போர்க்குற்றங்களை மறுக்கும் சிறிலங்கா

(அமெரிக்காவில் இருந்து வெளியாகும் Boston Globe  என்ற நாளேடு எழுதியுள்ள ஆசிரிய தலையங்கத்தின் தமிழாக்கம் கீழே கொடுக்கப்பட்டுள்ளது. மேற்குலக நாடுகளின் நாடித் துடிப்பைப் பிடித்துப் பார்ப்பதற்கு இந்த ஆசிரிய தலையங்கம் துணை புரிகிறது.  பழைய கனவிலும் காலத்திலும் கோலத்திலும்  நிற்பவர்கள் கண்களை இது திறக்கும் என நம்புகிறேன்.  நக்கீரன்)

சிறிலங்கா அரசு விடுதலைப் புலிகளது படையைத்  தோற்கடித்துப் போரை முடிவுக்குக் கொண்டு  வந்து கிட்டத்தட்ட மூன்று ஆண்டுகள் சென்றுவிட்டன.  இந்தப் போரில் பல்லாயிரக்கணக்கான பொது மக்கள் கொல்லப்பட்டார்கள்.  ஜெனீவாவில் இந்த வாரம் கூடுகிற அய்.நா மனிதவுரிமை அவை  சிறிலங்கா அரசு போர்க்குற்றங்களை இட்டு விசாரணை மேற்கொள்ள வேண்டும் என வற்புறுத்த வேண்டும்.  ஆனால் நடந்து முடிந்த குற்றங்களுக்குப் பொறுப்புக் கூறல் என்பது அதன் எதிர்காலத்தைப் பாதிப்பதாக இருக்கக் கூடாது. 

போரில் தோல்வியைச் சந்தித்த தமிழ் மக்கள் மிகவும் கசப்பான மனநிலையில் இருக்கிறார்கள். இருந்தும்  அவர்கள் தொலைநோக்கோடு  சமாதான முறையில் சிங்கள மக்களோடு ஒத்துவாழும் வாய்ப்பை நழுவவிடக் கூடாது.   இந்தப் பயங்கரமான மோதலின் தோற்றத்துக்கு காரணமாக இருந்த கேள்விகளுக்கு விடை காணப்படவில்லை.  எந்தளவு தன்னாட்சி உரிமை சிறுபான்மைத் தமிழர்களுக்கு இருக்கும்? 

தமிழ் மக்கள் தாங்கள் ஒத்துரிமையுடைய குடிமக்கள் என எண்ணுவதற்கு எதனைச் செய்ய வேண்டும்? மிக அண்மைக் காலம்வரை தமிழர்கள் தனிநாட்டுக் கோரிக்கைக்குக் குறைந்த தீர்வு எதனையும் ஏற்க மறுத்தார்கள். இப்போது கூட அமெரிக்கா மற்றும் கனடாவில் உள்ள கடும்போக்காளர்கள் அந்தக் கனவில் மிதக்கிறார்கள். இவர்களது மறுப்பு மக்களுக்குச் செய்யும் பணி மறுப்பாகும்.  பலர் தங்களது போராளிகள் - தமிழீழ விடுதலைப் புலிகள் - இழைத்த போர்க்குற்றங்களை ஒப்புக்கொள்ள மறுக்கிறார்கள்.   தமிழீழ விடுதலைப் புலிகளே தற்கொலைக் குண்டுத் தாக்குதல்களுக்கும் உக்கிரமான போரின் இறுதிக்கட்டங்களில் பொதுமக்களைக் கேடடியமாகப் பிடிப்பதற்கும் முன்னோடிகள்.    பழையனவற்றைப் பற்றி விசாரணை வேண்டும் என தமிழர்கள் விரும்பினால் இருதரப்பினரும் பாரிய போர்க்குற்றங்களை இழைத்தார்கள் என்பது ஒப்புக் கொள்ள வேண்டும்.

சிறிலங்கா அரசும் அது இழைத்த குற்றங்கள் தொடர்பாக ஒரு மறுத்தல் நிலையில் உள்ளது. இதில் மருத்துவமனைகள் மீது செல் அடித்தது,  சட்டத்துக்கு முரணான கைதுகள் மற்றும் காணாமல் போனவை உட்பட்ட  குற்றங்கள் உள்ளடங்கும்.  விசாரணையின்றி கொலைசெய்தல் மற்றும் பாலியல் வன்முறை போன்ற குற்றச்சாட்டுக்கள் பலவுண்டு.

சிறிலங்கா அரசு போர் பற்றித் தன்னால் நியமிக்கப்பட்ட ஆணையத்தின் குறைந்தளவு பரிந்துரைகளை - காணாமல் போனோர் பற்றி விசாரணை,  செய்தியாளர்கள் மீது மேற்கொள்ளப்படும் தாக்குதல்களை நிறுத்தல்,  தமிழ்ப் பெரும்பான்மை பிரதேசத்தில் சிங்களவர்களைக் குடியேற்றல் நிறுத்தப்பட வேண்டும் போன்றவற்றை    நடைமுறைப்படுத்த வேண்டும்.  சிறிலங்காவின் தலைவர்கள் அதற்கு அணியமாக இல்லாவிட்டால் அ.நா அவை ஒரு சுயாதீன விசாரணையை மேற்கொள்ள வேண்டும்.  ஆனால் எந்தவொரு அ.நா விசாரணையும் சிறிலங்கா அரசு ஒருவருக்கு ஒருவர் இழைத்த குற்றங்கள் பற்றி இதயசுத்தியான முயற்சிக்கு ஈடாகமாட்டாது.  (பெப்ரவரி 29,2012)