வெனிசுலாவில் புதுமை

“சோசலிச செல்போன் நிறுவனம்”

இடதுசாரிக் கொள்கைகள் நடைமுறையாகிக் கொண்டிருக்கும் வெனிசுலாவில் அந்நாட்டு அரசின் புதுமையான முயற்சியில் “சோசலிச நிறுவனங்கள்” உருவாகி வருகின்றன. அதில் ஒன்றுதான் அந்நாட்டுத் தலைநகர் காரகாசில் உள்ள லா பெடாரே என்ற இடத்தில் லா ஒரினோகியா என்ற பெயருடன் இயங்கி வரும் செல்போன் தயாரிப்பு நிறுவனமாகும். இங்கு செல்போன்களோடு, அதற்குரிய உறைகளும் தயாரிக்கப்படுகின்றன.

மே 2010ல் துவங்கப்பட்ட இந்த நிறுவனம் சீனாவின் உதவியால்தான் சாத்தியமானது. எத்தகைய நிறுவனமாக இயங்கப்போகிறோம் என்று சீன அரசிடம் தெளிவாக எடுத்துரைத்து, அதற்கு சீனாவின் உதவி மிகவும் அவசியம் என்று சாவேஸ் தலைமையிலான அரசு முன்வைத்தது. மாற்றுத் திறனாளிகளுக்கு வேலைவாய்ப்பு, நெளிவு சுழிவான பணிநேரம் மற்றும் பணியிடத்தில் அபாரமான ஒத்துழைப்பு உள்ளிட்ட பல அம்சங்களோடு சிறப்பான முறையில் இந்த நிறுவனம் இயங்கிக் கொண்டிருக்கிறது. நிறுவனம் துவங்கப்பட்டு சரியாக ஓராண்டு நிறைவு பெற்றுள்ள நிலையில், இந்த வெற்றியால் உத்வேகம் அடைந்த அரசு மேலும் பல நிறுவனங்களையும் துவக்கிவிட்டது.

லா ஒரினோகியாவில் தற்போது 108 ஊழியர்கள் பணியாற்றுகிறார்கள். இவர்களின் பெரும்பாலானவர்கள் பெண்கள் என்பது குறிப்பிடத்தக்கது. லா பெடாரேயின் சமூகக் கவுன்சில் மூலமாக இவர்கள் தேர்வு செய்யப்பட்டனர். அவர்களுக்கு மட்டுமே இந்த நிறுவனத்தில் பணி புரியும் வாய்ப்பு கிடைக்கிறது. உள்ளூர் சமூகத்தினரின் பங்கேற்பு என்பதைத் தாண்டி தேசிய அரசுக்கு வேறு சில இலக்குகளும் இத்தகைய நிறுவனங்களைத் துவக்குவதில் உள்ளது. தேசிய அளவிலான உற்பத்தியை அதிகரிப்பதும், “தொழில்நுட்ப இறையாண்மை”யை வெனிசுலா பெறுவதும் இந்த நிறுவனத்தைத் துவக்கியதன் பின்னணியில் உள்ள நோக்கங்களாகும்.

மாற்றுத் திறனாளிகளுக்கு அளிக்கப்பட்டுள்ள வாய்ப்பு மிகவும் முக்கியமானதாகப் பேசப்படுகிறது. உடல் ரீதியாகப் பாதிக்கப்பட்டவர்களுக்கு இங்கு பணிபுரிய வாய்ப்பளிக்கப்பட்டுள்ளது. போதிய ஓய்வு, நெளிவு சுழிவான பணிநேரம், சக ஊழியர்களின் ஒத்துழைப்பு போன்றவற்றால் அவர்களின் பங்களிப்பு மற்றவர்களுக்கு இணையாக இருக்கிறது. இரண்டு வயதிலேயே மாற்றுத் திறனாளியாகிவிட்ட மரிபிள் கார்சியா இந்தக் கருத்தையே பிரதிபலிக்கிறார். என்னைப் போன்றவர்களுக்கு சக ஊழியர்கள் நல்ல ஒத்துழைப்பு தருகிறார்கள் என்பது அவருடைய கருத்தாகும். அவரைப் போன்ற மற்ற மாற்றுத் திறனாளிகளும் இக்

கருத்தையே கொண்டிருக்கிறார்கள்.

