போதைப் பொருள் கடத்தல்காரர்களின் களமாகும் வடபகுதிக் கடற்பரப்பு...!

2012ஆம் ஆண்டு நவம்பர் மாதம் 28ஆம் நாள்... வடபகுதி கடற்பரப்பு... கரையில் இருந்து சுமார் 18 கடல் மைல் தொலைவு....“யாழ். குருநகர் பக்கமாக இருந்து அலைகளை கிழித்துக்கொண்டு விரைந்த டிங்கி படகு ஒன்று இந்திய கடல் எல்லைக்கு நெருக்கமாக இலங்கை கடல் எல்லைக்குள் நுழைந்து நின்ற மீன்பிடிப் படகு ஒன்றிற்கு அருகே சென்றது” “இரு படகுகளும் அணைக்கப்பட்டதைத் தொடர்ந்து மீன்பிடிப் படகில் இருந்தவர்கள் டிங்கிப் படகில் வந்தவர்களிடம் பார்ஸல் ஒன்றை கைமாற்றினர்” “இதில் ஏதோ விபரீதம் இருப்பதை புரிந்து கொண்டோம். உடனே எமது கடற் கண்காணிப்பு படகினை அப்படகுகள் நின்ற பக்கமாக செலுத்தினோம்”

“நமது படகு மின்னல் வேகத்தில் அப்படகுகளை நெருங்கியது எம்மை கண்ட - படகுகள் இரண்டும் அவ்விடத்தை விட்டு நழுவ முயன்றன.” படகை நிறுத்துங்கள்...........! படகை நிறுத்துங்கள்.....! படகை நிறுத்துங்கள்.......!

“உத்தரவிட்டவாறே அப்படகுகளை நெருங்கினோம். சமிக்ஞைகளைக் காட்டினோம். எமது படகில் இருந்த எச்சரிக்கை மின்னொளியை (பிlash ழிight) அப்படகுகளை நோக்கிப் பாய்ச்சினோம். நமது படகு அப்படகுகளை வட்டமிட்டு முற்றுகையிட்டது.”

அப்போது யாழ். குருநகர் பக்கமாக இருந்து வந்த டிங்கிப் படகில் மூவர் இருப்பதைக் கண்டோம். மற்றையது இந்திய மீன்பிடிப் படகு என்பதை அடையாளம் கண்டதுடன் அதில் ஐவர் இருப்பதையும் கண்டோம்.

“நமது படகு மேற்படி இரு படகுகளையும் நெருங்கிய வேளையில் டிங்கிப் படகில் இருந்தவர்கள் பார்ஸல் ஒன்றை எடுத்துக் கடலில் வீசினார்கள்”

“உடனே எங்கள் கடற் கண்காணிப்புப் படகில் இருந்த கடற்படை அதிகாரியான ஹேரத் கடலினுள் பாய்ந்து நீந்திச் சென்று கடலில் விட்டெறியப்பட்ட பார்ஸலை எடுத்து வந்தார்.”

“இதனையடுத்து கடற்படை அதிகாரிகளான ஹேரத்தும் விஜேவர்த்தனவும் விரைந்து செயற்பட்டு டிங்கிப் படகில் ஏறி அதில் இருந்தவர்களை மடக்கிப் பிடித்து வந்தனர்.”

“இதனிடையே, இந்திய மீன்பிடி படகு இந்திய கடல் எல்லையை நோக்கி ஓட்டம்பிடித்தது. இருப்பினும் அந்த படகினை துரத்திச் சென்ற நாம் அது இந்திய கடல் எல்லைக்குள் நுழைவதற்கு முன்னதாக இலங்கை கடற்பரப்புக்குள் வைத்து மடக்கினோம். அதில் இருந்த ஐந்து தமிழக மீனவர்களையும் கைது செய்தோம். இவை அனைத்தும் எமது படகில் பொருத்தப்பட்டுள்ள கண்காணிப்பு கமராவில் பதிவாகியுள்ளன.”

இது வடபகுதி கடற்பரப்பில் இலங்கை கடற்கரையிலிருந்து சுமார் 18 கடல் மைல் தொலைவில் அரங்கேறிய ஹெரோயின் போதைப்பொருள் கடத்தலை முறியடித்த இலங்கை கடற்படைத்தளபதி லெப்டினன்ட் கொமாண்டர் சரித்த குணவர்த்தன கொழும்பு மேல் நீதிமன்றத்தில் மேல் நீதிமன்ற நீதிபதி பிரீதிபத்மன் சூரசேன முன்னிலையில் வழங்கிய சாட்சியம்.

ஆம், வடபகுதி கடற்பரப்பு இந்திய - இலங்கை போதை வஸ்த்துக் கடத்தல்காரர்களின் களமாக மாறிவருகிறது. குறிப்பாக கேரளா, தமிழ்நாடு ஆகியவற்றை தளமாக கொண்ட போதைப் பொருள் வியாபாரிகள் இலங்கையின் வடபகுதி கடலூடாக இலங்கைக்குள் போதைப் பொருள்களை விநியோகிக்க தொடங்கியுள்ளனர்.

