4 1/2 தசாப்த காலத்துக்குப் பின்னர் கட்டுநாயக்க அதி நவீன பாதை

இலங்கையின் வர்த்தக நகரமான கொழும்புக்கும் பண்டாரநாயக்க விமான நிலையத்துக்கும் இடையே இலகு பயணத்தைக் குறைந்த நேரத்தில் மேற்கொள்ளக் கூடிய கடுகதிப் பாதையொன்றை அமைக்க வேண்டும் என்ற கனவும் எதிர்பார்ப்பும் நீண்டகாலமாக இருந்து வந்த ஒன்று. திடமற்ற அரசியல் போக்கும் வளக்குறைபாடுகளும் பாதை அமைப்பைப் பிற்போட வைத்தன. பாதை அமைப்புக்குத் தேவையான காணிகளை எடுக்கும்போது பாதிக்கப்படும் தனியாருடைய எதிர்பார்ப்புக்களும் பொருளாதார ரீதியான சிக்கல்களும் சூழல் சார்ந்த காரணிகளும் கூட பாதை அமைப்புக்குத் தடையாக அமைந்தன. எனினும் 45 ஆண்டுகளின் பின்னர் இலங்கையரின் கனவு நனவாகியுள்ளது. கொழும்பு பண்டாரநாயக்க விமான நிலையத்தை இணைக்கும் நவீன பாதை அமைக்கப்பட்டு விட்டது.

1968இல் இப்பாதைக்கான செயல்திட்டம் உருவாக்கப்பட்டது. நீண்ட கால தொடர் முயற்சியின் பயனாக எதிர்வரும் ஒக்டோபர் 27ஆம் திகதி இப்பாதையின் மங்களகரமான திறப்பு வைபவம் நடைபெற இருக்கின்றது. கொழும்பிலிருந்து கட்டுநாயக்கவை 20 நிமிடத்தில் அடையச் செய்ய இலகுவான நவீன பாதையாக இது அமைந்துள்ளது. இலங்கை அரசு அமைத்துள்ள இரண்டாவது கடுகதிப் பாதை இதுவாகும். அடுத்த மாதம் இலங்கையில் நடைபெறவுள்ள பொதுநலவாய மாநாட்டுக்கு வரும் உலகத் தலைவர்களை வரவேற்று குறுகிய நேரத்தில் கொழும்புக்கு அழைத்துவர இப்பாதை பெரிதும் பயன்படும் என எதிர்பார்க்கப்படுகின்றது.

இலங்கையின் அண்மைக்கால அபிவிருத்திப் பணிகளில் ஒன்றான சாலை அமைப்பில் இப்பாதை இன்னும் ஒரு மைல்கள். இலங்கையின் அண்மைக்கால அபிவிருத்திப் பயணிகளில் ஒன்றான சாலை அமைப்பில் இப்பாதை முக்கிய இடம் பெறுவதுடன் சர்வதேச உறவுகளை வலுப்படுத்தவும் இப்பாதை அமைப்புப் பயன்படுகின்றது. ஜனாதிபதி மஹிந்த ராஜபக்ஷவின் துணிச்சலும் சவால்களை மேற்கொள்ளும் திறமையும் காரணமாகவே இப்பாதை அமைப்பு வெற்றியளித்துள்ளது என்றும் நாட்டின் தலைவரும் சாலைகள் அமைப்புக்கு பொறுப்பான அமைச்சராகவும் இருக்கும் ஜனாதிபதியின் ஒப்பற்ற சாதனை இதுவாகும். நாட்டின் இன்றியமையாத தேவைகளுக்கு கடுகதிப் பாதையை உருவாக்குவதற்கான சூழலை உருவாக்கியவரும் துரிதமாக செயல்திட்டத்தை அமுல்படுத்த ஊக்குவித்தவரும் ஜனாதிபதி அவர்களே எனத் துறைமுக சாலை அமைக்கும் பணிக்குப் பொறுப்பான அமைச்சருமான நிர்மலா கொத்தலாவல தெரிவித்தார்.

