எத்தனை போராட்டங்கள் நடத்தினாலும்

மன்மோகன் சிங்கும், சோனியாவும் பயப்படப் போவதேயில்லை.

'இலங்கையில் நடைபெறும், காமன்வெல்த் மாநாட்டில், நம் பிரதமர் மன்மோகன்சிங், கலந்து கொள்ளக் கூடாதாம். அவர் சார்பாக, அவரது, அலுவலக பியூன் கலந்து கொள்வது கூட, பெரிய பஞ்சமா பாதகமாம். அப்படி மன்மோகன் சிங் கலந்து கொண்டால், அவரது திருவடிகள், இலங்கை மண்ணில் பட்ட மாத்திரத்திலேயே, தமிழகத்தில், பெரிய பூகம்பம் நிகழும். அன்று, கண்ணகி, மதுரையை எரித்தது போல, இன்று, தமிழர்கள் எரித்து விடுவர் போலும்! ஏழு கோடித் தமிழக மக்களும், கொதித்துப் போயிருக்கின்றனராம்; அவர்கள், தம் மனைவி, குழந்தைகள், அம்மா, அப்பாவை விட, இலங்கையில் வாழும், தமிழர்களின் நிலையை எண்ணி எண்ணி, நொந்து நுாடுல்ஸ் ஆகியிருக்கின்றனராம்.இப்படியெல்லாம், கண்ணீர் கதைகள் சொல்லி, தமிழகத்திலிருக்கும், நம் மதிப்பு மிகு அரசியல் தலைவர்கள், முதலைக் கண்ணீர் வடித்து கொண்டிருக்கின்றனர்.

உண்மை நிலை என்ன தெரியுமோ...தீபாவளி கொண்டாட பணம் இல்லாமல், மனைவியின் அர்ச்சனையைக் கேட்டு கேட்டு நொந்து போயிருக்கும், கணவன்மார்கள் பல கோடி பேர். தமிழக அரசு நிர்ணயம் செய்த, 150 கோடி ரூபாய், டாஸ்மாக் விற்பனை இலக்கையும் தாண்டி, 154 கோடி ரூபாய்க்கு, குடித்து, இதை இன்னும் எப்படி அதிகரிக்கலாம் என்ற கவலையில் ஆழ்ந்திருக்கின்றனர், நம் பெருமை மிகு, 'குடிமகன்கள்!'அன்று, கச்சத்தீவை, மத்திய அரசு, இலங்கைக்கு தானம் பண்ணிய போது, மவுனம் காத்த கருணாநிதியை, தமிழக மக்கள், கொதித்து எழுந்து, நாடு கடத்திவிட்டனரா என்ன... இல்லையே!அப்போது தமிழர்களுக்கு வராத ரோஷமும், அவமானமும், இப்போது, காமன்வெல்த் மாநாட்டில், இந்தியப் பிரதமர் கலந்து கொள்ளும் போது மட்டும், வரப் போகிறதா என்ன!

தமிழகத்தில் வசிக்கும், இலங்கை அகதிகள், ஆனந்த வாழ்க்கையா வாழ்ந்து கொண்டிருக்கின்றனர்? அடிப்படைத் தேவைகள் சரிவர இன்றி, முழு சுதந்திரமின்றி, இலங்கைத் தமிழர்களை விட, மோசமான வாழ்க்கைத் தானே வாழ்கின்றனர்...பின் எதற்கு, இலங்கைத் தமிழர்களைப் பற்றி, 'பாசத்தோடு' பேசிக் கொண்டிருக்கின்றனர். எல்லாம், வாயில் வடை சுடுவது தானே...!பிழைப்புத் தேடி, அயல்நாடுகளில், கழிவறை கழுவும் வேலையே போதும் என்று, ஓடிக் கொண்டிருக்கும் போது, தமிழர்கள், இந்த அரசியல்வாதிகளின் கபட நாடகத்தை, எப்படி நம்புவர்? ஏழு கோடி மக்களும், பைத்தியமா என்ன...நம் தமிழக அரசியல்வாதிகள், எத்தனை போராட்டங்கள் நடத்தினாலும், மன்மோகன் சிங்கும், சோனியாவும் பயப்படப் போவதேயில்லை. தமிழர்கள் எல்லாம், வெண்ணெய் வெட்டி வீரர்கள் என, அவர்கள் நினைக்கின்றனரோ... யாமறியோம் பராபரமே!

என்.கந்தசாமி, மதுரை 

நன்றி : தினமலர்