நீரிழிவு அலட்சியப்படுத்தும் வியாதியல்ல

உலகளாவிய ரீதியில் தொற்றா நோய்கள் மிகவும் வேகமாக அதிகரித்துக்கொண்டிருக்கின்றன. வருடாந்தம் பல மில்லியன் பேர் இந்நோய்களால் மரணமடைகின்றனர். தொற்றா நோய்களில் ஒன்றான நீரிழிவு நோயானது இன்று பாரிய பிரச்சினையாக உருவெடுத்துள்ளது. இருதய நோய், புற்று நோய் போன்றவைக்கு அடுத்ததாக ஆபத்தான மூன்றாவது நோயாகவுள்ளது. உலகளாவிய ரீதியில் 170 மில்லியன் பேர் இந்நோயால் பீடிக்கப்பட்டுள்ளனர். முன்பு நாற்பது வயதிற்கு மேற்பட்டவர்களையே தாக்கிய இந்நோய் தற்போது பத்து வயது சிறார்களைக் கூடத் தாக்க ஆரம்பித்துள்ளது. நீரிழிவு நோய் என்பது ஒரு நோயே அல்ல. கணையச் சுரப்பி ஒழுங்காகச் செயற்பட்டுப் போதிய அளவு இன்சுலினை சுரக்காமை, சுரக்கப்பட்ட இன்சுலினை உடல் ஏற்று முறையாக இரத்தத்திலுள்ள சீனியை எரித்துச் சக்தியாக மாற்றாமை காரணமாக இரத்தத்தில் சீனியின் அளவு அதிகரிக்கும் நிலையே நீரிழிவு எனப்படுகிறது.

இலங்கை சனத்தொகையின் பத்துப் பேரில் ஒருவர் இந்நோயால் பீடிக்கப்பட்டுள்ளார். சுமார் 50 சதவீதமான நீரிழிவு நோயாளர்கள் இந்நோய் ஏற்பட்டு முற்றிய நிலையிலேயே தம்மிடம் நோய் இருப்பது பற்றித் தெரிய வருகின்றனர். எவ்வித அறிகுறிகளுமின்றி மெதுவாகத் தாக்கும் இந்நோயை மெளனமான கொலையாளி என்று அழைக்கின்றனர். 10 சதவீதமான நீரிழிவு நோயாளிகள் கிராமப்புறங்களிலும் 15 சதவீதமானோர் நகரப்புறங்களிலும் காணப்படுகின்றனர். இந்நோய் தடுக்கக்கூடியதொன்றாகும். ஆரம்ப கட்ட எச்சரிக்கை அறிகுறிகள் தென்பட்ட உடனேயே உரிய சிகிச்சை அளித்தால் நோய் ஏற்படாது தடுக்க முடியும்.

ஒரு இயந்திரம் இயங்கத் தேவைப்படும் சக்தி எரிபொருள் மூலம் பெறப்படுகிறது. மனித இயந்திரம் இயங்க சக்தி உணவு மற்றும் காற்று மூலம் கிடைக்கிறது.

நாம் உட்கொள்ளும் உணவு முக்கியமாக மாச்சத்து சமிபாடு அடைந்து கடைசியாக சீனியாக மாற்றம் பெறுகிறது. கனையச் சுரப்பியால் சுரக்கப்படும் இன்சுலின் என்ற ஹோர்மோன் இச்சீனியை எரித்துச் சக்தியாக மாற்ற உதவுகிறது. சீனி எரிக்கப்படாமல் இரத்தத்தில் தேங்கி விடும் நிலையே நீரிழிவு என்பதாகும். இன்சுலின் சீனி கலன்களைச் சென்றடையவும் இரத்தத்தில் சீனியின் அளவைச் சரியான அளவில் வைத்திருக்கவும் உதவுகிறது.

அதிக அளவு சீனியை வைத்திருக்க சிறுநீரகத்தால் முடியாததால், சீனி வடிகட்டப்பட்டுச் சிறுநீர் மூலம் வெளியேற்றப்படுகிறது.

சீனியிலிருந்து சக்தியைப் பெற முடியாத நிலையில் உடல் சேமிப்பிலுள்ள கொழுப்பிலிருந்து சக்தியைப் பெற முயற்சிக்கும். இவ்வாறு செய்யும் போது உடலுக்குத் தீங்கிழைக்கும் அசிடோன் போன்ற வாயுக்கள் உருவாகின்றன. இவை அதிகரிக்கும் போதுதான் மயக்க நிலை ஏற்படுகிறது.

பல்வேறு காரணங்களால் சீனி எரிக்கப்படாத போது, அது இரத்தத்தில் தேங்கி நிற்கும். இவ்வாறு நீண்டகாலம் தேங்கியிருந்தால் உடலிலுள்ள பெரும்பாலான உறுப்புகள் பாதிக்கப்பட்டு பல நோய்கள் ஏற்படுகின்றன.

