அமரர் தொண்டமானின் 11வது சிரார்த்த தினம் இன்று

காலத்தின் தேவையை உணர்ந்து செயற்பட்ட உன்னத தலைவர்

(கே. மாரிமுத்து)

அமரர் செளமியமூர்த்தி தொண்டமானின் 11 வது சிரார்த்த தினம் இன்றா கும். மலையக மக்களின் மாபெரும் சொத்தாகவும், மலையக அரசியல் தொழிற்சங்க சிருஷ்டி கர்த்தாவாகவும் அமரர் செளமியமூர்த்தி தொண்டமான் திகழ்ந்தார் என்று கூறுவது மிகை யாகாது. கடமை, கண்ணியம், அர்ப்பணிப்பு, வேகம், விவேகம் ஆகிய அம்சங்களின் வரைவிலக் கணமாகவும் சாணக்கியத் தலை வராகவும், தன்னை வரலாற்றில் பதிய வைத்துக்கொண்டவராவார். கீழ் மட்டத்திலிருந்து உயர் மட்டம் வரையிலும் இலங்கை யிலிருந்து சர்வதேசம் வரையி லுமான மக்களினதும், அரசியல் பெருந்தகைகளினதும் நன்மதிப்பையும் பெற்றிருந்தார்.

இந்த உன்னத தலைவரின் சிரார்த்த தினத்தை நினைவு கூரும் நாம் அவர் மக்களுக்கு ஆற்றிய சேவைகளையும், பணிகளையும் எண்ணிப் பார்க்கக் கடமைப்பட்டுள்ளோம். இலங்கை தொழிலாளர் காங்கிரஸ் ஸ்தாபகத் தலைவராக விளங்கிய அமரர் செளமியமூர்த்தி தொண்டமான், மலையக வரலாற்றில் சுமார் ஐம்பது வருடங்களுக்கு மேலாக தோட்டத் தொழிலாளர்களின் நல்வாழ்வுக்கும், அவர்களை தினமும் அலைக்கழித்து வந்த பிரச்சினைகளின் விடிவுக்கும், உறுதியான சேவை யாற்றியதன் நிமித்தமே மலையகம் இன்று ஏனைய இன மக்களோடு சரிசமமாக போட்டியிடும் அளவுக்கு உயர்ந்து காணப்படுகின்றது. தோட்டத் தொழிலாளர்களை ஓரம் கட்டிய பிரஜாவுரிமை வாக்குரிமைச் சட்டங்களையும் மற்றும் கைத்தொழில் பிணக்கு, சமூக, பொருளாதார பிரச்சினைகளையும், தீர்க்க தரிசனத்தோடும், சாணக்கியத்தோடும், அணுகி அவ்வவ்போது தீர்வுகளையும் பெற்றுக்கொடுத்தவர் அவரே.

கம்பளை அன்ரூஸ் கல்லூரியில் தனது கல்வியை முடித்துக்கொண்டு வெளியேறியவுடன் தனக்குள் உதித்த எண்ணத்தின் விளைவாக மலையக மக்களுக்கு சேவை செய்வதை தனது இலட்சியமாக ஏற்படுத்திக் கொண்டு அச்சேவையினை 1939ம் ஆண்டில் இலங்கை- இந்தியன் காங்கிரஸ் மூலமாக மக்களுக்கு பல்வேறு வகையில் சென்றடையும் வகையில் விஸ்தரிக்கத் தொடங்கினார்.

