சித்த வைத்தியத்தில் சிறப்புறும் வலிகாமம் வடக்கு பிரதேசம்
(எஸ். ரி. குமரன் )

நோயற்ற வாழ்வே குறைவற்ற செல்வம் என்போர் ஆன்றோர்கள். தமிழர்க்கென மரபு வழி வைத்தியம் ஆனது சிறப்புற்று வளர்ந்துவந்துள்ளது. இவ் வைத்தியக் கலையானது சித்தர்களால் வளர்க்கப்பட்டு வந்தமையினால் சித்த வைத்தியம் என்று பெயர் வழங்கி வரலாயிற்று. இத்தகு சித்த வைத்தியத் துறையில் சிறப்புற்ற விளங்கிய சீர்மையாளனாக சித்த வைத்திய கலாநிதி கோ.சின்னத்தம்பி விளங்குகிறார்.

சித்த வைத்தியம் சிறப்புற்று எழில்பெற்ற இடமாக வலிவடக்கு விளங்குகின்றது. வலி வடக்கில் சிறப்பு மிகும் சிறிய பிரதேசமாக பளை என்னும் சிறிய கிராமம் அமைந்துள்ளது. இத்தகு சிறப்பு மிகுந்த புகழ்பூத்த மண்ணில் 1908ஆம் ஆண்டு பங்குனி மாதம் 30 ஆம் திகதி கோவிந்தர் மாதி தம்பதிகளுக்கு இளைய மகனாக சித்த வைத்தியர் சின்னத்தம்பி வந்துதித்தார். 32 வயதிலேயே தாய் தந்தையரை இழந்தார். ஆயினும் சிறிய சகோதரியினதும் அரவணைப்பில் வளர்ந்தார். இவருடன் 2 சகோதரர்களும் 3 சகோதரிகளும் பிறந்தார்கள்.

இவருடைய குடும்பம் பாரம்பரியமாகவே வைத்தியத்தொழில் செய்துவந்தது. இவரது தந்தையார் வைத்தியர். இவரது தாயார் சகோதரிகள் போன்றோர் எமது பாரம்பரிய முறைப்படி மருத்துவிச்சிகளாக விளங்கி வைத்தியத்துறைக்கு பங்காற்றினார்கள்.

வைத்தியர் ஆரம்பக் கல்வியை சைவத்தமிழ் வித்தியாசாலையில் கற்றார். கல்வியின் சிறப்பால் அநுராதபுரத்தில் இலங்கை புகையிரதத் திணைக்களத்தில் உயர் பதவி வகித்தார். ஆனாலும் இவரது மனம் வைத்தியத் தொழில் மீது கொண்ட பற்றும் மண் மீது கொண்ட பற்றும் காரணமாக அத்தொழிலை விட்டு தனது ஊர் திரும்பி சித்தவைத்தியர் பரீட்சையில் சித்தியெய்தி பதிவு செய்யப்பட்ட சித்த வைத்தியராக தன் பணியினை தொடர்ந்தார்.

வைத்தியத்துறையில் சிறுபிள்ளை வைத்தியம், வாத ரோக வைத்தியம், கட்டு வைத்தியம், கர்ப்பிணி வைத்தியம், விஷகடி வைத்தியம் போன்ற சகலதுறைகளிலும் சிறந்து விளங்கினார்.

எண்ணெய் காய்ச்சுவது மருந்துக் குளிகைகள், சூரணங்கள் தயாரிப்பது போன்றவற்றில் சிறந்து விளங்கியவர், சிறு குழந்தைப் பிள்ளைகளுக்கும், வாத ரோகிகட்கும் தலைமுடி உதிர்வோருக்கும், புண் குணமாவதற்கும், மனநோய் நீங்குவதற்கும் எண்ணெய் வழங்குவதில் புகழ்பெற்ற வைத்தியராக விளங்கினார்.

சைவ சமய உத்தமராக வாழ்ந்த தரும சிந்தனையாளர். பல்லாயிரக்கணக்கான நோயாளிகள் வந்து நோய் தீர்க்கப் பெறுவார்கள். அன்னையவள் பராசக்தி மீது கொண்ட நம்பிக்கையின் காரணமாக ஆலயம் அமைத்து பரிபாலித்ததோடு அதன் பிரதான பூசகராக விளங்கினார். அன்னை மீது கொண்ட பற்றினால் அன்னையின் பெயரிலேயே தனது வைத்திய மனையை நடாத்திப் புகழ் பெற்றவர்.

சித்த வைத்தியத்துடன் மாந்திரீகத் தையும், சோதிடக் கலையிலும், மனையடி சாஸ்திரத்திலும் சிறப்புற்று விளங்கியவர். இதற்கு அன்னையின் பேரருள் காரணம் என்பார். பராசக்தியின் அருளால் வேளை (நூற்கட்டுதல்) போடுதல் பணியின் மூலமும் நோய்தீர்க்கும் வைத்தியராக செயற்பட்டார்.

வசதிவாய்ப்பற்ற வறியவர்கள் சித்த வைத்தியரிடமே நாடி வருவார்கள். பரோபகாரியாகப் பெயர்போன வைத்தியராக விளங்கிய சின்னத்தம்பி அவர்கள் ஏழைகள் பலருக்கு இல வசமாகவே தன் பணியை செய்தவர். தன்னை நாடிவரும் நோயாளிகளிடம் மருத்துவக் கூலியாக பணத்தை விலைபேசி வேண்டுவதில்லை. அவர்கள் கொடுக்கும் தொகையை ஏற்கும் பண்பாளனாக விளங்கினார்.

