பெற்றோர் வாழும் இடம் முதியோர் இல்லமெனில் பிள்ளைகளையே சேரும் அதற்கான பாவம்!

(செல்லையா துரையப்பா )

உலகளாவிய ரீதியில் சனத்தொகை துரிதமாக அதிகரித்துக் கொண்டிருக்கிறது. மருத்துவத்துறை முன்னேற்றம் காரணமாக மனிதரின் சராசரி ஆயுட் காலம் கூடிக் கொண்டு போவதே இதற்கு முக்கிய காரணமாகும். ஐம்பது ஆண்டுகளுக்கு முன்பு ஐம்பது வருடங்களாகவிருந்த சராசரி ஆயுட் காலம் தற்போது அறுபதாக அதிகரித்துள்ளது. எதிர்வரும் இரண்டு சகாப்த காலத்தில் ஆயுட் காலம் 70, 80 ஆக அதிகரிக்கும் என எதிர்வு கூறப்பட்டுள்ளது. இதனால் முதியோரின் எண்ணிக்கையும் அதிகரித்துக் கொண்டிருக்கிறது. நாட்டில் சனத்தொகை அதிகரிக்கும் போது வாழ்வாதார, பொருளாதார, உணவு, அறிவு, சுகாதாரம் உள்ளிட்ட பல பிரச்சினைகளை எதிர்கொள்ள வேண்டிய நிலை ஏற்படுகிறது. பல்வேறு புதிய வகை நோய்களும், சமூக மாற்றமும் ஏற்படுகின்றன. இந்த மாதம் (ஒக்டோபர் 2011) ஏழு பில்லியனாக உயர்ந்துள்ள உலக சனத் தொகை 2025 ஆம் ஆண்டு எட்டு பில்லியனாக உயரும் என எதிர்பார்க்கப்படுகிறது.

ஆசியாவில் ஆயுட் காலம் அதிகமுள்ள நாடாக இலங்கை அடையாளம் காணப்பட்டுள்ளது. இங்கு சனத்தொகையும் வேகமாக அதிகரித்துக் கொண்டிருக்கிறது. 2020 ஆம் ஆண்டளவில் இலங்கை சனத் தொகையில் அறுபது சதவீதமானோர் அறுபது வயதைக் கடந்த வயோதிப நிலையை அடைவர் என எதிர்பார்க்கப்படுகிறது. இவ்வாறு வயோதிபத்தை எட்டும் மக்களைப் பராமரிப்பதற்கான ஒழுங்குகள் மேற்கொள்ளாமை கவலைக்குரிய விடயமாகும்.

மிகுந்த கஷ்டத்தின் மத்தியில் பிள்ளைகளைப் பெற்று, வளர்த்து, சிறந்த கல்வி புகட்டி, திருமணம் செய்து வைத்து பல்வேறு வசதிகளை ஏற்படுத்திக் கொடுத்துப் பல தியாகங்களைச் செய்த பெற்றோரை நன்றி கெட்ட சில பிள்ளைகள் வயோதிபத்தில் கவனிக்காது விடுவது பரிதாபகரமானதும் மிருகத்தனமானதுமான செயலாகும்.

ஐம்பது ஆண்டுகளுக்கு முன்பு இருந்த எமது கலாசாரம், பண்பாடு, விழுமியங்கள் எல்லாம் தற்போது கைவிடப்பட்ட நிலையில் உள்ளன. முன்பிருந்த கூட்டுக் குடும்ப முறை மாறி தற்போது பிள்ளைகள் திருமணம் ஆன உடனேயே பெற்றோரைத் தனிமையில் தவிக்க விட்டு விட்டுத் தனிக் குடித்தனம் நடாத்துகின்றனர்.

வேறு சிலர் தம் வீடுகளுக்குச் சம்பளம் பெறாத காவல்காரர் போன்று பெற்றோரை இருத்தி விட்டு மேலை நாடுகளில் சொகுசு வாழ்க்கை வாழும் போது பெற்றோர் பிள்ளைகளைப் பிரிந்த துயரில் வாடுகின்றனர். பிள்ளைகளின் பாசத்திற்காக ஏங்கி தம் அந்திம காலத்தைத் துயருடன் கழிக்கின்றனர்.

