ஐ.நா. மீது நம்பிக்கை ஏற்பட வேண்டுமாயின்...

ஐக்கிய நாடுகள் சபையின் மனித உரிமைகள் குழுவினால் எமது நாட்டிற்கு எதிராகத் தெரிவிக்கப்பட்டுள்ள போர்க்குற்றச் சாட்டுத் தொடர்பாக மாறுபட்ட கருத்துக்கள் தற்போது உலாவி வருகிறது. விடுதலைப்புலிகளுக்கு எதிரான இறுதிப் போரில் இலங்கை இராணுவம் செயற்பட்ட விதம் சர்வதேச நெறிமுறைகளை மீறியதுடன் பொதுமக்களையும் கொன்று மனித உரிமைகளை மீறிய செயலாகக் காணப்பட்டதாகவே ஐ.நா.வினால் குற்றம் சாட்டப்பட் டுள்ளது. இதனை வைத்துக்கொண்டு அமெரிக்கா எமது நாட்டிற்கு எதிராக இம்மாதம் ஜெனீவாவில் மீண்டுமொரு பிரேரணையைக் கொண்டுவரவுள்ளது.

ஆனால் உண்மையில் ஐ.நா. மனித உரிமைகள் குழுவின் இலங்கை மீதான போர்க்குற்றச்சாட்டு வலுவற்றதாகக் காணப்படுகிறது. உலக நாடுகள் பலவும் இலங்கை மீதான குற்றச்சாட்டை ஏற்றுக் கொள்ளத் தயாராக இல்லை. சர்வதேசப் பயங்கரவாதி என வர்ணிக்கப்பட்ட பின்லேடனை அமெரிக்கப் படையினர் சுற்றி வளைத்து கைது செய்யச் சந்தர்ப்பம் இருந்தபோதும் வேண்டுமென்றே சுட்டுக் கொன்றது. இது உலகறிந்த விடயம். ஆனால் உலகின் மற்றுமொரு பயங்கரவாதியாக வர்ணிக்கப்பட்ட அதுவும் உலக நாடுகள் பலவற்றிலும் தடை செய்யப்பட்ட அமைப்பின் தலைவரான பிரபா கரனும் அவரது சகாக்களும் அமெரிக்கப் படைகள் போலல்லாது இலங்கை இராணுவம் நடத்திய மரபுவழிப் போர் வழி முறையிலேயே கொல்லப்பட்டனர். இதனால் அமெரிக்காவிற்கு எமது நாட்டிற்கு எதிராகப் பிரேரணையைக் கொண்டுவர எவ்விதமான தகுதியோ அல்லது அருகதையோ கிடையாது.

உலக நாடுகளையே உலுக்கிய இரு பயங்கரவாதிகளை கொன்று மக்களின் எதிர்கால வாழ்வில் பயமற்ற ஒரு சூழ்நிலையை ஏற்படுத்திய இரு நாட்டுத் தலைவர்கள் மீதும் ஐக்கிய நாடுகள் சபை இரு வகையான நிலைப்பாட்டினைக் கொண்டிருப்பது கவலை தரும் விடயமாகும். உண்மையிலேயே அமெரிக்கா அல் ஹைதா இயக்கத்தின் தலைவரை மட்டுமே அழித்துள்ளது. அதன் தலைவர்கள் உறுப்பினர்கள் இன்றும் ஆயுதப் போராட்டத்தில் அமெரிக்கா உட்படப் பல நாடுகளுக்கும் சவாலாகவே இருந்து வருகின்றனர். ஆனால் இலங்கையோ முப்பது வருட காலமாக இருந்து வந்த புலிகள் இயக்கத்தையே வேரோடு அழித்துள்ளது.

அமெரிக்கா, கனடா, இந்தியா, அவுஸ்திரேலியா உட்பட பல உலக நாடுகளால் தடை செய்யப்பட்ட அமைப்பாகவே புலிகள் இயக்கம் இருந் துள்ளது. இந்தியப் பிரதமர் ராஜீவ் காந்தி, ஜனாதிபதி ரணசிங்க பிரேமதாச உட்பட எத்தனையோ அமைச்சர்கள், பாராளுமன்ற உறுப்பினர்கள், எண் ணிலடங்காப் பொதுமக்கள் அதனைவிடவும் சகோதர இயக்கப் படுகொலைகள் என புலிகள் செய்த கொலைகளின் பட்டியல் மிக நீண்டதாகவே உள்ளது.

தமது நாட்டினால் தடை செய்யப்பட்ட இத்தகைய ஒரு பயங்கரவாத அமைப்பினை அழித்தமையை தவறு என்றும் மனித உரிமை மீறல் என்று ஐ.நா.வில் அமெரிக்கா வாதிடுவதும், அதற்குச் சில நாடுகள் ஆதரவு கொடுப்பதுவும் உண்மையிலேயே வேடிக்கையாக உள்ளது, தமக்கு ஒரு கொள்கை ஏனையோருக்கு வேறுவிதமான கொள்கை என்பதாகவே அமெரிக்காவினது நிலைப்பாடு உள்ளது.

