இன்னொரு "கொலவெறி' விடியோ

இன்னொரு "கொலவெறி' விடியோ யூடியூப் இணையதளத்தை ஆக்கிரமித்திருக்கிறது. இரண்டு மூன்று நாள்களில் சுமார் 5 கோடி பேருக்கு மேல் இந்த விடியோவை பார்த்திருக்கிறார்கள். ஆனால், கொலவெறி விடியோவைப் போல் இல்லாமல், இந்த முறை அரசியல், மனித உரிமை போன்ற நோக்கங்களுடன் இந்த விடியோ இண்டர்நெட்டில் உலா வருகிறது. விடியோவின் பெயர் கோனி 2012. அது என்ன கோனி? கோனி "அது' அல்ல, அவர். உகாண்டா, சூடான், தெற்கு சூடான், டி.ஆர்.காங்கோ ஆகிய நாட்டு ராணுவங்களைக் கடந்த 20 ஆண்டுகளாக நடுங்கச் செய்த நக்சல் அமைப்பின் தலைவரின் பெயர்தான் கோனி. முழுப் பெயர் ஜோசப் கோனி. அவரது எல்.ஆர்.ஏ. எனப்படும் கடவுளின் தடுப்புப் படையினர் செய்த மனித உரிமை மீறல்களைப் பற்றியது யூடியூப் விடியோ.

 "இன்விசிபிள் சில்ரன்' என்கிற தன்னார்வ அமைப்பு உருவாக்கியிருக்கும் இந்த 27 நிமிட விடியோ, கோனியை கொடூரமானவராகச் சித்திரிக்கிறது. கொலைவெறி பிடித்தவர் என்று கூறுகிறது. கிட்டத்தட்ட சாத்தான் என்கிறது. 60 ஆயிரத்துக்கும் அதிகமான குழந்தைகளைக் கடத்தி சித்திரவதை செய்தார், சண்டையில் ஈடுபடுத்தினார், கொலை செய்தார், பெண்களை மானபங்கம் செய்தார், மக்களைக் கொன்றார் என்பதெல்லாம் கோனி மீதான குற்றச்சாட்டுகள்.

 கோனியின் ஆள்கள் என்றாலே குழந்தைகள் நடுங்குவார்களாம். நள்ளிரவு நேரங்களில் கிராமங்களில் உள்ள வீடுகளுக்குள் புகுந்து கையில் சிக்கும் குழந்தைகளையெல்லாம் தூக்கிச் சென்று விடுவது எல்.ஆர்.ஏ.வின் வழக்கம் என்று கூறப்படுகிறது. வீட்டில் தூங்கப் பயந்த குழந்தைகள், அருகிலுள்ள நகரங்களிலுள்ள மடங்களிலும் உறவினர் வீடுகளிலும் இரவு நேரங்களைக் கழித்துவிட்டு, காலையில்தான் வீடுகளுக்குத் திரும்புவார்களாம்.

 இதையெல்லாம் செய்த எல்.ஆர்.ஏ.வின் நோக்கம் என்ன என்று கேட்டால் ஆளாளுக்கு ஒவ்வொன்றைச் சொல்கிறார்கள். உகாண்டா அரசு அகோலி இன மக்களைப் புறக்கணிக்கிறது என்கிற கோஷத்துடன் தொடங்கிய இந்த அமைப்பு பின்னாளில் கிறிஸ்தவ மத அடிப்படைவாதத்தில் சிக்கியிருக்கிறது.

 ஒரு கட்டத்தில் கோனியின் செயல்பாடுகளுக்கு மக்கள் மத்தியில் பேராதரவு இருந்ததாகவும், பின்னாளில் மக்களையே துன்புறுத்தத் தொடங்கியதால், அவரைக் கண்டு மக்கள் அஞ்சத் தொடங்கிவிட்டார்கள் என்கிறார்கள்.

 தனிநாடு, ஆட்சி, அதிகாரம் என்ற எந்த வகையான கொள்கையும் கோனியிடம் இல்லை என்பதுதான் வியப்பு. எந்த நோக்கமும் இல்லாமல், அவர் வெறுமனே அரசுகளையும், ராணுவங்களையும் எதிர்த்துச் சண்டையிட்டார் என்கிறார்கள். சண்டையிடுவதும், மக்களைக் கொல்வதும் அவருக்குப் பொழுது போக்குப் போல.

