சுனாமி ஆபத்து எந்நேரமும் ஏற்படும்  என்பதை நாம் மறந்துவிடலாகாது

2004ஆம் ஆண்டு டிசம்பர் 26ந் திகதியன்று, இலங்கையிலும், தெற்காசிய நாடுகளையும் சின்னாபின்னப்படுத்தி, பல்லாயிரக் கணக்கான உயிர்களை பலிகொண்டும் கோடிக்கணக்கான பெறுமதியுடன் சொத்துக்களையும், உடைமைகளையும், கட்டிடங்களையும் அழித்துவிட்ட சுனாமி அனர்த்தத்தை இலங்கை மக்கள் இன்று முற்றாக மறந்துவிட்டார்கள். கடந்த வெள்ளிக்கிழமை ஜப்பானையும், பசுபிக் சமுத்திரத்தை அண்டியுள்ள நாடுகளையும் அதனைவிட அதிக பலம் வாய்ந்த சுனாமி ஒன்று பேரழிவை ஏற்படுத்தியது. ஜப்பான் மக்கள், எதற்கும் அஞ்சாத மனோதிடமும், விடாமுயற்சியும் உடைய எறும் பைப் போன்ற சுறுசுறுப்பானவர்கள். 1945ம் ஆண்டில் இரண்டா வது உலக மகா யுத்தத்தின்போது, யுத்தத்தை முடிவுக்கு கொண்டு வருவதற்காக அமெரிக்கா, ஜப்பானின் ஹிரோஷிமா, நாகசாகி ஆகிய இரு நகரங்கள் மீது அணுகுண்டை போட்டு பல லட்சக் கணக்கான மக்களை பழிவாங்கி ஜப்பானை சரணடையவைத்தது.

அந்த அணுகுண்டு தாக்குதலின் தாக்கம் இன்னமும் இவ்விரு நகரங்களை அண்டியுள்ள பிரதேசங்களில் வாழும் அப்பாவி ஜப்பானிய மக்களை விட்டுவிலகவில்லை. அப்பிரதேசங்களில் வாழும் மக்கள் இப்போதும் புற்றுநோய் போன்ற ஆட்கொல்லி நோய்களுக்கு பலியாகிக் கொண்டிருக்கிறார்கள்.

1945ஆம் ஆண்டில் முழு உலகமே ஜப்பான் இனிமேல் தலைதூக்க முடியாது வேதனையில் மூழ்கிவிடும் என்று நம்பியிருந்த போதிலும், அழிவின் சாம்பலிலிருந்து மீண்டெழுந்த ஜப்பானிய மக்கள் விடாமுயற்சியுடன் நாட்டை கட்டியெழுப்புவதற்காக இரவு பகலாக கடுமையாக உழைத்தார்கள். அதன் விளைவாக இன்று ஜப்பான் உலகின் மிகப் பெரிய பொருளாதார வல்லரசாக உருவாகி இருக்கிறது.

இன்று, ஜப்பானில் தயாரிக்கப்படும் பொருட்கள் உலக நாடுகள் எங்கிலும் பெரும் வரவேற்பைப் பெற்றுள்ளது. அதனடிப்படையில் இந்த சுனாமி அழிவிலிருந்தும் ஜப்பான் மீண்டும் பழைய நிலைக்கு மிக விரைவில் வந்துவிடும்.

1940 ஆம் 50ஆம் ஆண்டு தசாப்தங்களில் உலகத்திற்கு தேவையான கார்கள், லொறிகள், பஸ்கள் போன்ற வாகனங்களை அமெரிக்காவும், பிரிட்டனுமே தயாரித்து விற்பனை செய்தன.

இன்று, இவ்விரு நாடுகளில் அந்த வாகன விற்பனை ஏகபோக உரிமையை உடைத்து பலவீனமாக்கி இருக்கும் ஜப்பான், உலக நாடுகள் அனைத்திற்கும் வாகனங்களை உற்பத்தி செய்யும் முன்னணி நாடாக புகழ் உச்சியில் ஜொலித்துக்கொண்டிருக்கிறது.

இலங்கை வாழ் மக்கள் அனைவரும் இன்று தங்கள் வீடுகளிலிருந்து தொலைக்காட்சி நிகழ்ச்சிகளைப் பார்த்து, மனநிறைவடைவதற்கான வாய்ப்பை பெற்றுக் கொடுத்த நாடான ஜப்பானுக்கு கடந்த வாரம் ஏற்பட்ட சுனாமி பேரலை குறித்து, இந்நாட்டு மக்கள் மட்டுமல்ல, உலகெங்கிலும் பரந்து வாழும் மக்கள் அனைவரும் மீளாத்துயரில் ஆழ்ந்துள்ளார்கள்.

