நரேந்திர மோடி

நரேந்திர மோடி இன்று உலகெங்கும் உச்சரிக்கப்படும் பிரபல்யமானதொரு பெயர். இந்திய அரசியல் வரலாற்றில் வரலாறு படைத்த நாயகனாக இன்று உலகெங்கும் பேசப்படும் மாபெரும் தலைவன் நரேந்திர மோடி. இவர் எதிர்வரும் 21ஆம் திகதி உலகின் மிகப் பெரிய ஜனநாயக நாடான இந்தியாவின் 14ஆவது பிரதமராகப் பதவி யேற்கவுள்ளார். 1950 ஆம் ஆண்டு செப்டம்பர் 17ஆம் திகதி குஜராத் மாநிலத்தில் ஒரு நடுத்தர வசதி படைத்த சாதாரண குடும்பத்தில் பிறந்த நரேந்திர மோடி தனது சிறு வயதில் மிகவும் கஷ்டங்களை அனுபவித்து கல்வி கற்று இன்று பாரத தேசத்தின் பிரதமர் எனும் உயர் நிலைக்கு உயர்ந்துள்ளார்.

பிரதமர் பதவிக்காக அவர் போட்டியிட்ட காலத்தில் நாடு பூராவும் இடம்பெற்ற சுமார் ஐநூறுக்கும் அதிகமான தேர்தல் பிரசாரக் கூட்டங்களில் மோடி கலந்து கொண்டுரையாற்றியபோது தனது கடந்த கால அரசியல் அனுபவத்தையே அதிகம் பகிர்ந்து கொண்டார். மோடி, குஜராத்தை சேர்ந்த முக்கிய அரசியல்வாதிகளில் ஒருவராகப் பன்னெடுங்காலமாகத் திகழ்ந்து தொடர்ந்து நான்கு முறை குஜராத் மாநில இடைத்தேர்தலில் வெற்றிபெற்று, குஜராத் அரசியல் வரலாற்றில் நீண்டகால முதல்வராக இருந்தவர் என்ற சாதனையைப் பெற்றவர்.

தான் பிரதிநிதித்துவப்படுத்தும் மாநிலத்தில் மிகப்பெரிய அளவில் தொழில் வளர்ச்சி ஏற்பட வேண்டும் என்பதில், அதிக ஆர்வம் கொண்டவராக விளங்கிய அவர், மின்சாரம், தண்ணீர், பாதை வசதிகள், பெண் கல்வி, ஆரோக்கியம், ஊழலற்ற நிர்வா கம், விவசாயம், தொழில் வளர்ச்சி என அனைத்துத்துறைகளிலும் பல திட்டங்களை நடைமுறைப்படுத்தி, குஜராத் மாநிலத்தை மற்ற மாநிலங்களுக்கு முன்மாதிரியாக மாற்றிக்காட்டினார். அதனை குஜராத் மாநில மக்கள் மட்டுமல்லாது முழுநாட்டு மக்க ளுமே அறிந்து வைத்திருந்தனர். அதன் பிரதிபலிப்பே இன்று அவரைப் பிரதமராக்கி அழகு பார்க்க வைத்துள்ளது.

இவர் இளமைப் பருவத்திலிருந்து ராஷ்டிரிய சுயம்சேவா சங்க  ஒரு உறுப்பினராகவும் இருந்துவரும் மோடி, இளமைப் பருவத்திலேயே அரசியலில் ஆர்வம் கொண்டவராகவே காணப்பட்டார். இவர் 1998ஆம் ஆண்டில் அரசியல் அறிவியல் முதுகலை பட்டமும் பெற்றுள்ளார். ஊடகங்களும் அறிஞர்களும் இவரை இந்து தேசியவாதியாக விவரிப்பதை இவரும் ஏற்றுக்கொண்டுள்ளார் எனினும் இவர் தன்னை ஒருபோதும் இந்து தேசிய வாதியாக வெளிப்படையாகக் காட்டியது கிடையாது. இருந்தும் இந்தியாவிற்குள்ளும் சர்வதேசத்திலும் மிகுந்த சர்ச்சைகளுக் குட்பட்ட மனிதராக மோடி இருந்து வருவதை ஏற்றுக் கொள்ளத்தான் வேண்டும். எது எவ்வாறு இருப்பினும் இன்று மோடி தான் பெற்ற வெற்றி மூலமாக ஒரு சாதனை வீரனாக பாரத தேசத்து மக்களால் போற்றப்படும் நிலையிலுள்ளார்.

