விடுதலை புலிகளை வெளிநாடுகளில் பின்தொடரும் மர்ம நபர்கள்! அடுத்த குறி யார்?

விடுதலைப் புலிகள் நெடியவன் அணி தளபதி பரிதி பாரிஸில் சுட்டுக் கொல்லப்பட்ட சம்பவத்தையடுத்து, காரியங்கள் வேகமான நடக்க தொடங்கியுள்ளன. நெடியவன் அணியைச் சேர்ந்த முக்கியஸ்தர்கள் சிலரை ‘அடையாளம் தெரியாத’ நபர்கள் பின்தொடர்வதாக கூறப்படுகிறது. இதையடுத்து, நெடியவன் அணியைச் சேர்ந்த வேறு சில தளபதிகளும், செயல்பாட்டாளர்களும் இலக்கு வைக்கப்பட்டிருக்கலாம் என்று அந்த அணியைச் சேர்ந்தவர்களே கூறத் தொடங்கியுள்ளனர். முக்கியமாக இந்த மாதம் விடுதலை புலிகளின் மாவீரர் தினம் வருவதால், செயல்பாட்டாளர்கள் வெளியே நடமாட வேண்டிய தேவைகள் உள்ளன. இந்த சந்தர்ப்பத்தை வைத்து, நெடியவன் அணியைச் சேர்ந்த வேறு சிலரும் குறிவைக்கப்பட சாத்தியம் மிக அதிகம் என்றே சொல்லலாம். இந்தக் கொலையை செய்தவர்கள், அவர்கள் யாராக இருந்தாலும், பரிதியையே கொல்ல கூடிய அளவுக்கு திட்டமிடக் கூடியவர்களாக உள்ளார்கள். கொலை செய்துவிட்டு, இயல்பாக அந்த இடத்தை விட்டு அகன்று செல்லக்கூடிய அனுபவசாலிகளாகவும் உள்ளார்கள்.

“பரிதி தனிப்பட்ட பிரச்னையால் கொல்லப்படவில்லை” என்கிறது நெடியவன் அணி. “இயக்க வேலைகளில் ஈடுபட்ட காரணத்தாலேயே அவர் கொல்லப்பட்டார்” என்றும் அவர்களது அணி வெளியிட்டுள்ள அறிக்கைகளில் கூறப்படுகிறது. இதனால், வெளிநாடுகளில் இயக்க வேலைகளில் ஈடுபடும், நெடியவன் அணியைச் சேர்ந்த மற்றையவர்களின் உயிர்களுக்கும் அச்சுறுத்தல் உள்ளதை அந்த அணி உணர்ந்துள்ளது.

நெடியவன் அணி ஆதரவு அமைப்பான, பிரான்ஸ் தமிழர் மனித உரிமை மையம் விடுத்துள்ள அறிக்கையில், “கடந்த 8-ம் தேதி, இரவு 9.00 மணிக்கு, தளபதி பரிதி தனது பல சகாக்களுடன் வெளிவரும் வேளையில், பருதியின் தினசரி நடமாட்டங்ககளை நன்கு தெரிந்துள்ள கொலையாளி, பரிதியை அவரது பல சகாக்கள் முன்னிலையில், தனது கைத் துப்பாக்கியால சுட்டுப் படுகொலை செய்துள்ளான்” என்று குறிப்பிடப்பட்டுள்ளது.

இது மிகவும் அபாயகரமான விவகாரம். அந்த அணியின் ஒரு தளபதி, அதுவும் கர்னல் அந்தஸ்து பெறும் அளவுக்கு ராணுவ அனுபவசாலி, அவரது பல சகாக்களுடன் வந்த வேளையில் கொல்லப்பட்டிருக்கிறார்! அந்த அணியை சேர்ந்த மற்றைய முக்கியஸ்தர்களில் எத்தனை பேர் பல சகாக்களுடன் எப்போதும் நடமாட முடியும்? பல சகாக்களுடன் நடமாடினாலும், இப்படியான சூழ்நிலையில் உயிர் தப்ப முடியுமா? பரிதியால் முடியவில்லையே!

அதே பிரான்ஸ் தமிழர் மனித உரிமை மையம் விடுத்துள்ள அறிக்கையில், “உருது மொழி பேசும் சிலர் பாரிஸில், முக்கியமாக லாச்சப்பல், காடினோட் கடைத் தெருக்களில் தமிழ் செயற்பாட்டாளர்களை பின் தொடருவதையும், கண்காணிப்பதையும் எம்மில் பலர் அவதானித்துள்ளோம்” என்றும் குறிப்பிடப்பட்டுள்ளது. 

இதிலிருந்து, சிலர் பின்தொடரப்படுகிறார்கள் என்பது உறுதியாகிறது. அதுவும் ஏற்கனவே ஒரு கொலை விழுந்துவிட்ட நிலையில், எதற்காக பின்தொடரப்படுகிறார்கள்? பின்தொடரும் ஆட்கள் கொலைகாரர்களா? தகவல் கொடுப்பவர்களா?