மேலும் சிலர் பெரும் பணம் செலுத்தி சகல வசதிகளையும் கொண்ட வயோதிபர் மனைகளில் பெற்றோரைச் சேர்த்து விட்டுத் தம் கடமை முடிந்துவிட்டது என நினைக்கின்றனர். அங்கே வயோதிப பெற்றோருக்குத் தேவைப்படுவது சொகுசு வாழ்க்கையல்ல. தம் பிள்ளைகளின் பாசம், அன்பு, ஆதரவு போன்றவையாகும்.

பிள்ளைகளின் பாசத்திற்காக ஏங்கும் இவர்கள் பல்வேறு மன நோய்களால் பீடிக்கப்பட்டு மிக விரைவில் அங்கேயே உயிரை விடுகின்றனர். இவர்கள் பிள்ளைகளுடன் வாழ்ந்திருந்தால் மேலும் பல ஆண்டுகள் சந்தோசமாக உயிர்வாழ்ந்திருப் பார்கள். இவ்வாறு செய்வோர் தம் வயோதிப காலத்தில் இதேநிலை ஏற்படும் என்பதை மறந்துவிடுகின்றனர்.

மேலை நாடுகளில் வயோதிபர்கள் வளமாக வாழ்கின்றனர். அரசாங்கம் மற்றும் அரச சார்பற்ற நிறுவனங்களால் முதியோருக்கு காப்புறுதி, ஓய்வூதியம், வசிப்பிடம், இலவச மருத்துவம் போன்ற பல்வேறு வசதிகள் செய்து கொடுக்கப்பட்டுள்ளன.

ஆண்டுக்கு ஒருமுறை அனுஷ்டிக்கப்படும் தகப்பன் தினம்  (Fathers' Day)  தாயார் தினம் (Mothers' Day)  போன்ற தினமன்று மலர்ச் செண்டு ஏந்தியவாறு தம் பெற்றோர் வதியும் முதியோர் இல்லங்களுக்குச் சென்று சில மணித்தியாலங்களை அவர்களுடன் கழிப்பர். மீண்டும் அடுத்த வருடமே அங்கு தலை காட்டுவர். இக் கலாசாரம் எமது நாட்டிலும் பரவும் அபாயம் காணப்படுகிறது.

பிள்ளைகள் மற்றும் உற்றார், உறவினர்களால் கைவிடப்பட்ட சில வயோதிபர்கள் நடைபாதைகளையும் பாதை ஓரங்களையும் வசிப்பிடமாகக் கொண்டு வயிற்றுப் பசியைப் போக்க கையேந்திப் பிச்சை எடுக்கின்றனர். கடும் வெயிலிலும் மழையிலும் பனியிலும் அலைந்து திரிவதால் விரைவில் நோய்வாய்ப்பட்டு மடிந்து விடுகின்றனர்.

இவ்வாறு முதுமையில் ஏற்படும் இன்னல்கள் பற்றிய விழிப்புணர்வை மக்களிடையே ஏற்படுத்தும் முகமாகவும், அவர்களின் உரிமைகளைப் பாதுகாக்கும் முகமாகவும் ஆண்டு தோறும் ஒக்டோபர் மாதம் முதலாம் திகதி உலக முதியோர் தினமாக அனுஷ்டிக்கப்பட்டு பல்வேறு செயல் திட்டங்கள் நடைமுறைப்படுத்தப்படுகின்றன.

முதியோரின் உரிமைகளைப் பாதுகாக்க இலங்கையில் 2000 ஆம் ஆண்டு இயற்றப்பட்ட 9 ஆம் இலக்கச் சட்டத்தில் முதியோருக்குச் சாதகமான அனுகூலங்கள் பல உள்ளடக்கப்பட்டுள்ளன. பிள்ளைகள் வேண்டுமென்றே தம் வயோதிப பெற்றோரைப் பராமரிக்காது கைவிடல் தண்டனைக்குரிய குற்றமாகும்.