 சர்வதேச நீதிமன்றத்தில் கோனியின் வழக்கு கடந்த 2005-ம் ஆண்டில் வந்தது. அவர் ஒரு போர்க்குற்றவாளி என்று அறிவிக்கப்பட்டார். ஆனால் ஆள் அகப்படவில்லை. அவர் எங்கு இருக்கிறார் என்பதிலேயே சர்ச்சை நிலவி வருகிறது. உகாண்டாவில்தான் இருக்கிறார் என்றும், அவர் அங்கு இருக்க வாய்ப்பே இல்லை என்றும் இருவிதமான கருத்துகள் இருக்கின்றன.

 இப்படியொரு கொடூரமான மனிதரையும் அவரது இயக்கத்தின் கொடுமைகளையும் உலக மக்களுக்குத் தெரிவிக்க வேண்டும் என்பதுதான் தங்களது நோக்கம் என்று "இன்விசிபிள் சில்ரன்' அமைப்பு கூறுகிறது. அதன் ஒருபகுதியே "கோனி 2012' விடியோ. தெருத்தெருவாகப் பிரசாரம் செய்வதற்குப் பதிலாக இணையத்தில் வைரஸ் போல பரவச் செய்துவிட்டார்கள் அவ்வளவுதான்.

 இந்த விடியோவை, பில் கேட்ஸ் முதல் பராக் ஒபாமா வரை பெரும்பாலான பிரபலங்கள் ஏற்கெனவே பார்த்து விட்டார்கள். அமெரிக்கப் பள்ளிகளில் இதுபற்றி வகுப்பறை விளக்கம் நடத்தப்படுகிறது. வெள்ளை மாளிகையிலிருந்து வெளிப்படையான பாராட்டுப் பறந்து வருகிறது. பேஸ்புக்கும், டுவிட்டரும் "ஸ்டாப் கோனி' என்கிற குறியீட்டால் நிரம்பி வழிகின்றன. இவ்வளவு விளம்பரம் எதற்கு?

 வலுவான ராஜதந்திரப் பின்புலம் இருக்கிறது. பின் லேடனைப் பிடித்தார்களே, அவர்களைப் போன்ற 100 வீரர்களைக் கொண்ட அமெரிக்கப் படையை கடந்த நவம்பரில்தான் கோனியைப் பிடிப்பதற்காக பராக் ஒபாமா உகாண்டாவுக்கு அனுப்பியிருந்தார். இதன் தொடர்ச்சியே, "இன்விசிபிள் சில்ரன்' அமைப்பு வெளியிட்டிருக்கும் விடியோ.

 இதில் வேடிக்கை என்னவென்றால், ஒரு காலத்தில் அச்சுறுத்தும் அமைப்பாக இருந்த எல்.ஆர்.ஏ. இப்போது பயந்து ஓடும் குழுக்களாகச் சிதறியிருக்கிறது. முன்பு குழந்தைகளையும் ஆள்களையும் கடத்திக் கொண்டிருந்ததாகக் கூறப்படுவோர் எல்லோரும், இப்போது வீடுகளுக்குள் புகுந்து உணவுப் பண்டங்களைத் திருடிச் செல்கிறார்களாம். அந்த அளவுக்கு "காணாமல் போய்க் கொண்டிருக்கும்' ஓர் அமைப்பையும் அதன் தலைவரையும், ஹிட்லர், பின்லேடன் அளவுக்கு திடீரென பரபரப்பாக்குவது ஆச்சரியத்தைத் தருகிறது.

 பஞ்சம், பட்டினிச் சாவுகள், இன மோதல்கள், நாட்டுக்குள்ளேயே பல பிரிவினைகள், ஸ்திரமற்ற அரசுகள் என ஆப்பிரிக்காவின் அரசியல் மிகவும் சிக்கலானது. நாடுகளையும் புவியியல் அமைப்பையும் கடந்தது.

 பிற நாடுகளில் செல்லுபடியாகும் நியாயங்கள் அங்கு ஏற்புடையதாக இல்லாமல் போகலாம். அப்படியிருக்கையில், ஓர் அமைப்புக்கு எதிராக, ஊடக தர்மங்களையெல்லாம் காற்றில் பறக்கவிட்டு இத்தகைய "வைரஸ்' பிரசாரத்தை மேற்கொண்டிருப்பது ஏன் என்பதுதான் அதிர்ச்சியை ஏற்படுத்தியிருக்கிறது.

 பொருளைச் சந்தைப்படுத்துவதற்குப் பயன்படும் உத்தியை, நீதி வழங்குவதற்குப் பயன்படுத்தினால் எப்படி?

(தினமணி)