இனப் பிரச்சினையின் தீர்வுக்கு ஒத்துழைப்பு அணுகுமுறை

தமிழ் பேசும் மக்கள் முகங்கொடுக்கும் பிரச்சினை களுள் இனப் பிரச்சினைக்கு அரசியல் தீர்வு காண்பதும் மீள் குடியேற்றமும் முக்கியமானவை. மீள்குடியேற்றம் பிந்திய பிரச்சினை. புலிகள் இயக்கத்துக்கு எதிராகப் படையினர் மேற்கொண்ட இராணுவ நடவடிக்கையின் விளைவாக இடம்பெயர்ந்தவர்களும் பாரம்பரிய வாழ்புலங்களிலிருந்து புலிகளால் வெளியேற்றப்பட்ட வடமாகாண முஸ்லிம்களும் அவர்களது சொந்த இடங்களில் மீளக் குடியமர்த்தப்பட வேண்டியவர்களாக உள்ளனர்.

இனப் பிரச்சினை மிகவும் பழைமையானது. நாடு சுதந் திரமடைந்த காலத்திலிருந்து இனப்பிரச்சினைக்குத் தீர்வு காண்பதற்கான முயற்சி முன்னெடுக்கப்படுகின்ற போதிலும் எவ்வித முன்னேற்றமும் ஏற்படவில்லை. கடந்த காலங்களில் மேற்கொள்ளப்பட்ட தீர்வு முயற்சிகளிலிருந்து பாடம் கற்றுக்கொண்டு அரசியல் தீர்வுக் கான சரியான அணுகுமுறையைப் பின்பற்ற வேண்டியவர்களாக நாம் உள்ளோம்.

இனப்பிரச்சினைக்கான தீர்வு முயற்சியைப் பொறுத்தவரையில், இரண்டு விதமான அணுகுமுறைகள் கடந்த காலங்களில் பின்பற்றப்பட்டன. பதவியிலுள்ள அரசாங்கத்தை முழுமையாக எதிர்க்கும் அணுகுமுறை ஒன்று. அரசாங்கத்துடன் சங்கமித்துப் போகும் அணுகுமுறை மற்றையது. ஸ்ரீலங்கா சுதந்திரக் கட்சியின் தலைமையிலான அரசாங்க காலங்களில் தமிழ்த் தலைவர்கள் முழுமையான எதிர்ப்பு நிலைப்பாட்டையே எடுத்தனர். ஐக்கிய தேசியக் கட்சி அரசாங்கத்தில் பங்காளிகளாகத் தமிழ்க் கட்சிகள் செயற்பட்ட காலத்தைச் சரணாகதி அரசியலுக்கு உதாரணமாகக் கூறலாம்.

மாவட்ட சபை வழங்குவதென்ற உறுதிமொழியின் அடிப்படையில் தமிழரசுக் கட்சி ஐக்கிய தேசியக் கட்சி அரசாங்கத்தில் இணைந்தது. மாவட்ட சபை வழங்குவது சாத்தியமில்லை என்று ஐக்கிய தேசியக் கட்சித் தலைமை கூறிய பின்னரும் தமிழரசுக் கட்சி அந்த அரசாங்கத்தில் தொடர்ந்து அங்கம் வகித்தது.

இவ்விரு அணுகுமுறைகளும் இனப் பிரச்சினைக்குத் தீர்வு காண்பதற்குப் பொருத்தமானவையல்ல என்பதை அனுபவத்தில் அறிந்துள்ளோம். ஒத்துழைப்பு அணுகுமுறையின் மூலமே இனப் பிரச்சினைக்கான தீர்வை நடைமுறைக்குக் கொண்டுவர முடியும். ஒத்துழைப்பு அணுகுமுறையும் இணக்க அணுகுமுறையும் வெவ் வேறானவை. அரசாங்கத்தின் சகல செயற்பாடுகளுட னும் இணங்கிப் போவது இணக்க அணுகுமுறை. பிரச்சினையின் தீர்வுக்காக அரசாங்கத்துடன் ஒத்துழைப்பது ஒத்துழைப்பு அணுகுமுறை.

ஒத்துழைப்பு அணுகுமுறை மூலம் இனப் பிரச்சினைக்குத் தீர்வு காண்பதற்குத் தமிழ்த் தேசியக் கூட்டமைப்பு முன்வந்திருக்கின்றது என்ற செய்தி நம்பிக்கையூட்டுவதாக உள்ளது. இனப் பிரச்சினையின் தீர்வுக்காகவும் மீள்குடியேற்றத்துக்காகவும் அரசாங்கம் குழுக்களை நியமித்திருக்கின்றது என்றும் அக் குழுக்களுடன் ஒத்துழைத்துச் செயற்படுவதற்காகத் தமிழ்த் தேசியக் கூட்டமைப்பும் குழுக்களை நியமித்திருக்கின்றது என்றும் பாராளுமன்ற உறுப்பினர் மாவை சேனாதிராசா அண்மையில் கூட்டமொன்றில் உரையாற்றும் போது கூறினார்.

இன்றைய யதார்த்தத்துக்கு அமைவான ஒருதீர்வை உட னடியாக நடைமுறைக்குக் கொண்டு வருவதற்குத் தமிழ்த் தேசியக் கூட்டமைப்பு ஒத்துழைப்பு நல்கும் என்றும் மீள்குடியேற்ற விடயத்தில் வடமாகாண முஸ்லிம்களின் மீள்குடியேற்றமும் கவனத்தில் கொள்ளப்படும் என்றும் நம்புகின்றோம்.

(தினகரன்)