பெற்றோரை நன்கு பராமரித்து அவர்களுக்குத் தேவையான சகல வசதிகளையும் ஏற்படுத்திக் கொடுக்க இச் சட்டத்தில் வலியுறுத்தப்பட்டுள்ளது. பிள்ளைகளால் கைவிடப்பட்டோர், பராமரிக்க பிள்ளைகள் இல்லாதோர் போன்ற பராமரிக்க எவருமில்லாத முதியோரை அரசாங்கம் வதிவிட வசதிகள் ஏற்படுத்திக் கொடுத்துப் பராமரிக்கவும் இச் சட்டத்தில் கூறப்பட்டுள்ளது. எனினும், சம்பந்தப்பட்டோரால் இச் சட்டம் முழுமையாக அமுல்படுத்தப்படாமை கவலைக்குரிய விடயமாகும்.

ன்றைய இளைஞர் நாளை முதியோராவர். இவர்களின் முதுமையில் இவ்வாறான பரிதாபகரமான நிலை ஏற்படாமல் தவிர்க்க வாலிபர்கள் இப்போதே ஆயத்தங்களை மேற்கொள்ள வேண்டியது மிகவும் அவசியமாகும். வயோதிப காலத்தில் உடல், உள ஆரோக்கியமும் கைநிறையப் பணமுமிருந்தால் எவரிலும் தங்கியிருக்க வேண்டிய நிலை ஏற்படாது.

பிள்ளைகள் மற்றும் உற்றார், உறவினர்கள் கூடக் கைவிட மாட்டார்கள். எனவே, வாலிபத்தில் கை நிறைய உழைக்கும் போது எல்லாவற்றையும் பிள்ளைகளுக்காகவும், ஆடம்பரமான வாழ்க்கைக்காகவும் செலவிடாமல் ஒருசில தொகையாவது சிரமமாகச் சேமிக்க வேண்டும். வங்கி நிலையான வைப்புகள் மற்றும் காப்புறுதி பத்திரங்களில் முதலீடு செய்தல் அந்திம காலத்தில் பேருதவி செய்யும்.

மது, புகைத்தல், போதைவஸ்து பாவனை, நீண்ட நேர தொலைக்காட்சி மற்றும் கணினி காரணமாக உடலுளைப்பு குன்றல், ஆரோக்கிய மற்ற உணவுப் பழக்கம், போதிய உறக்கமின்மை, ஓய்வின்மை கெட்ட நடவடிக்கைகள் என்பவற்றில் ஈடுபடும் வாலிபர்கள் முதுமையில் ஏற்படும் பல்வேறு நோய்களுக்கு முதலீடு செய்கிறார்கள் என்பதை அறிவதில்லை.

சிலர் வாலிபத்திலேயே தலைமுடி நரைத்து, முடி உதிர்ந்து, கண்பார்வை குன்றி, முகத்தில் சுருக்கம் ஏற்பட்டு, முதுகு கூனி முதுமைத் தோற்றத்தைப் பெறுகின்றனர். இதனால் இவர்கள் மன உளைச்சலுக்கு ஆளாகிறார்கள். சகல உடல், உள நோய்களுக்கும் மனம் தான் காரணமாகும்.

மன உளைச்சல் காரணமாகத்தான் பல்வேறு உடல், உள (Psychosomatic Diseases) தாக்கம் ஆரம்பிக்கின்றன. பணம் படைத்தோர் முதுமை யைப் பின்போடப் பெரும் பணம் செலவழித்து வீரிய மிக்க வைட்டமின்கள் மற்றும் விசேடமாகத் தயாரிக்கப்பட்ட விளையுயர்ந்த மருந்துகளை வாங்கி உட் கொள்கின்றனர்.

எவ்விதப் பண விரயமுமின்றி எளிதில் முதுமையைப் பின்போட எளிய யோகா உதவும். 5000 ஆண்டுகளுக்கு முன்பே யோக சித்தர்கள் முதுமையைப் பின் போடும் வழிமுறைகளைக் கண்டு பிடித்து எமக்குத் தந்துள்ளனர். ஆரோக்கியமான உணவுடன் கூடிய சிரமமான யோகா பயிற்சி முதுமையைப் பின் போட்டு என்றும் இளமையுடனும் ஆரோக்கியத்துடனும் நீண்ட நாள் வளமாக வாழ பேருதவி செய்யும்.