உலகில் உயிர்வாழ்க்கை நிலைக்க மரங்களே கவசம்

நாடெங்கும் பதினொரு இலட்சம் மரக்கன்றுகள் இன்று நடப்படுகின்றன. இலங்கை எங்கும் பதினொரு நிமிட நேரத்துக்குள் பதினொரு இலட்சம் மரங்களை நடுவதே இத்திட்டமாகும். இன்று காலை 10.07 மணி தொடக்கம் 10.18 மணி வரையான பதினொரு மணி நேரத்திற்குள் பதினொரு இலட்சம் மரங்களும் நடப்படுகின்றன. இன்றைய தினத்தில் தேசிய மரநடுகை வைபவமாக இத்திட்டம் நிறைவேற்றப் படுகிறது.

ஜனாதிபதி மஹிந்த ராஜபக்ஷவின் பிறந்த தினம் எதிர்வரும் பதினெட்டாம் திகதியாகும். அதேசமயம் ஜனாதிபதி மஹிந்த ராஜபக்ஷவின் இரண்டாவது பதவிக் காலம் எதிர்வரும் பத்தொன்பதாம் திகதி ஆரம்பமாகிறது. இரண்டாவது பதவிக் காலத்துக்கான பதவிப் பிரமாணத்தை ஜனாதிபதி மஹிந்த ராஜபக்ஷ அன்றைய தினம் மேற் கொள்ளவிருக்கிறார். இவற்றை முன்னிட்டே பதினொரு இலட்சம் மரங்களை நாடெங்கும் நடும் திட்டம் இன்று மேற்கொள்ளப்படுகிறது. ஜனாதிபதியின் பிறந்த தினம் மற்றும் இரண்டாவது பதவிக் காலத்துக்கான பதவியேற்பு ஆகியவற்றை முன்னிட்டு நாட்டுக்கு மிகவும் பயன்தருகின்ற மரநடுகை வைபவம் ஏற்பாடு செய்யப்பட்டிருப்பது உண்மையிலேயே சிறப்பான தாகும்.

பூமியில் இயற்கைச் சமநிலை பாதிப்புறாமல் பேணப்படுவதற்கும் உயிர்வாழ்க்கை நிலைத்திருப்பதற்கும் தாவரங்களின் பங்களிப்பே இன்றியமையாத தென்பதை உணர்ந்தோருக்கு மரநடுகையின் முக்கியத்துவம் நன்கு புரியம். எனவே இன்றைய தினத்தில் எளிமையானதொரு வைபவமாக மரநடுகைத் திட்டம் தேர்ந்தெடுக்கப் பட்டிருப்பது சூழலியல் ஆவலர்களுக்கு மகிழ்ச்சி தருவதாகும். புவியின் இயற்கைச் சமநிலையானது வேகமாக மோசமடைந்து சென்று கொண்டிருப்பதை யாவரும் அறிவர். விஞ்ஞான தொழில்நுட்ப முன்னேற்றத்தின் விளைவினாலான கைத்தொழில் புரட்சியினால் பூமியின் நீர், நிலம், வளிமண்டலம் ஆகிய சூழல்கள் வேகமாக மாசடைந்து கொண்டு வருவது மட்டுமன்றி மரங்களும் தொடர்ச்சியாக அழிக்கப்பட்டு வருகின்றன.

பூமிக்கு மனிதன் இழைக்கும் தீங்குகளில் காடழிப்பு பிரதானமானது. மரங்களினால் உண்டாகும் பயன்களை விரிவாக ஆராய்வோமானால் தாவரங்களின் அவசியம் நன்கு புரியும். மனிதன் மற்றும் ஏனைய விலங்குகளுக்கு நேரடியாகவும் மறைமுகமாகவும் உணவுகளை வழங்குவதால் தாவரங்களை ‘உற்பத்தியாக்கிகள்’ என்கிறோம். தாவரங்கள் இன்றேல் இவ்வுலகில் தாவர உண்ணிகளும் இல்லை; விலங்குண் ணிகளும் இல்லை. அத்தனை ஜீவராசிகளின் உயிர்வாழ்க் கையும் தாவரங்களை நம்பித்தான் இருக்கிறது.

அதேசமயம் உலகின் அத்தனை ஜீவராசிகளும் தமது சுவாசத்தின் போது வெளிவிடுகின்ற அசுத்த வாயுவான காபனீரொட்சைட்டை தாவரங்கள் உள்ளெடுத்து உண வைத் தயாரித்துக் கொள்கின்றன. வளிமண்டலத்தைத் தூய்மைப்படுத்துகின்ற அதேசமயம் ஜீவராசிகளுக்குத் தேவையான உணவையும் மரங்கள் தயாரித்துத் தரு கின்றன.

பூமியில் உயிர்ச்சூழல் நிலைத்திருக்க இயற்கை அளித்திருக்கும் விந்தையான கொடை இதுவாகும். இவற்றுக்கெல்லாம் மேலாக புவி வெப்பமடையாமல் பேணும் நற்காரியத்தையும் தாவரங்களே ஆற்றுகின்றன. இவை மாத்திரமன்றி தாவரங்கள் ஆற்றுகின்ற பணிகள் எண்ணிலடங்காத¨ வயாகும்.

இத்தனை பயன்களை ஆற்றுகின்ற மரங்களை அழிப்பதென்பது மனிதன் தனது குலத்தையே அழித்துக் கொள்வதற்கு ஒப்பானதாகும். இவ்வாறு நோக்குகையில் நாடெங்கும் மரங்களை நடுவதென்பது எத்தனை அவசியமானதென்பது அனைவருக்கும் புரிந்துவிடும். காடழிப்பில் இலங்கை விதிவிலக்கானதல்ல... காடழிப்பதைத் தடுத்து நிறுத்தி பயன்தரும் மரங்களை நட வேண்டிய தேவையில் நாம் உள்ளோம். எனவே இன்றைய மரநடுகை வேலைத் திட்டமானது ‘தேசத்துக்கே நிழல்’ தருவதாகும்.

(தினகரன்)