இரத்தக் குழாய்கள் தடிப்பது காரணமாக இரத்தோட்டத்தில் தடை ஏற்பட்டு இருதய நோய், பக்கவாதம் போன்ற நோய்கள் ஏற்படுகின்றன. சிறுநீரகம் மற்றும் கண்களிலுள்ள மிகவும் மெல்லிய இரத்தக் குழாய்கள் பாதிக்கப்படுவதால் முறையே சிறுநீரகச் செயலிழப்பு, கண்பார்வை இழப்பு ஏற்படுகின்றன.

நரம்புகள் பாதிக்கப்படுவதால் கண்பார்வை நரம்பு பாதிப்பு, ஆண்மைக் குறைபாடு, கை, கால்களை இழுத்தல் போன்றவை ஏற்படுகின்றன. இதனால் நீரிழிவு நோய்க்கும் அதன் காரணமாக ஏற்படும் பல்வேறு நோய்களுக்கும் சிகிச்சை அளிக்க அரசினால் கோடிக்கணக்கான ரூபா பணம் செலவிடப்படுகிறது.

இது ஒரு தொற்று நோயல்ல. இந்நோயை ஏற்படுத்தும் துல்லியமான காரணி என்னவென்று மருத்துவத் துறையால் இன்னும் கண்டுபிடிக்கப்படவில்லை. எனினும் மரபுவழி வயது, மன அழுத்தம், அதிகரித்த உடற் பருமன், அதிகரித்த எடை, உடற் பயிற்சியின்மை, சன நெரிசல் நிறைந்த சூழலில் வாழ்தல், நகர வாழ்க்கை, வைரஸ் கிருமி தொற்று, அதிக அல்லது குறைவான உறக்கம், பயம், மித மிஞ்சிய தாம்பத்ய உறவு, பரபரப்பு, அதிக இனிப்பு, இளம் வயதில் ஆரோக்கியமற்ற துரித உணவுகளை அதிகம் உட்கொள்ளல், அதிகரித்த கொலொஸ்ரோல், புகைத்தல், அதிக மதுபாவனை, உயர் இரத்த அழுத்தம், கட்டுப்பாடற்ற வாழ்க்கை முறை, வேலைச்சுமை, சொகுசு வாழ்க்கை போன்றவை நீரிழிவு நோய் ஏற்படுத்தலை ஊக்குவிக்கும். இவற்றில் ஏதாவது மூன்று நீரிழிவு நோயை ஏற்படுத்தும்.

குடும்பத்தில் யாருக்காவது நீரிழிவு நோய் ஏற்பட்டால் குடும்பத்திலுள்ள ஏனையோரும் பாதிக்கப்படும் அபாயம் உள்ளது. தகப்பன் அல்லது தாய்க்கு மட்டும் இந்நோய் இருந்தால் பிள்ளைகளுக்கு நீரிழிவு நோய் ஏற்படும் அபாயம் சற்றுக் குறைவு. இருவருக்குமிருந்தால் இந்நோய் ஏற்படும் அபாயம் மிக மிக அதிகம்.

நீரிழிவு நோயை ஏற்படுத்தும் முக்கிய காரணிகளில் முதுமையும் ஒன்றாகும். வயது போகப் போக இந்நோயின் தாக்கம் அதிகரிக்கும்.

80 சதவீதமான நீரிழிவு நோயாளர்கள் 45 வயதிற்கு மேற்பட்டவர்கள். முதுமையின் போது உடலின் உள் உறுப்புகளின் செயல்பாடு மந்த கதியில் நடைபெறல், உடல் உழைப்பின்மை சூரிய ஒளிபடாமை போன்றவை காரணமாக உடற்பருமன் அதிகரிக்கும். அதிகரித்த உடற்பருமனால் கணையச் சுரப்பியின் செயல்பாடு பாதிக்கப்படுகிறது. இதனால் இன்சுலின் சுரப்பது தடைப்பட்டு நீரிழிவு நோய் ஏற்படுகிறது.

உணர்ச்சி வசப்படுதல் மனவெழுச்சியால் ஏற்படும் மன அழுத்தம் போன்றவை கூட நீரிழிவு நோயை ஏற்படுத்தும் காரணிகளாகும். மன அழுத்தம் நிறைந்த வாழ்க்கை முறை கணையச் சுரப்பியைப் பாதிப்பதால் போதிய அளவு இன்சுலின் சுரக்கப்படாததால் நீரிழிவு நோய் ஏற்படுகிறது. பரபரப்பு, கடுந்துயர், மன உளைச்சல், கவலை போன்றவை இரத்தத்தில் சீனியின் அளவை அதிகரித்து நீரிழிவு நோயை ஏற்படுத்தும்.

