யாழ். ஒஸ்மானியா கல்லூரியின் பொன்விழா

1959 ஆம் ஆண்டு மே மாதம் 3ம் திகதி டி. பி. ஜயா அவர்களால் ஒஸ்மானியா கல்லூரியின் அத்திவாரக்கல் நாட்டி ஆரம்பித்து வைத்தார்கள். அந்தக்காலத்தில் பெரிய தனவந்தரான வி. எம். எம். எஸ்.அப்துல் காதர் ஹாஜியார் அவர்கள் பணங்கொடுத்து உதவியது மட்டுமல்லாமல் இக்குழுவிற்கு தலைமை தாங்கினார். அவருடன் முன்னாள் யாழ் மாநகர மேயர், வழக்கறிஞர் குவாஸி, ஏ. எம் சுல்தான், கிராம விதானையார் எஸ். ஏ. றஸீன் ஆகியோரும் அயராது பாடுபட்டனர்.1963ஆம் ஆண்டு ஜனவரி மாதம் 5ம் திகதி யாழ். முஸ்லிம் சமூகத்திற்கு ஒரு நன்னாள். அந்த நாள் அன்றுதான் டாக்டர் அல்ஹாஜ் பதியுத்தீன் மஹ்மூத் அவர்கள் எமது கல்லூரியயை உத்தியோகபூர்வமாகத் திறந்துவைத்தார்.

அத்திறப்புவிழாவின் போது டாக்டர் அல்ஹாஜ் பதியுத்தீன் மஹ்மூத் அவர்கள் இஸ்லாத்தின் மூன்றாம் கலீபாவாகிய உஸ்மான் (ரலி) அவர்களை நினைவுபடுத்தி 'ஒஸ்மானியாக் கல்லூரி'என்ற நாமத்தை சூட்டினார்கள். அன்றிலிருந்து இன்றுவரை எமது கல்லூரி 'ஒஸ்மானியாக் கல்லூரி' என்ற பெயருடன் தலைநிமிர்ந்து நிற்கின்றது.

ஒஸ்மானியாக் கல்லூரி ஆரம்பிக்கப்பட்ட தும் முதன் முதலில் ஜனாப் சீ. எம். எ. ஜிப்ரி அவர்கள் அதிபர் பதவி வகித்தார் கள். அதிபர் உட்பட ஏழு ஆசிரியர்களும் நியமனம் பெற்றனர். திரு. ஆசாரியஸ் பெர்னாந்து, திரு. பொ. சிவஞானசுந்தரம், திரு. எஸ் ஸ்ரீ தர்மநாதன், ஜனாப் எம். யூ. ஏ. கை யூம், ஜனாப் எம். ஐ. எம்.சாபி, ஜனாப் எம். ஸீ. சலீம் ஆகியோர் ஆசிரி யர்களாக நியமனம் பெற்றனர். சில மாதங்கள் சென்றபின் கல்லூரிக் கீதமும் தயாராகிவிட்டது. கவித்துவபுலமைமிக்க ஆசிரியர் திரு. 'ஆசாரியஸ் பெர்னாந்து 'அவர்கள் கல்லூரி கீதத்தை இதமாக இயற்றிக் கொடுத்தார்கள். இந்தியாவின் தேசிய கீத மெட்டிற்கு அமைவாக 'வளர்கலை மாமதி யோடிளந் தாரகை வானக மேலொளி மல்க'என்று அமைக்கப்பட்டிருந்தது.

01-02-1964 முதல் ஜனாப் எம்.எம். யூ. ஸுப் அவர்கள் புதிய அதிபராக நியமனம் பெற்றார்கள். இவரின் பதவிக்காலத்தில் பல முக்கிய விடயங்கள் இடம்பெற்றன.

முதன் முதலாக இவரின் பதவிக்காலத்திலேயே பச்சையும் வெள்ளையும் கலந்த கல்லூரிக்கொடி அறிமுகம் செய்யப்பட்டது. அத்துடன் கல்லூரியின் இலச்சினையும் ஒ. எஸ். எம். ஏ. கபூர் ஆசிரியரால் வரைவாக்கம் செய்யப்பட்டது. எதிர்கால விளையாட்டு வளர்ச்சியைக் கருத்தில் கொண்டு இக்பால், ரபி, அலி ஆகிய இல்லங்கள் உருவாக்கப்பட்டன. அதன் பிற்பாடு கஸ்ஸாலி இல்லமும் இணைத்துக்கொள்ளப்பட்டது. 01-02-1967 முதல் ஜனாப் எம்.எம். அப்துல் குத்தூஸ் அவர்கள் அதிபர் பதவி வகித்தார்கள்.