கடுகதிப்பாதை அமைப்புக்கான யோசனைகள் 1968இல் முன்வைக்கப்பட்ட பின் பல்வேறு முட்டுக் கட்டைகளுக்கும் சவால்களுக்கும் முகம் கொடுக்கப்பட்ட நிலையைப் பதிவுகள் காட்டி நிற்கின்றன. சட்ட அடிப்படையிலான முட்டுக் கட்டைகளும் சூழல் பாதிப்பு மற்றும் மக்கள் இடப்பெயர்வு தொடர்பான எதிர்ப்புக்கள் எனப்பல சவால்கள் உருவாகின. இருந்தபோதும் எண்ணியதைச் செய்து முடிக்கும் சிறப்பாற்றல் மிக்க ஜனாதிபதியின் திட்டமிட்ட செயற்பாடுகள் சவால்களை முறியடிக்கவும் செயல்திட்டத்தை அமுல்படுத்தவும் பயன்பட்டு ஆக்கம் பெற்றன. ஆரம்பத்திலே களனி ஆற்று மண்ணைப் பயன்படுத்தத் தீர்மானிக்கப்பட்ட போதும் இறுதியிலே கடலில் பெறப்பட்ட மணலே பயன்படுத்தப்பட்டது. இலங்கை அரசின் வேண்டு கோளுக்கமைய 1968, 1982களில் ஜப்பான் பூர்வாங்க வேலைத்திட்ட அறிக்கையை உருவாக்கியது. ஜப்பானிய முகவர்நிலையம் ஒன்று இதை மேற்கொண்டது. முகவர் நிலையத்தின் அறிக்கை 1984இல் வெளியானதுடன் கொழும்புக்கும் நீர்கொழும்புக்கும் கிழக்கில் இப்பாதையை அமைக்க அந்த முகவர் நிலையம் விதந்துரைத்தது.

இருந்தபோதும் சாலை அபிவிருத்தி அதிகாரசபை மேற்குறிப்பிட்ட செயல்திட்டத்தை மாற்றி கொழும்பு - பண்டாரநாயக்க சர்வதேச விமான நிலையப் போக்குவரத்தை நீர்கொழும்பு ஏ3 வீதியூடாக அமைக்க 1981-1991களில் கருமமாற்றியது. ரணசிங்க பிரேமதாஸ ஜனாதிபதியாக இருந்த வேளையில் கொழும்புத் துறைமுகத்தையும் சர்வதேச விமான நிலையத்தையும் இணைக்கும் செயல்திட்டத்தை நகர அபிவிருத்தித் திட்டமாக முன்னெடுக்கத் தீர்மானிக்கப்பட்டது. அதற்கமைய 1991 மே 3ஆம் திகதி நகர அபிவிருத்தி அதிகாரசபைக்கும் ஜப்பானிய பாலம் அமைக்கும் முகவர் நிலையத்துக்கும் இடையில் ஒப்பந்தம் கைச்சாத்திடப்பட்டது. முன்னைய பூர்வாங்க அறிக்கையையும் சூழல் சார்ந்த தடைகளையும் கருத்தில் கொண்டு ஒப்பந்தம் செய்யப்பட்டது. எனினும் இது நடைமுறைக்கு வரவில்லை.

இறுதியாக 1995இல் ஆகஸ்ட் மாதம் கொழும்பு - சர்வதேச விமான நிலையத்துக்கிடையிலான கடுகதிப் பயணத்துக்குரிய தனியான பாதை அமைப்பு இலங்கை அமைச்சரவையால் அங்கீகரிக்கப்பட்டது. தேவையான நிதிக்கும் ஒழுங்குகள் மேற்கொள்ளப்பட்டன.

பாதைக்குரிய இடம் அடையாளப்படுத்தப்பட்ட போது அது முத்துராஜவெல சதுப்பு நிலம், நீர்கொழும்பு கடல்நீர் ஏரியை உள்ளடக்கியதாக அமைந்தது. 2000ஆம் ஆண்டில் கொரியக் கொம்பனி ஒன்றுடன் ஒப்பந்தம் செய்யப்பட்டது. செயல்திட்ட வேலைகளின் ஒரு பகுதி செய்து முடித்த நிலையில் பெருங்கொண்ட நிதி தேவை காரணமாக ஒப்பந்த வேலை கைவிடப்பட்டது. 12 பில்லியன் ரூபா இத்திட்ட வேலைக்காகத் தேவைப்பட்டது.