இவரது வேகமான, விவேகமான சேவை காரணமாக இலங்கை- இந்திய காங்கிரஸின் கம்பளை மாநாட்டில் வரவேற்புக்குத் தலைவராக தெரிவு செய்யப்பட்டார். 1947ஆம் ஆண்டு இலங்கை பாராளுமன்றத்திலே அமரர் தொண்டமானுக்கு பிரவேசம் கிடைத்தது. மலையக மக்கள் சார்பாக தானே தலைமைதாங்கி 7 பிரதிநிதிகளை பாராளுமன்றத்திற்கு அழைத்துச் சென்ற பெருமை அவரைச் சார்ந்ததாகும். அன்றிருந்த அரசாங்கம் தோட்ட தொழிலாளர்களின் பிரஜாவுரி மையையும், வாக்குரிமையையும் பறித்தமைக்கு எதிர்ப்புத் தெரிவித்து 1952ஆம் ஆண்டில் 7 பாராளுமன்ற உறுப்பினர்களுடன் சத்தியாக்கிரக போராட்டத்தை ஆரம்பித்தார். மூன்று மாதம் வரையும் சுழற்சி முறையிலான உண்ணாவிரதப் போராட்டத்தை நடத்தி அதில் வெற்றிகண்டார்.

இ. தொ. காவின் செயற்பாடுகள் 70 வருடங்களுக்கும் மேலாக முன்னெடுக்கப்பட்டு இன்றுவரையும் மக்களை சென்றடைந்த வண்ணமே உள்ளன. ஆசிய நாட்டிலே மிகப் பெரிய தொழிற்சங்கமாக இ. தொ. கா. வை வளர்த்தெடுத்த பெருமை அமரர் தொண்டமானையே சாரும். சர்வதேச தொழில் ஸ்தாபனம், சர்வதேச தொழிலாளர் சம்மேளனம் ஆகியன இ. தொ. காவை அங்கீகரித்தது இங்கு குறிப்பிடத்தக்கது.

எல்லாவற்றுக்கும் மேலாக மலையக தொழிற்சங்கங்களுக்கு மூலாதாரம் அமரர் தொண்டமான் என்றால் மிகையாகாது. காலத்தின் தேவையை உணர்ந்து செயற்படும் வல்லமையும் பேரம் பேசும் தன்மையும் இவரிடம் நிறையவே காணப்பட்டன. அகிம்சை முறையில் மிகச் சாதுரியமாகவும், பிரச்சினைகளை அணுகுவதில் வல்லவர் என்று பல அரசியல்வாதிகளால் போற்றப்பட்டுள்ளார்.

மலையக மக்களுக்கு இழைத்த அநீதிகள், பறிக்கப்பட்ட உரிமைகள் தொடர்பாக நடத்தப்பட்ட பல போராட்டங்கள் இவரது காலத்தில் வெற்றிகண்டமை இவரின் அணுகுமுறைக்கும் விவேகத்திற்கும் சான்றாக அமைகின்றன.

அமரர் தொண்டமான் பல தொழிற் சங்கப் போராட்டங்களை நடாத்தியிருந்தார். இதனில் மலையகத்திலேயே முதலாவது வரலாறு கண்ட போராட்டமான உருளை வள்ளிப் போராட்டத்தை நினைவு கூரலாம். இதுபோன்ற முல்லோயா, கந்தஹேன, ஹைபோரஸ்ட், வனராஜா, கலாபொக்க, சென் ஜேம்ஸ், மொன்டிக்கிறிஸ்டோ, கடியன்சேன, சென் கிளயர் இவைகள் அனைத்துமே தொழிலாளர்கள் உரிமைகளைப் பெறுவதற்காகவே நடத்தப்பட்ட போராட்டங்களாகும்.

அன்னாரின் தொழிற்சங்க நடவடிக்கைகளும் அரசியலும் பின்னிப் பிணைந்து இருந்ததினாலேயே இலங்கை தொழிலாளர் காங்கிரஸ் ஒரு மாபெரும் அரசியல் சக்தியாக மாறியது. இதன் பயனாய் இவர் அமைச்சராகவும், தொழிற்சங்கத் தலைவராகவும், நீண்டகாலம் சேவை செய்ய முடிந்தது. இவரின் விடாமுயற்சியினாலேயே ‘நாடற்றவர்களுக்கு பிரஜாவுரிமை வழங்கும் விசேட சட்டம் 1988 நவம்பர் 9ம் திகதி பாராளுமன்றத்தில் நிறைவேற்றப்பட்டது. நாற்பது வருடங்களாக ‘நாடற்றவர்’ களாக கருதப்பட்ட தோட்டத் தொழி லாளர்களும் ஏனைய இந்திய வம்சாவளியினரும் இந்த நாட்டின் பிரஜைகளானார்கள்.

