உலகின் செல்வாக்குள்ள 500 முஸ்லிம்கள்
இலங்கையிலிருந்து தேசபந்து ஜெசீமா இஸ்மாயில் தெரிவு

அமெரிக்க றோயல் இஸ்லாமிய புள்ளி விபரக் கற்கை நிலையத்தில் இருந்து கலாநிதி ஜோசப் லம்பேட், கலாநிதி ஆரிப் அலி நேயிட் ஆகியோரை ஆசிரியராகக் கொண்டு வெளிவரும் 2010ம் ஆண்டு அதிக செல்வாக்குள்ள 500 முஸ்லிம்கள் எனும் ஆய்வுத் தொகுதி நூலில் 136ம் பக்கம் இலங்கையைச் சேர்ந்த தேசபந்து ஜெசீமா இஸ்மாயிலின் தகவல் இடம்பெற்றுள்ளது. இத்தகவலின்படி இலங்கையின் முதலாவது முஸ்லிம் பெண்ணாக இவர் தெரிவாகியுள்ளார் என்பது இலங்கையில் வாழ்கின்ற முஸ்லிம் பெண்களுக்கு மட்டுமல்ல இலங்கையில் வாழ்கின்ற எல்லாப் பெண்களுக்குமே பெருமை சேர்க்கின்ற ஒரு விடயம் எனலாம். அது மட்டுமல்ல உலக முஸ்லிம் பெண்கள் அனைவருக்கும் இது பெருமை தரும் ஒரு விடயமுமாகும். இந்த வகையில் தேசபந்து ஜெசீமா இஸ்மாயிலுக்கு நாம் இந்தப் பெருமையை - கெளரத்தைத் தேடித் தந்தமைக்காக நன்றி சொல்லக் கடமைப்பட்டுள்ளோம்.

மத, அரசியல் ஈடுபாட்டோடு கூடிய சமூக சேவை என்ற அடிப்படையில் விபரங்கள் திரட்டப்பட்டு 500 பேர் தெரிவு செய்யப்படுகிறார்கள்.

இந்த வகையில் தேசபந்து ஜெசீமா இஸ்மாயில் இலங்கை முஸ்லிம் பெண்களின் ஆய்வு முன்னணியின் தலைவி என்ற அடிப்படையிலும் இந்த அமைப்பினூடாக அவர் முஸ்லிம் பெண்களின் அடிப்படை உரிமைகள், கல்வி, கலை, கலாசாரம், தொழில் முன்னேற்றம் போன்ற விடயங்களில் ஆற்றிவரும் சேவைக்காகவும் தேர்ந்து எடுக்கப்பட்டுள்ளார்.

தேசபந்து ஜெசீமா இஸ்மாயில் இலங்கை முஸ்லிம் பெண்களில் பல விடயங்களில் முன்னோடி என்பதை இங்கு சுட்டிக்காட்டாமல் இருக்கக் கூடாது.

இலங்கையில் முதலாவது தேபந்து ஜனாதிபதி விருது பெற்ற (1989ல்) முஸ்லிம் பெண் இவர். அத்தோடு 1991 - 1993 ஆண்டுகளில் லயன்ஸ் கழகத்தின் கல்வி விருது பெற்ற முதலாவது முஸ்லிம் பெண்ணும் இவர்தான். மேலும் 1992ம் ஆண்டு கல்விக்கான சோந்தா விருது பெற்றவர். Zonta women of achievment award for Education) தென் கிழக்கு பல்கலைக்கழகத்தின் உபவேந்தர் பதவி வகித்த முதல் முஸ்லிம் பெண் என அடுக்கிக் கொண்டே போகலாம். இத்தனை கெளரவத்திற்கும் உரிய ஜெசீமா இஸ்மாயில் பிறந்தது தென் கிழக்கில் அழகான முதுபெரும் கிராமமான சாய்ந்தமருதூரில்.