சித்த வைத்தியத்தின் உயிர் நாடி நாடி சாஸ்திரமாகும். இச் சாஸ்திரத்தினை மதிநுட்பமாகத் துல்லியமாக உணரும் திறமை ஆற்றல் படைத்தவராவர். இதனை அவரது வாழ்வில் இடம்பெற்ற சம்பவம் ஒன்றினூடாக விபரிக்கலாம்.

இவரது வாடிக்கைக் கிராமத்தில் இருந்து ஒரு கர்ப்பிணித்தாய் இணுவில் வைத்தியசாலைக்கு மனப்பேற்றிற்கு சென்றிருந்த சம்பவம் அது. புகழ் வாய்ந்த இந்திய மகப்பேற்று வைத்தியர் கெங்கம்மா அங்கு பணியாற்றினார். குறைமாத பிரசவ மாகையால் குழந்தை அழிந்த நிலையில் வைத்தியம் பார்த்து விட்டு திரும்பினர். தொடர் வயிற்றுவலி வந்தபோது இவரிடம் வந்து காண்பித்தார்கள். நாடி சாஸ்திர நுட்பத்தால் நஞ்சுக் கொடி இருப்பதாக கூறினார். சம்பந்தப்பட்டதாயோ நஞ்சுக் கொடி எல்லாம் வைத்தியசாலையில் அகற்றிவிட்டார்கள் எனக் கூறி வைத்தியருடைய கூற்றை நம்ப மறுத்தார்.

மீண்டும் இணுவில் வைத்தியசாலை க்கு சென்று சித்த வைத்தியருடைய கூற்றை கெங்கம்மாவக்கு கூறினார். அப்போது மீண்டும் பரிசோதனை செய்யப்பட்டு நஞ்சுக் கொடி அகற்றப்பட்டது. குறைப்பிரசவமாகையால் குழந்தைகள் இருவர் என்பது புலனாகவில்லை. கெங்கம்மா ஆச்சரியப்பட்டார். சித்த வைத்தியரை பார்க்க ஆசைப்பட்டார். அழைத்துப் பாராட்டினார். நாடி சாஸ்திரத்தின் நுட்பத்தை உணர்ந்து உவகை கொண்டார் என அறியமுடிகின்றது.

வைத்தியரை அகத்தியர் பண்டிதன் என்கிறார். புராதன ஏட்டுச் சுவடிகளில் தீராத நோய் தீர்க்கும் ஓளடதபாகங்கள் பற்றி கூறப்பட்டுள்ளன. இக்கூற்றுக்கு இலக்கணமாக தமிழ்ப் புலமையில் சித்த வைத்தியர் அவர்கள் சிறப்புற்று விளங்கினார்.

யுத்தம் காரணமாக வலி வடக்கை விட்டு இடம்பெயர்ந்த வேளையில் மல்லாகம், உடுவில், கொடிகாமம் போன்ற பிரதேசங்களில் வாழ்ந்த போதும் அங்கெல்லாம் தனது பணிமூலம் சிறந்துவிளங்கியவர். தனது 9ஆவது வயதிலும் தளர்வின்றி வைத்தியப் பணியாற்றிய பேராளனாக விளங்கினார்.

வைத்தியரைத் தொடர்ந்து இவரது 5ஆவது மகன் தங்கரட்ணம் வைத்தியப் பணியினை பரம்பரையாக திறம்பட நடாத்தி வருகின்றார். இன்றைய நவீன விஞ்ஞான உலகின் சவாலிலும் வளர்ச்சிப் போக்கிலும் சித்த வைத்திய பாரம்பரியத்தை வளர்க்க வேண்டும் சந்ததியை இடையறாது தொடர வேண்டும் என்ற நோக்கில் இவரது பேர்த்தி த. உமாலங்கா சித்த ஆயுள் வேத மருத்துவக் கல்லூரியில் மருத்துவக் கல்வியை கற்றுவருகின்றார்.

சித்த வைத்தியத்துறையில் மண் வாசனையோடு பரம்பரையாக செல்வாக்கு செலுத்திய சித்தவைத்தியர் கோ. சின்னத்தம்பியின் சேவையை பாராட்டி வலி வடக்கு பிரதேச செயலகமானது வைத்தியகலாசூரி என்ற சிறப்பு கெளரவ பட்டத்தை பரிந்துரை செய்தமை வலி வடக்கு மண்ணுக்கும் மக்களுக்கும் சித்த வைத்தியத்துறைக்கும் அவர் ஆற்றிய உயர் சேவையின் வெளிப்பாடேயாகும்.

சித்தவைத்தியர் 2000.11.04 இல் இறையடி சேர்ந்தார். இவருடைய பணிகள் சிறப்புகள் இவரது 11ஆவது ஆண்டு நினைவுதினத்தில் நினைவு கொள்ளப்பட வேண்டியதொன்றாகும். இத்தகு சான்றோனின் அயராத பணியினால் எமது வலி வடக்கு மண்ணானது பெருமை பெறுகின்றது.