இத்தனை கொடிய பயங்கரவாத அமைப்பை ஒரு மக்களால் தெரிவு செய்யப்பட்ட ஜனநாயக அரசாங்கம் மக்களின் ஆதரவுடன் தனது படையைக் கொண்டு அழித்தமையைத் தவறு என்று எவராவது குறிப்பிட்டால் அதனை விடவும் முட்டாள்தனம் எதுவுமாக இருக்க முடியாது.அதனையே இன்று ஐ.நா. நிபுணர் குழு செய்துள்ளது.அப்படியாயின் பயங்கரவாதிகளை அழிக்க நடவடிக்கை எடுக்கக் கூடாதா? அவர்களது பயங்கரவாதச் செயல்களை ரசித்துக் கொண்டு மக்களை அவர்கள் கொன்று குவிப்பதை ஓர் அரசாங்கம் வேடிக்கை பார்த்துக்கொண்டிருக்க வேண்டுமா? எனும் கேள்வி எழுகிறது. இறுதியாக நடத்தப்பட்ட உச்சக் கட்டப் போரில் பொது மக்கள் சிலர் கொல்லப்பட்டது உண்மையாகவே இருந்தாலும் கூட அது புலிகளால் கேடய மாகப் பிடித்து வைக்கப்பட்டிருந்த மக்களை அவர்களே சுட்டுக் கொன்றதாக சாட்சிகள் கூறுகின்றன. போர் இடம்பெற்ற சம்பவத்திலிருந்த முன்னாள் பாராளுமன்ற உறுப்பினர் கனகரட்ணம், அப்பகுதியில் கடமையாற்றிய வைத்தியர்கள், அரச அதிகாரிகள், தப்பிவந்த பொதுமக்கள் எனப் பலரும் புலிகளே பொதுமக்கள் சிலர் மரணமாவதற்குக் காரணம் எனத் தெரிவித்துள்ளனர்.

இவர்கள் அனைவரும் நேரில் இருந்த சாட்சிகள் இந்தச் சாட்சிகளை விடுத்து வெளிநாடுகளில் விலை கொடுத்து வாங்கப்பட்ட ஊடக நிறுவனங் களினதும் ஊடகவியலாளர்களினதும் சோடிக்கப்பட்ட வீடியோ ஒளி நாடாக்களை வைத்துக்கொண்டு ஐ.நா. தனது உறுப்புரிமை பெற்ற ஒரு ஜனநாயக நாடான இலங்கை மீது அப்பட்டமான குற்றச்சாட்டைச் சுமத்துவது எவ்வகையிலும் ஏற்றுக்கொள்ள முடியாத ஒன்று. இது எவரினதோ வற்புறுத்தலின்பேரில் அல்லது புலம்பெயர் தமிழர் அமைப்புக்களின் பாரிய பணப்பரிமாற்றத்தின் விளைவாகச் சோடிக்கப்படும் ஒரு குற்றச் சாட்டாகவே கொள்ள முடியும். அமெரிக்கா பின்லேடனைக் கொன்றது சரி என்றால் அதே அமெரிக்கா ஈராக்கில் அதன் சர்வாதிகார அதிபரைக் கொன்று இன்றுவரை பின்னணியிலிருந்து நடத்திவரும் பயங்கரவாதக் கொலைகள் சரி என்றால் சிரியா, ஜெர்மன் போன்ற நாடுகளில் உள்ளூர் பயங்கரவாதக் கிளர்ச்சிக் காரர்களை கொன்று வருவது சரி என்றால் இலங்கை பிரபாகரனைக் கொன் றதும் சரியே. அமெரிக்காவிற்கு ஒரு நியாயம். இலங்கைக்கு ஒரு நியாயம் வழங்க உலக நாடுகள் இடமளிக்கக் கூடாது.

புலிகளை அழித்தமைக்கு இலங்கை மீது விசாரணை என்றால் பின் லேடனை அழித்தமைக்காகவும் ஏனைய பயங்கரவாதத் தலைவர்களை அழித் தமைக்காகவும் அமெரிக்கா மீதும் ஐ.நா. விசாரணை நடத்த வேண்டும். அதுதான் ஐ.நா.வின் நேர்மையான பக்கச்சார்பற்ற செயற்பாட்டை உறுதிப் படுத்தும் இல்லையேல் எதிர்காலத்தில் ஐ.நா. வின் மீது உலக நாடுகளுக்கு நம்பிக்கை இல்லாது போகும்.

(நன்றி: தினகரன்)