ஒரு மனிதன் இறந்துவிடுதல் என்பது அவனின் உறவினர் அயலவர் என்று, பலருக்கும் துன்பகரமான ஒரு சம்பவமாகும். ஆனால், எத்தனை மனிதர்கள் இறந்தாலும் ஒருவனுக்கு மட்டும் கவலைபேற்படாது மாறாக மகிழ்ச்சியே ஏற்படும். ஏனென்றால் அவன் ஒரு சவப்பெட்டி கடைக்காரன். மனிதர்களது மரணம் அதிகரித்தால் அவனுக்கோ நல்ல வியாபாரம். தமிழ் தேசியக் கூட்டமைப்பின் அரசியலும் கிட்டத்தட்ட ஒரு சவப்பெட்டிக்கு கடைக்கு ஒப்பானதுதான். அண்மையில் கொஸ்லாந்தை மீரியபெத்த மண் சரிவினால் பலர் இறக்க நேர்ந்தது. எங்காவது எவராவது சாகமாட்டார்களா என்று எதிர்பார்த்துக் கொண்டிருந்த கூட்டமைப்பினரே, இதுதான் சந்தர்ப்பமென்று, மண்சரிவினால் இறந்தவர்களை தங்களின் அரசியலுக்காக பயன்படுத்திக் கொண்டனர். மண்சரிவு இடம்பெற்றதைத் தொடர்ந்து. அப்பகுதிக்கு விஜயம் செய்த கூட்டமைப்பின் வடக்கு மாகாண முதமைச்சர் விக்னேஸ்வரன், பேரனர்த்தம் ஏற்பட்டு துயரம் நிலவிவரும் இந்த தருணத்திலும், மகிழ்ச்சியடையக் கூடிய ஒரு விடயமாக வடக்கு மலையக மக்களுக்கிடையிலான உறவு வலுப்பெற்றுள்ளதை குறிப்பிட முடியுமென்று தெரிவித்திருக்கின்றார்.

அதாவது மண்சரிவினால் மக்கள் இறந்ததால்தான் வடக்கு மலையக மக்களுக்கிடையில் உறவு வலுவடைந்திருக்கிறது. மலையக வடக்கு உறவு மேலும் வலுவடைய வேண்டுமாயின் இன்னும் அதிகமான மலைய மக்கள் சாக வேண்டும். இதுதான் நான் குறிப்பிட்ட சவப்பெட்டிக் கடை அரசியல். மேலும் அங்கு கருத்துத் தெரிவித்திருந்த விக்னேஸ்வரன், வாக்கு சேகரிக்க சென்றிருந்த அரசியல்வாதிகள் சுயநலத்தை மட்டும் கருத்தில்கொள்ளாது, மக்களின் நலனினும் அக்கறை கொண்டிந்தால், உயிர் பலிகளை தடுத்திருக்கலாமென்று மலையக அரசியல் தலைவர்களுக்கு ஆலோசனை வழங்கியிருக்கிறார்கள்.
இதனை வடக்கிலிருந்து சென்றிருந்த விக்னேஸ்வரன் கூறியிருப்பதுதான் இதிலுள்ள வேடிக்கையாகும். புலிகளால் முன்னெடுக்கப்பட்ட அழிவுகரமான யுத்தத்தை நியாயப்படுத்தி பேசிவரும் விக்னேஸ்வரன், உயிர்பலி குறித்து மலையக அரசியல் வாதிகளுக்கு வகுப்பெடுத்திருப்பதை என்னவென்பது? மேலும் அங்கு விக்னேஸ்வரன் அனைவரும் மூக்கில் விரல்வைக்குமளவிற்கும் ஒரு அறிவித்தலை செய்திருக்கின்றார்.

அதாவது, கொஸ்லாந்தை மீரியபெத்தவில் பாதிக்கப்பட்ட மக்களுக்காக அனைத்து வழிகளிலும் உதவிகளை வழங்குவதற்கு வடக்கு மாகாணசபை தயராக உள்ளதாகவும், பெற்றோரை இழந்து தவிக்கும் பிள்ளைகளின் கல்வி மேற்பாட்டிற்காக உதவவும் தயராக இருப்பதாகவும் தெரிவித்திருக்கின்றார். அவ்வாறான பிள்ளைகளை தத்தெடுத்து பராமரிக்க தான் விரும்புவதாகவும் அறிவித்திருக்கின்றார்.

பின்னர் இது பற்றி கருத்துத் தெரிவித்திருக்கும் வடக்கு மாகாண சபையின் அவைத்தலைவர் சி.வி.கே சிவஞானம் பெற்றோரை இழந்திருக்கும் 75 பிள்ளைகளையும் புலம்பெயர் தமிழ் சமூகம் பொறுப்பெடுக்க தயாராக இருப்பதாக அறிவித்திருக்கின்றார். யுத்தம் நிறைவடைந்து 5 வருடங்கள் முடிவடைந்துவிட்ட போதும், இன்றுவரை வடக்கு மக்களின் நன்மைக்காக புலம்பெயர் சமூகம் எந்தவொரு உருப்படியான உதவியையும் செய்ய முன்வரவில்லை. இப்படியானவர்களா மலையக மக்களுக்கு உதவப் போகின்றனர்?

கூட்டமைப்பினர் இவ்வாறு திடீரென்று மலையக மக்களின்பால் கரிசனை காட்டுவதற்கு பின்னால் பிறிதொரு காரணமும் உண்டு. அண்மையில் கூட்டமைப்பின் தலைவர்கள் இந்திய பிரதமர் நரேந்திர மோடியை சந்தித்திருந்தமை உங்களுக்கு நினைவிருக்கலாம். இந்த சந்திப்பின் போது மோடி, ஏனைய சிறுபான்மை மக்களுடன் நீங்கள் நல்லுறவை பேண வேண்டும். அப்போதுதான் அனைவரும் ஒன்றிணைந்து ஒரு தீர்வை காண முடியும் என்றவாறு ஆலோசனை கூறியிருந்தார்.

இதன் பின்னர்தான் கூட்டமைப்பின் தலைவர்கள் முஸ்லிம் மற்றும் மலையக மக்களுடன் நாங்கள் இணைந்து பணியாற்ற வேண்டும் என்றவாறான பிரச்சாரங்களை செய்யத் தொடங்கினர். இந்த பின்னணியில் தான் மண்சரிவினால் மலையக மக்கள் இறந்தபோது, அதனை நல்லதொரு வாய்ப்பாக பயன்படுத்திக் கொண்டனர்.

இது உண்மையில் மலையக மக்களின் மீதான கரிசனையல்ல, தங்களின் எதிர்ப்பு அரசியலுக்காக மலையக அப்பாவி மக்களை பயன்படுத்திக் கொள்வதற்கான ஒரு திட்டம். இதனை இன்னொரு வகையில் சொல்வதனால் 60 ஆண்டுகளாக எதிர்பரசியல் பேசி தமிழ் மக்களை நாசமாக்கியது போன்று மலையக மக்களையும் நாசமாகுமாறு கூட்டமைப்பினர் கூறுகின்றனர்.
(தினகரன்)

அமைதி சமாதானம் ஜனநாயகம்

www.sooddram.com