பெண் உரிமையை பறிக்கும் யு.என்.பிக்கு மக்கள் பாடம் புகட்டுவார்கள்

ஒரு புதிய அரசியல் கலாசாரத்தை ஏற்படுத்தி பெண்களுக்கும், நாட்டின் நிர்வாகத்தில் சம அந்தஸ்தை அளிப்பதன் முக்கியத்துவத்தை ஜனாதிபதி மஹிந்த ராஜபக்ஷ அவர்கள் இப்போது வலியுறுத்தி வருகிறார். மார்ச் மாதம் 8ந் திகதியன்று, இலங்கையில் சர்வதேச மகளிர் தினம் சிறப்பாக கொண்டாடப்பட்ட போதிலும், உண்மையில் பெண்களுக்கு அந்தளவுக்கு கெளரவமும், உரிமையும் கொடுக்கப்படுவதில்லை என்று, சுட்டிக்காட்டியுள்ள ஜனாதிபதி அவர்கள், பெண்களை கொடுமைப்படுத்தும் ஆண் ஆதிக்கத்தை இல்லாது ஒழிக்கும் வகையில் தமது அரசாங்கம் கடுமையான முறையில் சட்டங்களை நிறைவேற்றும் என்று அறிவித்துள்ளார்.

பெண்களை கொடுமைப்படுத்தி, அவர்களை இரண்டாந்தர பிரஜைகளாக வீடுகளுக்குள் முடக்கி வைக்கும் குற்றச் செயலை பெரும்பாலும், ஐக்கிய தேசிய கட்சியே மேற்கொண்டு வருகிறது. ஐக்கிய தேசிய கட்சி அரசாங்கத்தில் வீற்றிருக்கும்போதும், எதிர்க் கட்சியாக இருக்கும்போதும் தனது கொள்கையை மாற்றாமல், பெண் உரிமையை பறிப்பதிலேயே ஆர்வம் காட்டி வருகிறது.

இதனால் தான் கம்பஹா தொகுதியில் அரசாங்க கட்சியின் சார்பில் போட்டியிடும் ஒரு பெண் வேட்பாளரை அவர் கர்ப்பிணியாக இருக்கிறார் என்பதைக் கூட பொருட்படுத்தாமல், ஐக்கிய தேசிய கட்சியினர் அடித்து, காயப்படுத்தி அவரை பெரும் வேதனையில் ஆழ்த்தியுள்ளார்கள் என்று சுட்டிக்காட்டிய ஜனாதிபதி, பெண்களுக்கு எதிராக வன்முறைகளை கட்டவிழ்த்து விடும் அரசியல்வாதிகள் குறிப்பாக ஐக்கிய தேசிய கட்சியினர் மீது கடுமையான சட்ட நடவடிக்கை எடுக்கப்படும் என்றும் எச்சரிக்கை செய்துள்ளார்.

1977 ஆம் ஆண்டில், ஜே. ஆர். ஜயவர்தனவின் தலைமையின் கீழ், ஆட்சிப் பொறுப்பை ஐக்கிய தேசிய கட்சி ஏற்றுக்கொண்டது முதல், அக்கட்சி பாராளுமன்ற ஜனநாயக பாரம்பரியங்களை உதாசீனம் செய்து, வன்முறைகளின் மூலமே, தேர்தல்களை நடத்தி, முறைகேடாக தேர்தல் வெற்றிகளையும் பதிவு செய்து வந்தது. அன்றைய அரசாங்கத்தின் இத்தகைய ஜனநாயக விரோத செயற்பாடுகளை பொது மேடைகளில் கண்டித்து பேசுபவர்களின் தராதரம் பார்க்காமல் ஜே. ஆர். ஜயவர்த்தன அரசாங்கம் தனது குண்டர்களை அனுப்பி, நையப்புடைத்து, அவர்களை மெளனிகளாக்கியது.

அன்றைய அரசாங்க கட்சிக்கு எதிராக ஒரு தீர்ப்பை வழங்கிய உயர்நீதிமன்றத்தின் நீதியரசர் ஒருவரின் வீட்டிற்கும் ஐக்கிய தேசிய கட்சி அரசாங்கம் தனது குண்டர்களை அனுப்பி, அந்த வீட்டை கற்களால் தாக்கி, உயர் நீதிமன்றத்தின் சுயாதீனத்தை பறிக்கக் கூடிய வகையில் வன்முறைகளை கடைப்பிடித்து, நீதியரசர்களை அச்சுறுத்திய சம்பவங்களையும் இந்நாட்டு மக்கள் மறுந்துவிடமாட்டார்கள்.

