ராஜபக் ஷே வருகை

தமிழர் பிரச்னைக்கு பின்னடைவு இல்லை

நாட்டின், 14வது பிரதமராக, நரேந்திர மோடி பதவி ஏற்கும் நிகழ்வு, மிகப் பெரிய கொண்டாட்டம் தான். அதில், எந்த சந்தேகமும் இல்லை. ஆனால், அந்த நிகழ்வுக்கு, 'சார்க்' நாடுகளின் தலைவர்களை அழைத்திருப்பது, குறிப்பாக இலங்கை அதிபர், ராஜபக் ஷேவை அழைத்திருப்பது, மிகப்பெரிய கொந்தளிப்பை, உலகத் தமிழர்கள் மத்தியில் ஏற்படுத்தி உள்ளது. 

அழைப்பதில் தவறில்லை

எடுத்த எடுப்பிலேயே, இப்படியொரு எதிர்ப்பை, புதிதாக பதவியேற்கும் அரசு எதிர் கொள்ளத்தான் வேண்டுமா என கேட்டால், கொஞ்சம் யோசித்து, இந்த விஷயத்தை கையாண்டிருக்கலாமோ என, நினைக்கத் தோன்றுகிறது. அதற்காக, ராஜபக் ஷேவை, பதவியேற்பு விழாவுக்கு அழைத்ததால், தமிழர்கள் பிரச்னையில் பெரும் பின்னடைவு ஏற்பட்டிருப்பதாகவும் யாரும் கருத வேண்டியதில்லை. பக்கத்து வீட்டுக்காரன், நம்மோடு பகைதான். ஆனாலும், நம் வீட்டில் ஒரு சுப காரியம் நடக்கும்போது, அவனை மரியாதை நிமித்தமாக நிகழ்வுக்கு அழைப்பதில் தவறில்லை தான். அந்த சுப நிகழ்வுக்கு அழைத்து விட்டதால், ஆண்டாண்டு காலமாக நிலவி வந்த பகை, ஒரே நாளில் தீர்ந்து விடும் என, சொல்ல முடியாது. பக்கத்து வீட்டுக்காரனின் மன நிலையும், ஒரே நாளில் மாறிவிடும் என, எதிர்பார்க்க வேண்டியதில்லை. அப்படியொரு சாதாரண நிகழ்வாகவே, பதவியேற்பு விழாவுக்கு அழைத்ததை, நாம் எடுத்துக் கொள்ள வேண்டும். ஆனால், பக்கத்து வீட்டுக்காரன் சுப நிகழ்ச்சிக்கு அழைக்கப்பட்டு, வருகை தரும் போது, நமக்குள்ளேயே இருக்கும் சிலர், பக்கத்து வீட்டுக்காரனை, வன்மத்தோடு எதிர்கொண்டு விடக்கூடிய ஆபத்து இருக்கிறது. அப்படி எந்தவொரு எதிர் மறையான விளைவுகளும் ஏற்பட்டுவிடக்கூடாது என்கிற, பதற்றத்தை ஏற்படுத்தக் கூடாது என்பதுதான், நியாயமான சிந்தனை. 

தண்டிக்கப்பட வேண்டும்

அப்படித்தான், ராஜபக் ஷே வருகையால், இங்கே ஏதும் மோசமான நிகழ்வு நடந்து விடக்கூடாது என்று நினைக்கிறோம். காரணம், இலங்கையில் நடந்த பிரச்னைகளால், மனித உரிமை மீறல் குற்றச்சாட்டுக்கு ஆளாகி இருக்கும் நபர், அதிபர் ராஜபக் ஷே. அதற்காக அவர் தண்டிக்கப்பட வேண்டும் என, இங்கிருக்கும் தமிழ் அமைப்புகளும், உலகத்தின் பல மூலைகளிலும் இருக்கும் தமிழ் அமைப்புகளும் கோரிக்கை விடுத்து வருகின்றன. இந்தச் சூழ்நிலையில், பெரும் வெற்றியடைந்திருக்கும், பா.ஜ., தரப்பு, இங்கிருக்கும் தமிழ் மக்களின் உணர்வுகளுக்கும் மதிப்பு அளித்திருக்கலாம். இந்தியாவில் நடக்கும் ஒரு பதவியேற்பு விழாவிற்கு வரும், இலங்கை அதிபர் ராஜபக் ஷேவிடம், இலங்கைத் தமிழர் பிரச்னை குறித்து, யாரும் பேசப் போவதில்லை. அது ஒரே நாளில், ஒரே சிட்டிங்கில் பேசி முடிக்கக்கூடிய பிரச்னையும் அல்ல. அதனால், அவர் வருகைக்கு அவ்வளவு முக்கியத்துவமும் தர வேண்டியதில்லை. இங்கே இருக்கும் சின்ன சலசலப்புகளும் கூட, அவர் வந்து விட்டு போன பின்னால், அடங்கி விடும். இலங்கையைப் பொறுத்த வரையில், அதிபராக இருந்த ஜெயவர்த்தனா முதல், அனைவருமே புத்திசாலித்தனமாகவே, தமிழ் இன பிரச்னையை கையாண்டு வருகின்றனர். தமிழர் பிரச்னையில், அவர்கள் தங்களுக்கு சாதகமான அம்சங்களை மட்டுமே பிரதானப்படுத்தி, அதை வைத்து இலங்கையிலும், வெளியேயும் மிகப் பெரிய லாபத்தை சம்பாதிப்பவர்கள். அப்படிப்பட்டவர்களில், மிகுந்த சாதுர்யமான நபராக தன்னை காட்டி வருபவர் தான், ராஜபக் ஷே. அவரை, நாம் அவ்வளவு எளிதாக அணுகி, பிரச்னையை தீர்த்துவிட முடியாது.புதிய அரசின் வெளியுறவு கொள்கை என்ன என்பதே, முழுமையாக அறியாத சூழ்நிலையில், அவரின் இந்திய வருகையால், இலங்கைப் பிரச்னைக்கு தீர்வு கிட்டிவிடும் என்றோ, பிரச்னை இன்னும் மோசமான சூழ்நிலையை எட்டப் போகிறது என்றோ யாரும் சொன்னால், அதை கேட்க வேண்டிய அவசியமில்லை. 