நீரிழிவு நோயை ஏற்படுத்தும் முதன்மைக் காரணிகளுள் உணவு முறையும் ஒன்றாகும். உடல் சீராக இயங்கத் தேவையான சக்தியைக் கொடுக்க சரியான அளவு நிறை உணவு மிகவும் அவசியம். ஆரோக்கியமற்ற உணவு அல்லது போதிய உணவின்மை இந்நோயை ஏற்படுத்தும். மாச்சத்து, புரதம், கொழுப்பு, இனிப்பு அடங்கிய உணவுகளை அதிகமாக உட்கொண்டால் கணையச் சுரப்பியால் இன்சுலின் சுரக்கப்படுவது தடைப்படும். இதனால் இந்நோய் ஏற்படும். துரித உணவு கழிக்கப்பட்ட உணவு, பாண், கேக், சொக்கலேட், விஸ்கோத்து, ஐஸ்கிரீம் போன்றவற்றை அதிகமாகவும் நார்ச்சத்துள்ள உணவைக் குறைவாகவும் உட்கொண்டால் நீரிழிவு நோய் ஏற்படும் அபாயம் மிக அதிகம்.

அதிகரித்த உடற்பருமனும் நீரிழிவு நோயை ஏற்படுத்தும் ஒரு காரணியாகும். அதிகரித்த உடல் எடை உடலில் அதிகளவு கொழுப்புச் சேர உதவுகிறது. இது இன்சுலினின் செயல்திறனைப் பாதிக்கும். அதிகரித்த கொழுப்பு இன்சுலின் சீனியை எரித்துச் சக்தியை ஏற்படுத்தும் திறனைத் தடுக்கும். இதனால் நீரிழிவு நோய் ஏற்படுகிறது.

நீரிழிவு நோயை ஏற்படுத்தும் மற்றுமொரு காரணி போதிய உடற் பயிற்சியின்மையாகும். உடல் உழைப்பற்ற வாழ்க்கை முறை நீண்ட நேரம் தொலைக்காட்சிப் பெட்டி மற்றும் கணனி முன் உட்கார்ந்து இருத்தல், தொடர்ந்து உட்கார்ந்து இருந்து கொண்டு தொழில் புரிதல் போன்றவை அதிகரித்த உடற்பருமனை ஏற்படுத்தும். இது நீரிழிவு நோய் ஏற்பட வழிவகுக்கும்.

வைரஸ் கிருமிகளின் தொற்றினாலும் சிலருக்கு நீரிழிவு நோய் ஏற்படுகிறது எனச் சமீபத்தில் கண்டு பிடிக்கப்பட்டுள்ளது. வைரஸ் கிருமிகள் கணையச் சுரப்பியில் தொற்றை ஏற்படுத்தி அதனினுள் உள்ள இன்சுலினைச் சுரக்கும் பீட்டா கலன்களை அழித்து விடுகின்றன. இதனால் இன்சுலின் சுரப்பது பாதிக்கப்பட்டு இரத்தத்தில் சீனியின் அளவு அதிகரித்து நீரிழிவு நோய் ஏற்படுகிறது. கர்ப்பம், சில வீரியமிக்க மருந்துகள், கணையச் சுரப்பியில் ஏற்படும் நோய்கள் போன்றவையும் நீரிழிவு நோயை ஏற்படுத்தும் அரிதான காரணிகளாகும்.

40 வயதிற்கு மேற்பட்ட அனைவரும் இரத்தப் பரிசோதனை மூலம் சீனியின் அளவை அறிந்து கொண்டால் ஆரம்பகட்ட நீரிழிவை உணவு மற்றும் உடற் பயிற்சி யோகா மூலம் குணப்படுத்தி ஊர்ஜிதம் செய்யப்பட்ட நீரிழிவு ஏற்படாது பாதுகாத்துக்கொள்ள முடியும்.

இரத்தத்தில் மற்றும் சிறு நீரகத்தில் சீனியின் அளவு அதிகரித்துக் காணப்படும் போது அடிக்கடி சிறுநீர் கழித்தல்,

அதிக பசி, தாகம், கண் வலி, கண்பார்வை மங்குதல், ஜனநேந்திர உறுப்புகளில் அரிப்பு, பலவீனம், சோர்வு, வியர்வை, இதயப்படபடப்பு, உடல் எடை குறைதல் போன்ற நீரிழிவு நோயின் முக்கிய ஆரம்ப அறிகுறிகள் தென்படும். எனினும், நோய் முற்றிய நிலையில் தலைவலி, குமட்டல், வாந்தி, கண் நோய்கள், நடுக்கம், தலைச் சுற்று, தடுமாற்றம் போன்ற அறிகுறிகள் தென்படும்.

மிகவும் முற்றிய நிலையில் மயக்க நிலை ஏற்படும் அபாயமும் உண்டு.