இலங்கையில் உள்நாட்டு யுத்தம் ஏற்படுவதற்கு முன்னர் வடபகுதிக் கடலை கடத்தல்காரர்கள் கள்ளக் கடத்தல் தேவைகளுக்கு பயன்படுத்தி வந்தனர்.

ஆயினும், இலங்கையின் உள்நாட்டு யுத்தம் குறிப்பாக வடபகுதியில் மையம் கொண்டிருந்ததினால் அப்பகுதி கடலில் பாதுகாப்பு, கண்காணிப்புகள் மிக தீவிரப்படுத்தப்பட்டதனால் இக்கள்ளக்கடத்தல் வியாபாரம் தடைப்பட்டு செயலிழந்து போயிருந்தது. இந்திய - இலங்கை கடத்தல்காரர்கள் முற்றாக முடக்கப்பட்டனர். இதனால் ஓய்ந்து போயிருந்த வடபகுதி கடற்பரப்பினூடான கள்ளக்கடத்தல் மற்றும் போதைப்பொருள் கடத்தல் வியாபாரமானது தற்போது மீண்டும் தலைதூக்கியுள்ளது.

வடக்கில் மீனவர்கள் நலன்களுக்காக ஏற்படுத்தப்பட்ட தளர்வுகளை சாதகமாக பயன்படுத்தி போதைப்பொருட்களை கடல்மார்க்கமாக இலங்கைக்குள் எடுத்துவர கடத்தல்காரர்கள் வடபகுதி கடலை பயன்படுத்தத் தொடங்கியுள்ளனர்.

விமானம் மூலமாகவோ கப்பல்களூடாகவோ அல்லது பொதிகள் சேவைகளூடாகவோ இலங்கைக்குள் போதைவஸ்துகளை எடுத்து வரமுடியாதளவு துறைமுகம், இறங்கு துறைகளின் பாதுகாப்பு பலப்படுத்தப்பட்டுள்ள நிலையில் கடத்தல்காரர்கள் கபடத்தனமாக கடல்மார்க்கத்தை கையாளத் தொடங்கியுள்ளனர்.

இதற்காக கடத்தல்காரர்கள் இலங்கை, இந்திய மீனவர்களின் உதவிகளை பெறுவதுடன் கடத்தலுக்கு அவர்களின் மீன்பிடி படகுகளையும் பயன்படுத்துகின்றனர். இவ்வாறு வடபகுதி கடல்மார்க்கமாக மீன்பிடி வள்ளங்களில் இலங்கைக்குள் எடுத்துவரப்படும் சஞ்சா, ஹெரோயின் உள்ளிட்ட போதைப் பொருட்கள் கடத்தப்படும் வேளையிலும் நாட்டுக்குள் விநியோகிக்க முற்படும் சந்தர்ப்பங்களிலும் பிடிபட்டுள்ளனட

அண்மைக்காலமாக வடக்கு, கிழக்கு உட்பட நாட்டின் பல பாகங்களில் இருந்தும் கேரள கஞ்சா அவ்வப்போது பிடிக்கப்பட்டுள்ளன. இந்த கேரள கஞ்சாவை வைத்திருந்த விநியோகித்த, பயன்படுத்திய பலரும் கைது செய்யப்பட்டுள்ளனர்.

அண்மைக் காலங்களில் மன்னார் கடல் மார்க்கமாக எடுத்துவரப்பட்ட பெருமளவு கஞ்சா, ஹெரோயின், புகைத்தல் பொருட்கள் மற்றும் போதைப் பாக்கு வகைகள் என்பன பொலிஸாராலும் கடற்படையினராலும் பல்வேறு சந்தர்ப்பங்களில் கைப்பற்றப்பட்டுள்ளன. இது தொடர்பில் பலர் கைதுசெய்யப்பட்டும் உள்ளனர்.

இது தவிர ஆங்காங்கே கேரள கஞ்சாவுடன் கைதாவோர் தொகை அண்மைக்காலமாக அதிகரிக்கத் தொடங்கியுள்ளது. இது தொடர்பான செய்திகளை அநேகமான பத்திரிகைகளில் காண முடிகிறது. கடந்த 27ஆம் திகதியும் அதிகாலை வேளையில் இந்தியாவிலிருந்து இலங்கைக்கு 100 கிலோ கேரள கஞ்சாவினை கடத்திவர மேற்கொள்ளப்பட்ட பாரிய போதைப் பொருள் கடத்தல் முயற்சி இலங்கை கற்படையினரால் முறியடிக்கப்பட்டது.

