வடக்கு அபிவிருத்தியில் அரசின் அக்கறை

கிராமங்கள் ஓரங்கட்டப்படுவதே இலங்கை அபி விருத்தியின் நீண்ட கால வரலாறு. மஹிந்த ராஜ பக்ஷ ஜனாதிபதியாகப் பதவியேற்கும் வரை அபிவிருத்திச் செயற்பாடுகள் மேல் மாகாணத்துக்குள்ளும் வேறு சில குறிப்பிட்ட மாகாணங்களுக்குமுள்ளேயே மட்டுப்படுத்தப்பட்டிருந்தன. சில மாகாணங்கள் முற்றாகப் புறக்கணிக்கப்பட்ட நிலையே நிலவியது. புறக்கணிக்கப் பட்டிருந்த மாகாணங்களையும் அபிவிருத்திச் செயற் திட்டத்துக்குள் கொண்டுவந்து அபிவிருத்தி நடவடிக் கையைப் பரவலாக்கியவர் இன்றைய ஜனாதிபதி மஹிந்த ராஜபக்ஷ.

அபிவிருத்தியில் புறக்கணிக்கப்பட்டிருந்த மாகாணங்களுள் வட மாகாணமும் ஒன்று. முன்னர் ஆட்சியிலிருந்த அரசாங்கங்களும் வட மாகாண மக்களைப் பிரதிநிதித்துவப்படுத்திய அரசியல் தலைவர்களும் இம்மாகாணம் அபிவிருத்தியில் புறக்கணிக்கப்பட்டதற்குச் சம அளவில் பொறுப்பேற்க வேண்டும். அரசியல்வாதிகள் அரசாங்கத்திடம் அபிவிருத்திக் கோரிக்கைகளை முன்வைக்க வில்லை. வடபகுதி அபிவிருத்தியில் அரசாங்கமும் தானாக அக்கறை கொள்ளவில்லை.

இன்றைய அரசாங்கம் எல்லா மாகாணங்களினதும் அபி விருத்தியில் அக்கறை செலுத்துகின்ற அதே நேரம் வட மாகாண அபிவிருத்தியில் கூடுதலான கவனம் செலுத்து கின்றது. அபிவிருத்தியைப் பொறுத்த வரையில் வட மாகாணம் மிகவும் பின்தங்கியிருப்பதே அரசாங்கத்தின் விசேட கவனத்துக்கான காரணம்.

வட மாகாணத்தின் 500 கிராமங்கள் 200 கோடி ரூபா செலவில் அபிவிருத்தி செய்யப்படவுள்ளன. இதற்காக வட மாகாணத்தின் ஒவ்வொரு மாவட்டத்திலிருந்தும் 100 கிராமங்கள் தெரிவு செய்யப்பட்டுள்ளன. இக் கிரா மங்களிலுள்ள காணிகள் சுத்திகரிக்கப்படுவதுடன் வீதிகள், குளங்கள், சமூக நிலையங்கள், மருந்தகம், நூலகம் போன் றவை இந்த அபிவிருத்தித் திட்டத்துக்குள் அடங்கு கின்றன. தேவைப்படும் கிராமங்களுக்கு மின்சார வசதியும் செய்து கொடுக்கப்படும்.

வீதிகள், மின்சாரம், நூலகம் போன்ற உட்கட்டமைப்பு வசதி கள் ஒரு கிராமத்துக்கு அத்தியாவசியமானவையே. அதே போல, கிராமிய வளங்களை அடிப்படையாகக் கொண்ட தொழில் முயற்சியிலும் கவனம் செலுத்துவது கிராமத்தி லுள்ள மக்களின் பொருளாதார மேம்பாட்டுக்குப் பெரிதும் உதவும். வட பகுதியின் பெரும்பாலான கிராமங்கள் தொழில் வளர்ச்சிக்குள் பயன்படுத்தக் கூடிய இயற்கை வளங்களைக் கொண்டுள்ளன. இந்த வளங்களைப் பயன்படுத்தும் தொழில் நிலையங்களை அமைப்பதிலும் அரசாங்கம் கூடுதலான கவனம் செலுத்த வேண்டும்.

தமிழ் மக்களின் நலனில் அரசாங்கம் அக்கறை செலுத்துவதில்லை என்று காலங்காலமாகப் பிரசாரம் செய்து வருகின்ற தலைவர்கள் இந்த அபிவிருத்தி நடவடிக்கை களின் பக்கம் திரும்பிப் பார்ப்பது நல்லது. தமிழ் மக்களின் நலன் இனப் பிரச்சினையின் தீர்வுடன் மாத் திரம் சம்பந்தப்பட்டிருக்கவில்லை.

பிரதேச அபிவிருத் தியும் பொருளாதாரமும் மக்களின் நலன் சார்ந்த விடயங்களே. இவற்றில் இதுவரை அக்கறை இல்லாதி ருந்த தலைவர்கள் இனிமேலாவது தங்கள் கவனத்தை அபிவிருத்தியையும் பொருளாதாரத்தையும் நோக்கித் திருப்புவார்களென நம்புகின்றோம்.

அரசாங்கம் மேற்கொள்ளும் அபிவிருத்தி நடவடிக்கை களுக்கு வட மாகாண அரசியல் தலைவர்கள் முழுமையான ஒத்துழைப்பு நல்குவது அப் பிரதேச மக்களின் நலனுக்குச் செய்யும் பங்களிப்பாக இருக்கும். இனப் பிரச்சினைக்கான அரசியல் தீர்வும் பிரதேச அபிவிருத்தியும் ஒன்றுக்காக மற்றதைப் பின்தள்ள முடியாதவை.