1980 ஆம் ஆண்டு தசாப்தத்தின் ஆரம்பத்தில் இலங்கைக்கு ஜப்பா னிய அரசாங்கம் தனது சொந்த செலவில் இலங்கை ரூபவாஹினி கூட்டுத்தாபனத்தை அமைப்பதற்கான சகல தொழில்நுட்ப சேவைகளையும் உருவாக்கியதுடன் நின்று விடாமல், ரூபவாஹினி கூட்டுத்தாபனத்தின் நூற்றுக்கு மேற்பட்ட உத்தியோகஸ்தர்களுக்கு ஜப்பானில் புலமைப்பரிசில் மூலம் தொழில்நுட்பம் பற்றிய அதியுன்னத பயிற்சிகளையும் பெற்றுக்கொடுத்தது.

இவையனைத்தையும் ஜப்பானிய அரசாங்கம் இலங்கைக்கு ஒரு சன்மானமாகவே செய்து கொடுத்தது. இந்த நற்பணிகளுக்கு நன்றி தெரிவிக்கும் முகமாக ஜனாதிபதி மஹிந்த ராஜபக்ஷ அவர்கள், ஜப்பானிய சக்கரவர்த்திக்கு அனுப்பியுள்ள ஒரு விசேட அனுதாபச் செய்தியில், இலங்கை இவ்வனர்த்தம் குறித்து மிகவும் வேதனைப்படுவதாகவும், இந்த அனர்த்தத்திலிருந்து மீள் எழுவதற்கு இலங்கை ஜப்பானுக்கு சகல விதமான உதவிகளையும் செய்வதற்கு தயாராக இருக்கிறது என்றும் தெரிவித்துள்ளார்.

சுனாமி அனர்த்தத்தை பற்றி இதுவரையில் அதிகமான தகவல்களை உங்களுக்கு எடுத்துரைத்த நாம், ‘பழைய குருடி கதவை திறடி’ என்ற கூற்றை ஞாபகப்படுத்துவது பொருத்தமாக இருக்கும்.

சுனாமி ஏற்பட்டதை அடுத்து, கடற்கரையிலிருந்து நூறு மீற்றருக்கு அப்பால் தான் கட்டிடங்களை நிர்மாணிக்க வேண்டும் என்ற விதிமுறை அறிவிக்கப்பட்ட போதிலும், இன்று எத்தனை பேர் அதனை கடைப்பிடித்து வருகிறார் என்று நாம் வினவுகிறோம்.

ஜப்பானில் சுனாமி ஏற்பட்டதை அடுத்து, மற்ற நாடுகளுக்கும் இதன் தாக்கத்தினால் சுனாமி ஆபத்து ஏற்படலாம் என்று அறிவுறுத்தல்கள் கொடுக்கப்பட்டிருந்த போதிலும், கடந்த வெள்ளிக்கிழமை, சனிக்கிழமை அந்திசாயும் வேளையில் சுனாமி பற்றி எவ்வித அச்சமுமின்றி மக்கள் கொழும்பிலும், நாட்டின் ஏனைய பகுதிகளிலும் தங்கள் குழந்தைகளுடன் கடற்கரைக்கு சென்று பொழுதை மகிழ்ச்சியோடு கழித்ததை எங்களில் பலரும் அவதானித்திருக்கலாம்.

சுனாமி அனர்த்தம் எந்நேரத்திலும் உலகில் கடற் பிரதேசத்தை அண்டியுள்ள எந்தவொரு நாட்டையும் தாக்கி, பேரழிவை ஏற்படுத்தலாம் என்ற யதார்த்தத்தை உணர்ந்து இலங்கை மக்கள் தங்கள் நாளாந்த வாழ்க்கையில் அவதானமாக இருந்தால், என்றாவது ஒரு நாள் சுனாமி ஏற்பட்டாலும், நாம் எங்களுக்கு ஏற்படக் கூடிய பேரழிவை அதிகளவில் குறைத்துக்கொள்ளலாம் என்ற நற்செய்தியை ஞாபகப்படுத்த விரும்புகிறோம்.

(தினகரன்)