எல்லோரினதும் பெரும் மதிப்பை பெற்றுள்ள இந்நாட்டின் தொழிலாளர் வர்த்கத்தின் உரிமைக்காக தமது வாழ்நாள் பூராவும் கடுமையாக உழைத்து வரும் இன்றைய மேல் மாகாண ஆளுநர் அலவி மெளலான அவர்களைக் கூட, அன்றைய ஐக்கிய தேசிய கட்சியின் அரசாங்கத்தின் குண்டர்கள் கத்தியால் குத்தியும், சைச்கிள் செயின்களால் தாக்கியும், படுகாயப்படுத்திய வேதனைக்குரிய கொடுமைகளையும் மக்கள் எளிதில் மறந்துவிட மாட்டார்கள்.

அன்று, அதிகாரத்தில் வீற்றிருந்த ஐக்கிய தேசிய கட்சியினர் இன்றைய உள்ளூராட்சிமன்ற தேர்தலிலும் எத்தகைய தில்லுமுல்லுகளை செய்தாவது வெற்றிபெற வேண்டும் என்ற சுயநலநோக்கத்துடன், வன்முறை கலாசாரம் ஒன்றை கட்டவிழ்த்து விட்டுள்ளார்கள்

இல்லத்தரசிகள் வீட்டை நன்றாக நிர்வகித்து, கணவன்மார் தங்களுக்கு மாதாந்தம் கொடுக்கும் வீட்டு செலவுக்கான பணத்தை கவனமாக பயன்படுத்தி, வீட்டில் மகிழ்ச்சியை ஏற்படுத்தும் பணியை வெற்றிகரமாக நிறைவேற்றிக் கொண்டிருக்கிறார்கள்.

அவ்விதம், வீட்டை சிறப்பாக நிர்வகிக்கும் பெண்குலத்திற்கு அரசியலில் பிரவேசித்து, நாட்டையும் சிறந்த முறையில் நிர்வகிக்க முடியும் என்ற யதார்த்தத்தை மறந்து, ஐக்கிய தேசிய கட்சி பெண்களை ஆண்வர்க்கத்தின் அடிமைகளைப் போல், நடத்தும் கொள்கைகளை தொடர்ந்தும் கடைப்பிடித்து வருவது உண்மையிலேயே வேதனையை அளிக்கின்றது.

பெண் வர்க்கத்தை இவ்விதம் ஆண்களின் ஆதிக்கத்திலிருந்து விடுவித்து, அவர்களுக்கும் நாட்டின், நிர்வாகத்தில் பங்களிப்பை வழங்க வேண்டும் என்பதற்காக ஜனாதிபதி அவர்கள் தமது அரசாங்க கட்சியின் சார்பில் போட்டியிடும் பெண் வேட்பாளர்களை அதிகரித்து, உள்ளூராட்சி மன்றங்களுக்கு தேர்ந்தெடுக்கப்படும் பெண் பிரதிநிதிகளின் எண்ணிக்கையை அதிகரிப்பதற்கு இப்போது நடவடிக்கைகளை எடுத்து வருகிறார்.

பெண் உரிமையின் மீதும், பெண்களுக்கு சமத்துவம் அளிக்கப்பட வேண்டும் என்பதிலும் ஆர்வம் காட்டிவரும் எமது நாட்டு வாக்காளர்கள் இந்த உண்மையை உணர்ந்து, தங்களின் விலைமதிப்பற்ற வாக்குகளை நன்கு சிந்தித்து, யதார்த்த பூர்வமாக பயன்படுத்தினால் நிச்சயம் ஜனாதிபதி மஹிந்த ராஜபக்ஷ அவர்கள் எடுத்து வரும், பெண்களுக்கு ஆண் ஆதிக்கத்திலிருந்து பூரண விடுதலையை பெற்றுக் கொடுப்பதற்கான லட்சியக் கனவு மகத்தான வெற்றியடையும் என்பது திண்ணம்.

(தினகரன்)