அழுத்தம் குறையலாம்

ஏனெனில், பதவியேற்பு விழாவுக்கு வருகிறவர், அந்த நிகழ்ச்சியை முடித்ததும், திரும்பிச் செல்லப் போகிறார்.ராஜபக் ஷேவுக்கு, உள்நாட்டிலும், வெளி நாடுகளிலும் கடும் அழுத்தமும், நெருக்கடியும் பல வகையிலும் இருந்து வருகிறது. இந்தச் சூழலில், இந்தியாவோடு இணக்கமான போக்கை கடைபிடிப்பது போல காட்டிக் கொள்வது, அவருக்கு நல்லது. அதாவது, உலக நாடுகளின் அழுத்தம் குறையலாம்.அதை நினைத்தே, விழாவுக்கு எப்படா கூப்பிடுவார்கள் என, காத்திருந்தது போல, பதவியேற்பு விழாவுக்கு அழைத்ததும், முதல் ஆளாக வருகை தர சம்மதித்துள்ளார்.இப்பவும் ஒன்றும் கெட்டுப் போய்விடவில்லை. வீட்டுக்கு வரும் விருந்தாளியை நல்லவிதமாக மரியாதை செய்து அனுப்பி வைத்து விட்டு, கொஞ்ச நாட்களுக்குப் பிறகு, இந்திய தூதரகம் மூலமாக, இலங்கை பிரச்னையை, மத்திய அரசு திடமான எண்ணத்துடன் அணுக வேண்டும். 

நல்ல தீர்வு கிடைக்கும்

இலங்கைத் தமிழர் பிரச்னை என்பது அண்டை நாட்டு பிரச்னைதான் என்பதில் மாற்றுக் கருத்தில்லை. இருந்தாலும், ஒரு இனம், மற்றொரு இனத்தால் பாதிக்கப்பட்டதை, மனிதாபிமானத்தோடு எதையும் எதிர் கொள்ளும் இந்தியா போன்ற ஜனநாயக நாடு, தட்டிக் கேட்கத்தான் வேண்டும்; தடுக்கத்தான் வேண்டும்.இதை செய்தால்தான், காலப் போக்கில் அங்கிருக்கும் தமிழர்களுக்கு, பிரச்னைகளில் இருந்து நல்ல தீர்வு கிடைக்கும். அதை, புதிய பா.ஜ., அரசு செய்ய வேண்டும். ஏனென்றால், இலங்கைத் தமிழர் பிரச்னைக்கு நல்ல தீர்வு ஏற்படுத்தப்படும் என, பா.ஜ.,வினர் தேர்தல் பிரசாரத்தின் போது, உறுதி கொடுத்துள்ளனர். அதனால், கல்யாண வீட்டுக்கு வருகை தருபவர்களை வைத்து, கலாட்டா - எதிர்ப்பு தெரிவிப்பதைக் காட்டிலும், காலம் காலமாக இருக்கும் பிரச்னையை தீர்க்க உதவியாக புதிய அரசு இருக்க வேண்டும் என, இப்போதிலிருந்தே அழுத்தம் கொடுப்பதுதான் சரியாக இருக்கும். 

பத்ரி சேஷாத்ரி -எழுத்தாளர் 

நன்றி : தினமலர் 25.05.2014