மோடி அவர்களது அறுதிப்பெரும்பான்மை வெற்றி மூலமாக பாரதத்தில் 1984ஆம் ஆண்டுக்குப் பிறகு முதல் முறையாக தனிப்பெரும்பான்மையுடன் மத்திய அரசு அமைகிறது. இந்தியா இதுவரை 16 லோக்சபா தேர்தல்களை எதிர்கொண்டிருக்கிறது. 1984ஆம் ஆண்டு நடைபெற்ற லோக்சபா தேர்தலில் இந்திரா படுகொலையால் ஏற்பட்ட அனுதாபத்தின் விளைவாக காங்கிரஸ் கட்சிக்கு 415 இடங்கள் கிடைத்தன. அதன் பின்னர் நாட்டில் நடைபெற்ற அனைத்து தேர்தல்களிலும் காங்கிரஸ் தனிப்பெரும்பான்மையைப் பெறவில்லை. எதிர்க்கட்சியாக இருந்த பா.ஜ.கவுக்கும் கிடைக்கவில்லை. தற்போது 30 ஆண்டுகளுக்குப் பின்னர் நாட்டில் முதல் முறையாக தனிப் பெரும்பான்மை பலத்துடன் பாரதிய ஜனதா மத்திய அரசை அமைக்கிறது. பெரும்பான்மைக்கு தேவை 272 இடங்கள். தற்போது பாஜக 277 இடங்களில் முன்னிலையில் இருக்கிறது. அத்துடன் தனிப்பெரும்பான்மை பெற்ற காங்கிரஸ் அல்லாத முதல் கட்சியாக பாஜக உருவெடுத்துள்ளது. மேலும் காங்கிரஸ் அல்லாத வலிமையான தனிப்பெரும்பான்மையுடன் கூடிய முதல் மத்திய அரசையும் பாரதிய ஜனதா அமைக்கிறது. மேலும் இந்தியாவில் இதுவரை இருந்து வந்த கூட்டணி ஆட்சி சகாப்தம் என்பது முடிவுக்கும் வந்துள்ளது குறிப்பிடத்தக்கது.

இவ்வேளையில் வெற்றிபெற்ற மோடி அவர்கள் தனது வெற்றியுரையில் இந்திய தேசத்தில் நல்லாட்சி புரிவேன் என்றும், நாட்டை மறுகட்டமைப்பு செய்வேன் என்றும் தெரிவித்திருக்கிறார். பாஜகவின் வெற்றிக்குப் பின்னர் குஜராத் மாநிலம் வதோதராவில் ஆற்றிய தனதுரையில் மோடி, தேர்தலில் தனிப் பெரும்பான்மை வழங்கிய இந்திய மக்களுக்கு நன்றி தெரிவித்திருக்கிறார். ஜனநாயக நடைமுறைகளை கருத்தில் கொண்டு மக்கள் இந்த தீர்ப்பை அளித்துள்ளனர் என்பதை உணர்கிறேன். புதிய சாதனையை படைக்க உதவிய நாட்டு மக்களுக்கு தலை வணங்குகிறேன் என மோடி கண்ணி யமானதொரு வெற்றியுரையை நிகழ்த்தி மக்கள் மனங்களில் இடம்பிடித்திருக்கிறார்.

இந்திய அரசியல் வரலாற்றில் காங்கிரஸ் அல்லாத வலுவான கொள்கைகள் கொண்ட தேசியவாத கட்சிக்கு ஒரு கட்சிக்கு முதல் முறையாக இந்திய மக்கள் மிகப் பெரிய தனிப் பெரும்பான்மை வெற்றியை அளித்துள்ளனர். மத்தியில் அமையவுள்ள அரசு, இந்திய மக்கள் அனைவருக்கும் சொந்தமான அரசு. ஒரு தனிப்பட்ட கட்சிக்கோ, ஒரு குறிப்பிட்ட மதத்துக்கோ சொந்தமானது அல்ல எனவும் மோடி தனது வெற்றியுரையில் குறிப்பிட்டுள்ளார். இது அந்நாட்டில் மோடி மீதம், பாரதீய ஜனதாக் கட்சி மீதும் சந்தேகக் கண்களுடன் இருந்த சிலருக்குக் கூட நிச்சயம் நம்பிக்கை ஒளி தருவதாக அமைந்திருக்கும்.

