பிரச்சினைகளின் தீர்வுக்கு சாதகமான சூழ்நிலை

ஜனாதிபதி மஹிந்த ராஜபக்ஷவின் இரண்டாவது பதவிக் காலம் நேற்று ஆரம்பமாகியது. கோலாகலமாக ஜனாதிபதி செயலக முன்றலில் ஜனாதிபதி மஹிந்த ராஜபக்ஷ நாட்டின் தலைவராக இரண்டாவது தடவையாகச் சத்தியப் பிரமாணம் செய்தார். ஜனாதிபதியின் முதலாவது பதவிக் காலம் இலங்கையின் வரலாற்றில் மிகவும் முக்கியத்துவம் வாய்ந்ததாக அமைந்தது. ஜனாதிபதி ஜே. ஆர். ஜயவர்தனவின் காலத்தில் கூர்மைபெற்ற பயங்கரவாதம் அவருக்குப் பின்னர் பதவி வசித்த மூன்று ஜனாதிபதிகளினதும் காலத்தில் நாட்டுக்கும் மக்களுக்கும் பல சேதங்களை உண்டாக்கி வளர்ந்ததேயொழிய, அதனை ஒழிக்க முடியவில்லை. ஜனாதிபதி மஹிந்த ராஜபக்ஷவின் முதலாவது பதவிக் காலத்திலேயே விடுதலைப் புலிகள் இயக்கத்தின் பயங்கரவாதத்தை முழுமையாக ஒழிக்க முடிந்தது.

அபிவிருத்தித் திட்டங்களுக்கு மத்தியிலேயே பயங்கரவாதத்துக்கு எதிரான நடவடிக்கை முன்னெடுக்கப்பட்டது. அபிவிருத்தியைப் பொறுத்த வரையில் கூட ஜனாதிபதியின் முதலாவது பதவிக் காலம் முத்திரை பதித்தது எனத் தயக்கமின்றிக் கூறலாம். முன்னைய காலங்களிலும் பார்க்க மிகக் கூடுதலான அபிவிருத்தித் திட்டங்கள் நாட்டின் பல பகுதிகளிலும் நடைமுறைப்படுத்தப்பட்டுள்ளன.

தமிழ் பேசும் மக்களைப் பொறுத்தவரையில் ஜனாதிபதியின் இரண்டாவது பதவிக் காலம் முக்கியத்துவம் வாய்ந்தது. நாட்டின் சகல பிரசைகளுக்கும் பொதுவான பிரச்சினைகள் இருக்கின்ற அதேவேளை தமிழ் பேசும் மக்களுக்குத் தனியான பிரச்சினைகளும் உள்ளன. இனப்பிரச்சினைக்கு அரசியல் தீர்வு காண்பதும் அண்மைய இராணுவ நடவடிக்கையின் போதும் அதற்கு முன்னரும் இடம்பெயர்ந்த தமிழ் மக்களினதும் வடக்கிலிருந்து புலிகளால் வெளியேற்றப்பட்ட முஸ்லிம்களினதும் மீள்குடியேற்றமும் தமிழ் பேசும் மக்களுக்கு முன்னாலுள்ள தனித்துவமான பிரதான பிரச்சினைகள், இப்பிரச்சினைகளின் தீர்வுக்கு ஜனாதிபதியின் இரண்டாவது பதவிக் காலம் சாதகமான காலகட்டமாக உள்ளது.

மீள்குடியேற்றத்தில் கணிசமான முன்னேற்றம் ஏற்பட்டுள்ள போதிலும், இடம்பெயர்ந்த அனைவரும் மீள்குடியேற்றப்பட்டு அவர்களின் வாழ்க்கையில் சுமுக நிலை ஏற்பட்ட நிலையிலேயே இப் பணி பூர்த்தியடைந்தது எனக் கூற முடியும். இந்த இலக்கை அடையும் நோக்கத்துடன் அரசாங்கம் செயற்படுகின்றது என்பதில் சந்தேகமில்லை. உள்ளூர் அரசியல் தலைவர்களுக்கும் இவ்விடயத்தில் பொறுப்பு உண்டு. அரசாங்கத்துடன் இணைந்து தங்கள் பங்களிப்பையும் அவர்கள் செலுத்தும் பட்சத்தில் மீள்குடியேற்றப் பணி விரைவில் பூர்த்தியடையக் கூடியதாக இருக்கும். வடக்கிலிருந்து புலிகளால் வெளியேற்றப்பட்ட முஸ்லிம்களை அவர்களது சொந்த இடங்களில் குடியமர்த்துவதில் ஏதேனும் தடங்கல் இருக்க நியாயம் இல்லை. இவ்விடயத்தில் அரசாங்கத்தைச் செயற்பட வைக்கும் பிரதான பொறுப்பு முஸ்லிம் அரசியல் தலைவர்களைச் சார்ந்தது.

இனப் பிரச்சினையின் தீர்வுக்கும் ஜனாதிபதியின் இரண்டாவது பதவிக் காலம் சாதகமானது. அரசியல் தீர்வு முயற்சிகளுக்குத் தடையாகச் செயற்பட்டு வந்த புலிகள் இப்போது அரசியல் அரங்கில் இல்லை. தனிநாடு சாத்தியமற்றது என்பதும் இப்போது உறுதியாகிவிட்டது. தமிழ்த் தலைவர்கள் யதார்த்தத்துக்கு அமைவான முறையில் அரசாங்கத்துடன் பேச்சுவார்த்தை நடத்தித் தீர்வு முயற்சியை மேற்கொள்வார்களேயானால் அரசியல் தீர்வு விரைவில் சாத்தியமாகும்.

பிரச்சினைகளின் தீர்வுக்குச் சாதகமான சூழ்நிலை இப்போது நிலவுகின்றது. தமிழ் பேசும் மக்களின் தலைவர்கள் இதைச் சரியான முறையில் பயன்படுத்த வேண்டும்.

(தினகரன்)