைவதற்கு ஒருவகையில் பெற் றோரும் பொறுப்பை ஏற்கவேண்டும். தங்கள் பிள்ளைகளுக்கு அளவு க்கதிகமாக பணத்தையும், சுதந்திரத்தையும் கொடுப்பதே ஒழுக்க சீர்குலைவுக்கான பிரதான காரணமாகும்.

சுமார் 50 ஆண்டுகளுக்கு முன்னர், இலங்கையில் சகல பாடசாலைக ளிலும் சாரணர் இயக்கம் வலுப்பெற்றிருந்தது. அன்று, சாரணர் இயக்கத்தில் அங்கத்தவராக இருக்கும் ஒரு மாணவனுக்காக பாடசா லைகளில் மாணவர் தலைவர் தலைமைப் பதவிகள் கொடுக்கப் படுவதுண்டு. அதுபோன்றே அவர்கள் படிப்பை முடித்து வெளி யேறிய பின்னர் சாரணர் இயக்கத்தில் அங்கத்தவராக இருந்தால், வேலை வாய்ப்புக்களிலும் முன்னுரிமை கொடுக்கப்பட்டது.

1857 ஆம் ஆண்டு பெப்ரவரி 22ந் திகதியன்று, பிறந்த சாரணர் இயக்க த்தின் ஸ்தாபகரான ரொபேட் பேடன் பவுல் பிரிட்டிஷ் இராணுவத்தில் லெப்ரினன் ஜெனரல் என்ற உயர் பதவி வகித்திருந்தார்.

அவர், சாரணர் இயக்கத்தை இலங்கை உட்பட உலக நாடுகள் அனைத்திலும், ஆரம்பித்து, உலகின் எதிர்கால சந்ததியினரை ஒழுக்க சீலர்களாக மாற்றுவதற்காக இவ்வியக்கத்தை கடமை, கண்ணியம், கட்டுப்பாடு என்ற தொனிப்பொருளில் வளர்த்து, சாரணர்கள் பொதுத் தொண்டு களில் தொண்டர் அடிப்படையில் ஈடுபட்டு நாட்டிற்கு பணியாற்ற வேண்டும் என்ற உயர்ந்த பண்பை வலியுறுத்தினார்.

இன்றும், சாரணர் இயக்கங்கள் உலகில் இருந்தாலும், அது அந்தளவுக்கு இன்று வலுவுடன் செயற்படவில்லை. அதுவும், இன்றைய மாணவர்கள் மத்தியில் ஒழுக்கம், குறைந்து வருவதற்கு ஒரு பிரதான காரணமாகும்.

(தினகரன்)