பாஜக வரலாற்றை நோக்கினால் ஜனதா கட்சியிலிருந்து பிரிந்து 1980 ஆம் ஆண்டு பாஜக உதயமானது. 1984ஆம் ஆண்டு பாராளுமன்றத் தேர்தலில் பாஜக இரண்டு இடங்களில் மட்டுமே வெற்றி பெற்றது. 30 ஆண்டுகளுக்குப் பிறகு அந்தக் கட்சி தற்போது தனிப் பெரும்பான்மை என்ற வளர்ச்சி கண்டுள்ளது. 1977 ஆம் ஆண்டு தேர்தலுக்குப் பிறகு, எதிர்கட்சி ஒன்று தனிப் பெரும்பான்மை பெற்று ஆட்சி அமைக் கிறது. சுதந்திர இந்தியாவின் தேர்தல் வரலாற்றில் எதிர்கட்சி பெரும்பான்மை பெற்று ஆட்சி அமைப்பது, இது இரண்டாவது முறை என்பது குறிப்பிடத்தக்கது. மத்தியில் 25 ஆண்டுகளுக்குப் பிறகு ஒரு கட்சி தனிப் பெரும்பான்மை பெற்று ஆட்சி அமைக்கப் போகிறது. 1989ற்குப் பிறகே மத்தியில் கூட்டணி ஆட்சியே நடைபெற்று வந்தது.

1996ஆம் ஆண்டு பாஜக தலைமையில் முதன் முதலில் ஆட்சி அமைந்தது. ஆனால் அது 13 நாட்களில் கவிழ்ந்தது. பிறகு 1998ஆம் ஆண்டு தேசிய ஜனநாயகக் கூட்டணி மூலம் ஆட்சியைப் பிடித்தது இதுவும் 13 மாதங்களே நீடித்தது. 13 என்ற எண் பாஜகவிற்கு பெரும் அலர்ஜியாகத் தொடங்கியது.

பிறகு 1999ஆம் ஆண்டு கார்கில் போரை முன்வைத்து மீண்டும் பாஜக தலைமை தேசிய ஜனநாயகக் கூட்டணி அரியணை ஏறியது. இந்தத் தேர்தலில் பாஜக 182 இடங்களைக் கைப்பற்றியது. 1984ஆம் ஆண்டு பெருத்த எதிர்பார்ப்பிற்கு எதிராக 543 தொகுதிகளில் படுமோசமாக 2 இடங்களையே கைப்பற்றியது காரணம் பிரதமர் இந்திரா காந்தி கொலை செய்யப்பட்டதையடுத்து ஏற்பட்ட அனுதாப அலை.

மாறாக காங்கிரஸ் கட்சி 1999ஆம் ஆண்டு மிகக் குறைவான 114 இடங்களைக் கைப்பற்றியது 2014ஆம் ஆண்டு இரட்டை இலக்கத்தில் தேங்கிப் போயுள்ளது.

இந்த இரண்டு பெரும் தோல்விகளுமே காங்கிரஸ் கட்சிக்கு சோனியா காந்தி தலைமையின் கீழ் ஏற்பட்டது என்பது குறிப்பிடத்தக்கது.

இதுசாரிகளுக்கும் இந்த தேர்தல் முடிவுகள் மிகவும் குறைவான எண்ணிக்கையையே கொடுத்துள்ளது. இந்த நிலையில், காங்கிரஸின் 10 ஆண்டு கால ஆட்சியில் மக்கள் கடும் அதிருப்தி அடைந்ததன் விளைவாகவும், மோடியின் எழுச்சியின் காரணமாகவும் பாஜக மகத்தான வெற்றியை இப்போது நிலைநாட்டியுள்ளது என்றே கூற வேண்டும். எனவே வெற்றியைத் தனதாக்கிக் கொண்டுள்ள நரேந்திர மோடி இனித் தொடரவுள்ள அரசியல் பயணத்தில் தான் தெரிவித்தது போன்று அனைவரையும் அரவணைத்துச் செல்ல வேண்டும். அத்துடன் அண்டை நாடான இலங்கையுடன் நட்பு, ராஜதந்திர உறவுகளைப் பேணி இருநாட்டு மேம்பாட்டிற்காகவும் பாடுபட முன்வர வேண்டும்.

(தினகரன்)