ஈகுவடோரில் தோல்வியில் முடிந்தது சதிப்புரட்சி

செப்ரெம்பர் 30ம் திகதி ஈகுவடோர் நாட்டு ஜனாதிபதி ரஃபேல் கொரயா அந்நாட்டுப் பொலிஸாரினால் பலவந்தமாகத் தடுத்து வைக்கப்பட்டார். அண்மையில் நிறைவேற்றப்பட்ட ஒரு சட்டம் பொருளாதார ரீதியாகத் தங்களைப் பாதிக்கின்றது எனக் கூறிப் பொலிஸார் வேலை நிறுத்தத்தில் ஈடுபட்டனர். அவர்களுடன் நேரடியாகப் பேசி உண்மை நிலையை விளக்கும் நோக்கத்துடன் பாசறைக்குச் சென்ற ஜனாதிபதி மீது பொலிஸார் கண்ணீர்ப் புகைத் தாக்குதல் நடத்தியதோடு, கனமான ஆயுதங்களாலும் தாக்கியுள்ளனர். காயமடைந்த ஜனாதிபதியை இராணுவ வைத்தியசாலைக்குக் கொண்டு சென்ற பொலிஸார் அவரைப் பலவந்தமாகத் தடுத்து வைத்து இராஜினாமா செய்யும்படி வற்புறுத்தினார்கள். ஜனாதிபதி மறுத்துவிட்டார். “நான் இங்கிருந்து ஜனாதிபதியாக வெளியே போக முடியாவிட்டால் பிணமாகவே பேவேனேயொழிய இராஜினாமா செய்யமாட்டேன்” என்று அவர் உறுதியாகக் கூறினார்.

இதேவேளை ஏறக்குறைய எல்லாப் பாசறைகளையும் கிளர்ச்சிப் பொலிஸார் தங்கள் கட்டுப்பாட் டுக்குள் கொண்டு வந்திருந்தனர். விமான நிலையங்களும் மூடப்பட்டன. பாதுகாப்புப் படையினரிலும் சிலர் கிளர்ச்சிப் பொலிஸாருக்கு ஆதரவாகச் செயற்பட்டனர்.

ஜனாதிபதி கைது செய்யப்பட்டார் என்ற செய்தி பரவியதும், ஆயிரக் கணக்கானோர் அவருக்கு ஆதரவு தெரிவித்து வீதியில் இறங்கினார்கள். அன்று மாலை விசேட படையினர் மேற்கொண்ட அதிரடி நடவடிக்கையின் மூலம் ஜனாதிபதி மீட்கப்பட்டார்.

ஈகுவடோர் ஆட்சி மாற்றங்களுக்குப் பெயர் பெற்ற நாடு. ரஃபேல் கொரயா 2006ம் ஆண்டு ஜனாதிபதியாகத் தெரிவு செய்யப்பட்டார். அதற்கு முன் பத்து வருட காலத்தில் எட்டு ஜனாதிபதிகள் பதவி வகித்தனர். கொரயாதான் அண்மைக்கால வரலாற்றில் கூடுதலான காலம் பதவியில் இருப்பவர். கடந்த வருடம் இரண்டாவது தடவையாகவும் மிகக் கூடுதலான பெரும்பான்மை வாக்குகளால் அவர் தெரிவு செய்யப்பட்டார். அண்மைய கணக்கெடுப்பில் அவரது அங்கீகார விகிதம் 70ஐத் தாண்டிவிட்டது.

கொரயா பொருளாதாரத்தில் கலாநிதிப் பட்டம் பெற்றவர். அவர் ஜனாதிபதியாகத் தெரிவு செய்யப் பட்டதும் பொரு ளாதாரத் துறையில் பல ‘றடிகல்’ நடவடிக்கைகளை மேற்கொண்டார். பிரதான தொழிற்துறைகளைத் தேசியமயமாக்கினார். அமெரிக்க நாடுகளுக்கான பொலிவிய மாற்று அமைப்பு என்ற அமைப்பில் ஈகுவடோரை அங்கத்துவ நாடாக இணைத்தார். சுகாதார சேவைக்கான செலவினத்தை இரண்டு மடங்காக அதிகரித்தார்.