30-06-1974இல் ஜனாப் ஏ. எச். ஹாமீம் அவர்கள் அதிபர் பதவியை ஏற்றார்கள்.

03-04-1980ல் ஜனாப் எம். ஏ. ஆர். ஏ. றஹீம் அதிபர் பதவியேற்றார். 30-06-1982ல் மீண்டும் ஜனாப் ஏ. எச். ஹாமீம் அவர்கள் அதிபர் பதவியேற்று கல்லூரியின் வளர்ச்சியில் பெரும் பங்கு வகித்தார்.1990 முதல் 2003ஆம் ஆண்டுவரை நாட்டின் அசாதாரண நிலைமை காரணமாக ஓஸ்மானியாக் கல்லூரி மூடப்பட்டிருந்தது. இது கவலைக்குரிய விடயமாகும்.

22-09-2003ஆம் ஆண்டில் எம்.எஸ்.ஏ.எம். முபாரக் மௌலவி அவர்கள் அதிபர் பதவி யேற்றார்கள்ஓஸ்மானியா கல்லூரியானது பொன் விழா காணும் இச் சந்தர்ப்பத்தில் அதிபர் எம்.எஸ்.ஏ.எம். முபாரக்கின் ஆலோசனையின் பேரிலும் யாழ் மாநகர சபை பிரதிமேயர் சட்டத்தரணி எம்.எம். ரமீஸின் முயற்சியாலும் யாழ் முஸ்லிம் வட்டாரத்தில் சரித்திரத்தில் முதன் முதலாக விடியலாக பெண்களுக்கான அரபுக் கல்லூரியான அல்-ஹம்திய்யா மகளிர் அரபிக் கல்லூரி'' கடந்த 25-10-2013 அன்று ஆரம்பித்து வைக்கப்பட்டுள்ளது என்பதனையும் இச் சந்தர்ப்பத்தில் குறிப்பிடுவது பொருத்தமாகும். யாழ் ஒஸ்மானியா கல்லூரியில் கல்வி பயிலும் மாணவிகளுக்கு மாலை நேர வகுப்பும், ஏணையவர்களுக்கு பகல் நேர வகுப்பும் நடைபெறுகிறது.

யாழ் ஒஸ்மானியா கல்லூரியின் பொன் விழா நிகழ்வு அடுத்த மாத முற்பகுதியில் நடைபெறவுள்ளது. இவ்விழாவானது மூன்று நாட்களுக்கு நடைபெறவுள்ளது. மாணவர்களின் கலை நிகழ்ச்சி, கல்விக் கண்காட்சி,பொன்விழா மலர் வெளியீடு, கௌரவிப்பு நிகழ்வு, பழைய மாணவர்களுக்கான விளையாட்டுப் போட்டி என்பன ஏற்பாடு செய்யப்பட்டுள்ளது. அத்துடன் புத்தளம், நீர்கொழும்பு, பாணந்துறை, கொழும்பு ஆகிய இடங்களில் வசிக்கும் பழைய மாணவர்களும் வரவழைக்கப் படவுள்ளனர். கல்விக் கண்காட்சியின் ஓர் அங்கமாக யாழ். முஸ்லிம்களின் ஆரம்பகால வரலாறு, மூதாதையர்களின் புகைப்படங்கள், சரித்திர குறிப்புகள், கல்வெட்டுக்கள் போன்றவை காட்சிப்படுத்தப்படவுள்ளன.

பொன்விழா காணும் எமது ஒஸ்மானி யாக் கல்லூரி மென்மேலும் வளர்ந்து முஸ்லிம் சமுதாயத்தில் தலைசிறந்த கல்லூரியாகத் திகழ்ந்து வைரவிழா, நூற்றாண்டு விழா போன்ற பல விழாக்களைக் கொண்டாட வேண்டும் என்று மனதார வாழ்த்துகிறோம்.

எப். எம். இக்பால்

யாழ்ப்பாணம்