முதல் முயற்சி கைவிடப்பட்ட நிலையில் 2006ஆம் ஆண்டில் சீனாவின் ரிகீயிணி வங்கியின் நிதியில் பாதை வேலையை ஆரம்பிக்க அமைச்சரவை அங்கீகரித்தது. 20 வருடக்கடனில் நிதி பெறவும் 292.4 மில்லியன் செலவாகுமெனவும் மதிப்பிடப்பட்டது. சீனாவின் மெற்றலொஜிகள் குறூப் கம்பனிக்கு வேலைக்கான ஒப்பந்தம் கையளிக்கப்பட்டது. செயல்திட்ட ஒப்பந்தம் 2008இல் கைச்சாத்திடப்பட்டபோது 2009 ஆகஸ்டில் 3 ஆண்டுகளில் முடிக்கக் கூடியதாக இவ்வேலை ஆரம்பிக்கப்பட்டது. இத்திட்டத்தின் ஆணையாளர் புஷ்பா குணரட்ன அவர்களின் கூற்றுப்படி நிரந்தரமாக 1000 உள்ளூர் தொழிலாளர் இதில் வேலை செய்தனர்.

 50,000 பேரின் சமயா சமய வேலையும் ஒத்துழைப்பும் கிடைத்தது. 500 சீன அதிகாரிகள் வேலையில் பங்கு கொண்டனர். பாதுகாப்புக் காரணங்களால் திட்டமிட்ட செலவுத் தொகையை விட மேலதிக நிதி செயல்திட்டத்துக்கு செலவானது. இக்கடுகதிப் பாதையில் 100 மதகுகள்  கட்டப்பட்டுள்ளன. 40 பாலங்கள் நிர்மாணிக்கப்பட்டுள்ளன. புதிய களனிப்பாலம், பேலியகொட, ஜாஎல, கட்டுநாயக்க ஆகிய இடங்களில் இந்த அதிவேகப் பாதை இருந்த பாதையைக் குறுக்கறுத்துச் செல்கின்றது. பொதுமக்களின் போக்குவரத்துக்கு தடை ஏற்படாத வகையில் தொழில்நுட்ப முறைகளைக் கையாண்டு திறமையாகப் பாதையின் வேலைகள் செய்து முடிக்கப்பட்டன. கொழும்பு - நீர்கொழும்பு வீதி, மாபொல, கட்டுநாயக்க விமான நிலையச் சந்திகளில் அதிகரித்த பயணிகளுக்கு இடைஞ்சல் ஏற்படாத வகையில் செயல்திட்ட வேலைகள் செய்து முடிக்கப்பட்டன.

இலங்கையின் தென் பிரதேசத்தில் அமைக்கப்பட்ட கடுகதிப்பாதையிலும் பார்க்க வித்தியாசமான பல நவீன அம்சங்கள் இப்பாதையில் அமைக்கப்பட்டுள்ளன. பாதை ஓரத்திலும் நடுப்பகுதியிலும் இயற்கை எழில் நிறைந்த மலர்கள் கண்ணுக்கு விருந்தும் மனதுக்கு இனிமையும் தருகின்றன. வேறுபட்ட செய்திகளைப் பரிவர்த்தனை செய்யும் நவீன வசதிகள் புகுத்தப்பட்டுள்ளன. தெற்கில் அமைக்கப்பட்ட கடுகதிப்பாதையில் உள்ளதை விட வித்தியாசமானதும் இலத்திரனியல் பொறிமுறையில் அமைந்ததுமான பயணச் சீட்டை வழங்கும் முறை கருமத்தைச் சுலபமாக்குகிறது. பிரதான கட்டுப்பாட்டு நிலையம் சீதுவையில் அமைக்கப்பட்டுள்ளது. அங்கிருந்தே கமெரா மூலமாக கடுகதிப்பாதையில் நடைபெறும் விஷயங்களையும் ஏனைய விஷயங்களையும் அவதானிக்கும் ஒழுங்குகள் செய்யப்பட்டுள்ளன. சீதுவைக் கட்டுப்பாட்டு நிலையம், தீயணைக்கும் படை, பொலிஸ் நிலையம் போன்றவற்றை  கமெரா மூலம் நெறிப்படுத்தும் ஒழுங்குகள் செய்யப்பட்டுள்ளன.