இவர் ஈட்டிய மற்றொரு சாதனை தான் 1989ம் ஆண்டு ஏப்ரல் 26ந் திகதி பாராளுமன்றத்தில் நிறைவேற்றப்பட்ட ‘வாக்குரிமையை வழங்குவதற்கான திருத்தச் சட்டம்’. இந்த சட்ட மூலத்தினால் புதிதாக பிரஜாவுரிமை பெற்ற இந்திய வம்சாவளியினரை வாக்காளர்களாக பதிவு செய்ய வாய்ப்பு ஏற்பட்டது.

இதன் பயனாக இன்று இந்திய வம்சாவளி மக்கள் பாராளுமன் றத்திற்கும், மாகாண சபைகளுக்கும் – பிரதேச சபைகளுக்கும் ஏனைய உள்ளூராட்சி சபைகளுக்கும் பிரதிநிதிகளை தேர்ந்து எடுக்க வழி பிறந்தது. இன்று நாமும் இந்த நாட்டின் பிரசையாக ஏனைய சமூகத்தவர்கள் போல் அரசியல், பொருளாதார, சமூக, கல்வி போன்ற துறைகளில் பங்குகொள்ளவும் பங்களிப்பைச் செய்யவும் முடிகிறது.

அன்னார் தோட்டப்புற மாணவர் களின் கல்வியில் மிக அக்கறை காட்டியதாலேயே தோட்டப் பாடசா லைகளை அரசாங்கம் பொறுப்பேற்க நேர்ந்தது. சிறிபால் கல்வியியல் கல்லூரியில் தோட்டத் தொழிலாளர்கள் பிள்ளைகளுக்கு 75% வீதம் இட ஒதுக்கீடு கிடைத்தது. இந்த காலப் பகுதியில் அமரர் செளமியமூர்த்தி தொண்டமான் அவர்களின் கிராமிய கைத்தொழில் உல்லாசத்துறை அமைச்சின் சிரேஷ்ட உதவிச் செயலாளராக நான் பணி புரிந்ததை இவ்வேளையில் நினைவு கூருவதில் மிக மகிழ்ச்சி அடைகின்றேன்.

அன்னாரைத் தொடர்ந்து அவரது பேரனாகும் இ. தொ. கா பொதுச் செயலாளரும், கால்நடை கிராமிய அபிவிருத்தி அமைச்சருமான கெளரவ ஆறுமுகன் தொண்டமான் பா. உ அவர்களின் சேவையும், தலைமைத் துவமும், தொழிற்சங்க ரீதியாகவும, அரசியல் ரீதியாகவும், தோட்டப்புற மக்களுக்கும், இந்திய வம்சாவளி மக்களுக்கும் கிடைத்திருப்பது மகிழ்ச்சிக்குரிய அம்சமாகும்.

அன்னார் அரசியலில் ஈடுபட்டு கட்சிகளோடு பேரம் பேசி, அதன் வாயிலாக மலையக மக்களுக்கு வரப்பிரசாதங்களைப் பெற்றுக் கொடுக்கும் யுக்தியை கையாண் டுள்ளார். பதவியில் இருந்த அரசை தக்க வைக்கும் அல்லது அசைய வைக்கும் வல்லமையை கொண் டிருந்தார். மலையகத் தலைவர் களுக்கு ஒரு சிறந்த வழிகாட்டியாக விளங்கிய அமரர் தொண்டமானை இந்நாளில் கெளரவமாக நினைவு கூர்வோம்.