அமெரிக்க நாடுகளுக்கான பொலிவிய மாற்று அமைப்பு எனப்படுவது இடதுசாரிக் கருத்துள்ள நாடுகளின் கூட்டமைப்பாகும். இந்த நாடுகள் சமத்துவ அடிப்படையில் தங்களுக்கிடையே பொருளாதார ஒத்துழைப்பை வகுத்துக்கொண்டுள்ளன. அரசியலிலும் பொருளாதாரத்திலும் அமெரிக்க நாடுகள் மத்தியில் மேலாண்மை செலுத்தும் ஐக்கிய அமெரிக்க நிலைப்பாட்டுக்கு இந்த அமைப்பு வலுவான சவாலாக உள்ளது. திழிகிதி வில் ஈக்குவடோர் இணைந்ததால் அமெரிக்கா கொண்டிருந்த சினம் மேலும் அதிகரிக்கும் வகையில், ஈக்குவடோரிலுள்ள அமெரிக்கத் தளத்தை மூடிவிடுமாறு ஜனாதிபதி கொரயா கடந்த வருடம் உத்தரவிட்டார்.

ஈகுவடோர் பொலிஸ் சேவையில் அமெரிக்க தூதரகம் ஊடுருவல் செய்திருக்கின்றது என்று சில காலத்துக்கு முன் ஒரு கனேடிய ஊடகவியலாளர் செய்தி வெளியிட்டிருந்தது குறிப்பிடத்தக்கது. இச்செய்தி தொடர்பாகக் கருத்துத் தெரிவித்த ஈகுவடோரிலுள்ள அமெரிக்கத் தூதுவர் ஹீதர் ஹொட்ஜெஸ் போதைவஸ்துக் கடத்தலுக்கு எதிரான நடவடிக்கைகளுக்காகவே ஈகுவடோர் பாதுகாப்புப் படையினருக்கும் அமெரிக்காவுக்குமிடையே ஒத்துழைப்பு நிலவுகின்றது எனக் கூறியிருந்தார்.

இது கனேடிய ஊடகவியலாளரின் செய்தியை மறைமுகமாக ஒத்துக்கொண்டதற்குச் சமன். போதை வஸ்துக் கடத்தலுக்கு எதிரான ஒத்துழைப்பு ஈகுவடோர் அரசாங்கத்துக்கூடாக இடம்பெற வேண்டுமேயொழிய நேரடியாக அல்ல. நேரடியான ஒத்துழைப்பு ஊடுருவலே. ஈகுவடோருக்கு விசுவாசகமாக இல்லாமல் அமெரிக்காவுக்கு விசுவாசமாக இருக்கின்றார் எனக் கூறி ஜனாதிபதி கொரயா 2008ம் ஆண்டு பொலிஸ் அதிபரைப் பதவி நீக்கம் செய்தார் என்பதையும் இங்கு குறிப்பிட வேண்டும்.

இவற்றையெல்லாம் பார்க்கையில், ஈகுவடோரில் தோல்வியடைந்த சதிப்புரட்சிக்குப் பின்னால் அமெரிக்காவே இருந்தது என்று வெனிசூலா ஜனாதிபதி ஹியூகோ சாவெஸ் கூறுவதை நிராகரிக்க முடியாது. அமெரிக்க நாடுகளுக்கான பொலிவிய மாற்று அமைப்பு வில் இணையும் நாடுகளில் ஆட்சிக் கவிழ்ப்பை மேற்கொள்வதற்கு அமெரிக்கா முயற்சிக்கின்றது என்பதற்கு ஹொன்டுராஸ் ஒரு உதாரணம் என்கிறார் சாவெஸ்.

ஹொன்டுராஸில் மக்களால் தெரிவு செய்யப்பட்ட ஜனாதிபதியான மனுவெல் ஸெலாயா தனது நாடு திழிகிதி வில் இணையும் என்று அறிவித்தார். அதைத் தொடர்ந்து, 2009ம் ஆண்டு இராணுவ சதிப்புரட்சி மூலம் அவரது ஆட்சி கவிழ்க்கப்பட்டது. இப்போது ஹொண்டுராஸிலுள்ள இராணுவ ஆதரவு அரசாங்கத்துக்கு அமெரிக்கா பெருமளவில் உதவி புரிகின்றது.

தோல்வியடைந்த சதிப்புரட்சியைத் தொடர்ந்து ரஃபேல் கொரயாவின் செல்வாக்கு மேலும் அதிகரித்திருக்கின்றது. ஆனால், அவரது செயற்பாடுகளினால் பாதிக்கப்பட்ட உள்ளூர் பெருமுதலாளித்துவ சக்திகளினதும் அமெரிக்காவினதும் அச்சுறுத்தலைச் சமாளித்தாக வேண்டுமே.