முத்துராஜவெல சதுப்பு நிலத்தை நிரப்பி மாற்றம் செய்தும் சூழலில் ஏற்பட்ட தடைகளையகற்றியுமே கடுகதிப்பாதை அமைக்கும் செயல்திட்டம் மேற்கொள்ளப்பட்டது. இந்தச் சுற்றாடலில் வெள்ளத்தால் ஏற்பட்ட கஷ்டங்களைத் தவிர்க்கவும் பாதைக்குப் பாதகம் ஏற்படாத நெறிமுறைகளையும் கையாண்டுள்ளோம். வெள்ளத்தினால் ஏற்படும் பிரச்சினைகளைத் தவிர்க்கவும். வெள்ளத்தை வெளியேற்றவும் 42 புதிய பாலங்களை இப்பிரதேசத்தில் அமைத்துள்ளோம். சதுப்பு நில நீரை இலகுவாக வெளிப்போக்க 102 மதகு  களையும் அமைத்துள்ளோம். முத்துராஜவெலவில் இருந்த டச் கால்வாயைத் திருத்தி அமைத்துள்ளோம். இக்கால்வாய் 40 மீற்றர் அகலத்துக்கு வெட்டப்பட்டுள்ளது. இந்தக்கால்வாயின் நீளம் 8 கிலோமீற்றர் ஆகும். நீண்ட காலம் கவனிக்கப்படாமல் கிடந்த கால்வாய் தற்போது நல்ல பயன்தரும் வகையில் அமைக்கப்பட்டுள்ளது. கடுகதிப்பாதை அமைப்பால் இப்பிரதேசம் அழகாகவும் பொலிவாகவும் காட்சியளிக்கிறது. இப்பிரதேசத்தில் வாழும் மக்கள் பாதை அமைப்பால் இடம்பெயராமல் இருக்கவே முத்துராஜவெலப் பிரதேசம் ஓடுபாதைக்குத் தெரிவு செய்யப்பட்டது.

700 குடும்பங்கள் மட்டுமே இடம்பெயர்ந்தனர். இவர்களுக்கு உரிய நஷ்டஈடு வழங்கப்பட்டுள்ளது. நஷ்ட ஈட்டுக்கு 3 பில்லியன் ரூபா செலவிடப்பட்டுள்ளது. இந்த செயல்திட்டம் 292 மில்லியன் 45 டொலருக்குரியதாக மதிப்பிடப்பட்டிருந்த போதும் எதிர்பாராத செலவுகளால் 335 மில்லியன் யு.எஸ்.டொலர் செலவிடப்பட்டுள்ளது. பேலியகொடைச் சந்தியில் ஏற்படும் பிரயாண நெருக்கடியைத் தவிர்க்கக் களனி கங்கைக்கு மேலாக ஒரு பாலம் முடிவடையும். இப்பால அமைப்பால் பயணிகளின் நெருக்கடி அதிகளவில் குறைவடையும் என எதிர்பார்க்கலாம்.

இந்தப் பாலம் முடிவடைந்த பின்னர் இப்பாதையை பேலியகொடையில் இருந்து செல்லும் பாதையுடன் இணைக்கத் திட்டமிட்டுள்ளது. திட்டமிடப்பட்ட வேலைகள் அனைத்தும் முடிவடைந்த பின் பிரயாணத் தடைகள் பெருமளவு நீங்கும் என்பதுடன் பயண நேரமும் குறையும் என எதிர்பார்க்கலாம்.

இம்மாதம் 27ஆம் நாள் மங்களகரமாகத் திறந்து வைக்கப்படும் கடுகதிப்பாதையால் தினமும் 10,000 வாகனங்கள் பயணம் பண்ணமுடியும் என எதிர்பார்க்கப்படுகின்றது. ஜனாதிபதி இப்பாதையைத் திறந்து வைக்கும் வைபவத்தைச் சிறப்பிப்பதற்கான ஒழுங்குகளை மனநிறைவுடன் மேற்கொண்டு வருகிறோம்.

சுஐப் எம். காசிம்