குடாநாட்டின் குளங்களை புனரமைத்தலின் முக்கியத்துவம்

யாழ்ப்பாணம் அரியாலையில் நடைபெற்ற ஏர்பூட்டு விழா பற்றிச் சில தினங்களுக்கு முன் குறிப்பிட்டிருந்தோம். வானம் பார்த்த பூமியான யாழ்ப்பாண வயல்களில் வருடத்துக்கு ஒரு தடவையே நெல் செய்கை பண்ணப்படுவது வழக்கம். கடந்த பல வருடங்களாக அங்கு நெற் செய்கை பெருமளவில் பாதிக்கப்பட்டிருந்தது. புலிகளின் செல்வாக்கு மிகுந்திருந்த பல வருடங்களாக யாழ்ப்பாணக் குடாநாட்டு நெற் செய்கையில் பெரிய வீழ்ச்சி ஏற்பட்டது. புலிகளின் தோல்விக்குப் பின் அங்கு நிலைமை துரிதமாக முன்னேற்றத்தை நோக்கி மாற்றமடைகின்றது.

இவ்வருடம் யாழ்ப்பாணக் குடாநாட்டில் 11000 ஹெக்டயரில் பெரும்போக நெற் செய்கை மேற்கொள்ளப்படவிருப்பதாக உத்தியோகபூர்வ அறிக்கைகளிலிருந்து அறிய முடிகின்றது. பெரும்போக நெற் செய்கையின் மூலம் யாழ்ப்பாணக் குடாநாட்டில் 30,000 மெற்றிக் தொன் நெல் அறுவடை செய்யக் கூடியதாக இருக்குமென அதிகாரிகள் கூறுகின்றனர். மிக நீண்ட காலத்துக்குப் பின் யாழ்ப்பாணக் குடாநாட்டில் இவ்வளவு கூடுதலான பரப்பளவில் நெல் செய்கை பண்ணக் கூடிய வகையிலான ஏற்பாடுகளைச் செய்த பெருமை அமைச்சர் பசில் ராஜபக்ஷவின் தலைமையில் செயற்படுகின்ற ‘வட மாகாண மீன்குடியேற்றம் மற்றும் அபிவிருத்திக்கான ஜனாதிபதி செயலணி’யையே சாரும்.

குடாநாட்டில் நெற் செய்கையை மேலும் அதிகரிப்பதற்கும் ஏனைய விவசாய முயற்சிகளின் வளர்ச்சிக்கும் இச் செயலணி செய்ய வேண்டிய மேலும் சில பணிகள் உள்ளன. குடாநாட்டில் நெற் செய்கை மழையை நம்பியதாக இருப்பது போல ஏனைய விவசாய முயற்சிகள் நிலக்கீழ் நீரை நம்பி இருக்கின்றன. குடாநாட்டில் ஒவ்வொரு கிராமத்திலும் வயல்களை அண்டிச் சிறு குளங்கள் உள்ளன. இவை நெற் செய்கைக்கு நீர் பாய்ச்சுவனவல்ல. நெல் வளர்ச்சிக்குத் தேவையான அளவிலும் பார்க்க மேலதிகமான நீரைத் தேக்கி வைப்பனவே இவை. இக் குளங்களில் சேரும் நீரின் மூலம் நிலக்கீழ் நீர் வளம் குறையாது பேணப்பட்டு வந்தது.

இப்போது பல கிராமியக் குளங்கள் தூர்ந்து போனதால் நிலக்கீழ் நீர் வளம் குறைந்து வருவதாக ஆய்வாளர்கள் எச்சரிக்கின்றனர். நிலக்கீழ் நீர் மட்டம் குறைந்து செல்வதால் பல பிரதேசங்கள் இப்போது உவர் நீர்ப் பிரதேசங்களாக மாறும் ஆபத்தை எதிர்நோக்குகின்றன. உவர் நீரில் விவசாயம் செய்ய முடியாதென்பதால் குடாநாட்டு விவசாய முயற்சி பெருமளவில் பாதிப்புக்கு உள்ளாக நேரிடும்.

தூர்ந்து போயிருக்கும் குளங்களைப் புனரமைத்து மழை நீரைத் தேக்குவதன் மூலம், குடாநாட்டின் நிலக்கீழ் நீர் வளம் குறைந்து செல்வதைத் தவிர்த்து, விவசாய முயற்சிக்குக் கைகொடுக்க முடியும்.

குளங்கள் தூர்ந்து போயிருக்கும் இடங்களில் வயல்களும் ஏறக்குறையக் கைவிடப்பட்ட நிலையிலேயே உள்ளன. குளங்களைப் புனரமைக்கும் பட்சத்தில் அந்த வயல்களிலும் நெற் செய்கையை மேற்கொள்ள முடியும். வட மாகாண மீள் குடியேற்றம் மற்றும் அபிவிருத்திக்கான ஜனாதிபதி செயலணி இவ்விடயத்தில் கவனம் செலுத்துமென நம்புகின்றோம்.

(தினகரன்)

மிக அருமையான கட்டுரை. நான் அடிக்கடி பலருடனும் பேசும் விடயம். குழங்களைத் தூர் எடுத்து நிலத்தடி நீரை தேக்க வைத்திருப்பதில் இக்குழங்கள் பெரிதும் உதவும். எனவே குழங்களைத் தூர் எடுத்தல் அரசாங்கத்தினாலும் ஏன் கிராமங்களின் சுய புனருத்தாரண விடயங்களிலும் முன்னுரிமை கொடுத்து செயற்பட வேண்டிய விடயம் ஆகும். தினகரன் ஆசிரியர் குழுவிற்கு இவ்விடயத்தை ஆசிரியர் தலையங்கமாக வரைந்தமைக்காக வாழ்த்துக்கள். - சாகரன்