இந்திய அமைச்சர்

ராஜாவின் ஸ்பெக்ரம் விவகாரம் காங்கிரஸின் நேர்மைக்கு உரைகல்

இந்தியாவின் மத்திய தொலைதொடர்பு அமைச்சர் அ. ராஜா பதவி விலக வேண்டும் என்ற கோரிக்கை பல்வேறு கோணங்களிலிருந்து வருகின்றபோதிலும் அவர் பதவி விலகுவதற்கான அறிகுறிகள் தென்படவில்லை. அரசாங்கமும் அவரைப் பதவி விலக்குவதாக இல்லை.

 ஸ்பெக்ரம் ஊழல் குற்றச்சாட்டு இவருக்கு எதிராகச் சுமத்தப்பட்டுள்ளது. ‘ஸ்பெக்ரம் பக்கேஜ்’ என்ற பெயரில் சில அலைவரிசைகளை ஏலம் விட்டதில் வழமையான நடை முறைகளுக்கு முரணாகத் தன் னிச்சையாகச் செயற்பட்டதன் மூலம் அரசாங்கத்துக்கு ஒரு இலட்சத்து எழுபத்தாறாயிரம் கோடி ரூபா நட்டம் ஏற்படுத்தியிருக்கின்றார் என்பது இவருக்கு எதிரான குற்றச்சாட்டு. இக் குற்றச்சாட்டை எதிர்க் கட்சிகளோ ஊடகங்களோ சுமத்தவில்லை. இந்தியாவின் கணக்காய்வு மற்றும் தணிக்கைத்துறைத் தலைவர் தனது வருடாந்த அறிக்கையில் இக் குற்றச்சாட்டைச் சுமத்தியிருக்கின்றார். இக் குற்றச்சாட்டை அடிப்படையாகக் கொண்டே எதிர்க் கட்சிகளும் ஊடகங்களும் ராஜா பதவி விலக வேண்டும் என்ற கோரிக்கையை முன்வைக்கின்றன.

இந்த ஏலம் தொடர்பாக நிதி அமைச்சும் நீதி அமைச்சும் செய்த சிபார்சுக ளுக்கும் வழமையான நடைமுறைகளுக்கும் முரணாகவே ராஜா செயற்பட்டிருப்பதாகக் கணக்காய்வு மற்றும் தணிக்கைத்துறைத் தலைவரின் அறிக்கையில் சொல்லப்பட்டுள்ளது. சில முறைகேடான நன்மைகளைப் பெறுவதற்காகவே இவ்வாறு செயற்பட்டிருக்கின்றார் என்ற சந்தேகமும் அந்த அறிக்கையில் தெரிவிக் கப்பட்டிருக்கின்றது.

ராஜாவின் முன்னைய பதவிக் காலத்திலேயே இந்த ஏலம் நடைபெற்றது. அப்போதே இக்குற்றச்சாட்டுகள் வெளிவந்துவிட்டன. கடந்த பாராளுமன்றத் தேர்தலுக்குப் பின் திராவிட முன்னேற்றக் கழகத்துக்கு அமைச்சுப் பதவிகள் வழங்குவது தொடர்பான பேச்சு வார்த்தையின் போதும் இவ்விடயம் எழுந்தது. ரீ. ஆர். பாலுவுக்கும் ராஜாவுக்கும் அமைச்சுப் பதவிகள் வழங்கப் போவதில்லை என்று மன்மோகன் சிங் கூறினார். இவ்விருவருக்கும் எதிராக ஊழல் குற்றச்சாட்டுகள் இருப்பதே காரணம் என்றும் சொன்னார். ஆனால், ராஜாவுக்கு அமைச்சுப் பதவி வழங்க வேண்டும் என்றும் முன்னைய அமைச்சே அவருக்குக் கொடுக்கப்பட வேண்டும் என்றும் கலைஞர் கருணாநிதி பிடிவாதம் பிடித்ததால் மன்மோகன் சிங் விட்டுக்கொடுக்க வேண்டி ஏற்பட்டது. ராஜாவை மீண்டும் தொலைத் தொடர்பு அமைச்சராக நியமித்தார்.

திராவிட முன்னேற்றக் கழகத்தின் சிரேஷ்ட உறுப்பினரான ரீ. ஆர். பாலுவுக்கு அமைச்சுப் பதவி பெற்றுக் கொடுப்பதில் அக்கறை காட்டாமல் ராஜாவின் விடயத்தில் மாத்திரம் கருணாநிதி ஏன் அக்கறை செலுத்தினார் என்ற கேள்வி அந்த நாட்களில் அரசியல் வட்டாரங்களில் கேட்கப்பட்டது. கனிமொழியின் வற்புறுத்தலாலேயே கருணாநிதி அவ்வளவு அக்கறை செலுத்தியதாகவும் பேசப்பட்டது.

இப்போது விடயம் உச்ச நீதிமன்றம்வரை போய்விட்டது. மத்திய புலனாய்வுப் பணியகம் இவ்விடயம் தொடர்பாக உச்ச நீதிமன்றத்தில் முதனிலை அறிக்கை சமர்ப்பித்திருக்கின்றது. விசாரணையைத் துரிதப்படுத்துமாறு மத்திய புலனாய்வுப் பணியகத்துக்கு உத்தரவிட்ட உச்ச நீதிமன்றம் ராஜா எப்படித் தொடர்ந்து அமைச்சராகப் பதவி வகிக்லாம் என்ற கேள்வியையும் எழுப்பியது. உச்ச நீதிமன்றத்தின் இக் கேள்விக்குப் பின்னர், ராஜா இராஜினாமா செய்ய வேண்டும் என்ற கோரிக்கை நாளுக்கு நாள் வலுவடைகின்றது.

இந்த நிலையில், நிதியமைச்சரும் காங்கிரஸ் கட்சியின் சிரேஷ்ட தலைவருமான பிரணாப் முகர்ஜியைச் சந்தித்த கனிமொழி ராஜாவைப் பதவி விலக்க வேண்டாம் என்று கோரிக்கை விடுத்தார். கனிமொழி தானாக இக்கோரிக்கையை விடுத்தாரா? அல்லது கலைஞரின் சார்பில் விடுத்தாரா?

*காங்கிரஸ் கட்சியின் நேர்மைக்கு இது ஒரு உரைகல். ஐ.பி.எல். ஊழலுக்காக சசி தரூரையும் ஆதர்ஸ் வீடு ஒதுக்கீடு ஊழலுக்காக அசோக் சவானையும் இராஜினாமா செய்யும் படி கூறியது போல ஸ்பெக்ரம் ஊழலுக்காக ராஜாவை இராஜினாமா செய்யும்படி காங்கிரஸ் தலைமை கூறுமா? அல்லது திராவிட முன்னேற்றக் கழகத்தின் ஆதரவைப் பெறுவதற்காக ஊழலைக் கண்டும் காணாதது போல் இருக்குமா?