இந்தியாவிலிருந்து இலங்கை கடற்பரப்புக்குள் 100 கிலோ கேரள கஞ்சாவினை கடத்திவந்த இந்திய மீன்பிடிப்படகு ஒன்றினையும் கடத்திவரப்பட்ட கஞ்சாவை இலங்கைக்கு கொண்டு செல்வதற்காக வந்திருந்த இலங்கை மீனவர்களுக்கு சொந்தமான டிங்கி படகு ஒன்றினையும் கச்சதீவுக்கு அருகே இலங்கைக்கு சொந்தமான கடற்பரப்பில் வைத்து இலங்கை கடற்படையினர் சுற்றிவளைத்தனர்.

இந்த முற்றுகையில் இந்திய மீனவர்களால் எடுத்துவரப்பட்டு இலங்கை மீனவர்களிடம் கையளிக்கப்பட்ட 100 கிலோ கேரள கஞ்சாவையும் படகு பயணம் தொடர்பாக தகவல்களை பரிமாறும் ஜி.பி.எஸ்.கருவி ஒன்றையும் மீட்ட கடற்படையினர் இந்திய மீன்பிடிப் படகில் இருந்த நான்கு பேரையும் டிங்கிப் படகில் இருந்த இலங்கையர்கள் இருவரையும் கைதுசெய்தனர்.

இது தொடர்பாக கடற்படைப் பேச்சாளர் கொமாண்டர் பிரசன்ன கோசல வர்ணகுலசூரிய, இலங்கையில் அடிக்கடி பல இடங்களில் கேரள கஞ்சா கைப்பற்றப்படுகின்ற போதும் இந்தளவு (100 கிலோ) கேரளக் கஞ்சா ஒரே தடவையில் கைப்பற்றப்பட்டது இதுவே முதற்தடவை என குறிப்பிட்டார்.

எனவே, இவ்வாறான கள்ளக் கடத்தல்களை முறியடிப்பதற்கு இலங்கை கடற்படையினர் தீவிர நடவடிக்கைகளை மேற்கொண்டுள்ளதாகவும் கடற்பரப்பில் கண்கணிப்பு நடவடிக்கைகளை முடுக்கிவிட்டுள்ளதாகவும் குறிப்பிட்டார்.

வடபகுதி கடற்பரப்பினுள் அத்துமீறி நுழையும் இந்திய மீன்பிடி ரோலர்கள் இலங்கையில் தடைசெய்யப்பட்ட மீன்பிடி முறை, வலைகளை பயன்படுத்தி கடல் வளத்தை சுரண்டிச் செல்கின்றனர்.

இதனால் ஏற்படும் பிரச்சினைகளும் இருநாட்டு மீனவர்களினது பரஸ்பர குற்றச்சாட்டுகளும் தொடர்கின்ற நிலையில் இலங்கையின் வடபகுதி மீனவர்கள் சிலரும் இந்திய மீனவர்கள் சிலரும் போதைப் பொருள் கடத்தலில் ஒன்றாக இணைந்து செயற்படுகின்றமை ஆச்சரியம் தருவதாக இருக்கிறது.

இது அண்மையில் இடம்பெற்ற இந்திய - இலங்கை இடையேயான போதைப் பொருள் கடத்தல் முறியடிப்பு சம்பவங்களின்போது இருநாட்டு மீனவர்களும் கூட்டாகவே அகப்பட்டுக் கொண்டமை மூலம் அம்பலமாகியுள்ளது.

ஒரு சில மீனவர்கள் சுயலாபத்துக்காக இத்தகைய சட்டவிரோத செயற்பாடுகளுக்கு துணைபோகின்றமை, நேர்மையாக உழைத்து வாழும் ஏனைய மீனவர்களை பாதிப்படைய செய்யும் அபாயகரமான சூழ்நிலையை ஏற்படுத்திவிடக்கூடும்.

இது மட்டுமன்றி வடக்கு, கிழக்கு உள்ளிட்ட பகுதிகளில் சட்டவிரோத போதைவஸ்து பாவனை அதிகரிக்கக் கூடிய அபாயகரமான சூழலை இது உருவாக்குவதுடன் போதைவஸ்துக்கு அடிமையான சமுதாயம் ஒன்று உருவாக இது வித்திடும்.

மொத்தத்தில் இந்திய மீன்பிடிப் படகுகளில் எடுத்துவரப்படும் கேரள கஞ்சா மற்றும் ஹெரோயின் உள்ளிட்ட போதைவஸ்துக்கள் நடுக்கடலில்வைத்து வடபகுதியைச் சேர்ந்த கடத்தல்காரர்களிடம் கைமாற்றப்படுகின்றது. இது வடபகுதிக்கும் நாட்டின் ஏனைய பகுதிகளுக்கும் புதியதொரு அச்சுறுத்தலாக வடிவெடுத்துள்ளது.

(க.பவன்)