இந்த நிறுவனத்தின் நிர்வாகக்குழுவும் தொழிலாளர்களையே கொண்டதாக அமைந்துள்ளது. லூயிஸ் சுல்பரன் என்ற பெண் இந்தத் தொழிற்சாலையில் பணிபுரிகிறார். அவர்தான் நிர்வாகக்குழுவின் செய்தித்தொடர்பாள ராகவும் இருக்கிறார். ஒரு கூட்டுத்தலைமையில் நிறுவனம் இயங்குகிறது. நிர்வாகக்குழுவின் முடிவுகள் ஏகமனதாகவே எடுக்கப்படுகின்றன. கருத்து வேறுபாடு ஏற்படும் பட்சத்தில் பெரும்பான்மை முடிவு நடைமுறைக்கு வரும் என்பது எழுதப்பட்டுள்ள விதியாக இருக்கிறது. தேசிய நலன், தொழிலாளர் நலன் ஆகியவை நிறுவன நலனோடு இணைந்து நிற்பதால் நிர்வாகக்குழுவின் முடிவுகள் ஏகமனதாகவே இதுவரை உள்ளது.

நிறுவனத்தை உருவாக்கியதன் நோக்கம் நிறைவேறுகிறதா என்று லூயிஸ் சுப்ரானிடம் கேட்டதற்கு, “இது போன்ற சோசலிச நிறுவனங்களில்தான் உழைப்பு மேல் காதலை ஏற்படுத்துவது சாத்தியம். தனியார் நிறுவனங்களால் அதைச் செய்ய முடியாது. இதுதான் இரண்டு நிறுவனங்களுக்குமிடையிலான வேறுபாடாகும். முன்பு, நான் தனியார் நிறுவனமொன்றில் பணியாற்றிக் கொண்டிருந்தேன். அப்போது ஒரு தனி நபருக்காகப் பணியாற்றினேன். தற்போது மக்களுக்காக எனது பணி இருக்கிறது என்பதில் மகிழ்ச்சி” என்கிறார். தேசிய அளவில் இது போன்ற பல சோசலிச நிறுவனங்கள் அமைக்கப்பட்டு வருவதோடு, அவற்றிற்கான சந்தைகளை ஏற்படுத்திக் கொடுக்கும் பணியிலும் சாவேஸ் தலைமையிலான அரசு முனைந்து நிற்கிறது. சீனாவின் செல்போன் தயாரிப்புத் தொழில்நுட்பம், மற்ற நிறுவனங்களின் செல்போன்களோடு போட்டி போடுவதற்கான வாய்ப்பை உருவாக்கியுள்ளது. சோசலிச நிறுவனங்கள் என்பது மக்கள் இவற்றிற்கு வைத்த செல்லப்பெயர் என்பது குறிப்பிடத்தக்கது.

வெனிசுலாவின் இந்த புதுமையான முயற்சிகள் பொலிவியா, ஈக்குவடார் போன்ற நாடுகளில் தாக்கத்தை ஏற்படுத்தியுள்ளது. அங்கும் இதுபோன்ற நிறுவனங்களைத் துவக்க திட்டமிட்டு வருகிறார்கள். வெனிசுலாவிலும் செல்போன் தயாரிப்பைத் தாண்டி வேறு பல துறைகளிலும் சோசலிச நிறுவனங்கள் உருவானால், நாட்டின் நலனையும், மக்கள் நலனையும் கருத்தில் கொண்டு வளர்ச்சியை ஏற்படுத்த முடியும் என்று ஹியூகோ சாவேஸ் தலைமையிலான அரசு கருதுகிறது. இந்த நடவடிக்கைகளால் 2012 ஆம் ஆண்டில் நடைபெறும் ஜனாதிபதித் தேர்தலில் சாவேசின் வெற்றியும் உறுதியாகி வருகிறது.