இங்கு கல்முனை கார்மேல் கொண்வென்ட் பாடசாலையில் பாலர் கல்வியை கற்றுக் கொண்டு கொழும்பு வந்து இடைநிலைக் கல்வியை சென்பிறிஞ்ஜட் கொண்வென்ட்டிலும் பட்டப் படிப்பினை பேராதனைப் பல்கலைக்கழகத்திலும் 1964 - 1966 வரை கனடா பல்கலைக்கழகத்தில் முதுமாணிப் பட்டத்தையும் நிறைவு செய்தார். கல்வியியல் டிப்ளோமா படிப்பினை அவுஸ்திரேலியாவிலும் கற்றுத் தேர்ந்தார். 1973 முதல் 1988 வரை கொழும்பு முஸ்லிம் பெண்கள் கல்லூரியில் அதிபராக இருந்து முஸ்லிம் பெண் பெண்பிள்ளைகளின் கல்வியில் முன்னேற்றம் காணப்பாடுபட்டார்.

இவரைப் போன்றே இவரது குடும்பமும் கல்வியிலும், சமூக சேவையிலும் அக்கறை காட்டியவர்கள் எனலாம்.

இவரது தகப்பனார் சஹீட் அகமத் நீர்ப்பாசனத் திணைக்களத்தில் பிரதிப் பணிப்பாளராகக் கடைமையாற்றி ஓய்வுபெற்றவர். இவரது கணவர் மஃரூப் இஸ்மாயில் வைத்திய கல்லூரியில் விரிவுரையாளராக இருந்தது மட்டுமல்லாமல் அவர். நோய் என்று தன்னிடம் வரும் எவரிடமும் என்றுமே ஒருசதம் கூட வாங்கியதில்லை.

அந்த அளவிற்கு வைத்தியத்தைச் சேவையாகச் செய்தவர் மஃரூப் இஸ்மாயில். தேசபந்து ஜெசீமா இஸ்மாயில் தான் பிறந்த மண்ணை உயிரிலும் மேலாக நேசிப்பவர்.

இந்த நேசிப்பின் அடித்தளமாக தென் கிழக்கு முஸ்லிம்களின் கலை கலாசாரங்களிலும், நாட்டார் இயலிலும் பெரிதும் அக்கறை காட்டிவருகின்றார். இதற்கு உதாரணமாக கல்விமான் எஸ். எச். எம். ஜெமீலினால் வெளியிடப்பட்ட கிராமத்து இதயம் எனும் நூலினையும், என்னால் ஆய்வு செய்து வெளியிடப்பட்ட ‘தென் கிழக்கு முஸ்லிம் தேசத்தாரின் நாட்டாரியல்’ எனும் நூலினையும் வெளியிட்டு வைப்பதில் பொருளாதார ரீதியாக மிகவும் அக்கறை செலுத்தினார் என்பதையும், இந்த நாட்டார் இயல் சம்பந்தமான ஆய்வுக் கட்டுரைகளை ஆய்வாளர்களிடம் இருந்து பெற்றெடுத்து ஆங்கிலத்தில் அவற்றை மிகுந்த சிரமங்களுக்கு மத்தியில் மொழி பெயர்த்தெடுத்து எதிர்வரும் டிசம்பரில் நூலாக வெளியிட இரவு பகலாக அயராது உழைத்து வருகிறார் என்பதனையும் இங்கு குறிப்பிடல் பொருத்தமெனக் கருதுகின்றேன்.

எமது முன்னோரின் முதுசங்களான கலை, கலாசார நாட்டாரியல் விழுமியங்கள் உலகளாவிய ரீதியில் படிக்கப்பட வேண்டும். ஆங்கில மொழியில் அவை மொழிபெயர்க்கப்பட வேண்டும் என்பது அவரது நீண்ட கால விருப்பம்.

ஒருவருக்குக் கெளரவம் அளிக்கும் வகையில் அமெரிக்க றோயல் இஸ்லாமிய புள்ளி விபரக் கற்கை நிலையம் 2010ம் ஆண்டிற்கான உலகில் அதிக செல்வாக்கு செலுத்திய 500 பேரில் ஒருவராக எமது நாட்டைச் சேர்ந்த தேசபந்து ஜெசீமா இஸ்மாயில் அவர்களைத் தேர்ந்தெடுத்தது நியாயமான பொருத்தமான ஒரு தேர்வு எனக் கூறிக் கொள்வோம்.

மருதூர் ஏ. மஜீத்...