பின்தொடர்பவர் தமிழர் அல்லது சிங்களவர் என்றால், முகத்தை வைத்து அடையாளம் கண்டுகொள்ளலாம். ஆனால், உருது மொழி பேசும் நபர் என்றால், எத்தனை பேருக்கு அவர்களை அடையாளம் கண்டுகொள்ள முடியும்?

அதுவும் பாகிஸ்தானின் தாஃப்தான் முதல் மாண்ட் வரையிலான எல்லைப் பகுதி நகரங்களை சேர்ந்தவர்கள் என்றால், தோற்றத்தில் ஈரானியர்கள் போல இருப்பார்கள். பின்னால் வரும் ஆட்களில் யாரை சந்தேகப்படுவது?

“இந்த விவகாரங்களுக்கு, பாகிஸ்தான் புலனாய்வு பிரிவினர் உதவுவதாக நம்பப்படுகிறது” என்றும் தமிழர் மனித உரிமை மையம் விடுத்துள்ள அறிக்கையில் கூறப்பட்டுள்ளது. அது நிஜமானால், இது மகா பயங்கர விஷயம்.

பாகிஸ்தான் உளவுத்துறை ஐ.எஸ்.ஐ. அநேக வெளிநாடுகளில் மிக துல்லியமான உளவு நெட்வெர்க் வைத்திருக்கிறது. அவர்களது உளவாளிகள் ஒருபுறம் என்றால், மறுபுறம் அவர்களது லெஷ்கர்-இ-தொய்பா தொடர்பு. ஐ.எஸ்.ஐ.யின் அநேக நிழல் வேலைகளை முடித்துக் கொடுப்பவர்கள், லெஷ்கர்-இ-தொய்பா அமைப்பினர்தான். ஐரோப்பிய நாடுகள் மற்றும் கனடாவில் இவர்கள்தான், ஐ.எஸ்.ஐ. கைகாட்டும் ஆட்களை கணக்கு முடிப்பவர்கள்.

ஐ.எஸ்.ஐ.யின் மற்றொரு ‘கணக்கு முடித்துக் கொடுக்கும்’ இயக்கம், ஹக்கானி நெட்வெர்க். இவர்களது ஆட்களும் தற்போது வெளிநாட்டு ஆபரேஷன்களில் உள்ளார்கள்.

ஜலாலுதீன் ஹக்கானி, அவரது மகன் சிராஜூதீன் ஹக்கானி ஆகியோரின் வழிநடத்தலில் இயங்கும் தீவிரவாத அமைப்பு அது. பாகிஸ்தானிலும், ஆப்கானிலும் சி.ஐ.ஏ.வால் அடையாளம் கண்டுகொள்ளப்படும் ஹக்கானி நெட்வெர்க் தளபதிகள், ஐ.எஸ்.ஐ. உதவியுடன் ஐரோப்பாவுக்கும், கனடாவுக்கும் வந்து சேர்கிறார்கள். அதன்பின், ஐ.எஸ்.ஐ. கொடுக்கும் அசைன்மென்ட்களை செய்து முடிக்கிறார்கள்.

இப்போது புரிகிறதா நிலைமையின் பயங்கரம்?

விடுதலைப் புலிகள் இயக்கம் ஆயுதப் போராட்டம் நடத்திய இயக்கம். தற்போது ஒரு கொலை விழுந்துவிட்ட நிலையில் அந்த அமைப்பின் முக்கியஸ்தர்கள் வெளிநாடுகளில் ஆயுதங்களுடன் நடமாடுவார்கள் என்று ஊகிக்கலாம். தவிர, முக்கிய நபர்களுக்கு மெய்பாதுகாவலர் வசதிகளும் நிச்சயம் நெடியவன் குழுவால் ஏற்பாடு செய்து கொடுக்கப்பட்டிருக்கும்.

அத்துடன் தளபதிகள் உயிருக்கு பயந்து ஒதுங்கக்கூடிய ஆட்களுமல்ல. அச்சுறுத்தலை எதிர்கொண்டு களம் இறங்குவார்கள்.

ஆனால், வெளியே இயக்க வேலைகளில் ஈடுபடும் சிவில் செயற்பாட்டாளர்களுக்கு எவ்வகை பாதுகாப்பு ஏற்பாடுகள் செய்யப்பட்டுள்ளன என்று தெரியவில்லை. நிச்சயம் ஏதாவது ரகசிய பாதுகாப்பு ஏற்பாடுகள் நெடியவன் அணி தலைமையால் செய்யப்பட்டிருக்கும்.

(நன்றி: விறுவிறுப்பு)

இப்படி அவர்களே  கூறுகின்றார்கள்